السلام عليكم ورحمة الله وبركاته

طاااااااااااااااااااط .. طاااااااااااط .. عووووووووو طشششش

لا حول ولا قوة إلا بالله .. صراحة ًمدري متى بيدفنون ذا الحفرة اللي في وسط الشارع .. الحين صار لنا ثلاث ساعات بس وحنا هنا وطاح فيها سيارتين يمكن .. يا أخي إذا ما يبون يدفنونها على الأقل يفتحون جمبها وكالة سيارات أو يفتحون فرع صغير للصناعية ويخلون الناس تصلح على طول .. أو أقلها يعني يحطون رقم راعي سطحه جو في الحفرة عشان كل ما طاح واحد يتصل عليهم .. و طبعاً إذا بيحطون الرقم ياليت يحطون كبينة هاتف عمومي تحت لأن الحفرة ما راح يكون فيها أبراج .. قاطعت كلامه وخاطبته ببسمةٍ متصنعة على وجهي : أنا اقول تمسك بالخيار الأول وطالب بأنهم يدفنون الحفرة

أوه صح .. يا لرداءة أخلاقي لقد نسيت أن أعرفكم بنفسي .. اسمي ( مستر أي ) في العقد الثاني من عمري , أحمل شهادة البكالوريوس , طموح وجميل و وسيم .. ذو رأس مثلث ولا أعتقد بأن هذه المعلومة بجديدة عليكم

أعمل لدى شركة متعاقدة مع إحدى شركات الجوال الحديثة العهد في السعودية , براتبٍ زهيد طبعًا .. أما بالنسبة للشخص الذي كان يتكلم قبل قليل فهو زميلي ( برّاية ) .. عمره ليس ببعيد عن عمري , يعمل معي في نفس الشركة المتعاقدة .. ويحمل شهادة البكالوريوس , ذكي يحب التطوير والاختراع , وهو شاب نحيل جدًا لا يخرج من منزلهم إلا وقد وضع حذوه حصان في جيبيه كي لا تطيره الريح

نحن الآن على رصيف مول ضخم حديث الافتتاح نقوم بتصليح بث مقوي للبرج الذي قد وضع فوق سطح المول .. يالحبيب وش جالس تسوي ؟؟ .. يا الله اخلص ورانا شغل ترى !! .. أوه لقد نسيت أن أخبركم عن زميلنا الآخر .. اسمه ( دباسة ) بطبعه دائم التشاؤم وسريع الغضب .. لذا خلوني أروح لمه قبل لا يجي يكسر الموضوع فوق راسي

* * *
خاطبنا ( دباسة ) بغضب : يلعن إبليسكم للحين ما عرفتوا وين العلة ؟؟ .. يالله اخلصوا علي نبي نمشي .. ترى الراتب إللي يعطونا إياه ما يسوى نجلس عشانه كل هالوقت !! ..سكت للحظة ثم أستطرد .. تصدقون أن الباكستاني اللي يركب الأبراج والمقويات لشركات الجوال يأخذ أكثر من راتبنا .. والقهر أنه ما معه شهادة ولا شيء !!

يترك( برّاية ) ما في يده من أسلاك وأجهزة ويرد عليه بخوف : أعذرني على كلامي يا دباسة بس ما تلاحظ أننا أنا ومستر اللي جالسين نشتغل وأنت ما تسوي شيء ؟؟ .. أقترب ( دباسة ) وأخرج نظارة ( برّاية ) من جيبيه وقال له : كم مره قايل لك يا شاطر إذا بغيت تتكلم تكلم وأنت لابس نظاراتك عشان أدري وينك فيه .. كل تو وأنا جالس أناظر السلك اللي جمبي

قاطعتهم مصرفًا ومهدئ ً للوضع : يالله الجو اليوم جميل صراحة .. وش رأيكم يا شباب بعد ما نخلص نروح لكوفي ؟ .. عازمكم على حسابي .. نظر إليّ ( دباسة ) نظرات مريبة ثم أردف قائلاً : عازم مين ؟؟ .. وعلى حسب مين ؟؟ .. أول شيء سدد لبراية الخمسين ريال إللي يطلبك .. وإذا سددتها له علمني عشان أخذها منه لأني أنا أطلبه خمسين بعد .. وثاني شيء العزايم والكوفيات ذي مهيب لي أنا وإياك الله يصلحك ..

