تنويه: تم إيقاف استقبال ونشر المشاركات للمجموعة البريدية بدءً من تاريخ 18-11-2009 ، على أن نعاود استقبال ونشر المشاركات مرة أخرى بتاريخ 4-12-2009 ، علمًا بأن الموقع مستمر بتحديث المواد، وكل عام وأنتم بخير.

قصة : عكس عكاس

Fox بتاريخ 03/08/2009 في شهر 8/2009 • للتواصل fox8666@gmail.com

•

4,829 +

59,996

• الطباعة: 28

• الإرسال: 2

• التعليقات: 63

• مرات التفضيل: 0

بسم الله الرحمن الرحيم

( عكس عكاس )
قصة وسيناريو وحوار

Fox

ام وليد على الهاتف : هلا والله بالغالي ....وش اخبارك ؟

وليد : هلا يمه انا بخير..وش اخباركم واخبار الديره ؟

ام وليد : بخير الحمد لله مشتاقين لك بس انت الله يهديك معذبنا ومعذب نفسك
ليتك مااخذت صيفي وجيت لديرتك تغير جو .

وليد : اما اغير جو بالرياض!!!...انا ابي اخلص من الدارسة بوقت قصير عشان ارتاح .

ام وليد : عسى ماغروك الحمر والشقر بس ؟ احفظ نفسك ترى ماوراهم الا المصايب .

وليد : ولييييه .......شكلك من كثر ماتوصيني بخربها مع هالحمر والشقر
لاتوصين حريص يمه.... اصلا انا مايملي عيني الا البنت السعوديه .

ام وليد :تعجبني .

وليد : وش أخبار اعمامي وخوالي وحريمهم وعيالهم؟

ام وليد : كلهم بخير ويسالون عنك ..نوره بنت خالتك تقول ورا وليد مايشارك بقروب بونواف مثل اول.

وليد : هههههههه ياخي المعجبات مشكله... قولي لها بطلنا خلاص ...في عضو بالقروب ماكل الاخضر واليابس مو مخلي لنا فرصه ننافسه .

ام وليد : من هذا وليش مو مخلي لك فرصه ؟

وليد : هذا عضو رااايق ودمه خفيف اسمه ورقة بلوت ايميلاته مثل ايميلاتي لكن عجزت اجاريه واعتزلت....والمبتعثين من السعوديه والخليج والعرب المشتركين بقروب ابونواف من يجي طاري القروب هو اول واحد يذكرون اسمه .

ام وليد : وليش ماتخلي قوة هالعضو هدف توصله وتتعداه... لاتيأس وحاول تشارك طلع مواهبك المدفونه ولاتقول مافي مواهب ماحد خالي من الموهبه لكن الذكي هو اللي يعرف يطلعها..وحتى لو مواضيعك ماتعجب الاعضاء بيجيهم يوم ويعجبهم ان شاء الله.

وليد : أصلا بونواف مايقبل الا الايميلات المميزة ومجرد نشر الايميل بالقروب شهاده ان الموضوع مميز واكيد بيعجب الاعضاء.

ام وليد : اجل شارك من اليوم خلني اشوف طموحك وين يوصلك..المهم خلاص طولت عليك انتبه لنفسك وحافظ على الصلاة والاذكار عشان الله يوفقك ويحميك.

وليد : ابشري يمه وسلمي على الجميع تكفين .

بعد مرور أسبوع :

ام وليد : والله اني خايفه لو شافنا وليد تجيه سكته من المفاجأه .

ابووليد : تسمعين بالسكته انتي؟؟ ....لاتخافين ان شاء الله مايجيه شي بالعكس فرحته بتكون كبيره .

ام وليد : طيب على الاقل المح له عشان لو شافني قدامه مايغمى عليه .

ابووليد : يابنت الحلال خليها مفاجأه عشان ينبسط اكثرقوي قلبك مايجيه شي ان شاء الله .

ام وليد : ليتك جاي معنا عشان تحلى السفره .

ابووليد : ماني بمجنون اعلق نفسي بالجو 14 ساعه .

تتجه ام وليد وأبنائها الى مطار الملك خالد وأثناء الانتظار كان يجلس في الجهة المقابلة لهم شخصين :

خالد: شف بس المصخره مسافره مع بزارين لحالها لامحرم ولارجل يسترها .

ناصر : وش دراك انها رايحه لحالها يمكن زوجها جاي بالطريق.

خالد :من دخلت المطار وهي لحالها انا مراقبها وبعدين اذا شفت الوحده كاشفه الوجه اعرف ان ماعندها رجال .

