تنويه: تم إيقاف استقبال ونشر المشاركات للمجموعة البريدية بدءً من تاريخ 18-11-2009 ، على أن نعاود استقبال ونشر المشاركات مرة أخرى بتاريخ 4-12-2009 ، علمًا بأن الموقع مستمر بتحديث المواد، وكل عام وأنتم بخير.

صورة + فيديو : شعب مع الخيل ياشقرا و( مكائن سنجر )

خفوقــ الروحــ بتاريخ 15/04/2009 في شهر 4/2009

•

6,964 +

62,492

• الطباعة: 9

• الإرسال: 5

• التعليقات: 45

• مرات التفضيل: 0

بسم الله الرحمن الرحيم

حفاظا ع وقتكم ماراح اسدح مقدمه >>صايره تسمع باستغلال الوقت

قبل امس ربي عقل علي ونمت بدري وسكرت تليفوني ..
وعيت وفتحت جوالي لقيت 4 مكالمات من اخوي ..
استغربت الوضع .. دقيت عليه تبي شي ؟؟
قال لا خلاص كنت ابي امي ضررروي << بمط الراء
قلت وكلمتها ؟ قال ايه .. ماسألته ليه .. كنت بغرقة النوم ..

نمت .. صحيت .. اصبحنا وأمسينا ..

الا ذا جوالي يدق زوجة خالي بالقصيم ..
شخباركم وكيف الحال وتتكلم بالموضوع ع اساس ان عندي خبر
وانا بعالم اخر مدري عن ايش تتكلم !!

قالت تصدقين وصلن 25000
قلت منهن ؟؟ بعارين >> عشان عندهم عرس وقلت شكل بيحطون بعارين
قالت لا لا .. ام اسد
قلت منهي ؟؟ >>قالت ماتدرين ؟؟ قلت لا ..وعلمتني السالفه

رحت لم امي وقلت لها تدرين باللي صاير ؟؟
قالت ايه امس اخووك بالليل صجن يبي مكاين
ويوم فحص مكينتي طلعت مو ام اسد >> الفلوس ماتروح الا لاهل الفلوس

وقال لا مابيها ابي ام اسد .. وراح لم جدتي يبي مكينتها ولا لقاها >>شكلها تصادرت
وقت الورث

المهم اخوي مشتب ويبي مكاين وابوي خايفن ان اخوي يتهور ويسوي شي
ويصير فقاعة صابون مثل الاسهم ..

جا ابوي دق ع ولد عمه بالقصيم وقال السالفه صدق
و بالجرده ( سوق شعبي ببريده )الوضع مو طبيعي والمبالغ خياليه
وصلت 15000 و 25000 >> من يبي مهر

من بكرا طلع ابوي لحراج الخبول مع احترامي للي وقفوا فيه وزايدوا
وشاف الوضع بعينه ..
يقول عاااااااااااااااااااااااااااالم تقولون يوم الحشر ع اللي صاير
حريم ورجال وشيبان وشباب وناس ترفع وناس تزيد

هذا مشهد صوره ابوي ..

للتحميل

مسنجري امس يخترش >> ماتطنزت وصفت توبيك معهم

اليوم الصباح قعدت اقرا الجرايد واشوف هبة العالم فيه

خير ان شاء الله !!

الى متى احنا شعب مهبل وشعب مع الخيل ياشقرا

قبل سنين يوم طلعت الاسهم كل العالم هبت فيها ..
حتى اللي ماعنده شي تسلف عشان يدخل السوق ..

بعدها طاحوا بالدينار العراقي وشروا قال ايش بعدين نبيعه ..
وكل يوم والثاني طالعه لنا موضه جديدهـ
والعالم ناس مغفله (( مع احترامي لعقولهم ))

الى متى واحنا شعب تابع .. الى متى واحنا شعب ماعندنا
ذرة ثقافه ولو 1% ونعرف ان اللي يطلع الاشاعه وينجحها عصابات وهوامير سوق سودا

اجل زئبق .. !!
قسم نقعت ضحك .. لا وبالابره >> دارين محد بيذوبها ويروح الزئبق عليهـ ..

وترى مو أي ماكينه يبونها ..

