بسم الله الرحمن الرحيم

أبو محمد : هلا ام محمد وشلونك اليوم ؟

ام محمد : هلا بومحمد .....وينك من أمس خليتني لحالي ...طلع لي فار وش كبره بغى قلبي يوقف ولاقدرت انام من الروعه .

أبو محمد : سامحيني يام محمد كنت أكد بالتكسي .

ام محمد : أنت عارف حالتي..... المفروض ماتخليني طول اليوم لحالي .

أبو محمد : وش اسوي يام محمد ابي ادبر قيمة الايجار تعرفين بوسند لسانه طويل وانا مااتحمل الاهانه .

ام محمد : من طلع لي الفار ماقدرت أنام وشين العين شايفني على السرير ولاخاف يناظر فيني حسيته يدري اني عاجزه وينتظر موتي عشان ياكلني (تبكي) .

أبو محمد : الله يشفيك ويطول بعمرك....ان شاء الله بتتيسر إلامور ... الشيخ بو ريان وعدني يشوف لي وظيفه واليوم بروح معاه استلم الوظيفه .

ام محمد : أمس جتني جارتنا ام سلمان قالت لي ان الجمعيه الخيريه بيساعدونك بالايجار ويعطونا تموين كل شهر .

أبو محمد : ماني ماخذ مساعده من احد.... ودامي متوكل على الله هو وحده اللي بيرزقني ومن جهدي .

ام محمد : بس ي أبو محمد حالتنا....

أبو محمد مقاطعاً: لاتتعبين نفسك جمعيات خيريه ماني برايح وان شاء الله اذا استلمت الوظيفه ببيع التكسي .

ام محمد : طول عمرنا عايشين على هالتكسي والحين صار عاله علينا تصرف عليه اكثر من اللي تدخله .

أبو محمد : التكسي ماله لزمه الحين العالم صارو ياخذون سيارات بالاقساط واذا ماقدر ياخذ سياره مايبي يركب الا ليموزين .

ام محمد : الله يكون بالعون .

أبو محمد : بروح الحين للشيخ وان شاء الله ماني متأخر عليك ..تبين شي ؟

ام محمد : مابي الا سلامتك ورضاك ..في حفظ الرحمن .

بعد صلاة الظهر يرافق أبو محمد الشيخ ابوريان إلى مقر الجمعيه الخيريه في منطقته :

أبو محمد : افا ياشيخ ماهقيتها منك!! تضحك علي جايبني الجمعيه الخيريه وتقولي وظيفه .

الشيخ : ههههه وراك متحسس من الجمعيه ي أبو محمد ..انزل ....وظيفتك الجديده هنا.

أبو محمد : يعني بشتغل في الجمعيه ؟

الشيخ : اي نعم وظيفتك حارس أمن ودوامك بيكون من أربع العصر إلى وحده بليل وراتبك ثلاث الاف ريال .

أبو محمد : بس ياشيخ أنا مافيني حيل لهذي الوظيفه ...لو يشغلوني سواق أحسن .

الشيخ : ماعندهم وظيفه شاغره إلا حارس أمن وتراك في بلد امن وأمان يعني مارح يكون فيه مجهود كل اللي بتسويه تجيب دلة الشاهي وتجلس على هالكرسي وبس .

أبو محمد : اجل توكلنا على الله .

بعد اسبوعين من استلام أبو محمد وظيفته الجديده وأثناء فترة عمله يقبل عليه شاب :

الشاب : وش عندك جالس إلى هالوقت يالشيبه ؟

أبو محمد : هلا ومرحبا ....هذي شغلتي ياولدي...أي خدمه ؟

الشاب : في احد بالجمعيه ؟

أبو محمد : الساعه 12 الحين كل الموظفين مشو ومافي احد غيري .

الشاب : ممكن تفتح لي الباب أبي استخدم دورة المياه ؟

أبو محمد : خليت كل الأماكن وجاي تدور حمام هنا ..روح الله يستر عليك .

الشاب : أنا مريض سكر ولازم ادخل الحين قبل ماتجيني النوبه وتبلش .

أبو محمد (بنرفزه) : ماعندي مفاتيح .....روح وإلا بلغت الشرطه .

الشاب (يمسك أبو محمد من رقبته) : تهددني يالشايب العايب... هات المفاتيح....هاااات .

