مقالب الليلة الأولى من الزواج

صلوحكا بتاريخ 22/03/2009 في شهر 3/2009

•

7,721 +

82,287

• الطباعة: 37

• الإرسال: 4

• التعليقات: 45

• مرات التفضيل: 0

بسم الله الرحمن الرحيم
أسعد الله أوقاتكم بكل خير

موضوعنا اليوم عن مقالب الشباب اللي يسوونها لأخوياهم في أول ليلة زواج !! وبصراحة هالشي مهيب حالة نادرة جدا .. بالعكس ظاهرة منتشرة بين الشباب .. ولكن تختلف قوة المقلب من شخص لآخر
وفيه ناس يكتفون بعمل مقلب ليلة العرس وفيه ناس يسوون المقلب يوم الزواج قبل التوجه للقصر او في القصر ..
لكن مسألة إن المقلب يوصل لسكن الزوجين .. وفي أول ليلة !! هذي بصراحة مصيبة .. أو خلوني أقول .. قلة حي
فيه مجموعة مواقف بذكرها لكم .. وراح اترك لكم تقدير حجم ( المأساة ) في كل موقف !! بحجة .. يارجاااال ضحك واستهبااال
المواقف طبعا سمعتها من بعض الزملاء .. واترك لكم التعليق

الموقف الأول : بوكيه ورد

هذا الله يسلمكم .. ليلة زواج العريس ,, كان مجتمع مع اخوياه بالاستراحة .. تعرفون بكره زواجه وقال آخر ليلة ابيها مع الشباب بالاستراحة .. عاد من ضمن السوالف ، قالوا هاه وش تبي نسوي لك مقلب ؟؟ قال لا هين ما تقدرون ..قالوا شف المقلب مسوينه مسوينه .. مير تبيه بالقصر والا قبل لا تروح والا بالفندق
الرجال مسكت معه وقال أبد تحدي .. ماتقدرون تسوون فيني مقلب
تزوج الرجال وتوجه للفندق مع عروسته .. وتوهم داخلين الفندق وجالسين أول ليلة ،، والفندق مرتب ومتكتك .. رن جرس الغرفة .. فتح واثره العامل اللي يشتغل بالفندق ومعاه سلة فواكه .. هدية من الفندق للعرسان
اخذها وحطها عند العروس .. جلس شوي ورنّ الجرس مرة ثانية ، راح فتح الباب واثره العامل معه بوكيه ورد وفيه كرت
أخذ البوكيه وحطه بالغرفة .. على أساس إن البوكيه هدية من الفندق لهم ، استأذن زوجته بيدخل دورة المياه - الله يعزكم - فزوجته كانت تبي تشوف الكرت اللي في البوكيه .. وش مكتوب فيه .. وكانت الصدمة :
ألف ألف مبروك الزواج .. وأتمنى لك التوفيق في حياتك الجديدة
..أموله..

انهارت الزوجة !! منهي أموله ؟؟؟ وفي ليلتي .. تبارك لزوجي وبكل وساعة وجه !! طلع زوجها من دورة المياه واثر زوجته تصيح وتشاااهق .. وش فيك يابنت الحلال ؟؟ وش صاير .. عطته الكرت اللي بالبوكيه .. الرجال انهبل .. قسم بالله ما اعرفها ولا ادري منهي .. والبنت مسيكينة الدموع اربع اربع !!! شوي ويرنّ الجرس مرة ثانية .. واثره العامل معه بوكيه ورد ثاني ومعه كرت
مكتوب فيه :
ألف ألف مبروك زواجك .. ونتمنى لك التوفيق في حياتك الجديدة
أخوياك بالاستراحة ( أموله )
والرجال يوريها زوجته .. شوفي قسم بالله انهم اخوياي .. هم اللي مسوين المقلب .. وبالأخير اقتنعت البنت !!!

يعني خربوا عليه أول ليلة في حياتهم .. بسبب هالتصرف !!!!!

