][ لملم جروحك وإنسحب.. مالك نصيب باللي تحب!! ][

إبتعد عني ماحبك وش تبي بي؟؟
قدرك الغالي رميته في الثرى.!
واحسايف قولتي لك ياحبيبي..
يوم قلبي جاهل بك ما درى.!

.

السلام علاكم يالربع والربعات
صبحهم ومسهم بالخيرات والمسرات
أخباركم عساكم تزقحون ان شاء الله؟؟
,
وش ذالإجازة اللي كل يوم والثاني عروس؟
تقول مابقى أحد عزوبي ولا بقت وحده عانس هههههه
الله يتمم لكم كل أبوكم على خير ياللي مابعد أعرستوا ..
ويوفقكم يالمعرسين والشياب والعجز يارب..
يالبى المسيار بس !!
وشسمه .. توني أتأكد أن السعوديين ماينفع لهم بوفيه مفتوح ..
أجل ذاك اليوم رايح عرس واحد من الأقارب, وحاط بوفيه مفتوح كثر الله خيره!!
ويجونك هالرجاجيل يصفوّن سرا ورا بعض وزحمه وحالتهم حاله تقول كأنه بيخلص !!
وكل واحد يصفّ له عشرين نوع فالصحن !!
المشكله كلها مو هنا .. لما خلصوا عشا كل واحد باقي في صحنه أكثر من النص !!
وربي بعضهم بس يذوق ذواقه ويخلي الباقي .. من جد حرام وحسوفه عليهم!!
ليش الواحد ما ياخذ على قد اللي يكفيه؟ يعني مثلاً يقول انا يكفيني قطعتين لحم وصحن رز!!
ويحط له الكميه اللي يحس انها تشبعه!!
اذا ماشبع يرجع ويحط مره ثانيه!!
/
عاد مدري عن الحريم لأني ماقد دخلت أرقص عند الحريم ولاشي !! <~ هذا همّك بس خخخ
يمكن أنهم ألعن شوي من بعض الرجال !!
قلت شوي ماقلت كثير .. لذلك نسألكم يامعشر الأنثويات وجاوبونا وعلمونا عن بعض السلبيات من بعض المشفوحات !!
/
على طاري الأنثويات .. ليش بعض الحريم مايعرفون يفكرون زين ؟
مره رايح السوق مع اهلي ودخلنا محل أقمشه , دخلت حرمه تكاسر على قطعة قماش بـ 15 ريال تبيها بـ 10 ريال, والبيّاع رفض طبعاً لأنه بيبيعها بخسارهـ!!
طلعت الحرمه ومعها بنتها وهي تقول لها يالله مشينا سوق الخزان هناك بـ 10 ريال!!
طبعاً لو حسبنا تكاليف البنزين من هالسوق لسوق الخزان بتطلع فوق 10 ريال.. أكثر من الفرق اللي تبغاه هي !!
يعني بتخسر وقت + 10 ريال بنزين + تسوّي زحمه فذاك بحكم أنها دباااا شووي !!
ولحّد يقول أنت تناظر الحريم ومدري أيش .. هذا شي صاير قدامي وصوتها عالي , ماتجسست ولا شي جالس مع أهلي وأسمع وماتحرشت!!
/
وعلى طاري المحارش .. فيه بنات قسماً بالله ودي أصطرهم ..
((عباياتهم يبغى لها عبايه!!))
تطريز وألوان جذابه من الفوشي وطقته تخلي الواحد يناظر ويفصخ ..
يفصخ الحياء يعني ويخربها لاقدر الله!!
أتوقع لو ما يلبسون عبايه أحسن لهم بكثيييير!! لأنها صارت زينه وجذب أكثر من أنها ستر!!
.
اللهم أستر بناتنا وبنات المسلمين..
اللهم أسترنا فوق الأرض وتحت الأرض ويوم العرض !!
.

الله يبلغنا رمضان ويرزقنا صيامه وقيامه



][ م ـدخ ـل ][
.

.
جتني تقول..
محبوبتك لا تنتظر ميعادها!!
جتني تقول..
هذا الجواب اللي بقى لك عندها!!
لملم جروحك وإنسحب!!
مالك نصيب باللي تحب!!
وأرجوك إقبل عذرها!!
هذي الحياة وهذا حكم أقدارها!!