حاول أبو محمد مقاومة الشاب لكن كبر سنه كان عائقاً ولم يستطيع فتمكن الشاب من ضربه والحصول على المفاتيح ثم أطلق صافره كإشارة لاصدقائه الذين كانو ينتظرونه في مكان قريب من الجمعيه ,وعند دخوللهم فوجئوا بصعوبة كسر باب الاداره الماليه بالجمعيه وسيحتاجون لوقت طويل لكسره ,وحتى لايغادرون بلا فائده قاموا بسرقة كل الاجهزه الموجوده بالمبنى وهربوا من المبنى تاركين أبو محمد ملقي على إلارض .

بعد اسبوع من الواقعه وشفاء أبو محمد من إصابته :

مدير الجمعيه: والله ي أبو محمد أنا قلت للشيخ ابوريان انك ماتصلح للوظيفه بسبب العمر لكنه أصر علي وشوف نهايتها اجهزه انسرقت فيها ملفات وبيانات الأسر المحتاجه وحنا الحين في موقف صعب لانهم سرقو الجهاز اللي فيه كل الملفات الاحتياطيه,يعني الأسر المسجله بالجمعيه بتتضرر ونحتاج لمدة طويله عشان نصلح إلامور .

أبو محمد : شغلوني سواق وأنا مستعد أتحمل قيمة الأجهزه..... اخصموها كل شهر من راتبي بس لاتفصلوني انا بعت التكسي الحين وماعندي أي دخل ثاني .

مدير الجمعيه: كان ودي ي أبو محمد لكن ماعندنا وظايف والجمعيه تعيش على التبرعات ومانقدر نزيد بالمصاريف خاصه ان رجال الاعمال صارو يتعذرون بإلازمه العالميه ومايتبرعون مثل أول والحين بدينا نصفي بالموظفين بدل مانوظف...لكن كمساعده مني لك بصرف لك راتب شهر كامل بدل الاسبوعين اللي اشتغلتهم .

أبو محمد : والله مايدخل جيبي ريال زياده ...حاسبني على الاسبوعين وبس .

مدير الجمعيه : على راحتك...... تفضل هذي 1500 ريال .

يخرج أبو محمد من الجمعيه ويتجه إلى مكتب ابوسند العقاري :

ابوسند : هلا والله بالشيبه الراهي ..عسا جبت إلايجار ؟

أبو محمد : هذي 1498ريال كل اللي عندي وعطني فرصه كم يوم وادبر لك باقي الإيجار .

ابوسند : لايكون أنا مأجرك دباب وأنا مدري؟ ياخوي أنا أبي أربع آلاف ريال .

أبو محمد : قلت لك يومين وأجيب الباقي .

ابوسند : مممممم ......اجلس ي أبو محمد أبيك بموضوع .

أبو محمد : سم ؟

ابوسند : بسالك عن ام محمد هي إلى الحين مشلوله ؟

أبو محمد : طابت ابشرك والحين جالسه تلعب كرة سله بالبيت .

ابوسند باستغراب : انت صادق؟؟

أبو محمد : ادري عنك ياخوي أكيد إلى الحين مشلوله يعني فجأه كذا بتطيب .

ابوسند : اذا الله أراد لها تطيب بتطيب في غمضة عين ي أبو محمد خل املك بالله قوي .

أبو محمد (بحزن) : ونعم بالله ..والله ودي أشوفها بصحتها مثل أول .

ابوسند : أنا قدر اجيب لها علاج في الخارج على حساب الحكومه .

أبو محمد : مانبي احد يدفع عنا شي .فلوسهم لهم وكرامتنا لنا .

ابوسند : ياخوي أنت تسمع بعزة النفس ..الحكومه ملزومه تصرف عليك .

أبو محمد : تصرف على غيري...لكن أنا لي الله يتولاني وهذاني عشت ستين سنه الحمد لله مااحتجت لاحد وان شاء الله بموت وأنا ماني بحاجة احد .

ابوسند : انتو وين تتعالجون اذا مرضتو ؟

أبو محمد : بالمركز الصحي .

ابوسند باستهزاء : طيب هذا مستوصف حكومي...اشمعنى ماجبت طاري عزة نفسك فيه ؟

أبو محمد : أتعالج في المستشفى ايه لكن اخذ فلوس لأ .

