تنويه: تم إيقاف استقبال ونشر المشاركات للمجموعة البريدية بدءً من تاريخ 18-11-2009 ، على أن نعاود استقبال ونشر المشاركات مرة أخرى بتاريخ 4-12-2009 ، علمًا بأن الموقع مستمر بتحديث المواد، وكل عام وأنتم بخير.
سويسرا ... قلت ما مثلك على الدنيا وصيف ... لا حشى مالك وصوف (ج2)
يسعد هالمسااااااااااااااااا .. يا هلا والله ومليون غلا .. يا هلا والله بأحبابي أنا .. أنا وبس .. .. كيفكم .. ان شاء الله بخير وعااااااااافيه ياربــ ،،،،
شكر كبير .. كبير . كبير جدا .. لكل واحد مر من هنا ... وقرأ الحلقة الأولى ،،،، أسعدتني كثير كلماتكم .. أسعدني كثير تفاعلكم ... دعواتكم .. شعوركم .. تواجدكم .. .. ربي لا يحرمني منكم . سواء اللي أعرفهم . أو حتى اللي ما أعرفهم .. اذا كان الواحد في باله يستغني عن كم ساعة يجلسها معكم .. أتوقع بعد هالتفاعل .. بيستغني عن يومه كله ..
اليوم يا حلويـــــــــن .. راح نكمل الحلقة الثانيه من سلسلة حلقات سفرتي لسويسرا .. الحلقة الماضيه خذين كم لفه بسيطه على جنيف .. اليوم راح نكمل ونعيش مع بعض اليوم الثاني لي هونيك .. ( مصطفى هونيك ) قبل ما نبدا .. عارف وش طقوسنا .. .. مفرحاتك خلها يمك .. وكثر منها اليوم . عشان في الاخير راح تعرف .. ويااااااااااا حلو كأس ثلاث أرباعه ثلج.. والببسي يسبح فيه .. ما تسمع الا . تش تش تش <<<<< صوت غازات الببسي ..
كل شي جاااااااااهز ؟ .!!! .. نبداااااااااااا .!!! اصبر اصبر .. بالله . لو سمحت يعني .. جوالك صرفه .. هيا بنا ،،،،
في نهايه أول أيامي في جنيف .. كنت مخطط أني أستغل ثاني يوم أكبر استغلال .. طيب كيف !!! قلت بدور لي شركه سياحية .. أحجز عندها بكج لليوم الثاني .. ابي يوم كااااااااااامل معهم .. قبل ما أرجع الفندق بعد غروب الشمس .. لقيت مكتب الشركة اللي أدورها .. وحجز عندنا بكج ليوم كامل .. وهو طبعا اليوم الثاني لي في جنيف .. اول شي .. جنيف مليااااااااااانه شركات سياحية . تحومي بك .. لكن وقع الاختيار على هالشركه .. خلوني أتكلم عنها شوي .. >>>>> أوف أوف أوف .. بديتو ولا علمتونااااااااااا <<<<< لا وموسعن صدره المايسترو مروق ويكتب . كأن ماله خوياااااااا
^^ ^^ ياربيه وش جابهم .. ما عليكم منهم . خلونا نكمل ... الشركة اللي حجزت فيها .. اسمها .. Keytours هذه شركة .. وش تسوي ؟ .. تضبط لك رحلات سياحية . لمده نص يوم . لمده يوم كامل .. يمشيك ويلف فيك أمكان معينه .. طيب وين يوديك .. وين يجيبك ؟ .. كل هذا في الكاتلوج اللي تبع الشركة .. أو موقعهم على الانترنت .. موقعها على الأنترنت ..
أول ما تدخل تشوف ..
طبعا الشركة لها باصات فخمه ومكيفه .. وحركتاااااااااااااات يعني .. مثل ما انت شايف في الموقع .. معلومات كثير عن الشركه . عن الأنشطه .. واهم شي عندنا وشو ؟ .. ما أسمع .. ايه .. اهم شي جدول الرحلات .. خلونا ناخذ مثال .. شوف معي ..
هذه بكجات مقترحة من الشركه .. يحط لك وصف بسيط عنها .. لو نختار واحد منها مثلا .. بوص معايا .. خلنا نختار وحدتن من هالبكجااااات
مثل ما انت شايف .. حاط لك عنوان البكج .. حاط لك التواريخ .. حاط لك من الى.. يعني معلومات كثيرررررررره حلوه .. <<<<< جد ؟ .. >>>>> أقول وخر بس .. بدينا الحركاااااااات أنت تدخل الموقع .. وتتفرج . وتشوف اللي يناسبك .. وبرضو حاطين ملف كااااااامل لرحلات الصيف هذا . بوص كمان ..