***

الموقف الثاني : خمسين ألف ريال

هذا الله يسلمكم واحد تزوج وكانت اموره كل شي زي اللوز ، وكل شي عدا على خير
أخذ زوجته وراحوا لبيتهم الجديد .. وبينما هم جالسين ( ركزوا على بينما ) المهم .. دق جوال الرجال واثره واحد من اخوياه
سلام عليكم .. عليكم السلام ,, ألف مبروك يابو فلان .. والله يوفقك يارب .. واعذرنا ماقدرنا نبارك لك بالقصر .. لأن حنا جايين من الديرة .. وضيعنا الطريق شوي .. ويوم وصلنا واثر المعازيم ماشين ولا قدرنا نبارك لك .. بس قلنا نبارك لك لو بالتلفون
قال انتم وصلتوا يعني ؟؟ قالوا ايه .. قال تعشيتوا ؟؟ قالوا لا والله بس كنا نبي نبارك لك .. قال ابد والله ان تمروني تتعشون عندي .. دامكم جيتوا وتعنيتوا من الديرة .. الا تجون تتعشون عندي
يا ابن الحلال .. عدل بدل ،، الرجاااال مصرّ الا يجون
البنت طبعا طااايرتن عيونها !! وش اللي تعالوا تعشوا عندي ..!! وش هالزوج اللي توهقت فيه خخخخخخخخخ المهم أول ماسكر السماعه قال لزوجته هذولا أخوياي جايين من الديرة ولا لحقوا على العرس بالقصر .. وفشيلة إني ما أستقبلهم ،، أنا بروح اجيب اغراض العشاء وأبيك تطبخين لنا !! الحاصل راح وجاب رز وبصل وطماط وملح وكل شي .. وحطها بالمطبخ قال اطبخي لنا .. اخوياي بيجون الحين
البنت تطبخ وتصيح وتقول في نفسها .. بكره أنا في بيت أهلي .. وش هالعييييييشة
يوم تعشوا وخلصوا .. دخل الزوج على زوجته بالصالة .. وعطاها مبلغ 50.000 ريال قال تفضلي
قالت وش ذولي ؟؟ قال هدية لك .. بمناسبة هالموقف اللي صار اليوم !! قالت شلون وش السالفة ؟؟

قال السالفة ومافيها ان الموضوع تحدي كان بيني وبين الشباب قبل الزواج .. قايلين لي اتحداااك تخلي زوجتك بأول ليلة من زواجها تطبخ لنا !! والتحدي كان من خمسين ألف ريال .. واخوياي ما جو من الديرة ولاهم يحزنون .. الموضوع ومافيه تحدي ,, والمبلغ هذا من حقك انتي

البنت بلعتها .. وانبسطت لسبب واحد .. قالت اشوى ان هالطبع فيه مب صدق !! والا كان علوم ,, وأخذت الدراهم .. بس وش الفايدة لا خربوا أول ليلة في حياتك الجديدة !!

***

الموقف الثالث : بخاري

هذا واحد قرر يتزوج ،، ومشت أموره تمام .. وقالوا له أخوياه .. ترى لازم حنا نسوي لك شي في يوم عرسك .. وترى حنا اللي راح نجيب لك العشاء اذا رحت مع زوجتك للفندق .. بنتكفل فيه وبنجيب لكم شي مرررتب
الرجال قال أبد ياشباب ماتقصرون ويكفي شعوركم .. ومن هالكلام
واحد من الشباب قال للباقين .. تكفون خلوا العشاء علي انا لحالي ،، الرجال هذا من أعز الناس عندي .. وودي يوم عرسه أجيب له أنا عشاه .. وخلونا حنا مرة ثانية نجيب له شي يصير مننا كلنا .. قالوا دام كذا أجل خلاص
تزوج اخونا في الله وراح مع زوجته على أساس إن خويه هو اللي بيجيب له العشاء ويوصله للفندق بنفسه
بعد ماجلسوا فترة بالفندق .. رنّ الجرس وفتح العريس الباب وأثره خويه
والمصيبة إنه جايب له العشاء كيسة رز بخاري وبصل وجرجير
ويمدها له وهو ميت ضحك
وش موقف الزوج ؟؟؟؟؟؟؟؟؟؟ أترك لكم التعليق