ابوسند : امرك غريب ي أبو محمد بصراحه ماني قادر استوعب تفكيرك.

أبو محمد : ماحد طلب منك تستوعب شي..تامرني على شي انا ماشي ؟

ابوسند : طيب أنا عندي لك حل ...تاخذ قرض من الديوان تعالج زوجتك فيه وتسدد لهم على أقساط .

أبو محمد :اذا يعطون ماعندي مشكله لكن شلون أسدد لهم وأنا ماعندي وظيفه ؟

ابوسند : الوظيفه عندي.... انت بس وافق وماعليك .

أبو محمد : إذا كذا أنا موافق .

ابوسند : بكره تروح لخويي زيد الفزعي في مستشفى السرقاوي .. بيدخلك على الدكتور يكشف على زوجتك عشان تطلع التقرير الطبي وبعدين تجيبه لي وانا بقدم لك على الديوان .

أبو محمد : يعني أسلمك التقرير وتسلمني الوظيفه ؟

ابوسند : بسلمك الوظيفه وبعفيك من إيجار ست شهور وبعطيك راتب شهر مقدم بعد .

أبو محمد : مابيك تعفيني ولا شي ..عطني حقي وبس .

ابوسند : ولايهمك خلاص اعتبر نفسك توظفت واذا جبت التقرير أعلمك وش وظيفتك .

في صباح اليوم التالي يتجه أبو محمد برفقة ام محمد إلى المستشفى ويقابل زيد صديق ابوسند فيطلب منهم زيد إلانتظار حتى ينادي موظف إلاستقبال على اسم ام محمد .......وبعد فتره من إلانتظار :

موظف الاستقبال ينادي : منيره إبراهيم ....منيره إبراهيم؟

أبو محمد : مافي حرمه غيرك.... لايكون هذا غلطان باسم ابوك!!...بروح اتأكد .

موظف الاستقبال : منيره إبراهيم اخوي؟

أبو محمد : لأ.. منيره سالم موب ابراهيم وهذا رقم الملف .

موظف الاستقبال : اخوي هذا دوركم تفضل ادخل للدكتور .

أبو محمد : بس الاسم غلط !!

موظف الاستقبال : مش مهم اخوي تفضل ادخل .

يدخل أبو محمد مع زوجته غرفة الدكتور وبعد الكشف على ام محمد :

الطبيب : اول مره تزورينا هنا اخت منيره ؟

ام محمد : ايه .

الطبيب : متى تعرضتي للاصابه .

ام محمد : قبل أربع سنين .

الطبيب : نتيجة حادث ؟

ام محمد : طايحه من درج بيت جارتي ومن عقبها ماأحس باطرافي ولساني ثقيل .

الطبيب : أنا بكتب لك تقرير انك مصابه بالحبل الشوكي وهذا اللي باين عندي الحين اما لو تبين تقرير كامل لازم نسوي لك تحاليل وكشوفات أكثر .

أبو محمد : مايحتاج يادكتورهم بيكشفون عليها اذا سافرت .

الطبيب : هي بتتعالج برى ؟

أبو محمد : أي نعم الديوان بيعطونا قرض وبنسافر نعالجها .

الطبيب (باستغرب) : قرض من الديوان!!!! اول مره اسمع فيها.... بدل مايساعدون الناس يمنون عليهم بقرض ..لايكون فيه فوايد بعد ؟

أبو محمد : افااااا....زين انك نبهتني عن الفوايد عشان اتاكد ان مافيه والا ماني ماخذه ....تراهم مايعطون قروض لكن انا اللي طلبت وهي ماتجي الا بالواسطه .

الطبيب : انت اللي طلبت !!! وبواسطه بعد!!!! ..انا بحلم والا بعلم ؟؟

أبو محمد : نمشي خلاص يادكتور ؟

الطبيب : سلم هذا للاستقبال وبعد اسبوع تجي تستلم التقرير. بس مااظنك بتستفيد منه لان الديوان مايعتمدون تقارير المستشفيات الخاصه ..اوه صح انت بتاخذ قرض يعني مايهمهم دام حقهم محفوظ ههههههههه .

