قصة : لغز ‎(البريء)‎

الرئيسية20102010/02 » قصة : لغز ‎(البريء)‎

بسم الله الرحمن الرحيم

قصة : لغز (البريء)

/
تصوير : المصورة حصة الدوسري


تلميح : لمن يخاف على ضياع وقته الثمين يرجى عدم قراءة القصة ولحل اللغز يجب التركيز في مشاهد القصة .

تعود عاطل ان يستقبل أصدقائه (فاصل) و(عاثر) و(وحدي)في منزله الكائن في حي التجار يوميا حيث يقضون وقتهم في لعب الورق او مشاهدة التلفاز وكانوا يسهرون حتى ساعات الصباح الأولى نظرا لسفر زوجة عاطل وأبنائه الى عائلتها في الرياض :

عاطل : ياخي ملينا من البلوت نبي نغير جو من جد من جد أبي أغير جو .

عاثر : صار لي يومين أقولك خلنا نسافر وأنت ماتبي ...ياخي تغيير الجو يعني تغير المكان والناس .

عاطل : ياخوي الحرمة خذت الجواز معها وشلون تبيني أسافر.

عاثر : وتعترف بعد أنت ووجهك ......طيب نروح البحرين والا دبي وهذي مايحتاج لها جواز .

وحدي : دبي وين ياعمي هذاك اول الحين ماتخشها الا بالجواز لانهم منعو البطاقة بأثر رجعي !!
خلنا على البحرين بس نشوف أفلام ونتمشى ونرجع .

عاطل (بحرج) : طيب اقدر امر من جسر البحرين بصورة البطاقة ؟؟!

عاثر (بنرفزه) : لاتقولي ان الحرمة ماخذه البطاقة بعد ؟؟

عاطل (بابتسامه غبيه) : أي والله قسم .

عاثر :وأنا اقسم انك غبي..تخلي حرمه تلعب فيك .

عاطل : ياخي خلها تلعب فيني دامها تصرف علي وانا جالس بالبيت .

وحدي : ماقول الا الله لايبلانا ...وين فاصل عنك اليوم ؟

عاطل : فاصل جايه ولد عمه من الديره صد ورد ورايحين السوق .

وحدي : أي ولد عم ؟

عاطل : والله مدري بس يناديه ابوفلته .

عاثر : لايكون ولد عمه اللي توه طالع من السجن .

عاطل : افاااا ..وش مسوي ؟؟!!

عاثر : الشركة اللي يشتغل فيها شكو فيه انه مختلس مبلغ وماطلع من السجن الا يوم سدد المبلغ .

عاطل : الله يفكنا من شره لايجيبه الدلخ فاصل هنا محنا بناقصين .

وبعد فتره يدخل فاصل ومعه ضيف جديد .

فاصل : اعرفكم بولد عمي ابوفلته .

عاطل بامتعاض : هلا....هلا حياك .

وحدي : حياك الله يابوفلته وكفاره ياقدع ههههههه .

ابوفلته : أي والله انك صادق ياخوي لاجيت الشرقية من الانتعاش أحس اني كنت بسجن .

عاطل (يحدث نفسه) : وش عنده اللي ماكان مسجون !!

فاصل : وش هالعود الزين ياعاطل ؟ شكله غالي من ريحته .

عاطل : ولا غالي ولا شي هذا شريته من باكستاني عند المسجد اللي ورى بيتييبيع التوله بميتين ريال وجلست يومين اكاسر فيه الين شريت منه التوله بعشرين ريال .

وحدي :كسر خاطري الباكستاني وكنت بعطيه مية ريال من جيبي بس منعني عاطل .

عاثر : والله من دلاختك يوم تفكر تعطيه ...ذولي ماينضحك عليهم تلاقي العود مغشوش والا ماباعه بهالسعر .

عاطل : اصلا مارضى يخفض المبلغ الا يوم قلت له ان زوجتي بتشتري الكميه كلها إذا رجعت من السفر وواعدته يجيني البيت بعد أسبوع . .

ابوفلته :والله ان ريحته طيبه ليتني لاحق عليه .

وحدي : بكره تعال صل المغرب عندنا وبتلاقيه مرتز قدام المسجد .

ابوفلته :انا ماشي الديره اليوم والله .

عاطل باستهزاء : عندك فلوس انت ؟

ابوفلته باستغراب ثم ضحكه : هههههههههه أكيد عندي طبعا !!

عاطل : خلاص هات 100 وخذ التوله حلالك .

ابوفلته :ماعندي مشكله بالفلوس لكن ماودي اخذه منك .

