السلام عليكم ورحمة الله وبركاته

أنتم مين ? .. و وش جابكم هنا ؟! <<– هذي نهاية اللي يجلس شهر ما نزل موضوع
في البداية أحب أبشركم إني الحمد الله وأخيراً تخرجت من الجامعة


قبل عدة أيام داهمت والدي في المنزل وقلت له : شف يا يبه .. أنا أعزك وأغليك وأعتبرك مثل أبوي بالضبط .. لي الحين فوق العشرين سنة متعرف عليك ومن زمان وحنا نمون على بعض .. صح ؟ .. نظر إلي بريبة : أيوه , وش عندك ؟! .. ابتسمت بخبث : أبد بس تخرجت وحاب أسوي حفلة وبجيب رقاصات ومطربين وكذا .. لذا صرف نفسك من البيت بكرة بس !! .. لم أكد أكمل جملتي إلا وقد خلع والدي عقاله كي ينهال علي بالضرب , فقفزت أمي بينا وقالت مرقعةً وهي تأشر لي بيدها كي أهرب : الله يهديك بس يا أبو مستر .. ما تدري أن قصده يجيب بنات أخواته الصغار يرقصون !!

ومنذو ذلك اليوم .. وأنا وأمي نسكن في أحد الفنادق .. فياليت واحد يتوسط لنا عند الوالد يرجعنا البيت يا أخوان .. عموماً قبل كم يوم برضو ( عاطل وأبي أسولف وش تبون ؟ ) كنت طالع مع واحد من الشباب ومرينا من جمب سوق طيبة فـ أقترح علي نمر محل حلويات مشهور أنه يبيع جميع الشوكولاته القديمة , مرينا المحل وكل واحد مسك له كيس على جمب وأخذ يعبيه وكأننا بزران ما صدقوا أنهم داخلين بقالة





أحد أبرز الأشياء اللي شريتها هم ذولي صراحة , بالإضافة إلى الكتكات القديم أبو قصدير بس عشانه مشهور وشكله يشبه للجديد ما حبيت أثقل عليكم التصفح وأصوره !! <<– قل أنك كلته قبل ما توصل للبيت .. طبعاً مثل ما أنتم شايفين في الخلفية حقت الصورة فيه مذكرات ودفاتر وحوسة .. هذي دفاتر أخوي الصغير جالس يذاكر وجيت أصور فوق دفاتره عشان اقهره بحكم إني فاضي <<– وشو نذالته ؟!

عارف أنكم الحين جالسين تفكرون : وش فايدة هالسالفة ؟ .. لكن اصبروا لنهاية الموضوع وبقول لكم .. والحين خلونا نخش في الموضوع مباشرة وبدون مقدمات رجاءاً <<– يلعن إبليسك على بالنا إللي قبل شوي هو الموضوع

ذكرت سابقاً أنني قد مررت مؤخراً بمرحلة التطبيق كـ مدرس في إحدى المدارس .. ما حصل هو أنني طلبت في أخر يوم أن يكتب لي كل طالب ورقة يتكلم فيها عن المادة وعن طريقة التدريس وذكر أي انتقادات لي وبدون ذكر أسماء .. وطبعاً كان ذلك بعد أن أخبرتهم بأنني قد انتهيت من مرحلة التطبيق وسأغادر المدرسة وجميع الدرجات قد سلمت .. يعني وكأنني أقول لهم : بلا تميلح بليز

فلنشاهد الصور معاً

تحذير : هذه الصور بما فيها من عبارات ونصوص تحوي على كم هائل من التليوق والتميلح والذي لو وزع على سكان مصر لكفاهم .. لذا يرجى الإبتعاد عن الشاشة كي لا تصاب بالعدوى



صورة لفناء المدرسة .. وللأمانة تراني ما قلت للمدير إني بصور لذا أعذروه أنها مهيب مرتبة


إحدى كتابات الطلاب .. واللي من الواضح أني راجفه


بغض النظر عن المعادلات والنسب المئوية الموجودة .. أعتقد من الواضح أيضاً أن الطالب قد تم رجفه