بعد اسبوع يحصل أبو محمد على التقرير ويتجه لابوسند في مكتبه :

ابوسند : هلا والله باللحية الغانمه ..بشر وش سويت ؟

أبو محمد : هذا التقرير بس ترى خويك فتح الملف باسم غلط . زوجتي اسمها منيره سالم وهو سجله....!

ابوسند يقاطعه : ايه ماعليك أنا بروح لخويي اعدل إلاسم..ترى لي ريالين بذمتك .

أبو محمد : وش ريالينه؟؟

ابوسند : عطيتني قبل اسبوع 1498 وايجارك 4000 ريال ست شهور يبقى لي عندك 2502 وراتبك 2500 يعني يبقى لي ريالين بذمتك .

أبو محمد : تفضل ريالين!!! ....الحين قرض الديوان عليه فوايد ؟

ابوسند : هو فيه بس انا بخليه لك بدون فوايد لاتخاف .

أبو محمد : الله يجزيك خير كفيت ووفيت...وش بتكون وظيفتي الجديده؟

ابوسند : اول شي وقع لي هنا على انك استلمت راتبك كامل وبالنسبه لوظيفتك أي زبون يبي يشوف ارض وإلا بيت وإلاشقه توديه يشوفها .

أبو محمد : واذا الشقه بعيده وشلون اوديهم وأنا ماعندي سياره ؟

ابوسند : اركب مع الزبون ي أبو محمد ماهي بصعبه... واذا جاك الزبون مع عيلته دلهم على البيت وروح مشي او خذ تكسي على حسابك ....أنا ودي اعطيك سيارتي لكن ماودي اجرح عزة نفسك هههههههه .

في صباح اليوم التالي وفي مكتب تقديم طلبات الزواج من اجنبيه :

الموظف للمراجع : تفضل اخوي .

المراجع إلاول : ابي اقدم على زواج من سوريا ؟

الموظف : كم عمرك ؟

المراجع : 19 .

الموظف : انت ممنوع تتزوج اجنبيه لان العمر المسموح فيه 30 وفوق .

المراجع : أنا خطبتها خلاص .

الموظف : هذي التعليمات اخوي .

المراجع : طيب مافي استثناء ؟

الموظف : هذي تعليمات مجلس الوزراء واذا تبي استثناء تاخذه منهم, لكن ماأنصحك تجرب لان عمرك صغير مارح يعطونك إلا إذا كان فيك مرض لاسمح الله او اعاقه .

المراجع: بس في ناس من عمري تزوجو من أجنبيات!!

الموظف : يمكن اخذو موافقه من الوزاره دايركت..لكن هنا مانقدر نسوي لك شي....... اللي بعده ؟

المراجع الثاني : ابي اقدم على زواج من لبنان وعمري 40 سنه يعني فوق المطلوب .

الموظف : متزوج ؟

المراجع : ايه .

الموظف : وش سبب زواجك عليها.

المراجع : تعدد وابي اجيب عيال لان زوجتي كبيره بالسن ماتنجب .

الموظف : عندك تقرير طبي يثبت انها ماتنجب .

المراجع : لا ماعندي والله .

الموظف : كم عمر زوجتك ؟

المراجع : 36 .

الموظف : وليش ماتقدر تنجب ؟

المراجع : تقول الدكتوره الحمل خطر عليها بهذا العمر .

الموظف : مااقدر ارفع طلبك إلا إذا جبت تقرير يثبت كلامك .

المراجع : من بأمره ؟

الموظف : أمر الجهات العليا .

المراجع : يعني لو واحد من هالجهات العليا يبي يتزوج اجنبيه بيمنع نفسه؟

الموظف : روح له وأساله .

المراجع : الشرع حلل اربع وماقالو لازم سعوديه عادي من كل بنات المسلمين...ارفع طلبي الله يرحم والديك .

الموظف : التعليمات ماتسمح لك اخوي اعذرني....اللي بعده .

المراجع الثالث : أبي أقدم على زواج من المغرب وزوجتي مريضه وهذا تقرير طبي عنها .

الموظف (بعد قراءة التقرير) : زوجتك تعاني من ضغط وسكر؟!!

المراجع : اي والله شفت شلون ؟!