لا لا فيه شروط ومواصفات :
1- الاسد مطلوووبه >> حنا فراشه ض1
2- لازم ينعدم ارسال الجوال عندها عشان الزئبق يعدم الارسال
ويصدقون ان فيها زئبق

وغيروا وغيروا من اللعب والضحك ع الذقون ..

صدق من قال :

رزق المهبل ع المجانين ..

ختام حديثي :

1- الى متى واحنا شعب مع الخيل ياشقرا ؟؟ نُقاد ونتبع أي اشاعه ..

2- وين وزارة التجاره عن هالموضوع ؟؟

3- اللي براسه يصير تاجر ليش يدخل طريق مو مضمون
مثل الاسهم ، وسنجر وغيرها .. او الموت مع الجماعه رحمه !!

4-سمعنا عن عرض وطلب .. لكن هل شفتوا بعينكم بيع واستلام ..

لكم ،،

كتبت
خفوقــ الروحــ


	الموضوع السابق: صور : فاهم ام السباق غلط - جوجل حق كمبيوتر صخر	الموضوع التالي: فيلم نسيج العنكبوت

	التعليقات على الموضوع
	1 ام ريم زائر 66430 ايوالله \| 15/04/2009 01:26:19 ههههههههههههههههههههه امس صار حادث لابوي وجارتنا جايه تحمد لنا بالسلامه ودرعمت على طول لغرفة الشغاله تقول بشوف اذا انتو فراشة والا ابو اسد تراها على 100000 بس وش السالفه وشيسوون فيها .؟ وين يودونها؟ من يشتريها منهم ؟ يعني من اللي يستفيد منها ؟ <<ترى مكينتنا فراشة مو اسد مو تفهمون غلط 2 كابرس زائر 66439 ام اسد وام قطو \| 15/04/2009 01:46:21 بسم الله الرحمن الرحيم والله صدق رزق الهبل على المجانين ولا بالله عليكم اي مصنع هاذا الي بيحط هالماده وبيبيعها برخص التراب الا اذا كان موداري شلي قاعد يصنع ههههههههههههههههههههههههههههههه والله شي يضحك ويبون يمشونها علينا زي الاسهم وشكرا 3 بوحمد زائر 66441 من يشتري \| 15/04/2009 01:58:11 السلام عليكم يا اخوان عندي وحده وبسعر زهيد من يشتري ما طلبت فيها الا 75000 ها في شراي الله يكون في العون 4 _ابوعلي_ عضو 66442 ناس فاضيه \| 15/04/2009 02:02:57 ولله مدري وش اقول بس الله يعقلهم 5 الزئبقي زائر 66444 اجل زئبق احمر \| 15/04/2009 02:06:06 هذا ملعووب يالله ماعليه نعيش واكيد بناخذ غيرها لما سمعت بالموضوع رحت طيران للمستودع وانفض الغبار عن مكينتنا العزيزة والصق الجوال بالمكينه وانتظر الابراج تختفي !! لكن اللي حصل ان الابراج قووت وصارت فل دائما ماتحبطني شركة الاتصالات .. في كل شي اما بخصوص الاسعار فانا لااعرف احد باع مكينته بمبلغ وقدره اسمع زيكم بس 6 حمد زائر 66454 ايش عليكم خذو فلوسكم و انتهى \| 15/04/2009 03:01:05 مع اني سمعت الخبر بس ما فهمت المعنى بس ايش علينا منهم الي معاه مكينة يروح يبيعها و ياخذ فلوسها و الي ما معاه ما يتكلم الا من قهرو انو يبى الفلوس ههههههه 7 نــــــــــــــــــــــوف زائر 66468 اخواني المهبل \| 15/04/2009 04:21:05 هههههههههههههههههه فتكم والله مفحطه ضحك لو تشوفوني وانا اضحك على اخواني مررررررره متحسين مصدقين السالفه صدق اللي قاااااااااال الطوال طوال نخله والعقل عقل سخلهوالله لوتشوفنهم واقفين طابور هند غرفة امي تقووووول مقصف مدرسه خخخخ ولا كل واحد عنده عياااااال هم ووجيهم قاعدت اعلب عليهم قالتلهم انا ادخله غرفت امي اللي يعطني اتكلم اكثر من كثر ماهو مصدقين اللي