عاطل : لا ماعليك .... اذا رجع الباكستاني زوجتي بتعوضني هههههههه .

ابوفلته :اجل دام كذا اتفقنا .

عاطل (يحدث نفسه) : تعااال هذا فلوسه حرام وشلون اخذ منه ....أقول يابوفلته بعطيك العود بس بشرط....ابي فاصل اللي يدفع .

ابوفلته :وش دعوى ياخوي انا ماارضى .

عاطل (بخبث) : كذا لعانه انا ابي اخسر فاصل ههههههه .

فاصل : خلاص خلاص خذ الميه وهات العود اخلص علينا .

وأثناء حديثهم يدخل عليهم جار عاطل الملاصق لبيته :

الجار : مساكم الله بالخير .

عاطل : هلا بوحمد حياك الله تفضل .

الجار : الله لايهينك ياعاطل اذا ممكن بعد اذنك تسكر باب الملحق لان أصواتكم واصله لبيتي !!

عاطل : لا ياخوي ماني مسكر الباب نبي الهوا يخش علينا شوفة عينك مافي شبابيك .

الجار : طيب افتح الباب اللي يودي للحوش وبيجيك هوى !

عاطل : لا انا ابي أشوف الرايح والجاي ماني مسكره اسمح لي .

الجار :طيب الله يجزيك خير ماقصرت ..فمان الله .

عاطل : لو انه جاي بأدب كان سكرت الباب .

وحدي : وشوو!! مابقى الا يبوس يدك وتقول جاي بأدب..امرك غريب !!

عاطل : ياخوي انا حر وش تبي انت.

يسهر الجميع حتى الصباح ثم يودعهم ابوفلته بحجة عودته الى قريته ويشكر عاطل على حسن استقباله ويدخل عاطل منزله متجهاً الى غرفة نومه فيشاهد نافذة الصالة مفتوحة ويذهب لاغلاقها فيشاهد اثار قدم من الطين على الأرض وينتابه الخوف ثم يخرج مسرعاً من البيت ويدخل الملحق ويغلق الباب على نفسهم يتصل على فاصل ويخبره بما حصل ويطلب منه العوده بأسرع وقت,وعندما يصل يتجه الاثنان الى داخل البيت ببطيء ,وبمجرد دخولهما غرفة النوم اكتشفا ان محتويات الخزنه اختفت وصندوق مجوهرات زوجة عاطل اختفى فيجن جنونه :

عاطل يضرب بيده على رأ سه : ياويلي من (ساطره) بتذبحني ياويلي منها ماني بجالس بالديره بهاجر ..بهاجر .

فاصل : امحق رجال والله ؟؟! اسكت خلنا نعرف نتصرف .

عاطل :وش تتصرف مجوهرات ساطره انسرقت يعني انا قيم اووفر .

فاصل : منت بهين ياكراش ..ماعليك بترجع ان شاء الله الحين بتجي الشرطه وتحل الموضوع .

يصل أفراد الشرطة ويظهر علي محياهم التعب والكسل من عناء العمل :

الشرطي (يتثاوب) : خير يابو الشباب ؟

عاطل : بيتي انسرق ياطويل العمر تكفى مابي الفلوس بس أبي المجوهرات .

الشرطي : هذا خامس بيت ينسرق اليوم بنفس الحي .

عاطل : طيب لقيتو السارق حقهم ؟

الشرطي : عمرك سمعت بحرامي ينمسك بهالديره ؟

عاطل : طيب والحل انا ابي المجوهرات تكفون قبل مايكمل الأسبوع .

الشرطي : أنت تشك بأحد ؟

عاطل : لا والله ماشك بأحد ولا عندي أعداء .

الشرطي : خلاص اجل بنرفع البصمات الحين ونبدا بالبحث عن السارق وهذا وجهي اذا لقيناه .

عاطل : وشلون هذا وجهك !!!

الشرطي : احم .اقصد احفظ وجهي عشان لاجيت المركز تعرفني .

عاطل : لحظه لحظه ....عرفت من الحرامي !!

الشرطي :الله يبشرك بالخير ...منهو ؟

يمسك عاطل برقبة فاصل : ولد عم هذا هو اللي سرقني .

فاصل : وش تقول انت يامجنون !!

الشرطي : من هو ولد عمه وليش هو بالذات ؟

عاطل : لانه طالع من السجن في جرايم نهب واختلاس وقتل وتذكرت وإحنا سهرانين طلب يروح دورة المياه مرتين ..أكيد المرة الأولى سرق بيتي والمرة الثانية سرق البيوت الاربعه لان الأولى رجع بسرعه اما الثانية تأخر بالرجعة .