الموظف : العالم اغلبها تعاني من هإلامراض وعايشه حياتها ...ماأقدر اقبل طلبك لان التعليمات تقول اذا كانت الزوجه غير قادره على إلانجاب او ماتقوم بواجباتها الزوجيه .

المراجع : هي فعلا ماتقوم بواجباتها .

الموظف : عندك اثبات ؟

المراجع : تعال البيت عندي وشوف بعينك انها طول يومها جالسه على التلفزيون وان طلبت شي قالت أنا تعبانه ؟

الموظف : الكلام هذا مامنه فايده ...عندك اثبات عشان ارفع طلبك وإلا اعذرني .

المراجع : يعني لازم ادفع رشاوي عشان احصل على الموافقه مثل غيري .

الموظف : استغفر الله العظيم ..ياخي وش تقول انت .؟!!

المراجع : اعرف ناس تسويها بفلوس لكني ماودي بالحرام وشكلكم بتضطروني .

الموظف : كلامك هذا ممكن احاسبك عليه... روح الله يستر عليك..اللي بعده .

المراجع الرابع : أنا متزوج من اجنبيه وعندها الجنسيه السعوديه وابي اسحب الجنسيه منها ؟

الموظف : والسبب ؟

المراجع : الجيران يقولون لي انتبه لزوجتك تراها تلعب من وراك .

الموظف : كلام بدون اثبات مايمشي اخوي وانتبه تراك تتكلم في عرضك وشرفك وهإلامور مايصلح فيها فلان قالي .

المراجع : ياخي هي خذت الجنسيه عن طريقي وأنا هونت وابي اسحب الجنسيه منها .

الموظف : تقدر تقدم شكوى عليها وحنا نحولها للجهه المختصه تنظر فيها .

المراجع : تبيني انتظر الين ينظرون فيها!!! ياخي أنا ابي اسحب الجنسيه وأسفرها لديرتها بأسرع وقت .

الموظف : مانقدر نسوي لك شي ...لازم تقدم معروض وإلاجراءات تاخذ مجراها .

المراجع : البنت صغيره عمرها 24 سنه وسهل الواحد يلعب عليها وأنا مابيها تشوه سمعة البلد .

الموظف : الغلطه غلطتك اخوي باين عليك كبير بالسن وغلطان تاخذ بنت بهالعمر .

المراجع : دلني على بنت او حرمه سعوديه تقبل تتزوج واحد عمره ستين سنه .

الموظف : هذي غلطتك اخوي وانت تتحملها لحالك .

المراجع (وهو يرحل) : أنا غلطان اني اجي لناس ماتقدر ولاتفهم .

الموظف (بهمس) : ياصبر الارض ....اللي بعده .

ابوسند : الله يعينكم على هالمهبل ....يسعد صباحك ياطويل العمر...تفضل.... الزوجه مشلوله شلل كامل حماكم الله وهذا تقرير طبي يثبت هالكلام وهذي وكاله شرعيه تخولني أسوي كامل الإجراءات عن اللي يبي يتزوج .

الموظف : ماشاء الله جاي جاهز .

ابوسند : أنا جيت قبل لزميلك وعطاني المطلوب .

الموظف : وين أصل التقرير الطبي ؟

ابوسند : تفضل اخوي هذا الاصل.. وهذا تقرير عنه هو زي ماطلب زميلك ....مسكين الرجال متعذب مع زوجته ياشايلها ياحاطها ياموديها مستشفى ياموديها علاج طبيعي ولا في فايده خلاص راحت عليها .

الموظف : طيب هو وينه ؟

ابوسند : مسافر الحين وبيجي بعد شهرين وحنا مستعجلين لان اللي بيتزوجها بتكون ممرضه لزوجته الله يشفيها .

الموظف : الزوجه اسمها منيره ابراهيم الميري ؟

ابوسند : أي نعم طال عمرك... وهذي صوره من دفتر العائله مع الاصل .

الموظف : عنده زوجه غيرها ؟

ابوسند : لا ماعنده إلا هي......ياليت تخلي تأشيرة الزواج مفتوحه الله يخليك .

الموظف : لازم تحدد البلد اخوي .

ابوسند : طيب خلها المغرب أو سوريا .

الموظف : تحدد بلد واحد بس .

ابوسند : اجل خلها الين أتاكد من الرجال وين يبي بس كملي الإجراءات الحين .