تصدق مرة عزمني واحد من أخويائي لمطعم راقي .. تدري وش أول شيء سويته ؟؟ .. حطيت جوالي على الصامت .. تدري ليه ؟؟ .. لأني خايف يرن وأطلعه قدامهم .. يا أخي مليت من كثر ما أحط الجوال في جيبي من الفشيلة .. ودي أكشخ ولو مرة وأحطه على الطاولة وأنا أكل

قطع ( دباسة ) كلامه حين مرت سيارة BMW فارهة بجوارنا .. ثم أستطرد : شف شف ما شاء الله تبارك الله .. أيه هذا هو راعي العزايم , بالله شف وش معه سيارة .. تدري خل سيارته على جمب وشف شكله وشلون أطخم ويخلي الناس تحترمه , مهوب مثلك يا مستر كل ما مرت سيارة من هنا هدت السرعة وكله بسبب راسك المثلث يحسبونه لوحة " احذر " المرورية !! .. تصدق المفروض يستخدمونك المرور كـ لوحة إرشادية متنقلة

في هذه الأثناء نزل صاحب السيارة الفارهة فإذا به قد لبس نظارات شمسية نظرت إليه ثم تغيرت ملامح وجهي إلى البسمة المليئة باللكاعة وقلت لدباسة : يا أخي أولاً وأخيرًا احمد ربك على الحال اللي أنت فيه .. بعدين هالزين والغني اللي جالس تشوف مهوب شرط يكون كامل ومرتاح في كل شيء .. تأكد أن كل شخص مهما كان فيه مميزات فيه عيوب , غالباً تكون العيوب ظاهرة ومن خلالها يحكم الناس للأسف !! .. طبعاً أكيد أنت فاهم الكلام اللي قلته كله لأنك إنسان ذكي <<-- من قال إني خايف ؟

عموماً خلنا نرجع لراعي السيارة يا دباسة .. للأسف راعي السيارة إللي أنت مغير تمدح فيه وتحسه متهني وكل حياته سعادة طلع أعمى !! .. التفت ( دباسة ) لصاحب السيارة ونظر إليه بازدراء و قبل أن يتفوه بكلمة إذا بصاحب السيارة يخلع نظارته ويسلم على أحد أصحابه بابتسامة تكاد أن تشق وجهه .. استطردت وقلت : أوكي يمكن استعجلت وما صار أعمى بس تراني متأكد أنه حزين

يقطع جدالنا صوت متحشرج مخيف .. التفت أنا ودباسة إلى براية فلم نجده .. ذهبنا كي نتفقده بالقرب من البوكسية فلم نجده أيضًا .. ألقينا نظرة بداخلها فإذا بنا نسمع صوت من بين العديد من الأسلاك : الوضع هنا سليم وما فيه أي عطل مبين معي !! .. يجيبه ( دباسة ) : الله يهديك نلعب حبشه حنا يومك تتوزى بين الأسلاك ؟؟ .. هات يدك خلني أطلعك

خرج برّاية من البوكسية وبدأ في نفض الغبار عن نفسه ثم قال : البوكسية سليمة يبي لنا ندخل المول ونشيك من جوا .. وبالفعل دخلنا المول وبدأنا في تعقب الأسلاك والتوصيلات باحثين عن المشكلة .. صعدنا إلى الدور الثالث والذي بدوره لم يفتتح بعد وأخذنا جولة تفقدية إلى أن وجدنا المشكلة

صعد ( بّرايه ) على السلم وطلب مني أن أحمل صندوق المعدات الخاص به وبدأ في العمل .. وبينما أنا أحمل الصندوق في يدي وجدت جهاز غريب!! .. أخرجته من الصندوق وقلت بدلاخة : الله يهديك يا براية .. ترى ما عندنا اختبار رياضيات اليوم عشان تجيب معك الآلة الحاسبة ..!

أجابني ( برّاية ) وهو منهمك في العمل : هذا أخر اختراعاتي يا مستر .. جهاز يخليك تتصنت على المكالمات .. بس طبعاً لازم تكون قريب ولازم توجه الجهاز لشخص يكلم بالجوال أو بالتلفون حتى ! .. خطف ( دباسة ) الجهاز من يدي وأتجه إلى النافذة وقال : ما راح نتأكد إنه جهاز تصنت إلا لما نجربه .. أشار بالجهاز إلى محل إلكترونيات موجود في الدور الأول

في البداية سمعنا : تششششش ( الجهاز يوشوش ) .. فقال ( دباسة ) لي بغضب : ياليته آلة حاسبة يا مستر , طلع رادو !! .. فجأة سمعنا صوت ناعماً يقول : أهلين .. الله يخليك أنا شفت إعلانكم في الجريدة وحبيت أستفسر عن اللاب توب الموجود في الإعلان .. ممكن أعرف وش مواصفاته بالضبط ؟