ناصر :خل الحرمه في حالها تراها متسترة ومتحجبة .

خالد : البلى في الحجاب لان الوجه باين وهي حلوه وهذي فتنه .

ناصر : تطالع فيها وتقول فتنه!! ..غض بصرك وريح نفسك.

خالد : والله ماخليها...... اصبر بوريك وش بسوي .

ناصر : تعال يالخبل وين رايح ؟!

خالد : مساء الخير ؟

ام وليد : مساء النور .

خالد : وراك ماتغطين وجهك ياخاله ؟

ام وليد : خاله بعينك ..شايفني كبر امك ..بعدين وش دخلك انت اغطي وجهي والا اكشفه .

خالد : لاتدفين طيب انا تهمني مصلحتك ... خافي ربك وتستري ؟

ام وليد : وانت ماتخاف ربك يوم تدخن بمكان عام......تضر نفسك وتضر خلق الله؟

خالد : اقول تستري بس .

ام وليد : شكلك صايع وتبي تلعب روح احسن لك والا ناديت امن المطار .

خالد بخبث : طيب ماتبين خوي بالسفره ؟

ام وليد(تنهض من مكانها) :وش تقصد يابن ال.. طوط طوط .

خالد يتراجع للخلف : معليه بيجيك يوم وتندمين على فعايلك .

ام وليد : انقلع قلعك الله .

حسام ابنها : امي دقي على خالي بندر والله لو يجي يسوي وجهه زحليقه.

ام وليد : مايحتاج انا أدبته .

بعد عودة خالد الى مكانه :

ناصر : تستاهل خل اللقافه تنفعك...الناس كلها شافتك .

خالد : لعادي بس علمتها ان الحرمه تتمصخر بدون رجال .

ناصر : حرام عليك والله اني رحمتها مسكينه يمكن مطلقه يمكن ارمله ياخي خاف ربك لاتسيء الظن .

خالد : حتى لو هي مطلقه او ارمله وين ابوها وين اخوها وين عمها وين خاله ؟

ناصر : لايكون انت مسئول عن الناس وانا مدري؟ لاتسوي فيها ملتزم وانت دب داشر .

خالد : ياخي بس الملتزم اللي ينصح ....انا قصدي انها سعوديه يعني تعتبر من محارمي .

ناصر : منت بصاحي!!! شلون من محارمك وهي ماتقرب لك وبعدين الملتزم ماهو بملقوف زيك واذا نصح ينصح عن درايه موب زيك جاهل وتتفلسف .

خالد : وش عنده الجامعي...اقول اقطع واخص بس الشرهه علي اللي مسافر معك .

ناصر : انا باسالك سؤال ........خواتك الحين وينهم فيه ؟

خالد : اكيد بالبيت!! .

ناصر : طيب وش رايك ان خواتك الحين في حفله خاصه مع شباب .

خالد بنرفزه: كل تبن واحترم نفسك .

ناصر : دق عليهم وبتتأكد من كلامي .

يتصل خالد على شقيقته نوف ويسمع صوت الاغاني:

خالد بعصبيه : نوووووف وش ذا الموسيقى انتي في وين؟؟..... اقسم بالله بذبحك ؟!!

نوف : هلا خالد عندي ازعاج مااسمعك زين؟

خالد يصرخ : الو الو .......اف قفلت الخط ..ذابحها ذابحها خلاص ماني مسافر .

ناصر : هههههههههههههههههههههه يامخفه يادلخ ياغبي ..نسيت ان اليوم زواج ماجد ولد خالتك وخواتك بصالة الزواج الحين .

خالد : يوووووووووووووه ياخي حرام عليك نشفت دمي .

ناصر : عشان اعلمك ان سوء الظن مرض فيك .

خالد : بس تعال شلون بعرس وداخله بالجوال ؟؟!!

ناصر : ماتتوب انت ؟؟ بالعرس بالعرس لاتوسوس يمكن جوالها مافيه كاميرا .

بعد فتره تصعد ام وليد وابنائها الطائره وبعد الجلوس بمقاعدهم:

المضيف : لو سمحتي اختي في كرسي بالخلف جالسه فيه بنت وجنبها الاخ اللي واقف هناك وهي رافضه يجلس جنبها .

ام وليد : وتبيني اقنعها أنها توافق مثلا ؟؟!

المضيف : اذا ماعليك تكليف تجلسين جنبها والرجال يجلس جنب ولدك .

ام وليد : وش يوديني بآخر الطياره ازعاج وصوت المحركات وبعدين عيالي وراي هنا اسفه اسمح لي .