يطلع لي ريالين واللي يطلع لي خمسه اعنبوووووووو بليسكم عطوني شئ يسوى هذا طولي وعرضي واخر سنه بالجامعه ماصفت الاعلى ريالين وخمسه عااااااادلوتشوفون اخواني والله تموتون من الضحك8وصافين وراء بعض وانا البنت الوحيد يابعدهم انا يااااااااااالله مستشفى اشهار مو بعيد عن الرياض بقوه خخخخخخخخخخخخخههههههههههخخهههه 8 hamoos زائر 66476 غبـآآآآآء .. \| 15/04/2009 05:22:23 اصلا السـآلفه كلهـآ أإأشـآآعه .. بقول .. في أإحدى العصور تحدى أإحدعم صديقه فقـآل له أإهل القريه مغفلين وأإغبيـآآء فضحك صديقه فتحدـآه ان يثبت له غبـآئهم .. فخرج أإليهم ووأإبتدع حديث للرسول من لمس لسانه اذنه دخل الجنه فأخرج أإاهل القريه أإلسنتهم يحـآولون أإن يلمسو أإذـآنهم .. وانتصر الصاحب بالتحدي .. وضحكو على غبـآئهم .. والان .. ظهرت موضوع الزئبق والمكـآئن .. مـآ أإريد ان أإعرفه هو .. من هم المرـآهنييــن .. فسبحـآن الله أإأصحبنـآآ شعب .. أإغبيـآء .. أإستغفر الله .. 9 الراجيه عفو ربها زائر 66487 العباره لاتجوز \| 15/04/2009 06:48:01 السلام عليكم ورحمة الله وبركاته والله العالم يحزنون يدخلون في اي شي عشان يكسبون وبس صدق كذب ولا يهتمون .. عموما ارجو عدم قول صدق من قال : رزق المهبل ع المجانين .. الخطأ : رزق الهبل على المجانين : وهذه العبارة فيها إشراك بالله والسبب أنه ليس رزق أحد على أحد ، ورزق جميع المخلوقات على الله. قال تعالى : وما من دابة في الأرض إلا على الله رزقها ويعلم مستقرها مستودعها 10 َََََََ@عبق الورود@ عضو 66489 كلن حر بعقله \| 15/04/2009 07:04:39 اللي عنده قرش محيره يشتري حمام ويطيره خلوهم يشترون هالمكاين وتجلس بكبودهم هماهم بيعطونكم مبالغ ماحلمتو فيها حق هالحديده القديمه ؟؟ خلاص مابين البايع والشاري يفتح الله مافي داعي تتفلسفون وتتكلمون بسخريه عن بني جلدتكم تحياتي 11 الجمل الحكيم زائر 66494 تكنلوجياالمكاين \| 15/04/2009 08:22:12 خفوق لاتلومينهم شي بلاش ربحه بين من حصل مكينة بهالسعر على فكرة عندي صحون أمي الله يرحمها كم ظنك تجيب لاتراهامن الحديدالاول بس مابعتهايوم الحديدغالي راحت علي 12 ما عليش زائر 66495 كذبة جديدة \| 15/04/2009 08:35:05 مساهمات عقارية وبعدين أسهم وطلع لنا CD وبعدين طلعت سوا وبعدين مزاين الإبل وبعدين مزاين التيوس والسلق والحمام ومن سيربح المليون وشاعر المليون وستار أكديمي 0000 كل هذي أساليب تحايل على شان ياخذون فلوسك يا ( خبل ) معليش هالحين ما باقي إلا مزاين مكاين الخياطة والله أعلم وش بيكون بعد أم أسد يمكن يكون طياس برمان 00000تحياتي 13 أم وافي زائر 66514 :) \| 15/04/2009 10:03:44 .. لا تعليق .. .. الصرخات والصرعات صارت في كل شيء .. 14 مصطفى زائر 66517 نفس الخبر \| 15/04/2009 10:12:05 يا اخواني اذا كان الخبر صدق او لا اوصيكم تكثرو من زياراتكم لجدتكم عشان مثل هذه الاخبار ما ينفعك الا جدتك يعني عشان تاخذ منها المكينه هههههههههههههههههههههههههههه 15 هديل زائر 66523 مكائن سنجر \| 15/04/2009 10:40:17 السلام عليكم ورحمة الله وبركاته يا بعدهم أنا قريت الموضوع وحبيت اعلق عليه معنى ما يهم لكن الجرايد علقت يعني ما يحتاج الموضوع شد حيل وتلفظ ماله معنى لو جاء بصيغه ثانيه كان أفضل وبعدين خلي الناس تعبر عن مشاعرها بعدين وشو شعب مع القوم يا....