هنا عرفنا أن الجهاز أشتغل .. وضعت ما في يدي واقتربت من دباسة حتى كدت أن أعانقه وبدأنا نستمع له وسعابيلنا تتقوطر من تحتنا من شدة الخقة على الصوت الناعم فإذا بنا نسمع : بصي حضرتك القهاز ده بالزات احسن قهاز موقود عندنا دلوئتي !! .. ليييييه ؟؟؟ .. ئولتي لي ليه بئه ! .. لأنو فيه وايلرلس .. ولأنو فيه بلوتوس

تششششش .. ( يعني لازم أقول لكم كل شوي أن هذا صوت الجهاز وهو يوشوش ؟ ) .. التفتُ إلى ( دباسة ) وخاطبته باستهجان لأول مره في حياتي : ليه طفيت الجهاز ؟؟ .. شغله خلنا نسمع ! .. أجابني ( دباسة ) بخبث : عندي ذا الجهاز وأجلس أتسمع به مواصفات كمبيوترات ؟؟ .. تعال تعال .. أمسك بيدي وذهبنا إلى غرفة أخرى ومن ثم أشار بالجهاز إلى فتاة كانت تمشي في أحد الممرات وقد أخرجت جوالها من حقيبتها كي ترد عليه

تششششش .. ألو .. عبيررررر وييينك يالشينة ؟؟ .. فاتك ما شفتي الفلم الهندي معي .. يجنن يجنن يجنن يجنن صراحة .. أحسن فلم هندي شفته لشاروخان !! .. تجيبها عبير بصوتٍ واطي : أكلمك بعدين يا خلود أنا في السوق الحين .. ترد عليها خلود : أقول لك يجنن وأحسن فلم وتقولين لي بعدين !! .. تصدقين أنه أحسن من ( كوتش كوتش هوتا هي ) و ( كل هونا هو ) ! .. ما كنت أتوقع شاروخان بيمثل فلم زي كذا صراحة .. والأغاني شيء خطيرررر مرة .. تدرين بس , يالله في أمان الله بروح أعيد أغنية الجبل جايزة لي .. تششششش

حرك دباسة الجهاز وأشار به على فتاة أخرى : تششششش .. هلا سارة , كيفك ؟ .. هاه للحين صاملة ؟؟ .. تجيبها سارة : أيه مها , للحين صاملة .. عارفة وش بتقولين " لا تخربين حياتك وحياة عيالك " !! .. وإذا كنت أبي أطلب الطلاق وش المشكلة يعني !! .. أنتي يا مها عارفتني أكثر من غيرك .. أفنيت حياتي لزوجي إللي ما عمره عبرني أو ناظرني حتى

خدمته وحبيته وعطيته قلبي .. وهو في المقابل وش عطاني ؟؟ .. بس يكرر جملة ( أنا ما قصرت عليك بشيء ) !! .. تمتمت مها : بس يا سارة …. تقاطعها سارة : لا بس ولا حاجة .. أنتي أنثى مثلي وعارفة وش نحتاج .. أنا ما تزوجت عشان أشوف المخزن مليان أكل والبيت مليان أثاث !! .. أنا أبي شخص يحبني وأحبه شخص يبادلني المشاعر .. هنا تأثر دباسة بكلامها فحضني لا إرادياً !

يتوقف الجهاز عن الكلام للحظات وينظر إلينا نظرات مليئة بالريبة من وضعنا المخل ثم يتنحنح ويستطرد .. زوجي يا مها جربت معه كل الطرق , كل الكلام الموجود في المنتديات طبقته وكل المواقع إللي تزعم إصلاح العلاقة الزوجية , كلها ما فيها فايدة ! .. تخيلي مرة قريت في منتدى أن تغيير الملابس قد يؤثر على العلاقة الزوجية .. تدرين وش سويت ؟؟ .. لبست لزوجي ساري , إيه إيه الساري حق الهنود , وجلست أدور في البيت كل اليوم

وحضرته جالس قدام التلفزيون ولا يدري عن شيء .. أخر شيء صرت أمر من قدامه كل شوي لعلى وعسى يلاحظ .. وفي الأخير وش يقول لي ؟؟؟ ( ما صليتي للحين ؟ .. وإلا ليه لابسه جلال الصلاة ؟؟ ) .. مو مشكلة نقول مسكين والساري ثقافة خارجية ولا انتبه له .. مرة من المرات شريت حجاب لون موف ومطرز بأصفر .. يعني بيلاحظه لو أنه أعمى .. وجلست أدور به في البيت برضو وفي الاخير يوم لاحظني حضرته وش قال ؟؟ .. ( الله يهديك يا سارة .. أحد يتروش في ذا البرد !! ) .. تخيلي يا مها يحسبني حاطة فوطة على راسي !!