***

الموقف الرابع : النور

هذا واحد تزوج وراح مع زوجته لبيتهم الجديد والمعاريس جالسين ومستحين .. وصحن فواكه .. وعصيرات وكل واحد يسترق النظرات .. وطاقتهم أم الركب وحالتهم صعبة !! شوي الا يطفى النور
يااااوك وش السالفة .. طلع الزوج وفتح الطبلون حق الكهرب واشتغل النور
رجع مرة ثانية .. وطفى النور .. وراح مرة ثانية وشغله
ومرة ثالثه ورابعه وخامسه !!! وجلس على هالحالة من 12 بالليل لين أذن الفجر خخخخخخ .. والسبب ؟؟ أخوياه يبون يسوون فيه مقلب .. يعني يالله خربوا أم أم الليلة عشان ضحك واستهباااال

***

الموقف الخامس : مقلب عكسي

هذا واحد قرر يتزوج .. وقرر أنه هو اللي يسوي بأخوياه مقلب ،، يعني يتغدا بهم قبل يتعشون فيه
قال لأخوياه انه نوى يتزوج وكذا .. وجلس يستعد للزواج ،، ومن ضمن الاستعدادات .. طباعة كروت الدعوة
طبع كروت دعوة للأقارب والأهل بمكان القصر وموعد الزواج وكل شي .. وطبع كروت زواج خاصة لأخوياه .. وكتب فيها موعد الزواج يختلف عن موعد زواجه الفعلي بيوم .. وكتب فيها ان الزواج بيكون في البيت
الشباب اخذوا البطاقات .. وشكلهم كانوا ناوين يسوون فيه مقلب يوم زواجه
طبعا الرجال تزوج وعدت ليلته الأولى من أروع مايكون .. لا مقالب ولا هم يحزنون
يوم صار من بكره .. اللي هو موعد الزواج الوهمي لاخوياه خخخخخخخخخخخ لبسوا الشباب واللي راح الحلاق يكشخ .. وراحوا لبيت المعرس !! وش السالفة .. غريبة وين المعازيم ؟؟ مافيه الا سيارتين او ثلاث عند الباب
دخلوا .. ويسلمون على اخوان المعرس .. ويجلسون شوي بالمجلس .. ماش مافيه احد .. مب جو عرس !!
ويروح واحد يسأل اخو العريس .. وين فلان ؟؟
قال .. سافر
قالوا وش اللي سافر ؟؟ عسى ماشر بس ؟؟ وزواجه اليوم ؟؟؟؟
قال .. زواجه امس .. وسافر اليوم الصبح هو وزوجته

وتراه قايل لأهلي انكم بتجون عقب عرسي بيوم .. وترانا مسوين لكم عشاء وشغل مرتب .. والله يحييكم

بصراحة اعجبني خخخخخخخخخخخخخخخ

أتركم لكم المساحة المتبقية لتعليقاتكم وآرائكم ..
صلوحكا


	الموضوع السابق: صور : قوانين استخدام التواليت في زيمبابوي	الموضوع التالي: طريقة صنع عطرك المفضل

	مواضيع أخرى للمرسل صلوحكا
	كمية حديد في شارع العليا
	تكاتف - 2 : بنك التسليف - القروض والشروط
	تكاتف - 1 : صندوق المئوية
	قلة أدب
	كـَبـَـدْ - 2