ليه؟؟؟؟؟أنت من باريس عيب بعدين السوق فيه أخوك وأبوك يعني كل شي ينطبق عليهم مثل ما نطبق على الناس الي تلفظت عليهم(مع احترامي) ياااااااااااااااااااخفوق الروح واتمنى الجديد أفضل ودمتم 16 بندر زائر 66528 المكينه وماادراك ملمكينه \| 15/04/2009 11:06:22 نحن في شهر ابريل وفي هذا الشهر بذات تحدث اكبر كذبه فيليت تعقلون اشوي وتشفون الي له مصلحه في هذه الدعايه (الكذبه)وانتبهو لدراهمكم يااصحب العقول والا باقي متبتم من بطايق سوا تكفون مستشفي المراض النفسيه مليان مليان تقبلو تحياتي 17 ـجنرالـ القــــصــــيــــمـ زائر 66560 الشعب السعودي والاشاعات \| 15/04/2009 13:38:09 ذكرتوني بسالفه الشيخ المنجد اللي يقول في قديم الزمان صاحب رجل رفيقه بسفر وعندما اقتربو من قريبه راهن الرجل رفيقه وقال له اتتحداني ان اكتشف هذي القريهب ان اهلها مغفلين او لا فقال رفيقه نعم اتحداك وذهب الي القريه وقال اللي يطلع لسانه ويوصله خشمه يدخل الجنه وراه عن حديث يعني كذب عليهم وجاء وقت صلاه وشافهم كلهم بالمسجد بطلعين السنتهم عند خشومهم يعني مخفااات وحنا يا الشعب السعودي كذالك نصدق اي شي ياخي اعقلو تراكم منتم بزارين او خبول ياخي مدري وش اقول ترى ما دمر الشعب المصري الا الدعيات الكاذبه لا احد ينقل شي وهو ما شاف بعينه عموما الله يعين عليكم وع اشاعاتكم وترى سالفه المنجد ما ظبتها بالظبط يعني جايبلكم المهم يلا سلام عليكم 18 Emily Rose زائر 66607 السبب \| 15/04/2009 16:42:43 المسالة بكل بساطة ايها الاعزاء ان الشعب يعيش هذة الايام حالة من القحط وبحاجة الى اي شي يروي احتياجاتهم وليسو بلهاء كما علق الجميع فمن يكرة ان يصبح بيدة 100 الف او 50 الف او حتى 10 الاف من اشياء بسيطة يظن انة لم يعد بحاجة لها ان الحاجة المادية هي اللي تدفعنا الى هذا الشي وربما الايام القادمة تكشف لنا اشياء اسوء من مكائن الخياطة 19 عذاب زائر 66613 ihddddddd \| 15/04/2009 17:17:40 امي خذت جواله وتصلت على ختي بتشوف كنه المكينه تطفي الجوال والله مسكت بطني من الضحك انا ومرت اخوي ومسكناها طنز عللى امي والمكينه ضلت ساعه بي عشان الالف الي بتربحها 20 مجهول زائر 66626 خخخخخخخخ \| 15/04/2009 18:10:34 هههههههههههههههههه احس انهم خربوا مزاجك 21 رآشد العامري .. زائر 66688 .. ابوهاا من أشاعه .. \| 15/04/2009 23:47:16 .. الشعب أعماه الطمع .. صرآحه شي .. يثير القهرر .. لهآ الدرجة الانجراف ورا الاشااعات .. بس اللي يلطف الامر .. .. أنه هالدوششه .. دررس .. .. وأكيد ماراح يتكرر .. زلا ينسى .. .. واتمنى .. زيادة الوعي .. . تحياتي لشخصك .. 