بسم الله الرحمن الرحيم
السلام عليكم ورحمة لله وبركاته

صبحهم بالخير
أدري إنكم كلكم تحبوني ، وكلكم راسمين قلب حب على يديكم وكاتبن فيه 0 جنط السفينة 0 وفيه سهم شاقن القلب وفيه
دمامين تخرخر من القلب .
اعترفوا صح تحبوني ؟
اعترفوا أحسن لكم !
اعترفوا لاو الله بالشاحن
لا نامت أعين الجبناء
سنحرق الأرض من تحت أقدام العلوج
.

ماعليش تراي تحمست
إيه وشلوله أنا فاتحن الموضوع ؟
صح صح إثري بكتب قصة.

****



انحراف عجوز

الفصل الأول :
في ليلةٍ شاتيةٍ مطيرةٍ وضعتُ جنبي على سريري الدافئ بعد أن أطفأت أضواء غرفتي ، وأنا أسمع صوت زخات المطر تطرق
حديد مكيفي كحدادٍ ريفي يطرق حذاء خيله في مزرعته البائسة ، و حفيفُ الريح يعزفُ صوته المخيف على شباك غرفتي
وكأنه اتخذها ناياً له يعزف عليه سمفونيته المرعبة ليرعب بها قلوب الأطفال ، وضعت جنبي بعد يومٍ مرهقٍ طويلٍ طويلٍ ،
ثم أغمضت عيني فلم أكد أنهي آية الكرسي حتى دخلت بغيبوبة نومٍ هنيئة .
وبعد دقائق قليلة طُرق بابُ غرفتي كأشد مايكون ، فقمت فزعاً أنظر باب غرفتي هل خلعه الطارق كما خلع قلبي ؟
حتى إذا عادت لي روحي ركضت نحو الباب لأسبر الخبر ، هل خرج المسيح الدجال ؟ أم هل قامت الحرب العالمية الثالثة
كما ذُكر ذلك في مسلسل عدنان و لينة ؟
فإذا أمي واقفة على الباب وهي تصرخ : أنت نايم لهالحين يالسربوت وجدك بالعناية المركزية ؟!
فقلت : هل قتله علَّام ؟ وهل قبضوا على السيد بدر ؟
فقالت : احتس زين عساك للحتسة .
قلت : سم يمه ، عسى ماشر وش فيه جدي ؟
قالت : ولا تسلمة ، يالله البس ثوبك نبي نروح للديرة << أنواع القمع
قلت : سمي أبشري
ركبنا السيارة الساعة 2 بالليل وبعز البرد مشينا للديرة الي تبعد عنا 200 كيلو ، وصلنا للديرة قبل الفجر بشوي وعلى طول رحنا
للمستشفى وسألنا عن جدي قالوا مافيه زيارة هالحين بس فيه واحد من أقارب الضحية موجود بالانتظار ويوم رحنا للانتظار لقينا
خالتي منيرة سلمنا عليها وقلنا وش السالفة .
قالت : أبد مثل العادة أمي ضاربتن أبوي بخشبة مع الراس بس هالمرة صارت قوية وهالحين هو بين الحياة والموت .
قلت : لا حول ولا قوة إلا بالله ، طيب هي وينها هالحين ؟
قالت : هي هالحين بحوش الرقيب سعيّد .
قلت : وش دخل الرقيب سعيّد ؟
قالت : حوش الرقيب سعيد مخلينه سجن الحريم بالديرة .
قلت : أجل أنا أبروح أصلي الفجر حولهم وبعد الصلاة أبروح للشرطة أشوف الاجراءات .
صليت الفجر وطلعت للشرطة وسألتهم عن الإجراءات ، قالوا لازم تكفلها عشان لو مات الشايب نسحبك مع شوشتك ، توكلت
على الله وكفلتها ، قالوا لي رح خذها من حوش الرقيب سعيّد ، رحت لبيت الرقيب وطقيت باب الحوش وفتحت لي أم فرج
مرة الرقيب سعيد وقالت من أنت قلت لها أنا الجنط ، قالت يالله حيه اقلط .
يوم دخلت الحوش الا أم فرج وجدتي مزنة فارشاتن فرشة بالحوش وأنواع القهاوي والكراث ، يوم جيت أبسلم عليها قالت
انثبر بالسيارة لما أجيك .
قعدت بالسيارة حول ساعتين - ويوم خلصن حاشاتن بكل سكان الشرق الأوسط - طلعت وركبت معي ، قالت :وش صار على
التسلب ؟ ، قلت : من هو التسلب ؟ ، قالت : جدك، قلت : أفاااا بس يا أم عزيّز تسذا تقولين عن زوجتس و عشيقتس وعشير
عمرتس ، تقولين عنه تسلب ؟! ، قالت : تسلب وكل أحفاده تسلاب .
أنا انثبرت وقعدت أسوق وأنا ساكت بعدين قلت لازم يالجنط تصير عنصر إيجابي في ظل الأزمة الراهنة ، وأجي قلت لها :
يا أميمتي الله يطول بعمرتس لازم تصيرين متسامحه مع الآخر ولا تنسين الي يقول : 0 إذا صفعك أحدهم على خدك الأيمن
فأدر له خدك الأيسر 0 ، قالت : أدر الطارة زين لا تصدم بنا لا أديرك بكف أفقش لك خدك .
رجعت وانثبرت مرة ثانية لين وصلنا بيتها ، نزلتها للبيت ورحت للمستشفى وشرحت الوضع لأمي وخالتي منيرة ، قالت خالتي
منيرة : مايصلح نخليها تسذا لازم تطلع من هالديرة و إلا ترى بتذبح أبوي ، قالت أمي : والله إنتس صادزة ولازم وحدة مننا تاخذها
معها ، قالت خالتي : أنا ما أقدر آخذها تخبرين يوم تشق جبهة أبونا بالدلة ؟ ، قالت أمي : أجل أنا باخذها .
انتظرنا لين بدت الزياة وزرنا جدي بعدين رحت بأمي لها في البيت وبالموت أقنعتها تروح معنا ، عاد يوم ركبت معنا كتبت لها رقم
جوالي وعطيتها إياه وقلت : لاسمح الله تضيعين وإلا شي اتصلي بس على هالرقم .