المضيف : بتسوين خير بالرجال لانه بيوقف على رجله طول الرحله .

ام وليد : ماشاء الله عليه سمين وراه ماحجز درجه اولى اوسع له؟ يمكن البنت رفضت عشان مايضايقها بالجلسة ومعذورة بصراحة .

المضيف مبتسماً : ماندري عن ظروفه اختي.

ام وليد : اسفه كان ودي اساعده لكن مستحيل اجلس ورى واترك عيالي هنا...بعدين اسمعنى انا ليه ماتشوف باقي المسافرين ؟

المضيف : انتي المسافره العاشره اللي اطلب منها وكلهم رافضين والبقية كلهم شباب او رجال عموما مشكوره وماقصرتي .

بعد 14 ساعه تهبط الطائره في مدينة نيويورك وكانت لديهم رحله اخرى في اليوم التالي الى سياتل حيث تقع جامعة وليد وقبل خروجهم من المطار :

حسام :امي امي شوفي ذاك الولد ابو تي شيرت احمر يشبه اخوي وليد .

ام وليد : وينه ..........والله يعقب..لو هذا ولدي تبريت منه
هذا شكله اجنبي ووليد رجال مايحلق شنبه ويعلق سلسله بصدره
ان شاء الله وليد بيرجع من امريكا مربي اللحيه وملتزم مثل خاله بندر .

حسام : هذا مسوي شعره سبايكي .....انا بسويها هنا .

ام وليد : لو سويتها لا انت ولدي ولا اعرفك.

ندى ابنته: امي... متى بنقابل وليد ؟

ام وليد : الليله بننام في هالديره وبكره رحلتنا للديره اللي فيها وليد .

ندى : وليه مانروح له اليوم ؟؟

ام وليد : ودي اسكن بهالديره عن خاطري وبكره نروح لوليد ماورانا شي .

حسام : نبي نسوي المفاجأه لوليد فلم رعب انتو تتخبون جنب الباب وانا أدق الجرس بعدين لما يفتح اناظر فيه بعدين اركض عشان يفكرني شبح وتجين انتي وتصرخين باذنه عشان ينقز ... هع هع .

ام وليد : لا ياحسام هذا ذبح علني موب مفاجأه..حنا نتصل عليه نسولف وبعدين ندق الجرس ويفتح وانا على الخط عشان المفاجأه تصير خفيفة .

واثناء بحث ام وليد عنباب الخروج لركوب التاكسي:

ام وليد لعامل بالمطار : سكوزمي ... لموزين...... وير؟

عامل المطار : وات؟

ام وليد :لموزين... كار.. هوتيل ؟

عامل المطار باشمئزاز: قو تو انفورميشن اوفيس اند اسك ذيم .

ام وليد :الله يخزيه شافني متحجبة ويفكرني اسال عن البرتشن!!!
نو برتشن......تكسي تكسي .

عامل المطار :اووووه تااااااااكسي ..اوكي يو كان قيت ون فرم آوت سايد أور قو تو تاكسي اوفيس اندقيت ون .

ام وليد :والله ورطه...... مدري وش يقول!!

حسام : يمكن يقوله انه هو راعي التكسي .

ام وليد :لأ هذا عامل نظافه هذا خلك ساكت بس .

واثناء حيرة ام وليد يأتي الرجل الذي رفضت التبديل معه بالطائره :

الرجل : محتاجه مساعده اختي ؟

ام وليد :ابي تكسي اخوي وهالفاهي شكله هندي مايعرف انقليزي .

الرجل : هندي ؟؟ هههههههههههههههههههه تعالو معي بوصلكم لمكان التكاسي.

ام وليد :معليش اسمح لي مافزعت معك بالطيارة لكن كانت فيني دوخه وماقدرت اتحرك والمضيف الله يهديه ماعطاني فرصه اعلمه وراح .

الرجل : هههههههههههههههههه شدعوه عادي من حقك .....بالعكس جت من صالحي جلست بالمطبخ مع المضيفات اكل وشرب وسوالف ههههههههههههههههههههههههههه.

ام وليد :باين انك كثرت من اكل الفطر .

الرجل باستغراب : أي فطر ؟؟!!

ام وليد :مدري اشوفك تضحك كثير .

الرجل : احم ...تفضلي من هنا اختي .

بعد ان اوصلهم لمكتب حجز التاكسي شكرته ورحل :

حسام : كانت فيك دوخه اجل هاااه ..تكذبين ياامي !!!

ام وليد (بخجل) :ماكذبت هذي مجامله عشان اجبر بخاطره وهذي للكبار بس الصغار مايسوونها انتبه تقلدني .