][ ألم الضرس ,, ولا انتظار فالعرس ][



الزمان: 3 الظهر
المكان: في الصالة جنب "ترمس" الشاي
.
مرزوق: وش ذالكشخه على وين إن شاء الله؟؟
منال: اليوم عرس سويّر صديقتي ولازم نروح له, وأرسلوا لنا بطاقه
مرزوق: الله يوفقها, طيب وش المطلوب مني؟؟
منال: الله يعافيك ودّني الكوافيرهـ عشان أحجز دوري مبكرّ
مرزوق: بس ألحين تونا الساعه 3 الظهر
منال: إيه عشان يمديني أحجز دوري مبكر
مرزوق: طيب يالله ألبسي ومشينا ..

الزمان: 4 العصر
المكان: مشغل وضحى

منال: لو سمحتي "ياسديقه" سوّي شعر أنا سوا سوا موناليزا رايس
الفلبينية: مين هادا؟؟ أنا مافيه معلوم؟؟
منال: طيب سوّي زي أم فيصل سديقه مال أنا !!
الفلبينية: أيوا هادا معلوم ماما فيصل .. سوّي سوا سوا "كدش" أنا معلوم سوّي ..!
منال: طيب وسوّي لي ميك أب ومساج أب وصبغات وعمليات تجميل وكل شي عندكم !!
الفلبينية: طيب ماما .. إمسكي سرا مع كولو نفر .. وسوّي عدّ إلى ألفين ..

الزمان: 8 مساء
المكان: في غرفة الملابس

منال: تعال ياولدي فؤاد ألبس عشان نحطك عند خالتك هيله
فؤاد: يمّه مابي أروح عند خالتي هيله عيالها مايحبوني ولا يلعبوني معهم!!
منال: كل تبن بس ماصدقنا على الله أحد يضفك ألبس صروالك عجل !!
مرزوق: وش فيتس عليه حبيبتي لاتغصبينه!!
منال: أقول تحمم بالشامبو وغيّر ثوبك وخلصنا تأخرنا مرهـ ع العرس!!
مرزوق: إن شاء الله طال عمركـ ..!

الزمان: 10 مساء
المكان: قاعة الزواج

منال: شفتي العروسه تجنن
موضي: وييييه .. ماعندتس ذوق والله
صيته: والله أن المعرس أملح منها .. لبى قلبه بس
منال: الصراحه كلهم حلوين
موضي: أسكتي بس ماعندتس سالفه ..
صيته: أقول يابنات, من ذي اللي كل شوي تناظرنا وتخزّ خزّ ؟؟
منال: الظاهر أنها فوزيه أخت لولوهـ, إنتبهوا منها تراها حسوده!!
موضي: يووه شوفوا يابنات خخخخ وش ذالخلاقين اللي لابستها رهف؟!
صيته: ماعليتس منها قرويّه ماتعرف تلبس زي الناس !!
منال: شوفوا شوفوا ذاللي ترقص وطالع نص ظهرها ماتستحي!!
موضي: ماعرف زوجها يربّيها والله!!
صيته: حرام ياصبايا لاتحشون ههههه

الزمان: 12 فجراً
المكان: قاعة الطعام

مرزوق: ألو.. هلا منوله هاه ماخلصتوا؟؟ ترى حنا خلصنا
منال: لا مرمر .. تونا نتعشى ألحين والله..
مرزوق: طيب بنتظر فالعرس إلمن تخلصين..
منال: عندهم بوفيه مايتفوّت والله .. بتعشى وبكلمك

الزمان: 1 فجراً
المكان: قاعة الزواج

مرزوق: ألو .. يلا خلصتوا عشا؟؟
منال: لا حبيبي تونا باقي الزفه مابعد خلصت
مرزوق: طيب كم يبغى لكم؟؟
منال: شوي بس ساعه يمكن.!!

الزمان: 2 فجراً
المكان: على البست

مرزوق: ألو.. يلا منااااااال أنحرجت منهم مابقى إلا أنا وأهل العروسه!!
منال: طيييييب حبيبي بس طلبت أغنية وأنتظرها برقص عليها..
مرزوق: اللهم صبرك ياروووووووح !!
منال: حتى بيغنون فيك "يازين مرزوق بينهم" !!
مرزوق: طوط طوط طوط

الزمان: 3 فجراً
المكان: على الكنب

مرزوق: ألو .. منال بيأذن الفجر ووراي دوام وتعبت مره!!
منال: طيب حبيبي روح نام إذا وراك دوام .. أنا برجع مع أختي هند
مرزوق: يعني جالس أنتظر كل ذالوقت ليش؟؟ طيب كان قلتي لي من أول!!!
منال: ألوو .. طمبق طمبق .. تررن ترنننن .. ما أسمعك حبيبي بدت الأغنيه .. طوط طوط

الزمان: 5 صباحاً
المكان: في سيارة هند

منال: الله يعافيتس ياهند مدري وش أسوي بدونتس والله.. زوجي سحب علي ونام وقال تصرفي!!
هند: وش دعوه حنا خوات لبعض.. ماله داعي هالحكي !!
منال: طيب وصلت البيت .. إقلطي معي خلينا نسولف شوي معك أنتي وبنتك!!
هند: طيب ساعه ماتضرّ دام زوجي مسافر..!