ينتهي ابوسند من إجراءات الطلب ويخرج للاتصال على ابوعايض وهو الشخص الذي يرغب الزواج من اجنبيه :

ابوسند : هلا بوعايض أبشرك خلاص المعامله خلصت ومابقى إلا البلد ولازم تحدد من أي بلد .

ابوعايض : أنا محتار بين المغرب وسوريا.

ابوسند : علمني وش ناقصك من ام عايض وانا اعلمك من وين تاخذ .

ابوعايض : تبي الحق هي ماهي مقصره معي بشي وشايلتني على راسها .

ابوسند : وشوو؟!!..اجل وراك تبي تتزوج عليها .

ابوعايض : ياخوي ابي اغير مليت من وجهها... وابي احسن النسل بعد ههههههه .

ابوسند : لو كل واحد فكر مثلك يابوعايض صارت الدنيا فوضى .

ابوعايض : الحين انت وش تبي ..هذا انت متزوج شغالتك الاندونيسيه على ام سند ..والا حلال عليك وحرام علينا .

ابوسند : ياخوي انا زوجتي بهدلتني وجابت لي الهم والغم وفوق هذا كله عقيم وانا ابي اجيب سند وابي احسن النسل مثلك هههههههههه .

ابوعايض : كل واحد يشوف نفسه معذور يبن الحلال المهم خلنا في موضوعنا .

ابوسند : بالنسبه للبلد أنا اشوف انك تخليها على سوريا عشان إجراءاتها أسهل وإذا ماحصل نصيب اقدر اغير لك البلد بعدين بس ترى كل شي بحقه .

ابوعايض : وانت ماتسوي شي لله ؟

ابوسند : اقسم بالله مالي منها ولاقرش واحد كلها للموظفين الله لايوفقهم .

ابوعايض : لابوهم لابو من جابهم ...طيب الموظف المرتشي اللي مايخاف ربه كم يبي عشان يطلع الموافقه ؟

ابوسند : طلب ستين الف ريال ....يقول رفعوا اسعارهم عشان انفلونزا الخنازير ..لكن أنا رصيت عليه ونزلت المبلغ الى اثنين واربعين الف وخمسمية ..وانا بخدمك ببلاش حتى رسوم تعقيب ماني بماخذ منك .

ابوعايض :اف اف ليش كل هالمبلغ..بعدين وش دخل الخنازير ابي اعرف؟!

ابوسند : هذا كلامه والله وتراه صادق ....لان اللقاح حق الخنازير اللي بيرسلونه غالي واكيد عنده عيال واجد يبي يلقحهم .

ابوعايض : ياخوي اللقاح مجاني من قالك بفلوس ؟

ابوسند : خل اللقاح يجي وبتشوف اذا ماتاجرو فيه مناشير البلد .

ابوعايض : أي والله يسوونها وكنه العيد.... لكن برضو غالي قله يخفض بالمبلغ .

ابوسند : اخاف اقوله ويهون مره وحده .

ابوعايض : طيب هو اكيد بيطلع الموافقه ؟

ابوسند : يقولك لاتدفع ولاريال إلا اذا استلمت التأشيره وأنا بضمنك عنده.

ابوعايض : خلاص اجل تم .

يتجه ابوسند الى مكتبه ويجد أبو محمد :

ابوسند : ها بشر كيف الشغل ؟ .

أبو محمد : ابد مافي زباين.. وش صار على علاج ام محمد يابوسند .

ابوسند : توني اليوم مقدم الطلب وان شاء الله يردون بعد شهر .

أبو محمد : الله يبيض وجهك يابوسند .

ابوسند : اي والله مانبي الا الدعاء .

أبو محمد : الله يثيبك ويجزيك خير .

وأثناء حديثهم يدخل ابونوره صاحب مكتب عقار :

ابوسند : هلا والله بونوره حياك الله .

ابونوره : جاك الرجال اللي يبي إلارض امس ؟

ابوسند : ايه جاني بس ماعجبته إلارض ومشى .

ابونوره : تكذب علي انت ووجهك؟؟!! الرجال يقول انه اتفق معاك ودفع عربون !!

ابوسند : لا موب نفسه اللي أرسلته أنت .

ابونوره : الرجال نسيبي وقالي انه اتفق معك .