أمطرت يا جماعة وإلا وش ذا الموية اللي تصبصب علينا ؟ <<— فاتح الشمسية




أكيد ملاحظين كلمة " الفاضل " شلون راكبة على اسمي .. هذا وأنا ما عطيتهم إلا عشرة ريال رشوة بس .. عموماً كان ردي على هالمعجبين الاثنين : مشكورين على تواصلكم وإطرائكم يا أعزائي .. مع تحيات قناة الأم بي سي


شاطر يا حبيبي كتبت مثل ما قلت لك , عشرة من عشرة <<– واضح اني محفظه الجملة
عموماً طبيعي بكون أفضل مدرس شافه بحياته لأنه للحين ما تعدى عمره عشر سنوات


لا لا لا لا .. كذا أدوخ أنا يا أمير المشاعر يا أبو توقيع جنان وضحكه جنان .. لن أنساك ما حييت لا تخف .. لن أنساااااااااك لن أنساااك .. إلا على فكرة , من يكون الأخ ؟ <– ما أمدك يالحبيب


ههههههههههههههههه هذي الورقة فطست عليها ضحك قسم بالله .. أما " أي لوف يو " بس لا تقول للطلاب .. الصراحة الورقة ذي خطيرة جداً بس أول ما قريتها ما كانت خطيرة جداً ولكن الأن صارت خطيرة وممتازة جداً <<– كأنه عاداني , وإلا ؟


زين وشين ؟.. ناقص بس يكتب البطارية تخلص بسرعة وتصير ورقة نقد جهاز جوال


أنت أفضل طالب قد مر علي ولا أشكو منك ابداً .. مع تحيات الشفاف <<– وش زودك عني


قبل ما نبدأ خلونا نتفق أن صاحب الورقة مهوب سعودي .. لآن ثقافة القلب حب هذي ما تناسب السعودي أبداً .. أوكي لو مرسوم لي سيفين ونخلة أو على الأقل حاط بحيرة دم تحت القلب حب كان أوكي قلت أنه سعودي !!


بغض عن وجه المهرج الموجود في الورقة .. تذكرون هذاك اللي من الشوام وجلس يصيح عشان نقصته درجة في الاختبار ؟ .. هذي ورقته .. أكيد الحين وضح لكم سبب كتابته ( تعرف تشخص ) .. وطبعاً هو الحين حاقد علي عشان ما طلعته يشرب مويه طول الدرس لسببين صراحة .. الأول عشاني مافضيت يعبي التانكي حق الدموع .. والثاني عشانه ما جاب لي وصفة الكبة اللي طلبتها منه


ورقة أحد عرابجة الفصل


شفه مكتوب على السبورة يا ابني
<<— مسوي لهم إيميل خاص للفصل حقهم .. بس للحين ما وصلني منهم ولا رسالة ياحسافة التعب بس


الورقة الوحيدة المفهومة صراحة .. أصلاً يكفي أن اللي كاتبها مأخذ عشرة من عشرة في الأختبار والمشاركة


هذا عنده بلايستيشين ثري وتبادلنا أنا وإياه كلمات سرية


واحد منسم قال لي : أستاد عادي أكتب اي شيء ؟! .. قلت له إيه على بالي أنه بيسبني بس كان مستحي .. وأخرتها صار بينسخ لي من الصحيفة المعلقة على الجدار


اللي يحل اللغز يا جماعة يعلمني بليز
لحظة لحظة .. الصراحة ما أتذكر أني رجفت ذا ؟! .. شكلي راجف زميله اللي جمبه وهو اللي طلب منه يكتب لي كذا


الورقة من قروب " سنوب دوق" .. طبعاً عايشين جو أنهم عبيد ساكنين في بروكلين
وعلى الطاري مير . . جاني مرة طالب وقال لي : عمي فلان يسلم عليك .. قلت له : عمك فلان الفلاني عميد كلية اللغة الأنجليزية ومشرف المطبقين في المدارس ؟! .. فـ رد علي بكل تميلح : ايه .. قلت له وبكل برود : ما أعرفه يلا على فصلك