الزمان: 6 صباحاً
المكان: ملحق منال

منال: والله العرس يهبل أنبسطت فيه, شفتي العروسه يقولون شينه!!
هند: لا والله شعرها يجنن بس عيونها صغار مرااا..
منال: بس أحس أنها قصيره وكرشتها بارزهـ
هند: أجل شكلك ماشفتي سكسوكة العريس مايله هههه
منال: عاد البنات يقولون أنه لابس "صروال سنه" !!
هند: هااااااااااااو !! شدرااااهم !!
منال: مدري وأنا خيتس والله !!
تهاني (بنت هند): يمّه بطني يعوّرني!!
هند: بسم الله عليتس يابنتي.. شفيتس وش ماكله؟؟
تهاني: ماكلت شي يمه بس مره يوجعني!!
منال: أكيد أنها عين .. أنا شايفه نويّر بنت حصيّص تناظرها طول الوقت!!
هند: بكرا أجل بناخذ (غسالها)
منال: لا مايحتاج, خلينا نشرّبها موية زمزم "تافلـ(ن)" فيها إمام مسجدنا..
فؤاد (توه صاحي مرتاع): يمه شفيكم سمعت صراخ في غرفتي وجيت!!
منال: مافيه شي ياولدي, تعال تعال .. وش ذالأحمر اللي في يدّك ؟؟ مين طقك؟؟
فؤاد (خانقته العبره): أحمد ولد عمتي طقني عشاني لعبت بألعابه وعمتي هاوشتني!!
منال: أنا داريه أنها ماتطيقني ولا تطيق عيالي!! مدري وش خلاني أوديه لها!!

الزمان: 9 صباحاً
المكان: نفس الملحق اللي قبل شوي

مرزوق صاحي من النوم ويدخل عليهم الملحق
مرزوق: صبحهم بالخير.. صوتكم واصل لغرفتي وماعرفت أخمد زي الناس.. ومتأخر عن الدوام ماصحيتيني!!
منال: آسفه حبيبي بس تعال شف أختك وش مسويه بولدك !!
مرزوق: طيب أنتي اللي أصرّيتي يروح عندها!!
منال: طيب عندي أختي هند وبنتها .. شرايك تجيب لنا من أقرب فواّل أحلى فطور؟!!
مرزوق ..............................................!!!! !!!!



.
* ملاحظات:
- تهاني بنت هند شاربه لبن قليل الدسم مع بطاطس ليز بالملح (العصر) .. طبيعي يمغصها بطنها فالليل!! لاعين جتها ولاشي!!
- الغسال هو يخلون الشخص اللي حسد يشرب عصير وياخذون بقايا العصير يخلطونه مع شيء ويشربه المحسود, أو يتروش به!!
.
* مايستفاد:
- قال الله تعالى: ((ويل لكل همزةٍ لمزه)) .. والويل: هو وادي في جهنم !!
- وقال تعالى: ((ولايغتب بعضكم بعضاً أيحب أحدكم أن يأكل لحم أخيه ميتاً فكرهتموه)) !! والمقصود بأكل اللحم هو الغيبه!!
- قال رسولُ اللهِ صلى اللهُ عليهِ وسلَّم: " أَيّمَا امرَأَةٌ مَـاتَت و زَوجُها عنْها رَاضٍ دَخَلَتْ الجَنَّةَ "




][ الكهرباء والصيف ][


.

.

.

.

.
س/ شركة الكهرباء .. وين الخطط المستقبلية.. ولا كله توقيع على ورق وإعلانات؟!!
* اللي عندهـ تعليق على إنقطاع الكهرباء في بيتهم أو حارتهم أو ديرتهم حتى يجي يفضفض فيذا .. المساحة مفتوحه للجميع.. قبل يطفى الكهرب!!



][ آدم × حواء ][



زوج يستأجر رجل لمغازلة زوجته لاختبارها !