يا عيني على هيك تنظيم .. يا عيني على هيك شركات . حاط لك الجدول .. وكل كل كل شي تحتاجه .. طيب وين نحصلهم ؟ .. في كل مكان تقريبا في جنيف .. انا حصلتهم في مكانين .. في كشك على البحيره .. وفي محطه الباصات اللي برضو قريبه من البحيره .. المهم رحت لراعي الكشك .. السلام عليكم .. <<<<< يا نصبك نصباه اجل تسلم .. >>>>> أخرص .. طع طع . <<< صوت كفين المهم قلت له عطني الكاتلوج .. وجلست أتفرج على شي يناسبني لبكره .. أي أطول شي . وأحلى شي .. وأجلس أقلب . أقلب .. أقلب .. شوي أقلب عيوني . وشوي أقلب الكاتلوج .. ليـــــــن وصلت صفحة .. يوم جلست قلبي يقول . دردوب .. دردوب . دردوب وش هالصفحة ..!! .. شوف معي . لالالالالالالا . لا تشوف .. بوص بس ..
البكج هذا .. ليوم واحد .. من الساعه 9 الصباح الى الساعه 6 المسا تقريب .. يعني ما يذن المغرب .. الا انت في بيتكم .. ليش قلبي قال دردوب .. شوف الجدول فوق .. الجدول يتضمن زياره لمصنع الشوكولاته ..( قلبن طلع من التي شيرت بسبب الخفقان ) .. .. انا شفت بس كلمه شوكولاته .. وأنا اقول له .. موافق . موافق مواقق .. موافق ... قال هيه هيه . وش فيك الله يصلحك .. قلت ها .. ايه ايه .. وش سالفه هالبكج . اشرح لي <<<<< مسوي ما خق مع المصنع >>>>> ملاحظ أنت مثلي المهم وش هالبكج !! .. خلوني اشرحه لكم بإختصار .. الساعه 9 ونص .. الانطلاق من جنيف .. راح ننطلق الى مصنع الشوكولاته يبعد تقريبا ساعتين .. ندخل المصنع ونتمشى فيه نطلع منه نروح لمصنع جبن .. نطلع من مصنع الجبن نزور قلعه قديمه شوي .. نلف فيها .. نطلع من المصنع .. نروح نركب قطار فلـــــــــله .. بينزلنا في مكان ثاني .. بعد هالقطار .. نبي نروح لمكان روعه نجلس فيه ونتقهوى ونشرب الشاهي على الماشي .. بعدها نبي نرجع لجنيف .. هذه مختصر قلته لكم . والا الرحله أطول من هالكلام .. طيب السعر كم !! .. السعر مثل ما أنت شايف .. 198 فرنك سويسري .. تقريبا 500 ريال .. للشخص البالغ .. طبعا اللي ما بلغ . يروح يبلغ ويرجع .. لا لهم اسعار ثانيه .. طبعا بعدها ما تدفع شي ابد .. كل شي الشركه تدفعها .. هذا شي الشي الثاني .. انتم راح تلفون هالأمكان مجاااااااااااااااااانا .. ايه ايه . انت اللي تقرا التقرير الحين .. لك ببلاش .. راح أخليكم تلفونها حبه حبه.. بعد ما عجبني البكج .. قلت يالله . هذه بطاقه الفيزا . وأحجز لي على بكره .. شاف البطاقه .. قال أنت الأطخم بندر .. قلت ايه ايه .. قال معليش ما عرفتك . لابس نظاره وكيذا يعني .. قلت لا عادي . من اللي ما يعرفك .. يسوي جهل .. والعلم نور ..<<< يارب المثل صح <<<<< ودي أصدقكـ .. >>>>> تصدق وألا أمش ..