فاصل : تعوذ من الشيطان ياعاطل واعقل ولد عمي مايسوي هالحركات وبعدين من قالك انه طالع من السجن .

عاطل : عاثر هو اللي قالي عنه الحرامي ابن الحرامي مايكفيه انه اختلس فلوس من شغله وجاي يكمل على مجوهرات ساطره الضعيفة .

فاصل : يبن الحلال هذاك اخوه اللي طلع من السجن وكانت بسبب ديون موب عشان اختلاس وقتل حرام عليك ياشيخ .

يطلب الشرطي من فاصل معلومات عن ابن عمه ابوفلته ومكان تواجده ويتم القبض عليه في قريته وبعد عدة تحقيقات يتم تبرئته ويطلق سراحه .

السؤال : اذا لم يكن ابوفلته السارق فمن يكون ياترى ؟

- انتهى -
الجائزه ستكون كالعادة تحريك عقلك أكثر وأكثر


شكراً للمصورة حصة الدوسري على الصورة الحصرية

fox
فهد احمد داود
موقعي
www.fdawod.com

عن الكاتب
عدد النقاط: 105 نقطة

صورة فهد العبداللطيف

تابعوا جديد شبكة أبو نواف على:

التعليقات

  • 1
    حمد (زائر)

    اتوقع السارق هو العاثر .. لانه حاول يشوه صورة ولد عم فاصل .. و توجه اليه اصابع الاتهام لو يصير اي شيء .. و بما ان تمت تبرئة ولد العم فـ العاثر هو الحرامي ! و الجار ابو حمد ماتوقع له دخل .. لان لو يبي يسرق كان ماجاه بكل هدوء و قاله سكر الباب بسبب الازعاج .. فالسبب لمجيئة مقنع و لاهو بدون سبب او لسبب تافه .. عشان يجس النبض !

  • 2
    أبو حلا (زائر)

    إذا ما خاب ظني وخانني ذكائي فالسروق هو جار عاطل ..

  • 3
    الطائر الجزين (زائر)

    مشكور على القصة الحلوة:D بيكون الجار هو السارق:8)

  • 4
    الفـ ج ـر (زائر)

    اممممم يمكن الجار .. جاء يتآكد من كون الباب على المنزل سيظل مغلق ..

  • 5
    سلوطي (زائر)

    انا اتوقع الجار لانه دخل عليهم انا مادري وشلون دخل:D

  • هذي يبيلها المحقق كونان>>>متأثر بـ سبيس تون يعطيك العافيه أخوي fox

  • 7
    memy (زائر)

    أتوقع عاثر هو اللص 8) وان شالله يكون صح علي

  • 8
    صورة Ammar

    السارق هو الجار و لو سمحت ارسل الحل بمشاركة لأنه صعب ادخل كل يوم و افتش كل التعليقات حتى اشوف الحل الصحيح

  • 9
    راضي (زائر)

    >> سهران ومالي خلق افكر مين السارق أبي أخمن بس أكييد جاره الي جاء وقال سكر الباب : ) شكراً على الموضوع الفلته من جد

  • 10
    أحـــــــلى بنوته (زائر)

    مدري ........ لكن اتوقعه الباكستاني الي قدام المسجد حق العود ....:D

  • 12
    الاسير (زائر)

    :~ الليى سرق المجوهرات والفلوس الباكستاني

  • 13
    D7OOM (زائر)

    هلا والله وغلا بفوكس حياك الله اخوي http://www.abunawaf.com/smile/smile5.gif انا اتوقع حل اللغز هو الجار والله اعلم واذا ماصار الجار يبي يصير الشرطي بس ماضن هاذا والله اعلم ومشكور ع الموضوع اخوك D7OOM

  • 15
    حسيـــن (زائر)

    اخو ابو فلتة هو السارق بمساعدة اخيه ابو فلتة .. ذهاب ابو فلتة لدورة المياه للمرة الاولى لفتح نافذة الصالة لاخوه ولم ياخذ وقت كبير لذلك .. وفي المرة الثانية لمساعده اخيه في نقل المجوهرات والاموال واستغرق ذلك وقت كبير كما اوضح عاطل ..