ابوسند : طيب والمطلوب ؟

ابونوره : وين نصيبي بالسعي ؟

ابوسند : ماعندي لك شي واصلا السعي كله بيروح للمكتب اللي ماسك إلارض وأنا مالي ولا ريال .

ابونوره : أنا غلطان اني ارسلك ناس وتراني ماني محللك وان ماأخذت حقي اليوم باخذه يوم الحساب ياحرامي العقار .

ابوسند : اقول ماحد حرامي غيرك ...اقلب وجهك ولاعاد اشوفك مره ثانيه .

أبو محمد : وراك ماتعطي الناس حقها يابوسند .

ابوسند : والله ي أبو محمد ماخذت منها فلس واحد كلها اخذها المكتب اللي ماسك إلارض.

أبو محمد : غريبه ..اخبرك ماتسكت عن حقك لو فيها قص رقاب .

ابوسند : مااحب اخذ شي الا بطيب خاطر .

بعد مرور شهر :

ابوسند : خلاص يأبو محمد بسكر المكتب لاني خسران وسامحني بضطر استغني عنك واكيد ماترضى اني اصرف عليك من جيبي .

أبو محمد : وعلاج ام محمد ؟

ابوسند : كلمتي وحده قلت لك بجيبه يعني بجيبه .

أبو محمد : وشلون بسدد للديوان .

ابوسند : عاد هذي تصرف فيها واذا ماتبي العلاج علمني عشان اكنسله.

أبو محمد : مابيه دام ماعندي وظيفه .

ابوسند : خلاص اجل الله يستر عليك ولاتنسى إلايجار باقي عليه خمس شهور .

أبو محمد : اجيبه لك بالبيت ؟

ابوسند : لا بالمكتب لاني بخلي المكتب ديوانيه اقابل فيها ربعي .

أبو محمد : الله يعين.... اجل بروح اشوف لي وظيفه .تصدق ندمت اني بعت التكسي كان يجيب لي شي للاكل على إلاقل .

ابوسند : سكر الباب وراك لاهنت .

بعد مرور سنتين يأتي اتصال على الموظف الذي انجز معاملة ابوعايض .

ام عايض : اخوي ابي قسم الزواج لو سمحت .

الموظف : تفضلي اختي اي خدمه .

ام عايض : انتو كيف تعطون زوجي موافقه يتزوج علي وأنا على ذمته .

الموظف : مدري وش تتكلمين عنه اختي ؟!

ام عايض : زوجي قدم عندكم طلب قبل كم سنه وحصل على موافقه وأنا ابي اعرف شلون ياخذها وأنا على ذمته .

الموظف : ممكن تعطيني اسمه الكامل .

ام عايض : اسمه تركي عايض السبلش .

الموظف بعد دقائق: فعلا هذا عنده موافقه وحصل عليها لان النظام يسمح له .

ام عايض : أنا سالت وعرفت أن المتزوج مايعطونه موافقه يتزوج اجنبيه شلون النظام يسمح له !!!

الموظف : النظام يسمح له لانه جاب تقرير طبي ان زوجته مصابه بالشلل .

ام عايض : أنا زوجته يابني ادم ومافيني شي الله يكافينا الشر .

الموظف : اختي أنا عندي اجراءات امشي عليها وهو جاب تقرير ..تقدرين تقدمين شكوى اذا كان التقرير مزور .

ام عايض : أنا بوصل الموضوع لابومتعب ومارح اسكت .

الموظف : براحتك اختي .

تتصل ام عايض على ابنها عايض :

ام عايض : الحين تخلي اللي بيدك وتشوف لي محامي يقدم شكوى للملك لاني عرفت ان ابوك جاب تقرير اني مشلوله وحصل على الموافقه .

عايض : لاحول ولاقوة إلا بالله ..وش فايدة المحامي ؟

ام عايض : مااخلي هالسوريه تاخذ شي من الورث دامي حيه .

عايض : بس هي زوجته شرعا ومات وهي على ذمته وعندها ولد منه يعني النظام في صفها .

ام عايض : تزوجها بالتزوير ومابني على باطل فهو باطل .

تتصل ام عايض على المسئولين في الوزاره وتخبرهم بما حصل فيتم تشكيل لجنه للتقصي عن حقيقة ماذكر .................. وبعد عدة تحقيقات :

الضابط : من متى وانت في دار المسنين ؟

أبو محمد : صار لي سنه ساكن بالدار واشتغل فيه .