المهم عطيته فلوسه .. وأخذت التذكره . والأيصال .. وقال لي يالأطخم بندر( Atkham Bandar ) .. .. قال خلاص .. الوعد بكره الساعه 9 عند محطه الباصات .. طبعا محطه الباصات قريبه جدا للفندق اللي أخذته .. فركيت كعب .. المهم أخذت كل الأوراق اللي عطاني .. ورحت الفندق عشان اسوي نوم .. سويت نوم أليـــــــــــم .. .. بعد ما سويت وخلصت وجا بكره .. قمت طبعا .. <<<<< ما شاااااااااااء الله .. >>>>> شفت عاد .. سبحان الله . ابن آدم أنسان.. اول ما سويت نوم . وقمت الصبح على الساعه 8 تقريبا .. وخلصت كل طقوسي الصباحية .. رحت للمحطه تقريبا على الساعه 9 .. أول ما وصلت عرفت المحطه بالباص اللي عليه شعار الشركه .. بوص يا ضنايا .. <<<فتحيه
أول ما شفت الباص .. وأنا اللي أنصاه ( اي ذهبت إليه عنوه ) ... وأشوف أثنين عنده لابسين لبس . برضو عليه شعار الشركة .. طبعا ما سلمت عليهم .. ليـــش .. عشان الأثنين اللي فوق . ما يقولون عني نصاب <<<<< ايه ايه . بعدي والله . هذا اللي صادق >>>>> الله مير يسلمك المهم أول ما شفتهم .. وريتهم الوصل اللي أخذته أمس .. قال اوكي .. عطني أسمك .. وعطيته اسمي .. بدون كلمه ( الاطخم ) .. تخبرون يعني الواحد يتواضع على هالصبح .. وأركب الباص . لقيتهم حاطين جوا في الباص كوفي ميكر .. آله للكوفي . وجنبها كيسان وسكر وكيذا يعني . وأنا اللي أختار الكرسي اللي جنبها ه.. قلت أبد . لو ما يحصل من الرحلة ألا هالمكان. انتظرنا شوي الى الساعه 9.20 دقيقه تقريبا .. يوم تجمعو كل اللي بيروحون .. كان العدد تقريبا 11 شخص .. والباص كبيررر .. يعني فالينها جوا .. الرحلة هذه راح يكون معنا شخصين من الشركة .. واحد يشرح . والثاني يهز.. هههههههههههههـ .. لالالالا .. واحد يشرح .. والثاني يسوق بنا طبعا.. الساعه 9.30 بالضبط . بالضبط .. تحرك الباااااااااص .. ويجي أخونا المرشد السياحي . ويمسك المايك ..
ويبدا يعرف بنفسه .. وينه منه .. وينه دارسن فيه . وأمه وش ترجع له .. يعني هيك.. المهم هذا المرشد . فله . فله . فله .. وسيع صدر بشكل غير طبيعي .. أول ما ركبنا .. قال ما ودكم نشغل ميوزك خفيفه نسوي التمارين الرياضيه .. عاد أقول في نفسي .. تسنك داري أن سابعتي تعورني .. .. المهم هذا وش وظيفته . هذا طول الطريق . صدقوني طول الطريق وهو واقف . بس يشرح .. أي شي نمر عليه في جنيف يشرحه .. حتى لو نمر على قطوه .. يقول هذه أمس ماكله من زباره الحي الفلاني .. فااااااااااااااااااهم في كل شي ماش الله عليه .. المهم كان الجو راااااااايق .. وعلى الصباح .. شوف ..
.. .. ما تحس أبد بالطريـــــق .. الجو خونفشاري . والمناظر ترد الروح .. بقرهم يرد الروح بعد .. أنا طبعا جنبي الكوفي .. ومعاي الأيبود .. مرات اسمع للمرشد السياحي . ومرات أسحب عليه وأخش مع أليسا ... من الأمكان اللي مرينا عليها بالطريق .. وجلس يشرح عنها .. هي هذه
هذه يقول مقر الألعاب الأولمبيه ..
ويجلس يشرح عنها شوي . وأنا اقول . اها .. ايوه . ما شاء الله . كويس والله .. بعدها مشينا شوي .. وقال نبي نوقف نشري مويه من بقاله قريبه هنا .. ونوقف .. وأخذ هاللقطه وانا بالباص ...
الجو رووووووووعهـ .. وكملنا رحلتنا .. طبعا عارفين وين رايحين ؟.. وييييين .. ما أسمع .. <<<<< رايحين لمصنع الشوكولاته >>>>> يا حوبي لك . شكل ما تابع ألا أنت .. ايووووه . رايحين لمصنع الشوكولاته .. طيب .. وش قصه هالمصنع ؟؟ .. وين يقع .!! خلوني أتكلم عنه شوي . لين يوصل راعي الباص للمصنع .. اوكي .. !! المصنع اللي نبي نروح له هو ..
. طبعا هالمصنع أحد شركات شركة نيستله المعروفه عالميا .. طيب . خذ لك لفه بسيطه في موقعهم ع النت ..
اول ما تدخل الموقع .. تشوف ..
المصنع هذا يا حلوين . يقع في مكان أسمه Broc .. بوص عليه في الخريطه ..
طبعا ( بروك ) مو معروفه مره . المعروفه هي قريهفيفي .. مو فيفي اللي في عسير .. لالالالالالا . فيفي في جنيف .. اللي في عسير فيفي والا فيفا ؟؟ .. مدري بس خلونا نكمل الموقع على الانترنت . ممكن تحجز لك موعد للزياره .. ممكن تشتري منتجاتهم .. لأن بعض الناس يقول انا بضبط جدولي على كيفي .. بحجز واضبط اموري من النت .. بدون أي شركات .. ممكن كل شي يصير .. المهم ونمشي .. ونمشي . ونمشي .. وما زال قلبي يقول . دردوب . دردوب .. <<<<< قلب ذا والا حفله دي جي ؟ >>>>> تبي تعقل والا أرجعك ؟ .. المهم وحنا بالباص .. لقطت هاللوحه ..