بغض النظر عن الطلاسم الموجودة فوق , واللي تحسس القارئ بأنها طلاسم سحر .. حاولوا تعربون معي الجملة الموجودة تحت واللي كتبها لي واحد من
الطلاب في أحد الواجبات .. عموماً أنا ريحت نفسي من الإعراب وكتبت له


<<— أمحق مدرس

في أخر عشر دقايق من الدرس مليت وطلعت جوالي وجلست أقرأ الرسايل وكل شوي أسأل : فيه أحد حوطي هنا ؟! .. يوم قالوا لا قريت النكته لهم .. وبعدين سألتهم : فيه أحد قصمنجي هنا ؟! .. قالوا لا وقريت النكته لهم .. وبعدين سألت : طيب فيه أحد محشش هنا ؟! .. يوم قالوا أيه دخلت جوالي وأستحيت

بعدها طلبوا مني أقول لهم كلمة وداعية , فـ غمضت عيني وبديت أتذكر أي حكمة قد سمعتها , أي توقيع في منتدى قد قريته , بس ماش .. جلست شوي وبعدين قلت لهم : أي شخص يبي يسوي شيء ويصمم عليه راح يقدر عليه … رفع احد الطلاب يده وقطع كلامي قلت له : نعم !؟ .. قال لي : يعني يا أستاد عادي نسكر كتاب الأنجليزي وأطلع كتاب التاريخ وأحل الواجب ؟! .. قلت له لا يا ابني خلني أكمل .. رفع طلاب ثاني يده وقال : يعني نطلع نلعب رياضة الحين ؟! .. قلت لا يا أخي اصبر بكمل كلامي فـ رفع الثالث يده وقال : طيب عادي ننزل نتوضاء عشان الصلاة ؟! .. ورفع بعدهم واحد رابع يده فعصبت وقلت له قبل لا يتكلم : أيه أيه خلاص اطلعوا وسوو اللي تبون !! .. فـ ابتسم وقال : لا بس كنت بقول لك كمل الكلمة حقتك .. وبعدها طلعوا وأن كانكم شفتوهم بعد كذا فـ أنا شايفهم

* * *
إيه صح قبل ما أنسى .. هدفي من القصة اللي في البداية مهوب أني أبين لكم أن عندي ذوق رفيع في الشراء أو عشان أحسسكم أني وسيم أو شيء من هالقبيل لا قدر الله ( أعتقد أني نبهتكم إني متخرج , لذا عطوني جوي ) المغزى هو إني شفت في المحل بنت مدري شلون قايلة عبايتها , ومكياجها أووووفر مررررة .. وكأنها تقول للناس : look at me <<– يعني " انظر إلي " لغير المتخرجين

الصراحة ما قدرت أمسك نفسي يوم شفتها فـ دفيت صديقي على طول وقلت : وخر لا يتوصخ ثوبك من المكياج .. أنا عارف أن الوضع الحين مزري والواحد هالأيام إذا شاف وحدة حاطة لثمة يقول لها : جزاك الله خير , الله يثبتك .. ولكن حبيت أنقل وجهة نظري كـ شاب , وهي صحيح أن الشكل قد يكون ملفت وجميل ولكن وش بتكون نظرة الرجل لك ؟ .. مهما أبدى إهتمامه سواء بالتحديق أو أي شيء كان , وقرر يتحرش بك أو يكلمك .. اسألي نفسك ليه سوى كذا ؟! .. هل عشان شكلك الجميل وأخلاقك الرائعة والعالية ؟! .. لو كان الجواب كذا كان لقيتيه سابقك وجالس يحتريك في بيتكم !!

* * *
الموضوع لم يخطط له ولم أطلب الورق عشان كي اكتب الموضوع , ولكن بحكم أني طولت نزلت شيء حبيت أسخن بشيء خفيف كـ الصور وأن شاء الله القادم أكثر بإذن الله

___________________________________
مـدونـتـي
www.mr-azoz.com
سبحان الله وبحمده .. سبحان الله العظيم