في اليوم التالي تستقل ام وليد وابنائها الطائرة الى مدينة سياتل وبعد خمس ساعات يصلون ويستقلون تاكسي الى مقر سكن الجامعة وقبل وصولهم للسكن تتصل باابو وليد :

ام وليد : ورا جوالك مقفل تعبت وان اتصل .

ابو وليد : هلا ام وليد...... جوالي طفى من البطاريه وانا نمت بالاستراحه وتوني شاحنه بالسياره....هذا رقمك الجديد؟

ام وليد : ايه امس رميت رقمي القديم وركبت شريحة موبايلي......التغيير مفيد لتجديد النفسيه .

ابووليد : اي والله يبيلنا تجديد للنفسيه .

ام وليد : ازين لك والله..... وعلى قولة اخوي بندر انا هلالي ورقمي موبايلي يعني قمة الرفاهيه.. اقول كيف البيت بدوني ؟

ابو وليد :مانمت فيه اقولك وجاي البيت ابدل ثيابي وبطلع معزوم على العشى .

ام وليد : وليش ماتنام بالبيت ؟ خايف ههههههه؟

ابو وليد : بيت وش كبره ولحالي فيه اكيد باستاحش ومارح يجيني نوم .

ام وليد : تستاهل ماحد قالك تجلس لحالك .

ابو وليد : افاااا ....تصدقين نسيت اقفل باب المدخل .

ام وليد : الله يهديك بس انتبه لايسرقون صندوق الذهب؟

ابووليد: بس هذا اللي همك؟ اقول وصلتو لوليد؟

ام وليد : يقول التكسي خمس دقايق ونوصل سكن الجامعه .....والله قلبي يخوفق خايفه عليه من التخرع .

ابو وليد : عسى مشيتي امورك باللغه؟

ام وليد : الحمدلله اكتشفت اني فطحله باللغه ومشيت اموري... واخوي بندر ماقصر كتب لي العناوين بورقه عشان مانضيع والحمدلله تساهيل .

ابو وليد يصرخ : بسم الله الرحمن الرحيم قل اعوذ برب الفلق.... بسم الله الرحمن الرح.... ( انقطع الخط ) .

ام وليد : وش فيك ...الو الو محمد وش فيك ..الوو .يارب سترك يارب سترك مدري وش فيه ابوكم ؟

ام وليد تعاود الاتصال : ياربي جواله مسكر الظاهر انه شاف جني وجته سكته... الله يستر الله يستر .

يصل التاكسي الى مقر سكن الجامعه وتنزل ام وليد مسرعه وتسال عن غرفة وليد ثم تتجه لها وتدق الباب وهي تصرخ: وليد الحقنا ابوك ابوك .

بدر يفتح الباب : سلامات سلامات وش السالفه ؟

ام وليد : هذي غرفة وليد محمد ؟

بدر : ايه غرفته لكن ماهو بموجود .

ام وليد : ياربي وين رايح؟؟ ......... انا امه .

بدر : امه!!!!!!! وليد اتوقع انه الحين في بيتكم بالرياض .

ام وليد : وشووووووووووووو!!! (بلقت عيونها) تكفى لاتقول انه كان لابس تي شيرت احمر ؟!!!

حسام : اجل بيرجع ملتزم مثل خاله بندرههههاااي .

-النهايه -

ملاحظه 1: القصه تأليف في تأليف <<يارجل

ملاحظه 2: لكل من رد على قصصي السابقه او ارسل ايميل
من اعماق قلبي :
شكرا شكرا شكرا شكر...........الخ
كل ملاحظاتكم اضعها في الحسبان وبالتأكيد منكم استفيد .

Fox


	الموضوع السابق: البلدة القديمة بـ محافظة العلا \| تغطية مصورة	الموضوع التالي: صور : تقرير منتجع ديزرت بالم

	مواضيع أخرى للمرسل Fox
	قصة : لغز الغرفة المظلمة
	قصة : نقطه
	قصة : عكس عكاس - الجزء الثاني
	قصه : سلطان
	قصه : حقي (الجزء الثاني)

