السلام عليكم ورحمة الله وبركاته ..
من باب أني إنسان أقضي هذا العصرية الجميلة مستلقي على أريكتي الفارهه ..
أبحث عن ما يسليني ويبهج صدري .. ويبدد مابي من فراغ أسرني :( ..
فقلت ياولد ما لك إلا " الإعتصار المخي ".. اللي تكلم عن البارح أبو حسنين ..
الإعتصار المخي على كلام صديقي المصري أبو حسنين أنك في وقت الفراغ خذ لك فره على أحرف اللغة العربية ..
ومن كل حرف طلع كلمة تعد مشكلة من مشاكل مجتمعنا .. وأقعد هوجس بها شوي ..
أعلم أنكم ماهضمتوا أن أبو حسنين بيقول هوجس بها بس ماعليه عطوني على قد عقلي ..
على العموم أنا سويت اللي قالي أبو حسنين هو صحيح أني مليت شوي بس يكفي أني طلعت بهالموضوع ..

حرف [ الألف ] .. " الإحباط "..
الإحباط مشكلة يعاني منها مجتمعنا .. سواء أن كان بسبب فشل أحدنا في شي معين .. وإلا بسبب أننا مجتمع يبحث عن الإحباط بأي طريقة .. ألاحظ في مجتمعنا نقطة شينة جداً ..
وهي أننا لو نلقى شخص يدور على أي دعم معنوي عشان ينجح بحل مشاكله .. نادر مانلقى أحد يساعده أو يقوله أنت قدها .. غالباً مجتمعنا يقول يارجال أنت فاشل وش لك بهالأمور بتقنعني أنك بتقدر تنجح بهالشي ..
الإحباط يجينا من الفشل .. حنا مجتمع فاشل <- تكلم عن نفسك ..
مثال للإحباط .. ( س ) من الناس مستواه الدراسي عادي جداً .. مهوب متميز ومهوب فاشل .. لكنه ذكي وفهيم ..
تخرج من الثانوي ودخل تخصص مايبيه في الجامعة بعد سنتين ونص ترك الجامعة وراح لمعهد وبنا كل آماله على هالمعهد ..
لأنه هو اللي اختاره وهو اللي قرر هالمره .. لكن يوم وصل الخبر لأهله كلهم قالوا أنت فاشل وغبي عقب مادرست سنتين ونص بالجامعة ..
تتركها وتروح لمعهد .. فعلاً أنت فاشل وغبي ..
النتيجة الشخص يعاني من الإحباط وبشده :( ..

حرف [ الباء ] .. " البرتقالة "..
البرتقاله فتاة عراقيه أثارت مشاعر كثير من الشعب العربي خصوصاً أنها ظهرت لنا في وقت كانت تعاني فيه العراق وبشده ..
أذهلت الجميع لدرجة أنها سلبت عقول كبار السن .. وهالحين ما عاد عندنا حكماء .. وهذا طبيعي مدام البرتقالة سلبت عقوله ..
مثال للبرتقالة .. أبو عبدالمعين رجل عاقل محنك ذكي .. غالباً مايمشي الناس على مشورته ..
يجتمع مع عدد من الشياب في إستراحة كل خميس .. المفاجأة أن الشياب يتابعون البرتقالة إلا هو لأنه يعدها سخافة ..
بعد كم أسبوع شافها بالغلط .. فأصبح سفيه يبحث عن البرتقالة في كل القنوات لدرجة أنه شفر الجزيرة والعربية وحط قناة غنوة على رقم واحد ..
النتيجة ما عاد في شلتهم رجالاً صاحي ..

حرف [ التاء ] .. " التفحيط "..
التفحيط ما عادت مشكلة كبيرة في مجتمعنا رغم أنها كبيرة .. وسبب تحجيمها الحالي هو كثرة النقاش في هالنقطة ..
لدرجة أن الناس ملت من كثر الكلام عنها .. لأننا نتكلم في دائرة مفرغة <- قوية صح؟! .. فعلاً نتكلم في دائرة مفرغة ..
والسبب أننا على كثر ما جبنا حلول ماشفنا شي منها تطبق .. وآخرتها يحكم على أبو كاب بالسجن 20 سنه و3 آلاف جلده ..
مثال للتفحيط .. ما عاد عقب أبو كاب أمثله ..
النتيجة موت ناس أبرياء ..

.... [ أنتظر حروفكم ]