	التعليقات على الموضوع
	1 الفرعون عضو 63017 هااااااااا \| 22/03/2009 23:21:55 يوووويه والله انها مقالب حماااااااااااس تسلم اخوي الكريم ........... 2 خالد Khalid عضو 63022 ههههههههههههههه \| 22/03/2009 23:26:40 الظاهر بسوي مثل الأخير و بدال ما أجيبهم للبيت بصرفهم عكس إتجاه بيت العرس لا صار في الشمال برسلهم للجنوب و عسى نسلم بعد مشكور يالغالي و بارك الله فيك تقبل مروري 3 ام عبدالرحمن زائر 63024 صراحة اهل العقول براحة \| 22/03/2009 23:27:39 مساء الخير بس والله بعض المواقف صعبة وعقولهم تنك وهذي اللحظات اصعب شي عند الانسان يمر في ليلة العمر والله عيب بعض المواقف حرجة وهذولي رجال ماعندهم صنعة تشغلهم 4 فوشيهـ عضو 63025 سماااجه \| 22/03/2009 23:28:46 قسم قسمات حرام خيييير ان شاءللله مال امهم دااعي ع الحركات بس وش نقول الله لايبلاانا بس 5 عبدالله زائر 63044 ورب المصحف مووت \| 23/03/2009 00:09:25 ههههههههههههههههههههههههههههههههه قسم بالله قصص مووت وتضحك .. خاصة اللي سوو فـ اخوياه منكح والزواج كان وهمي فـ اليوم الثاني .. الله يديك العاافية .. 6 زائر جديد زائر 63047 المقالب \| 23/03/2009 00:18:07 الصراحه مقلب بوكيه الورد و الرز البخاري و النور مقالب سخيفه أما مقلب الخمسين ألف سمعت فيه الصراحه العروس بنت رجال و بالنسبه للمقلب الأخير... الرجال ذكي بس خساره ماحضروا خوياه ليلة زواجه 7 محسن زائر 63052 خطيييرة والله \| 23/03/2009 00:35:38 خطيرة بس يا ويله اللي يسويلي مقلب 8 ابو نواف زائر 63054 آخر مقلب \| 23/03/2009 00:41:11 كل المقالب ترفع الضغط H لكن آخر مقلب اعجبني ولو بتزوج بسوي كذا لكن ماعندي خوياء يسوون مقالب كلهم محترمين 9 kroom زائر 63061 الثالث والاخير \| 23/03/2009 01:02:50 هههههههههههههههه اما الموقف الثالث رااااااااايق والموقف الاخير رووووووعه انا اشهد انه ذيب ههههههههههه تسسسسلم صلوحكا 10 عمر زائر 63068 مقالب زينه شينه \| 23/03/2009 01:34:44 صراحه موضوع حلو ومشكله صايره بس حاول تشوفها من منظور ايجابي يعني اخويا العريس يبون يصير لخويهم شي مميز يعني حتى اذا تذكر يوم العرس يكون فيه شي صار غير طبيعي يعني بعض المواقف اللي ذكرتها عاديه مثل حبة الرز وتطفية النور بس الموقف الاول احس انه اقواها وابيخ موقف اللي عزم اخوياه بعد العرس يعني هذي قمة قلة الحيا واشكرك مره ثانيه على طرحك للموضوع عشان ناخذ الحيطه والحذر بالمستقبل 11 الــسـاهـرهــ زائر 63078 ـ \| 23/03/2009 02:22:00 ههههههههههههههههههههههههه وربي الموقف الاول خطييير واعجبني الموقف الخامس بصراحه عارف لهم سـلمت يمناك تقبل ودّي واحترامي 12 bofalah زائر 63084 خبال \| 23/03/2009 03:09:35 الله يهداكم كله بكوم وراعى رز البخاري والجرجير بصوب 13 ناصر زائر 63093 بلا مقلب بلا كلام فاضي \| 23/03/2009 04:33:31 احسن مقلب الخامس يعطيه العافيه على الي سواه في اخوياه 14 منووله زائر 63094 سلاااام \| 23/03/2009 04:54:37 هههههههههه احلى موقف اخر واحد والله يستاهلوووون 15 محمد زائر 63096 ياشييين هالمقالب \| 23/03/2009 05:16:58 والله يابعضهم قشران والله يستر... زود ربكة الزواج تربكونهم زود بهالمقالب فكوووووووووونا < متوعدينه اخوياه 16 بنت بااارق زائر 63099 هههههههههههه \| 23/03/2009 07:05:39 هههههههههههههههههههه من جد شباااب فااضين بس اخر وحده تستاااهلوون 17 مداوي عضو 63100 الله يستر \| 23/03/2009 07:08:07 الله يعطيك العافيه بس من جد هالايام .. ينخاف من الصديق ههههههههههههههههههههههه اووووووووووب اتخيل موقف يصير لي من اخوياي .. 