الفصل الثاني :
وصلنا للرياض على آخر الظهر ، قعدنا وتغدينا إلا يوم أذن العصر ، رحت صليت ويوم دخلت البيت إلا جدتي مقابلتني بالحوش
معها زمزميتين قهوة وشاهي ، قلت : وين يا أميمتي تبين أوديتس وإلا شي ؟ ، قالت : لا بس ودي أتعرف على جيراننا .
تعرفت على كل عجز الحارة خلال العصر ، ويوم رجعت للبيت قالت لي رح اشتر كيسة كراث الكبيرة ترى الحريم عندي باتسر .
من سوء حظنا إن فيه عجوز بالحارة أقل مايقال عنها إنها سربوته من الطراز الأول اسمها أم مرزوق الله لا يرزقها ، تعرفت
عليها جدتي والمشكلة إن جدتي سحبت على كل عجز الحارة وصارت ماتروح إلا لأم مرزوق ولا يجينا إلا أم مرزوق .
المجرمة أم مرزوق سوت غزو فكري لجدتي ، وغسيل مخ وأعادت تركيب خلايا مخ جدتي خلية خلية ، لين انحرفت جدتي و
أصلا جدتي عندها استعداد فطري للانحراف .
لاحظنا على جدتي التغير بعد أسبوع بس من تعرفها على أم مرزوق ، وصارت ماتجي إلا الساعة 11 بالليل وبدا يتغير لبسها
ولا عاد نشوف قمصان الروز ، وفي يوم من الأيام طلعت من غرفتي إلا جدتي تمشي قدامي ولابستن سروال طيحني والمشكلة
إن سروال خط البلدة طالع تحت .
مسكت أمي وقلت لها الوضع ماينسكت عليه جدتي بدت تفلت من يدينا ، قال أمي : إي والله الوضع مايطمن تصدق يالجنط
إنها أمس أخذت جوالي قلت وش تبي فيه ؟ قالت بغير اسمي عندك ، ويوم رجعت لي الجوال رحت بشوف وش الاسم الي
حطته لقيتها مسميتن نفسها : 0 المتمردة 0 ، لا وباديتن تلبس لبس ماهوب ذاك ، ومرة رحت معها لأم مرزوق استقلتنا
أم مرزوق وهي لابستن بلوزة قصيرة ومطلعتن بطنه ، عاد هي فيها بعج وسره يتدودل تقل طرف جرو 0 شمام 0 الله لا يبلانا .
قلت : إن شاء الله أنا ما راح أسكت ولابد أتدخل تدخل ايجابي بالموضوع وبشاور علي أبورجل مسلوخة يمكن عنده حل << أمحق مستشار
يوم بعد يوم جدتي تجيب لنا أشياء جديدة وأنواع الشطحات ، وفي يوم من الأيام قاعدين نتغدى قالت : جيبوا لي شوكة ، قلت :
وش تبين بالشوكة ؟ قالت : وش عرفك بالتماتيك يالقروي ؟! ، قلت وش تماتيكه يا أميمتي ؟ قالت تماتميك يعني الي ياكل
بشوكة ، قلت قصدك إيتيكيت ؟ قالت إيه -أبوك للجنة -أوتوكيت .
بعد الغدى مسكتها على جنب وقلت : يا أميمتي هالي تسوينه ترى مايصلح ، قالت : لازم الواحد يصير أردن ، قلت وش