اقتباس:
ذكرت تقارير إخبارية أن مواطنا أستأجر شخصا لمغازلة زوجتة كي يختبر إخلاقها . وأفادت صحيفة (عكاظ) السعودية بأن المفاجأة حينما علمت الزوجة ان الشخص الذي ظل يغازلها لشهور ما هو الا مؤجر من قبل زوجها لاختبار إخلاقها .. وكانت الزوجة قد أشتكت لزوجها مرارا وتكرارا من ذاك المعاكس الذي يطاردها في كل مكان لكنه لم يعر شكواها أي أهتمام ثم اشتكت الزوجه لإخوتها , الذين لجأت اليهم لحمايتها من معاكسات الشخص أوسعوه ضربا ليلقنوه درسا لن ينساه مدى حياتة في كمين نصبوه له ما أضطره للأعتراف بالامر الذي أذهل الجميع وخاصة الزوجة.

فعلاً .. شرّ البليّة مايضحك !!
ألحين يوم أنك تشكّ بأخلاقها ليش تزوجتها من الأول !!
بس سبحان الله .. اللي يسوّي الغلط يتوقع كل الناس يسوون مثله !!

زوج يطلق زوجته عبر مكبّر الصوت بعد قبولها "ورقة معاكسة

اقتباس:
لجأ رجل إلى مكبّر الصوت في أحد المراكز التجارية في السعودية، ليعلن تطليق زوجته، بالثلاثة، بعد قبولها ورقة "معاكسة" من شاب غريب. جرت الحادثة حين كان الزوجان يتسوقان برفقة أطفالهما الثلاثة في أحد المراكز التجارية الشهيرة للملابس الرجالية والنسائية. وبعد دخولهما المركز، ابتعد الرجل عن زوجته لشراء بعض الحاجيات التي تخص الرجال، تاركاً إياها لشراء احتياجاتها النسائية. حينها، قام شاب بإعطاء السيدة رقم هاتفه الجوال على ورقة، بغية التعرف عليها. فما كان منها إلا أن أخذت الرقم، ووضعته في حقيبة يدها، دون أن تدري أن زوجها رأى ما جرى من بعيد. وعلى الفور، توجه الزوج إلى السيدة، طالباً رؤية حقيبتها. ولما رفضت، سحب الحقيبة بالقوة، ليجد الورقة التي تحمل رقم الشاب. حينها، توجه الزوج إلى أمين الصندوق (الكاشير)، ليطلب منه مكبّر الصوت، ليعلو صوته بالقول "أيها الحضور وأيها المتسوقون اسمعوني وأريدكم شهوداً على ما أقول، أنا فلان بن فلان وزوجتي فلانة بنت فلان فقد طلقتها ثلاثاً وليس لها رجعة بعد اليوم"، وفق ما نقلت صحيفة "الرياض" السعودية الاثنين 31-12-2007. بعدها، خرج الرجل من المركز، واستقل سيارته بمفرده، تاركاً زوجته المطلقة وأطفاله بالسوق، في موقف أدهش مئات المتسوقين الذين تابعوا الحادثة.

شتـّان بين هالسالفه واللي قبلها !!
يوم حفظته وصانته .. راح يدوّر لها ع الزله !! ويشكك في شرفها وعفتها !!
ويوم حفظها وصانها .. خانته !! وجابت له العار والفضيحه !!

القصة الأولى .. لحواء:
س/ وش موقفتس ياحواء لو دريتي أن زوجتس يسوّي بتس تسذا ويرسل وراتس شباب عشان يختبرتس؟؟!
//
القصة الثانية .. لآدم:
س/ وش موقفكـ يا آدم لو شفت زوجتك مكانها وسوّت بك تسذا ؟ هل بتحل الموضوع كذا ؟ ولا عندك حل ثاني؟؟ ووشو؟؟
//
( اللهم أسترنا فوق الأرض وتحت الأرض ويوم العرض )



][ ف ـاص ـل ][

ياحبها يادنيتي وحلم العمر..
ياحبها ياللي بـ يديه كل الأمر..
كيف الهروب من حبها؟!
وهيه منايا وغايتي!!
كيف أتحاشى قربها؟!
وعنها أداري غيرتي!!
يا ذالقدر وش اللي أقول؟!
شنهي الوسايل والحلول؟!
شنهي حياتي بعدها؟!
/
لملم جروحك وإنسحب!!
مالك نصيب باللي تحب!!
وأرجوك إقبل عذرها!!
هذي الحياة وهذا حكم أقدارها!!




][ M.M.S ][

هذي التصاميم إهداء من صنع الأخت "patchi" جزاها الله كل خير, وحقوقها للجميع ..
وخاصه بقدوم شهر رمضان تصلح فالتواقيع, كل من يقراها لك مثل أجره بإذن الله .. والأجور في هالشهر مضاعفه بإذن الله ..