الضابط : وزوجتك ؟

أبو محمد : زوجتي؟؟....... زوجتي الله يرحمها (تدمع عيناه) .

الضابط : وشلون جاك قلب تستغل مرض زوجتك وتبيع ضميرك عشان كم الف ؟

أبو محمد : والله ياطويل العمر اني ماخذت شي ولاادري عن شي كل اللي صار قلته لك والله العظيم مازودت ولا حرف ...حرام عليك يابوسند ترمي بلاك علي .

ابوسند : انا ماقلت الا الصراحه. جيتني المكتب وطلبت مني اخلص المعامله لخويك ابوعايض وعطيتني كل الاوراق وانا اللي سويته اني عقبت عليها بمكتب الزواج والحمدلله موقفي سليم .

الضابط : اصلا الورقه هذي تدينك يأبو محمد.انت موقع عليها انك استلمت من ابوعايض اثنين واربعين الف وخمسميه عشان تجيب له موافقة الزواج .

أبو محمد : هذي ورقة الراتب اللي استلمته من ابوسند قالي وقع ووقعت بدون مااقراها .

الضابط : التهمه راكبتك يأبو محمد ماله داعي اللف والدوران .

أبو محمد : والله ان بوسند طلب مني التقرير عشان يعالج زوجتي ورحت لخويه ...

الضابط (يقاطعه) : تراك نفخت راسي من هالسالفه..لوما كبر سنك كان صكيتك بكف طيحت حواجبك .

ابوسند : انا ماعلي شي ياطويل العمر ؟

الضابط : الا عليك طبعا انت شاركته في اللي سواه يوم تعقب على المعامله..انت روح الحين ووقت الجلسه بيتصلون عليك .

أبو محمد : وانا ياطويل العمر؟

الضابط : انت ماتطلع من هنا الى على السجن....ياعسكري..خذ هالشيبه وارمه بالحجز .

وبعد اسبوع في مكتب الضابط :

الضابط : انت متأكد من كلامك ؟

زيد الفزعي : المكالمه هذي توضح لك كل شي .

الضابط : هي تدين ابوسند لكن يقدر ينكر ويقوله انه موب هو..وش يدريني انك ماتتبلى عليه .

زيد الفزعي : انا قلت اللي عندي ومستعد للي تبون عشان اثبت لكم .

الضابط : يعني تبي تفهمني ان ضميرك (كان نايم) وصحى فجأه مثلا ؟

زيد الفزعي : يوم دريت من بوسند ان بومحمد المسكين ابتلش وهو ماله ذنب ضميري أنبني وجيت اعترف .

الضابط : وضميرك الوصخ هذا ماأنبك يوم تستغل حرمه مشلوله.

زيد : اسجنوني اشنقوني سوو اللي تبون لكن بومحمد يطلع . ...والله ياطويل العمر من اخذت الفلوس من بوسند وانا من مصيبه الى مصيبه ..ولدي توفى قدام عيني وامي ماتت وهي غضبانه علي وغيرها من المصايب خلها على ربك بس .

الضابط : توك ماشفت شي ..هذا عقابك بالدنيا ..وشلون عقابك بالآخره .

بعد اسبوع يتم القبض على بوسند بالتعاون مع زيد اثناء اتفاقهم على انجاز معامله جديده وبالضغط على ابوسند يعترف بجرمه
ويتم محاكمته هو وزيد بالسجن عشر سنوات ودفع غرامه خمسمائة الف ريال لكل واحد منهما, ويخرج أبو محمد ويعود الى دار المسنين.
أما بالنسبه لشكوى ام عايض فقد حكم القاضي لصالح الزوجه الاجنبيه .

- انتهى -

لاغرابةَ في أنْ نبتسمَ لنهايةِ بُقعٍ سوداءَ.

فوجودُها يُفقدُ الكلمةَ رونقَها وجمالَها .


ملاحظه1 : مشهد واحد فقد هو الحقيقي اما البقيه فهي تأليف في تأليف .

شكر خاص لــ (حصه,لطيفه,مريم,العنود) على المساعدات السابقه والحاليه والمستقبليه .