22 عاصمت الحب زائر 66703 حاجه مو معقوله \| 16/04/2009 01:29:00 والله حاجه مو معقوله الي صايره هذه الايام مكاين خياطه بأغلا الاثمان 23 بندر زائر 66728 على عشره \| 16/04/2009 04:29:07 انا ماكسرو خاطري الا كم عجوز معها ماكينه ورابطتها بسلسله برجلها خافت تنسرق منها من كثر العالم الي تشوفوهم قسم الشوارع تقفل بس قريبا راح نسمع اشياء اكثر من ذي انواع السوالف والضحك الي نسمعها من العالم وانواع الاتصالات اخر كلامي بس . . . . . . . . . . ماعندكم ماكينه هههههههههههههههههههههههههههههههههههههههه 24 مجهوله زائر 66729 يقولون ينقطع الارسال بسبب الزئبق \| 16/04/2009 04:29:30 والله قمة الغباء ياناس والله اي شي فيه مغناطيس اذا حطيتوا الجوال تحته انقطع الارسال فمكاين الاسد فيها مغناااااااااطيس مو زئبق عشان كذا ينقطع الارسال 25 mono عضو 66734 كل هذا وما كفاهم \| 16/04/2009 07:02:24 انا بصراحه من سمعت السالفه وانا هاقيه انها اشاعه من وراها مو مهم بس الاك يد ان سرعة الاشاعه تسبق الضوء من الشمال للجنوب وشرق وغرب , وكل ما جابوا سيره قلت اي هين مساوم فيه بس مافي احد شاف شي دفع وكع فلوس الا كان واحد اعماه الطمع الله يكفينا شر الفلوس انا خفت الناس تذابح بسبتها , عاد اختي تقول الحقي خذي لك مكينه وش انتي خسرانه , اهل العقول براحه والمصيبه في ناس مفتحه وشاطره بس بانوا يطهبلون مع المطهبلين 26 واحد من الناس عضو 66753 عرض \| 16/04/2009 11:25:20 ابي اشتري بيت بعشر مكاين 27 فرح زائر 66755 ياربي ناس فاضيه حدها \| 16/04/2009 11:48:54 ماحد يشوف شي الا يصدق ياربي بس تصدقون شي مايدخل العقل عاد امي مكينتها اخذتها ورمتها بالزباله قبل كم شهر تقول مسويه زحمه ههههههههههههههههههه بس من جد ناس فاضيه وفعلا هذي كذبه ابريل ههههههههههههههه 28 نورع زائر 66760 فيه اسلوب \| 16/04/2009 12:35:30 اعجبني موضوعك خفوووق الرووح بس فيه اسلووب واحترااام وكلن يتكلم عن نفسه اذا انتي شايفه اخوك زوجة خالك مخفاات ومجانين ومع الخيل يا شقره لا تحكميين على الشعب كله واذا على ثقااافتكم يمكن انتوا صح1 بالمييه بس بااقي الشعب لا والكل يشهد على كذا بلييييز بالمرااات الجااايه احترمي اللي تكتبين لهم ... 29 محارب سنجر زائر 66761 الزئبق الاحمــــــــــــر \| 16/04/2009 12:47:29 اول شي امسي عليكم بالخير .. مع احترامي للشعب السعودي الذي يركض وراء الشائعات والخزعبلات والله شي يحير مكينه سنجر ب25000 ريال هههه زمان ب200 ومحد يطالع فيها المهم الى كل واحد عليه ان يحذر اهله قبل ان يقع الفاس في الراس ياعالم ترون هذي كذب نقولها ونمشي وراهااااااا. تحياتي لمكائن سنجر. 30 احمد الحربي زائر 66778 تعليق \| 16/04/2009 15:02:48 السلام عليكم ورحمة الله وبركاته من خلال تلخيصي لردود المشاركين في القروب والمواقع الاخرى ناس مؤيده الفكره وهي التي تملك ماكينة خياطه والمعارضون اغلبهم ما عندكم مكاين ومقهورين بعدين السالفة بسيطه جدا يعني انت معك مكينة بيعها وايش المشكله في بيعها مادام في ناس بتشتريها اما نقول انها تخلف وما ادري ويش وبعدين اغلب الي يبعون مكاينهم هم مساكين ما صدقوا على الله يجيهم قرشين 31 abeer زائر 66795 يحسبه العطشان ماءا \| 16/04/2009 16:55:21 رغم ان سالفة مكينة