18 اميرة زائر 63109 ناس متخلفين وسخيفين \| 23/03/2009 08:20:54 الواحد بدل مايدعي لزميلةبالتوفيق ويفرح لة يسوي فية مقلب واحتمال المقلب هذا ينهي حياة المتزوجين في اول ليلة لهم اذا كانت الزوجة موواعية في هالمسائل الا اذا حاول الزوج ان يقنعها انة مقلب وليس حقيقة 19 ali زائر 63111 عشتم \| 23/03/2009 08:35:54 كثرالله من امثالكم المواضيع حلوة ونتمنى ربنا يوفقكم والى المزيد 20 الزهيري زائر 63121 روووووووووووووووووووووعه \| 23/03/2009 10:28:26 رووووووووووووووعه هل مقالب ممكن المزيد منها 21 المهند أبو محمد عضو 63125 ههههه \| 23/03/2009 10:57:52 وان شاء الله نختار واحد من المقالب هذي ونطبقها عن قريب 22 مكارى زائر 63126 مقالب ليلة العرس \| 23/03/2009 11:07:20 ههههههههههههههه والله فعلن انه مقالب بجد صعبه فلاكن سلملي على صاحب المقلب الخامس ومشششششششكور 23 كتكوته بطبعي زائر 63142 والله فله \| 23/03/2009 13:57:00 ههههههههههههههه والله مو اقف موتتني من الضحك حسافه ليت صار لزوجي موقف من أخويااه بس والله لو تصير فينا مقلب ((أموله)) أدخل عليه بالحمام واوريه نجوم القايله 24 عايض زائر 63164 اللـــــــــــــــــــه يستر \| 23/03/2009 16:09:57 والله ياجماعه إني موعود بمقلب غير طبيعي والرجال اللي وعدني اعرفه مايمزح الله يستر بس 25 لبنانية جنوبية زائر 63165 حرااااام وعيب \| 23/03/2009 16:12:58 هوي صح انو حلوين المقالب بس عنجد عيب وحرام يعني الواحد يحط حالو مكانن اكيد ما رح يعجبو هيدا الأسلوب يعني هيدا بالنهاية راجع للشخص يلي عم يعمل مقلب اذا اجى شي نهار وواحد عملفيه مقلب أكيد رح يتدايق صح وبتحدى يلي بيحكي لأ 26 فراس الحزين زائر 63166 على الجميع \| 23/03/2009 16:16:11 حبيبي عاشت ايدك على هل مقالب الحلوه وهسه اني صارت عندي شويه خبرة من هاي المقالب حتى بيوم زواجي ميسولي مقلب وشكراااااااااااااااااااا على المشاركة الحلوة 27 gggg زائر 63174 sohhti \| 23/03/2009 16:31:24 حركاات باايخه بايخه مالها داعي .. 28 كنق لحيان زائر 63186 حب قروب ابو نواف \| 23/03/2009 17:30:58 ههههههههههههههه جداً مواقف جميلة منجد اهل العقول براحة 29 Nora*** عضو 63192 الاحول ولاقوه0000 \| 23/03/2009 17:45:02 الله يعينكم ياشباب على مقالبكم في بعض بعضها تودي اصحابها للقبور اما اذا كان فيها منفعه مثل مقلب الخمسين الف فهذي كثروا منها ماعندنا مانع بس فيها مقابل ولا فيها ضحايا 30 الجمعه عضو 63197 ههه \| 23/03/2009 18:23:39 هههههههههههههههههههه والله ضحك شكرا صلوحكا 31 السعيس زائر 63204 . \| 23/03/2009 18:54:02 هههههههههههههههههههههه آخر موقف ورب البيت فله من جد أسعد الله خاطرك بذكره كن بخير 32 علي العبيدي زائر 63206 طبخ \| 23/03/2009 19:18:58 حلو الموضوع.. ب س بخصوص المقلب ابو خمسين الف.. هو فيه بنت سعودية بسن الزواج تعرف تطبخ..؟؟؟!!!! تحياتي 33 fahad عضو 63212 فـــــــــــــهـــــــــــــــد الألمعي \| 23/03/2009 19:59:21 