ذي أردن بعد ؟ قالت مدري بس أم مرزوق تقول لازم نصير أردن ونلبس مثل شاتسيرا ، قلت : أهاااا قصدتس مودرن .
الجنط : يا أميمتي ...
مزنة : اقطع واخس وعطن مية ريال أبروح لعمارة المملكة العربية السعودية يقولون إن به بسطات زينات ، ودي
أشتري لي ديرمان وحنا .
الجنط : أبشري بس مية ؟ ، أنا أعطيتس ميتين بس خلين أنا أوديتس ، وترى بسطات سوق حجاب يعجبنتس .
مزنة : سوق حجاب لك ولأشكالك يالقروي ، مدري متى تبي تصير أردن فشلتن قدام الناس ؟!
الجنط : طيب خلـ ...
مزنة : انثبر بس ، وش قال ؟! قال سوق حجاب ، .......... الله والديك << تراه ماتفشل
أنا يوم شف الوضع وصل لهالمرحلة قلت لازم أتدخل تدخل إيجابي << يا أخوي من بداية القصة وأنت تبي تدخل تدخل إيجابي
رحت لبيت علي أبورجل وشرحت له القصة ، قال : طيب وش الراي ؟ قلت والله أنا ناوي أستخدم معها نظيرة 0 ثورندايك 0
يعني بستخدم معها أسلوب التعزيز ، قال : والله هالأشكال ماينفع لهم إلا نظرية أبوي ، قلت وش نظريته ؟ ، قال : اسمها
0 نظرية الزبيرية 0 أي واحد يعارض أو يخطي مايدري إلا الزبيرية ناشبتن بجبهته ، قلت : هذاك أول المتخلفين يستخدمون
هالنظرية بس هالحين الناس تطوروا وصاروا يستخدمون النظريات الحديثة ، قال احترم نفسك يالجنط لا أهفك بالزبيرية
أنت ونظرياتك ، أكاليوم جايبن لنا نظرية فرويد بغيت توهق فيها عيال الاستراحة وهالحين ثورندايك وباتسر الله يستر
وش تبي تجيب لنا ؟ ، والله يالجنط إنك من يوم دخلت كلية التربية وأنت صايرن غريب الأطوار .
الجنط : تباً لك أيها الوغد !
علي : اذهب إلى الجحيم وإلا هففتك بزبيريتن قديمة << المقطع ذا مسروق من فلم أمريكي
و أول ماطلعت من بيت علي إلا يوم جاني اتصال من رقم غريب رديت عليه :
الجنط : ألو هلا .
المتصل : السلام عليكم ، الأخ جنط السفينة ؟
الجنط : وعليكم السلام ، ايه نعم .
المتصل : معك شرطة العليا ، ياليت تجينا تنهي الاجراءات بخصوص جدتك مزنة .
الجنط : أفااااا ، وش هي مسويه ؟
المتصل : إثارة بلبلة بمكان عام .
الجنط : طيب يصير خير إن شاء الله .

انتهى الجزء الأول

**
دمتم بأحلى ابتسامة
أحسن واحد بالعالم
د. جنط السفينة
منتديات ضحتسة