الخياطه ما شدت انتباهي ابدا ولا اثارت فضولي ، لكني اتفهم وضع المساكين اللي فعلا رجوا من وراها شيء لان السراب مايجي الا العطشان ،، الله يعين حال الجميع ويرزقهم يارب .. وبالتوفيق 32 سعود زائر 66806 رزق المهبل \| 16/04/2009 18:03:51 رزق المهبل على المجانين 33 قلوب بلامشاعر عضو 66827 هه \| 16/04/2009 20:33:05 هههههههههههههههههه شفتوا كيف من جد زحمه والله احس اني انكتمت اشوا اني مارحت<----لايكثر اشكرك من قلب الحدث 34 al-jadel عضو 66860 ههههههههههههههههه \| 17/04/2009 03:47:27 شسالفة الناس انهبلت على المكاين 35 المجنون عضو 66922 رد \| 17/04/2009 15:28:26 الحمد لله علي نعمة العقل شوف مكاين ويش سوت عاد لا جا المسيح بكنوز الارض ويش 36 آفتخر لكوني آنثىٍُ ~ عضو 66940 خخخخخخخخخخخخخخخخخخ \| 17/04/2009 17:26:42 الله لآيبلآآآآنــآ بس .. تسسسلمي ياعسسل ,, ~ 37 عمة نواف عضو 66965 سنجر \| 17/04/2009 21:21:37 عن جد السؤال المهم بعد تساؤلات الجميع هل تعرفون احد أستلم مبلغ مهول يعني استفاد من هالإشاعه ؟ ودك هالعالم تنساق ورا كل شي وانت استفيد التجاره شطاره !!! <<<== راحت شالت الطحانات البرتقاليه القديمه واي شي قديم بالحفظ والصون عندي غدي نصير تجار باتسر تحياتي للجميع 38 رائد زائر 66981 ياليل \| 18/04/2009 00:10:27 ياعيني على شعبنا الفله وربي واحد من اصاحبي جدته باعة وحده 15 الف لووول وربي مره طحس الله يخارجنا بكره يقولك علبة الببسي تطرد الجن 39 basool زائر 66998 تصدقون مدري وش السالفه \| 18/04/2009 02:13:09 وش الفايده منها 40 abadee14 زائر 67001 ooooooooooo \| 18/04/2009 02:37:15 والله وسم عار على الشعب عامه ما نقول الا الله يكفينا شر الشإعات 41 brwanh زائر 67223 الى متى ؟؟ \| 18/04/2009 18:52:23 شكرا على الموضوع..... لكــــــن ماحبيـــت تلفظــك وتطـــآولك !!! كان باامكانك تعلقين على الموضوع لكن بطريقــة تحترميـــن فيــها أهـــل أرضـــك ياأختي الفاضلـــــه!! الى متى احنا شعب مهبل وشعب مع الخيل ياشقرا << في مناقشة المواضيع الاجتماعيه لمتى نستهزيء ببعضنـــآ ؟؟؟ صدقينــــي مارآح تفيــدين المجتمـــع بهالتعليـــق الجـــآرح !! ماكتــبت من بــآب النصيــحه أختـــي ... وعذرآ إن أخطــــأت ..!! 42 الدكتور فارس عضو 67386 ناس اغبياء \| 19/04/2009 09:41:27 صحيح شعب متخلف 43 hussin زائر 67484 شكرا على الموضوع \| 19/04/2009 16:38:21 ياشباب احد خبرلي مكينه للبيع هههههه ههههههه تروها على 100000 44 جمال زائر 67617 مايجوز يااخوان \| 20/04/2009 01:32:38 المثل القائل (رزق المهبل ع المجانين .. مايجوز لان الرازق هوا الله سبحانه استغفرالله واتوب اليه 45 ابو دعيع عضو 67799 \| 20/04/2009 23:43:02 واللــه نــاس فـلضيــه عنــدهم الأحســـاس تعبـــان

	اقسام الملتيميديا
	العاب \| ملفات \| بلوتوث \| صوت \| صور \| فلاش \| فيديو \| منوعات

عضو في اتحاد المواقع العربية الكبرى

شبكة أبو نواف

موبايلي

موبايلي

صورة + فيديو : شعب مع الخيل ياشقرا و( مكائن سنجر )