][ زواج لايف ][


.
الإسم: مناحي أدهم.
المكان: جيبوتي.
مواصفاتي: شاب أطخم ما أدخن إلا إذا سكرت, رومنسي راتبي 1500 على بند الأجور, وأعرف واحد يشتغل في بنك بس مايعرفني.
المواصفات المطلوبة: بنوته زي القمر عمرها بين 45 و 50 تشبه لميس أو نور وتكون ركبها بيض.
.
الإسم: صيته مرجان.
المكان: السنغال.
مواصفاتي:شابه تاخذ العقل وتطيح السما من الطير, أشتغل مدرسة والعصر خطابة وفالليل طقاقة, أبلغ من العمر 65 سنه فقط.
المواصفات المطلوبة:شاب يخاف الله فيني ويحب مزعل فرحان ومايقول لاتاكلين كراث ويكون ساكن في خنشليله وماحولها.


أنتشرت قنوات التعارف بشكل كبير.. تحت غطاء "الزواج" و "العفاف" و"الستر" و"جمع راسين بالحلال"..!!
/
س/ هل تعتقد/ين أنهم صادزين في توجهاتهم؟ وأن المتقدمين بالطلبات راغبين فعلاً بالزواج والعفاف؟ أم غير ذلك؟
س/ هل من الممكن أن تتزوج/ين بهذهـ الطريقة؟
س/ من هو القائد العسكري الذي فتح القسطنطينية؟ <~ سؤال خاش عرض..



][ رمـ ض ـانيات ][
.
قال الله تعالى: { شَهْرُ رَمَضَانَ الَّذِى أُنزِلَ فِيهِ الْقُرْآنُ هُدًى لّلنَّاسِ وَبَيِّنَـاتٍ مِّنَ الْهُدَى وَالْفُرْقَانِ } [البقرة:185].
.
وعن ابن عباس رضي الله عنه قال: ( أنزل القرآن كله جملة واحدة في ليلة القدر في رمضان إلى السماء الدنيا ، فكان الله إذا أراد أن يحدث في الأرض شيئاً أنزله منه حتى جمعه ) .
.
إذا كنت تتصفح النت خل هالصفحة مفتوحة وعدّاد الأجر يزود عندك بإذن الله
http://www.tvquran.com/
.
إذا بغيت تقرأ القرآن من اللاب توب
http://www.quranflash.com/quranflash.html
.
إنشروها .. من قرأ حرفاً أو سمِعَ حرفاً لك مثل إجرهـ بإذن الله..
والله يضاعف لمن يشاء..



][ إهداء خاص لكم ][





][ م ـخرـج ][
.
يازولها ياللي على الخاطر تمرّ ؟!
عن شوفها كيف أتصبر وأعتذر؟!
كنت أحسبك حبي الجديد!!
وأثاري ظني مو أكيد!!
حبيت وخانـّي الإختيار!!
ضاع الرجا في الإنتظار!!
يا ذالقدر وش اللي أقول؟!
شنهي الوسايل والحلول؟!
شنهي حياتي بعدها؟!
/
لملم جروحك وإنسحب!!
مالك نصيب باللي تحب!!
وأرجوك إقبل عذرها!!
هذي الحياة وهذا حكم أقدارها!!


كلمات / يوسف ناصر



في آلختآم .. أشكركم على متابعة موضوعكم ...
وأتمنىآ آن يحوز على رضى الرحمن ورضآكم وينآل ذآئقتكم كل آبوٍكم ..
تعليقك على جميع الفقرات أو بعضها وإبداء وجهة نظرك يفيدني جداً .. :$
اللهم إغفر لي ولكم .. ولوالديّ ووالديكم وأجدادي وأجدادكم وجميع المسلمين والمسلمات الأحياء منهم والأموات (F)
اللهم بلغنا شهر رمضان المبارك, وإجعلنا من صوامه وقوامه .. اللهم آمين (F)
اللهم في هذا الشهر الكريم تشفي "أم مصعب", وتشفي خالتي "أم سلطان" وترجعهم بالسلامه يارب العالمين..
سبحانك اللهم وبحمدك , أشهد ألا إله إلا أنت , أستغفرك وأتوب إليك

اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ

.
الإستماع للقرآن الكريم
http://www.tvquran.com
سورة الكهف ليوم الجمعه
http://al-kahf.com

كتبه وأملاهـ الفقير إلى عفو ربّه:
باء نقطه شين
بدر.الشوق
وفي روآية / أبو س ـعد

سلآمـ

.
.
منتدى فهاوه

http://www.fha5.com/vb

للتواصل

b.s9@hotmail.com