أعزائي قروب أبو نواف
اليوم اسمحوا لي بمعانقة ذوائقكم بهذه
القصيدة الغزلية
الطرقي اللي زارني تالـي الليـل
قلط ولا ابدا في حضوره سلامـا
يامرحبا به هيل ماسال مـن سيـل
اعـداد ماهلـت مـزون الغمامـا
علي ارحب بـه كرامـه وتبجيـل
وازيد في قـدرة وفـا واحترامـا
اللي ليا جانـي تطيـب التعاليـل
ابدي له الخافي ولا اخشى الملاما
يصون سري مامشى مع هل القيل
ولا الحق ورا عرض المقفي كلاما
الا دعيتـه جـا بركبـه زرافيـل
وان ماطلبتـه يبتليـنـي الهـامـا
ابدع واصونه عن كـلام المهابيـل
وهـو يجملنـي مابيـن النشامـا
دنيت له من صافيـات المعاميـل
وشعمت ناري بين حدب العظامـا
ثم قمت اسوق من الجزايل فناجيل
ابرد خـوا راسٍ غشـاه العسامـا
وارويت محني الضلوع النواحيـل
واطربـت قلـب للهوا مستهامـا
اشكي واشاكي وابدع احلى التماثيل
واصوغ من همي حروف الهيامـا
اناجي القرطاس واسامـر سهيـل
لين انتهى حبـري وكـل البهامـا
ثم قمت اشيل ابيات شعري مواويل
وجذبتهـا جـذب الدلـي للحيامـا
وانا محيم وجـاريٍ لـي بهاذيـل
والحب وقعه مثل وقـع السهامـا
ذقت الذي ذاقوا قـروم الرياجيـل
يوم انها ضرب القنـا والحسامـا
يروون حـد مرهفـات مصاقيـل
لعيون من تزها الذهب والوشامـا
وانا لعين اللي زهـت بالخلاخيـل
ياما شكيت مـن المواجـع ويامـا
عنقا تشادي بالبهـا ذايـر الخيـل
من خيل ابـن ثانـي بليـا لجامـا
ذارت عقب ماحسها صوت ازاويل
محدن عسفها ما اذعنت للخطامـا
في خاطري سميتها صفوة الجيـل
ماني بغاوي لو خسـرت الانامـا
لو راح عام من الهوا والغرابيـل
يروح عـام ونبتـدي فيـه عامـا
العهد باقـي والغـلا زاد فالكيـل
والشعر لامـرت بفكـري تسامـا
روحي لها فدوه ودمعـي هماليـل
وقلبي امانه مـن عهـود الغرامـا
اما تظلـه تحـت سـودٍ مظاليـل
والا تـرده بيـن حـدبٍ حيـامـا
اخوكم وجد شاعر
wjdsha3r@hotmail.com
وجد شاعر
1,864
تصميم وبرمجة 
صح لسانك | 03/03/2010 06:23:47
صح لسانك على هالدره ياشاعر شبكة ابو نواف