	التعليقات على الموضوع
	1 [ Saad ] زائر 85467 الله عليك !~ \| 03/08/2009 03:01:36 دآئماً مُبدع يآ أخ [ Fox ] .. وسنآريو حلوو كثير .. أتمنى لك التوفيق ,’ 2 واحد من الناس زائر 85474 وش ذا \| 03/08/2009 03:34:41 قصة تقهر وين مفرحة فيه 3 *..أميرة الورد..* زائر 85487 مـــــــــبــدع \| 03/08/2009 03:58:44 مرررره نايس يســــــــلمو اخ(fox) بالتوفيق 4 حـلآ الـروح عضو 85502 سلآم \| 03/08/2009 04:27:32 يعني مآ فيه تكملة .! خلصت كذآ ..؟ وش بيصير لأبو وليد ووش صار مع خالد؟ فوكس لازم تكمل ما يصير << مشكلة اللي يتحمس يعطيك العافية ومتابعة لك بس انتبه للأخطاء الإملائية شكرا وأتحفنا بجديدك 5 smooth sahdow زائر 85533 ............ \| 03/08/2009 06:13:24 لأازم تكمله ... احس اني خسيت جو مع القصـه ودي اعرف وش صار فيهم .. فوكس صراحه ابداااع ثانكس على القصه ...~ 6 البسيط عضو 85544 ما شاء الله \| 03/08/2009 07:19:35 السلام عليكم اخوي فوكس بارك الله فيك قصه مثل سابقاتها روعه انا من المتابعين لكتاباتك بصمت واصل الابداع ولا حرمت الاجر 7 همســــه زائر 85560 نايس \| 03/08/2009 08:32:39 سجلني من متابعييييينك يافوكس قصه رهيبه انسجمت معها حسيت اني في فيلم يسلموووووووووووووو 8 إيــــــــاد زائر 85577 كمـــل \| 03/08/2009 10:01:23 كمل كمل كمل بلـــــــــــــييييييييييييييييييييييييييييييز و قصم تحمست تحمسن واااااجد >> والله احلف يصلموووو على هيك قصه 9 7OssAM عضو 85582 مبدع \| 03/08/2009 10:21:07 مشكور وما قصرت 10 نور عضو 85586 ناااااايس \| 03/08/2009 10:52:38 مبدع وننتظر جديدك 11 علووووشة زائر 85588 عكس عكاس \| 03/08/2009 11:11:14 ألف شكر أخي الكريم روعة وقد تجدها هذه الأيام ولك تحياتي 12 واحدمن الناس زائر زائر 85589 والله شئ \| 03/08/2009 11:16:56 يعطيك الف الف عافيه ع القصة الجميلة جدآ بس وين التكمله 13 نون زائر 85591 رووووووووووووووووووووووعة \| 03/08/2009 11:27:13 روعه مرة مرة الله لايعوكسنا بس ام وليد و وليد قلوبهم عند بعضها وتفكيرهم واحد ودي ادري وش سوت ام وليد بهالموقف الي حطت نفسها فيه الله يعطيك العافيه.. وسلمت اناملك 14 عبدالواحد زائر 85604 ههههههههههههه \| 03/08/2009 12:13:17 حلوة بالتوفيق و غلي الأمام 15 ابووسن زائر 85615 عكس عكس \| 03/08/2009 12:50:52 فوكس ههههههههههههه حلوه بيض الله وجهك والله وقتها طفشان وقافله معي قلت خلني اشيك ع ايميلي وقريت موضوعك نسيت الطفش الله يعطيك العافيه واقول لاخواني واخواتي انا ماشاركت ولا بموضوع احد يسلفني هههه 16 miss.ro0ona عضو 85629 ro0on \| 03/08/2009 13:32:08 ايه جد كملــــــــه >>>تحمست يسلمووووووووووووو عالقصه وننتظر ابداعكـ 17 روح الهواء زائر 85634 حلوة \| 03/08/2009 13:47:52 رووووووووعة تسلم الأيادي موفق أخي الفاضل بس لو تتكمل كان أحسن بعد 18 غــــــــــزل زائر 85637 رااااااااااااااااااااااااائع \| 03/08/2009 14:02:56 يعطيك الف عافيه على القصه الرائعه وننتظر جديدك 19 محمد زائر 85656 لووووول \| 03/08/2009 14:57:21 ههههههااااااااااااااااي أجل طلع هو في مشى من نيويورك وهم في سياتل طيب ماقلت اي جامعه Washington U ولا S-U خلهم وهم هناك يمرون الـ pacific place والويست ليك سنتر <--- استانس انهم عنده في سياتل لايكون انت من طلاب سياتل بعد؟ والله اني شاك في الأسلوب هههههههـ 20 Fox صاحب الموضوع 85658 هلا وغلا \| 03/08/2009 15:18:58 السلام عليكم اختي حلا الروح شكرا على الملاحظه وليتك كملتي جميلك وحددتي الاخطاء الاملائيه عشان اتفاداها مستقبلا واشكرك على اهتمامك الاخوه والاخوات اللي طلبو تكملة القصه : رغم ان القصه انتهت ولكن بناء على طلبكم سأحاول تكملتها واذا اقتنعت بالجزء الثاني سأضعه بين ايديكم باذن الله واجب علي ان اشكركم واحد ووحده [ Saad ] واحد من الناس أميرة الورد حلا الروح smooth sahdow البسيط همسه اياد 7OssAM نور علووووشه واحد من الناس نون عبدالواحد ابووسن miss.ro0ona روح الهواء الله لايحرمني منكم 21 احم احم عضو 85665 ههههههههه \| 03/08/2009 15:36:35 قصة حلوة ورائعة 22 بنت العز زائر 85673 أبداع X أيداع \| 03/08/2009 15:55:38 أبداع القصة يا أختي /أخي FOX اتمني انشوفك /ـج كاتبه ان شاء الله ياربي تحياتي لك/ـج بنت العز 23 الكنترول عضو 85695 إبداااااااااااااااااع \| 03/08/2009 18:03:10 أنت مبببدع بمعنى الكلمة ورا ما تكمل الجزء الثاني؟؟ قسم إني خشيت جووووو مع القصة مشكووووووووور أخوي فوكس 24 جمــولة زائر 85711 . \| 03/08/2009 18:46:52 يعطيك العافية واصل الابداع 25 sweet_smile زائر 85725 وناسه \| 03/08/2009 19:12:41 وناسه وربي مبدع ماشاء الله عليك لاتحرمنا من قصصك 26 SARA زائر 85728 LOOOVE the story \| 03/08/2009 19:25:42 من جددد مبدعععععع اهنييييك لازم تصير مخرج لازم لازم والله نجااح على طوول hehehehe Oo shokraaaaaaaaaaaaaaaannn fox 27 sarona O_o زائر 85753 رائع \| 03/08/2009 21:10:38 ههههههههههههههههههههههههههههههههههه مستحييييييييل النهايه اليمه شكرا لك fox قصصك ممتعه ننتظر جديدك 28 النداوي.. زائر 85757 ابدااااااااااااااااااااااااااااع صراحه \| 03/08/2009 21:21:31 أهنيك صراحه عالابداع هذا. قصه روعه تحمست مع خالد هو واخواته. بس زي ماقالو الاخوان يبيلها تكمله علشان تحلوّ زود يا سنايدي.. تحياتي ومشكووووووووووووووور.. النداوي.. 29 ابوحرب زائر 85775 رد \| 03/08/2009 22:33:28 بصراحة عشت القصة معاهم وإن دل هذا فإنمايدل على الابداع 30 توووفي زائر 85778 واااااااااااااااااااااااااااو \| 03/08/2009 22:37:37 وااااااااااااااااااااوز رااااااااااااايقه القصهــ.. مررررررره حلوووهـ... بس,, ليش كذاا !! الام فااتشه الله يهديهااا مشكوور.. انت وورقة بلوووووووت كلكم شيـ،، لااا تقلل من قيمتك اوك.. منتظرينكـ.. 31 soso زائر 85780 رووووووووووعه \| 03/08/2009 22:39:05 الصراحه ابداع في ابداع يعطيك الف عافية ونتطلع للجديد من القصص الحلووووة ياحلووووو انت ملاحظة / في جزء ثاني للقصة هههههههههههه الصراحة تحمست معها كملها تكفى 32 يركدون عضو 85791 لااااااااااااااا \| 03/08/2009 22:54:38 وين وين وين فوكسآآتو ما انت بصآآآحي بتاتا البتة القصة ناااقصة يبي لها تكملة باقي أحداث ما خلصت ههههههه أبو محمد وش صآر عليه ووليد وينه وأم وليد قظت دراهمها وإلا لا ؟؟ ههههههه 33 noon زائر 85793 ابداع \| 03/08/2009 23:08:29 يعطيك العافية و الله بتجنن و انا جد اندمجت فيه جزء تاني؟؟ يعطيك العافية 34 أبو غسان زائر 85794 تسلم \| 03/08/2009 23:16:28 ماشاء الله عليك الله يعطيك العافيه 35 في الدنيا زائر 85798 اللقافة \| 03/08/2009 23:36:03 حلوة بالذات موضوع اللقافة ده 36 حلا زائر 85802 حلا \| 03/08/2009 23:57:36 ههههههههههههههههههههههههههههههههههه ههههههههههههههههه تسلم يمنااك وننتظرر قصصك الجاايه 37 حـلآ الـروح عضو 85851 السلام عليكم \| 04/08/2009 03:20:37 هذي الأخطاء اللي انت بغيت أوضحها لك لعادي = لآ عآدي خاله = خالهآ مسئول= مسؤول بعدين اسمعنى انا = بعدين وش معنى أنا عنباب = عن باب الخروج العشى = العشاء هي ممكن مطبعية أكثر من إملائية لكنها لفتت نظري وأتمنى ما يكون مصدر ازعاج لك شكراً ... وبإنتظآر جديدك 38 بدر الحربي عضو 85882 يسلموووو \| 04/08/2009 07:27:10 يعطيك العافية و الله بتجنن و انا جد اندمجت فيه جزء تاني؟؟ يعطيك العافية 39 غروري ذبح غيري عضو 85885 روووووعه \| 04/08/2009 07:56:34 يسلموووو فعلا القصه حلوه 40 أبو حمد زائر 85888 النهاية السعيدة \| 04/08/2009 08:35:23 تابعت جميع قصصك من بداية [ قصتي مع الخنزير ] إلى نهاية [ عكس عكاس ] وكل قصة أجمل من الثانية وحنا بانتظار الجزء الثاني ونبي النهاية تكون ( سعيدة ) الله يجزاك خير 41 مفحطة بناقة عضو 85901 هههههههههههههههههههههههه \| 04/08/2009 10:03:09 القصةمرررررررررررررررررررررررررررررةحلوة اللة يعطيك العافية 42 Tarek زائر 85905 قصة مرة حلوة \| 04/08/2009 11:02:31 تسلم ايديك علي الكتابة الحلوة و الله الواحد نسي انها قصة و اندمج معاها في الأخر. 43 أم صالح زائر 85907 ققة:عكس عكاس \| 04/08/2009 11:54:03 بصراحه والله قصتك تصلح حق التلفزيون اذيعونها 44 جالكسي والهوا عاكسي زائر 85928 قمة الرووعه>> \| 04/08/2009 13:19:38 والله القصه مرررة حلوووة > كالع ــادة وانا الصراحه متابعه مواضيعك لانهااا في قمة الرووعه ومشكووورر وياليت تكمل القصه يا متميز .. 45 فانترنتينا زائر 85946 هل المعنى وصل؟ \| 04/08/2009 15:14:13 أبو وليد شاف وليد جاه للرياض وارتاع .. وأم وليدسافرت على الفاضي ,, وش تبون بعد انتهت القصة! لكن المعاني اللي تحملها ياليت تكون وصلت من يوم كانت أم وليد بالمطار إلى أن نزلت من الطيارة سلوكيات تقهر في المجتمع,, بالنسبة للتصحيح الوارد للأخطاء الإملائية من الأخت حلا الروح بعضها خاطئ ذكرت : لآ عآدي وهي لا عادي, من أين أتت آ ؟ وبالنسبة لمسئول ومسؤول فهي تكتب بالطريقتين.. 46 hamada عضو 85949 حلوة هل قصة؟؟؟؟؟ \| 04/08/2009 15:52:06 عجبتني القصةة كتيييير وبضحك اعرضوا كتير متلها 47 Fox صاحب الموضوع 85951 هلا وغلا \| 04/08/2009 15:55:31 قرائتكم القصه بحد ذاته دعم كبير لي فمابالكم بهذه الردود الرائعه اختي حلا الروح الف شكر على الملاحظات وزي ماقلتي اخطاء بالطباعه فقط سيتم تلافيها مستقبلا بالنسبه للاخوان والاخوات اللي طلبو جزء ثاني انا الان اكتب الجزء الثاني لعيونكم بس اخوي فانترنتينا جبت الذيب من ذيله ماشاء الله ولكن لاني بكتب جزء ثاني سأظطر لتتغير شي بسيط فيها كالعاده احب ان اشكركم بالاسم غزل محمد احم احم بنت العز الكنترول جمولة sweet_smile SARA sarona O_o االنداوي ابوحرب تووفي soso يركدون noon أبو غسان في الدنيا حلا حـلآ الـروح بندر الحربي غروري ذبح غيري أبو حمد مفحطة بناقة Tarek ام صالح جالكسي والهوا عاكسي فانترنتينا شكرا الى مالانهايه 48 سيف زائر 85958 ابداآآع \| 04/08/2009 16:28:30 فوكس .. الله يعطيك العافية .. بصراحه انا ما اقرأ القصص كثير .. لكن قلت بقرأ هاذي القصة و بشوف الوضع .. لكن الشهاده لله قصة من اجمل القصص و هي اللي دفعتني لكتابة تعليق .. تسلم يالغالي على حسك الكتابي المتميز .. و بالتوفيق ان شاء الله 49 يبقى شموخي زائر 85960 هذا حالنا \| 04/08/2009 16:39:36 قصه تشبه كثير حال الشعب السعودي ,, مشاء الله عليك وراه ماتطلع كتاب قصص ,, احسن مابالقصه تحكي حالنا ,,, مشكووور\\واصل ابداعك 50 ابو حسـام زائر 85985 ابداع قليله في حقك \| 04/08/2009 17:51:53 قمه في الابداع ولون قصه سلطان اجمل الله يوفقك والا الامام المخلص / ابو حسام 51 big problem زائر 85990 :) \| 04/08/2009 18:20:28 مبدع كعادتك .. ضمني لقائمة المعجبين بكتاباتك .. واعذرني كنت متابعه لك منذ البداية ولكن بصمت .. & واصل فابداعك لا يجب ان يتوقف .. 52 مــــريــــم زائر 86004 رووووعه \| 04/08/2009 19:52:51 الله يعطيك العافيه مـــــبدع وننتظر جديدك والله يستر على اخيي ويحفظه 53 شمس الوداع زائر 86007 ماشاء الله \| 04/08/2009 20:53:21 عجيييييييييييييب يا خوي دومك عجيييييب 54 حساسه لانس الماسه زائر 86072 >>>>>>>>>>>> \| 05/08/2009 01:06:45 هههههههههههههههههه قصه تجنن ابدعت يالغلا 55 الجمل الحكيم زائر 86131 عكس عكاس \| 05/08/2009 02:31:35 اخوي foxانت مبدع ولديك أسلوب روائي جيد 56 فرح زائر 86319 من جد روعه \| 05/08/2009 15:32:09 بصراحه اكرة هذي المفاجأت الي زي كذا بصراحة توقف القلب وش الفايدة من كل هالف والدوران خبرهم بموعد جيتك وخلهم يكشخون ويتسنعون ويستقبلونك بالمطار بدال هالحوسة والتخريع كلة>>متعقدة من اخوي مرة سواها 57 Jo0Jo0o زائر 86382 صدمه!! \| 05/08/2009 19:19:19 يااا حيااتي والله تنرحم وهو بعد يعني بالصراحه صدمه اهني اللي كاتبها كثيير ع القصه الختييره وبالصرااحه مرة روعه نستنى منك الكثير اختك جووجوو الحربي 58 mashal زائر 86687 بصراحة روعة \| 07/08/2009 08:14:00 روعة روعة هذي القصة فيها أكثر من حدث وأكثر من واقعة 59 وصال زائر 86882 هي حلوه \| 08/08/2009 02:31:21 هي حلوه بس لللللللللللللليييييييييشششششششش ماكملتها وين حنا فيه اتحمس بعدين ماتكملت اقول كملها مفهوم ابي اعرف انت مين 60 Fox صاحب الموضوع 87185 هلا وغلا \| 09/08/2009 01:26:32 الاخوه الاوخوات hamada سيف يبقى شموخي ابو حسام big problem مريم شمس الوداع حساسه لانس الماسه الجمل الحكيم فرح Jo0Jo0o mashal وصال الف الف شكر واعتذر عن التأخر بالرد الجزء الثاني سيكون جاهزا للعرض قريبا 61 متابع زائر 87711 رائع كالعادة \| 10/08/2009 20:02:24 أخي فوكس حقيقة لأول مرة تصيب فراستي!! من أول قصة قرأتها لك وأنا أتوقع موهبةواعدة قصصك جميلة وأجمل ما فيها الأفكار غير المباشرة.. دواتي لك بالتوفيق. 62 احمد الحواشي عضو 87796 قصة جميل \| 11/08/2009 01:33:36 رائع فوكس في أنتظار ك 63 توته زائر 88211 ررررررررررررررررروعه \| 12/08/2009 13:12:54 تحمست مع القصة بعدين انقطعت ليييييييييييييه بالنسبة لي هذا عذاب نفسي وودي لو تتحفنا بقصصك لأن هذي اول مرة اقرا فيها تأليفك ارجوا من الله لك التوفيق ولا تنسى الاخطاء الاملائية

	اقسام الملتيميديا
	العاب \| ملفات \| بلوتوث \| صوت \| صور \| فلاش \| فيديو \| منوعات

عضو في اتحاد المواقع العربية الكبرى

شبكة أبو نواف

موبايلي

موبايلي

قصة : عكس عكاس