  • اتوقع الى سرق المجوهرات والفلووس عاثر لانه هوو الى متهم ابو فلته ظلم هذا توقعي وان شاء الله يكوون صح

  • 18
    joly (زائر)

    اتوقع إن الجار هو الحرامي

  • 19
    إيمو الدلوعه .. (زائر)

    مدري والله اتوقع انه عاثر لانه قال له ان ولد عم فاصل مسجون وهو كذاب.. عشان ينفي التهمه والشكوك عنه .. لاتنسة تعطيني الحل لان حدي متحمسه اعرف من الحرامي ..

  • 20
    المروقة (زائر)

    هو واحد من ثلاثة .. إما الجار ، ولازوجته يعني مافيه سرقة يمكن كانو امستعجلين ودخلوا مع الدريشة .. ولا السيد عاطل ، لانه أول ما اكتشف السرقة مابادر لتبليغ الشرطة ، وغير كذا هو أول من اتهم أبو فلته .. ماخليت أحد ..:D

  • 22
    صورة AKG
    AKG

    أتوقع بياع العود الباكستاني لانه حلقة الوصل بينه وبين الجيران اللي انسرقوا ولانه عرف عنوان البيت

  • 23
    الرويلي (زائر)

    انا اتوقع انه الجار لان يوم جــاء يـبــغاه يسكرا الباب فــرفض عــاطل فقــاله الجار افتح الباب الي من الحوش فرض فتأكد بأنه لم يفتح الباب فقام بسرقت البيتB واذا خطاء اتوقع من اسماء الغز الحل ؟

  • 24
    عبدالمحسن محمد (زائر)

    :D السـلآم عليكم ورحمة الله وبركاته شاكرك على الجائزة احلى شي الجوائز قبل الجواب :) مممم في نظري اقول انه الجار :> او انه فلتة هذا والله اعلم .. تسلم ع القصة الاكثر من رائعة اسعدتني حقا مع الصباح ..

  • 25
    الحاير 2007 (زائر)

    بياع العود لانو وعده انو بعد اسبوع جاي زوجته من السفر وهذا يعني البيت فاضي لمدة اسبوع

  • 26
    galaxy (زائر)

    اعتقد ان السارق واحد من اثنين عاثر او الجار وارجح عاثر اكثر

  • 27
    d7oom (زائر)

    ههههههههه عرفت منهو الي سارق الذهب الي سارقه هي حصة الدوسري ههههههههه

  • 28
    يزيد الغامدي (زائر)

    جميعهم مشبوهين .. لكن عاثر وينهـ ؟ شكله عاثر

  • 30
    زاويه خاصه !! (زائر)

    :$ اعتقد والله اعلم ..انه يا أما الزوجه ماخذه المجوهرات والفلوس معاها .. او انه جارهم لما دخل البيت ..يبي يستكشف الوضع وشسمه ..:D او ان الزوجه اخذت المجوهرات معها .. و جاء الجار يبي يسرق بس ماحصل شي ..وطبعا تبفت اثار اقدانه يارب يارب يطلع صح .. fox .. يرحم والديم ابي اعرف الجواب B

  • انا اتوقع انه الجار لانه عرف من انه عاطل ماراح يفتح باب الحوش ويشوف اللي داخل بيته وطالع لكذا اخذ الذهب ..

  • ما فيه غيره هو الجار قاله سكر الباب عشان يسرق أو أنه حقد عليه وسرق بيته وبيت الاربعه

  • 33
    بو يو سف (زائر)

    اكيد عاثر متعاون معا الجار:$ تحياتي بو يو سف

  • 34
    عطر المساء (زائر)

    اول شي القصه حلوه وممتعه ومفرفشه ثاني شي مشكور عليها ويعطيك العافيه ثالثا الحرامي هو ... والله اعلم ... جار عاطل لكم تحيتي ...

  • 35
    أسير الأقدار (زائر)

    طبعاً الحمدلله والشكر ما يزال النوم يخيم >>> والحل هو بياع العود النصاب :(

  • 36
    abdullah-14 (زائر)

    اتوقع يكون الجار لأنه في البدايه تقول انهم يجتمعون كل اسبوع عند عاطل وكانوا يسهرون الين الصبح عنده ولأنهم كانوا يجتمعون كل يوم لأن زوجة عاطل مسافره والجار ما لقى يدخل الا هذا اليوم فا احتمال كبير انه يكون متفق مع واحد على السرقه لأنه يعرف انهم ما يجتمعون الا اذا كانت زوجة عاطل مسافره (ساطره) . وشئ ثاني يخليني اشك في الجار لأن هم قاعدين يسولفون فا ما اتوقع انه فيه ناس بيقعدون يصايحون :D وهم يتكلمون في ملحق . وفيه احتمال ثاني انه يكون عاثر لأن ما له اي كلمه من دخل فاصل فا احتمال ضعيف انه يكون هو . واخر احتمال :D وهو اقوى شوي من الي قبله :D هو يكون السارق عاطل نفسه بس يصير متفق مع واحد ثاني لأن ما قد شفت واحد منسرق بيته ويرجع يصك على نفسه في الملحق :D خخخخخخ واتوقع انه الي متفق معه جاره بس عاطل بيي يبعد الشبهه عنه لأن الجار داخل وقايل له بأدب بس اكيد ان عاطل كان متوتر وقال >لو انه جاي بأدب كان سكرت الباب <