المهم شوي وبتصل عليك .. تششششش .. نظرت إلى دباسة فإذا بعينيه تكاد تدمع من شدة التأثر .. مسح دمعته بطرف كمه ومن ثم حرك الجهاز كي يبحث عن اتصال أخر ( أمحق تأثر ) : تششششش .. ولأنو فيه كرت شاشه عالي الدقة .. ولأنو فيه ذاكرة عالية الجودة .. ولأنو … تششششش .. حرك دباسة الجهاز وقال : فاضين لك أنت ومواصفاتك بعد .. شكله جالس يقول مواصفات سفينة فضائية !! .. نغزته على كتفه وقلت له : شف هذاك الرجال إللي مرسم وكاشخ .. هذاك إللي واقف قدام محل الهدايا

ضحك دباسة بخبث وقال : ازهله .. ومن ثم أشار إليه بالجهاز : تشششش .. ابشري .. بشري .. وش تأمريني عنه بعد ؟ .. ابشري يا الغالية ما طلبتي شيء .. في هذه اللحظة نظر إلى ( دباسة ) نظرة ولسان حاله يقول ( عرفت تختار يا كلب ) .. بشري .. طيب ما قلتي لي يا يمة .. الخبز أجيبه مفرود وإلا صامولي ؟؟ .. تشششش .. التفت إلى دباسة ونظرت إليه مستغربًا : وش فيك طفيت الجهاز ؟؟

أجابني : الله يقطع بليسك يكلم أمه , وش نبي به بالله عليك !! لو جالسين نتسمع شوي كان سمعناها تشاوره وش يبي تطبخ له غداء .. سكت للحظة ثم استطرد : مهوب كأن الغرفة صغرت شوي والجدار قرب لمنا وإلا يتهيأ لي ؟ .. ابتسمت وقلت له : أكيد يتهيأ لك .. كمل كمل

بدأ دباسة يحرك الجهاز بشكل عشوائي باحثاً عن من نتصنت عليه : تششششش .. هلا يا مها ، تراك ازعجتيني .. قلت لك خلاص معزمة على الطلاق يعني معزمة !! .. تجيبها مها وهي تبكي : تذكري يا سارة أن هذا مهوب الحل ! .. تششششش

ينظر دباسة إلي ويقول : قل عني مريض , قل عني مجنون .. بس الجدار ذا يتحرك أكيد !! يا أخي الغرفة صغرت وإلا لا يا مستر ؟؟ .. أجبته بالنفي فلم يكن منه إلا أن اتكأ على الجدار وقال : تصدق يا مستر .. فعلاً البنت إللي قبل شوي صادقة هذا مهوب الحل صراحة .. تدري ليه ؟ لأن … وقبل أن يكمل جملته إذا بالجدار الذي خلفه يتحرك ويدفعه فيسقط على الأرض .. صدمت برؤية رجل ضخم من رجال الهيئة لم ننتبه له لكون الغرفة مظلمة .. حقيقةً كنا طوال الوقت نظنه جدارً

خاطبنا رجل الهيئة قائلاً : لو سمعتوا أن إحدى شركات الخمور الضخمة أنشأت مشروعاً خيرياً .. طبيعي بتلقون أنفسكم تقولون ( خلهم ينصحون نفسهم في الأول ) .. هذا المثال للأسف ينطبق عليكم .. فلقد تجاوزتم الحدود , وتنصتم على الخصوصيات ! .. أجابه دباسة بخجل : صادق يا شيخ .. يضع رجل الهيئة يده على كتف دباسة ويقول له : الكلام هذا تقوله في المركز عندنا

* * *
القي القبض علي أنا ودباسة ورحنا ضحية آلة حاسبة ( للحين حاقر الجهاز ) .. وأما بالنسبة ل ( براية ) فم زال يعمل على إصلاح البث ولم يعلم بما حصل لنا إلى الأن .. وتوجد شائعات بأنه تزوج إحدى الأسلاك وعاش معها في بوكسية إلكترونية حياة سعيدة وخلفوا توصيلات وأفياش كهرب .. وأما الجهاز فلقد سقط على الأرض ونسيّ هناك وأخر ما سمع منه هو : .. ولأنو فيه هادريسك .. ولأنو فيه ماوس .. ولأنو .. تشششششش

النهاية

مـدونـتـي
www.mr-azoz.com

سبحان الله وبحمده .. سبحان الله العظيم