ههههههههههههههههههههههههههههههههههههههههههههه والله حكه مجنونه خلا زوجته تطبخ عشاء ههههههههههههههههههههههه 34 سويســرا زائر 63214 رد \| 23/03/2009 20:15:25 أضحك الله سنك ياهذا << ألف شكر 35 نواف العتيبي زائر 63227 مقالب قوووية \| 23/03/2009 21:44:29 مشكور على الموضوع والله مقالب قوية بصراحة أعجبني حق المتزوج المسكين مسكين والله أكلها قوية وفي ليلة زواجه 36 زيز والكل ثابت عضو 63234 زيز والكل ثابت \| 23/03/2009 22:35:57 عجبوني حدهم في البحرين مايسون مقالب يخلونه يستهنى هاليلة حراااااااااااااااااااااااام يخربونه 37 ابوعتيبي زائر 63236 ههههههههههه \| 23/03/2009 22:43:20 سلمت ولاندمت صراحه مت من الضحك مشكور ماتقصر 38 صلوحكا صاحب الموضوع 63247 مشكووورين \| 24/03/2009 00:21:21 بسم الله .. ياحبي لكم كلكم .. تسلمون على هالتشريف والتواصل الرااائع حضوركم الدائم واطلالتكم .. شرف كبير وفعلا مقالب تحوم التسبد خخخخخخخخ والله لا يحطنا بمثل هالمواااقف .. ما قصرتوا حبايبي والله لا يحرمني منكم . . . صلوحكا 39 باسل زائر 63250 ههههههههههههههههههههه \| 24/03/2009 00:46:06 يعطيك الف عافية 40 فآطسـهـ ضــحــكـ ... زائر 63430 يوووووهـ ششششــي !!! \| 24/03/2009 22:16:03 ههههههههههههههههههـ قســمـ بالله دفـآآآآآآآآآآآآشـــهـ آعووذ بالله ويــن قــآعديـــن ؟؟؟ بس كلــهـ كوووومـ والآخيـــر كووووووووومـ ثــآآآآآآآآنــــي ... ههههههههههههههههههههـ << من قلــب .. 41 شرووووووق زائر 63435 حلوين وبنفس الوقت يخووووووفون \| 24/03/2009 22:59:35 هههههههههههههه مررررره مشكور وربي مو قادره من الضحك<<<<<<<ماتحب الشر ابد تسلم اخوي صلوحكا موضوع اكثر من راااااااائع 42 ياسر 2000 زائر 63450 يا حبني لهالمواقف بس \| 25/03/2009 01:07:16 بس تخرب اجممممممممل ليلة بالعمر وما تكون بوقتها ويصير بها زعل وحقد بدال الضحك والاستهبال ........ 43 محمد زائر 63702 مواقف مربكة \| 26/03/2009 10:57:31 والله مقالب مالها داعي...... ذكر لي ان واحد في ليلة زواجه اخوياه عملوا له مقلب اعطو طفل في القصر كم ريال وقالوا له اذا جاء العريس بالسيارة ونزل منها قل مبروك الزواج يبه (يا بابا)...... فعلا سواها والحقيقة ما ادري وش صار له بعدين مثل هذا الموقف عادي يفسد الزاج كله. مثلا سمع ابو العروس كلام الطفل راح يجي في باله ان العريس متزوج من قبل وراح اقل شي يصير فيه مشكله بدلا من ان يقف اصحابه معه في مثل هذي الاوقات يدخاونه في متاعب اخرى فااركدو ياشباب والتزموا بالاخلاق السعودية وان كان ما تربيتو نربيكم 44 أشحفان القطو زائر 63838 صدق مقالب \| 27/03/2009 15:31:50 والله بعض الاخويا مصيبة وخاصة إذا جا يوم زواجك لكن عجبني مقالب الرجال اللي لعب على اخوياه هههههههههههه وسافر ثاني يوم من زواجه والله انه سنافي الله يعطيك العافية على التعب اللي تعبته 45 سوسه حمرا زائر 64417 ههههههههههههه** \| 01/04/2009 13:33:01 بصرلحه المواقف مرررره خطيره هي صحيح تضحك بس الله يستر يعني في مقلب بوكيه الورد ممكن تكبر القصه وتصير مشاااكل الله يهديهم بس عجبني الاخيررر ومشكور

	اقسام الملتيميديا
	العاب \| ملفات \| بلوتوث \| صوت \| صور \| فلاش \| فيديو \| منوعات

أنثى

شبكة أبو نواف

موبايلي

موبايلي

مقالب الليلة الأولى من الزواج