  • 37
    عبـدالرحمـن (زائر)

    السـآرق هـو : العطـل ، العثـر ، الوحيـد . هذآ آخر مآتوصلت بهـ من تفكيـر . :)

  • 38
    صورة سعد

    عندي احتمالين 1- ساطره خذت مجوهراتها معها او حطتها في مكان أمين عشان خايفه عليهم من زوجها او 2-عاطل سرقهم وسوا نفسه بريء وكلم الشرطه وحط البلوى على المسكين ابو فلته

  • 39
    نوره ح (زائر)

    اتوقع الجار هو الحرامي8) لانه عرف ان بالملحق بابين واحد يطل على الحوش وهو مسكر :$ و احسه سكت بسرعه وما ناقش او عصب و عاطل قال لو انه تكلم بادب كان صكيت الباب معناها انه مو متعود منه الادب احم احم ام التحليل و الاستنتاجات انا الله يحفظني بحفظه يا رب يصير صح عشان افرح و احس اني ذكيه:)

  • B وي وي ... طلعت عيوني وانا اركز في القصه شكيت ان السارق هو جاره بحكم ان بيته ملاصق لبيت خويكم :P ويمكن يمكن من باب ان حاميها حراميها يكون الشرطي صباحكوا عسل

  • 41
    بعيد المدى (زائر)

    قصة جميلة والحل والله العالم انه عاثر لانه اختفى ما عاد سولف معهم

  • 42
    توفي فرآوله (زائر)

    هههههههههههه آحلى يآ (آجآثآ كريستي) وآلآ آرثر (كونان دويل) طيب بمآ آني آول وحده :D بآشرح آلآجآبه و بآقولك آلشخص بمآ آن آلبيت مو آول وآحد يسرقفي هآلحآره و ولآ وآحد تحرك كلهم يسولفون بآلقصه آعتقد آن آلسآرف هو ( آلجآر ) وبرر جيته بآنه يقول آصوآتكم آزعآج << شآرلوته هولمزه 8)

  • 44
    مدهش (زائر)

    اتوقع الباكستاني :( << بدينا بالشك بخلق الله انا قلت اتوقع لان ابو حمد الجار قال لعاطل سكر الباب ورفض وهذي عقوبته.. وبعدين عاطل المفهي قال لبو بكس ان زوجته سافرت والبيت فاضي.. وش رايكم مايفع اصير محلل اقتصادي B <<اقتصادي اجل وش دخل المهم الجائزه لاهنتم ملاحظه ودي اتفلسف اكثر بالسالفه بس معليش اذن برب

  • 46
    أمون (زائر)

    اتوقع ان السارق هو الجار خصوصا انه تطمن ان عاطل مارح يفتح باب الملحق اللي مطل على الحوش لانه رفض يوم طلب منه طب الجار على الحوش بدون مايحسون لان أصواتهم عالية والباب مسكر ومافي أحد بالبيت وسرق وهرب ان شاء الله يكون الجواب صح

  • انا اتوقع الجار8) لانه قال له سكر الملحق ... حق يصفى له الجو ويعرف يتصرف في البيت:$ B B

  • 48
    عبوده (زائر)

    السلام عليكم ..!! كنت بقول عاثر بس عاثر كان جالس معاهم :~ اتوقع أنه >> الجااااااااار :D

  • 49
    آنيـن آلسسكون (زائر)

    آمممممم صرآحــهـ صصعب :~ بس آظــن آنهـ آلجــإر 8) ويعطيـــكـ ربي آلـف عـإفيييهـ Fox آنــد لي بـــإك إذــآ نزلــتوآ آلححححل :D تح ـــيتي

  • 50
    almzZzunh (زائر)

    !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! لغز عجيب غريب بس انا اتوقع انه الجاار لانه هو الي جاهم بعدين طلع بسرعه

  • الصفحات

    تطوير: SharedTech