مثل ما أنت شايف . لوحة أن مصنع نيستله على اليسار .. أماااااااا لو راعي الباص ما لف يسار .. نزلت وخليتهم .. مشينا ليـــــن وصلنا للمصنع .. طبعا أول ما وصلنا .. نزل المرشد السياحي عشان يضبط الوضع من جوا . دخل بس خمس دقايق .. عشان يدفع رسوم الدخول . ( طبعا حنا ما ندفع شي ) .. خمس دقايق . ألا طلع لنا . وقال الان نبي ندخل المصنع . ونلف فيه .. أول ما نخلص .. الوعد الباص . راح يكون هذا مكانه ولا راح نحركه .. ويجلس يعد .. 1 .. 2 .. 3 .. 4 .. 5 .. 6 .. .. طبعا جالس يعدنا . يخاف يضيعنا .. وندخل المصنع .. أول ما تدل تقابلك هاللوحه قدامك ..
شوي . ألا جتنا وحده من موظفات المصنع . قالت معكم فلانه بنت فلان . آل فلاني .. طبعا ناسي أسمها . نسيت اصوره بالكام .. <<<<< بالله فيه أحد يصور كلام ؟ >>>>> أصور ريحه لو تبي . فكني من شرك..
أما اللي بالنص . صح أنه اكتشف الشوكولاته .. لكن راح عمره ما ذاقها .. كل ما جا بياكلها . نشبت في شنبه ههههههههههههههههـ .. قالت هذولي أول من أكتشف الشوكولاته ... وهم اللي طوروها .. عاد أنا اقول في نفسي .. الله لو هذا جدي .. كان الحين بيتنا كلللللللله جالكسي وكتكات ومفرحات .. غرف مليااااانه .. وأمشي في الشارع .. ادخل أي بقاله .. أكل منها شوكولاته ليــن أدوخ وأطلع من غير ما أحاسب . خير بعد . جدي هو اللي مكتشفها( فيس حاط يده على خصره ويهز رجله اليمين بشويش ) المهم جلست تشرح .. وتنتقل فينا من غرفه لغرفه .. ومن جناااااااح لجناح .. وش رايكم نشوف مع بعض ؟ .. يالله يالله . أول شي . وقفت بنا عند خياش كثااااااارين .. ( جمع كثير ).. .. شوفو
قالت هذه شوكولاته خام .. نستوردها من أماكن معينه في العالم .. طبعا شوكولاته بيضا . وشكولاته غير بيضا <<< ورط ما عرف لون الشوكولاته .. الا الا اعرفه .. لون كاكاوي .. شوي وتورينا غرفه ثانيه ..
هذه القوالب اللي يصبون فيها الشوكولاته .. وتطلع اشكااااااااال وألوان.. وطبعا هالمصنع .. يوزع لأماكن كثيرررررره في العالم .. شوف معاي شبكه التوزيع ..
ترى شقتي هنااااااااااك .. بعدين مشينا شوي .. وقالت بوريكم أول مكينه شوكولاته جبناها .. قلت يالله وريني .. قالت طيب .. قالتها وهي مستحيه .. وهذه المكينه
هذه يحطون الشوكولاته الخام في جهه . وشويه سكر من جهه ثانيه . وشويه حليب من جهه ثالثه .. وتجلس هالاله تخلط . وتطحن .. وتخلط . وانت بس حط فمك تحت .. وبالهنا والعااااااااافيه .. بعد هالآله .. تطورو أكثر . وجهزو مصنع كااااااااامل .. وهذه صور من المصنع ..
وهذه براميل كلها شوكولاته
. يا زين من جاب أثنين للشقه .. وهذه برضو
وهنا . شوف شوف شوف .
اهوووووووف . اهووووووووف . رايحه جايه الشوكولاته . وحنا طالعين .. من هالقسم .. قالت فيه عندنا آله .. فائدتها أنها تحرك الشوكولاته ما تبرد وتجمد .. وهي في آخر مرحله من مراحل صناعه الشوكولاته .. بوص معايا .
ياربيه .. ودك بس تحط خشتك .. وتجي الشوكولاته على فمك . ولسانك . والتيشيرت يصير له شوكولاته .. وحالتك حاله .. الله . احسه ونااااااااااااسه . <<<<< بالله لا عاد تتخيل .. >>>>> أنت الى الحين ما نمت <<<<< لا معاك إلى آخر الحلقة.. بعد ما طلعنا من هالقسم .. رحنا لقسم المعروضات .. حاطين من كل صنف من اصناف الشوكولاته . حاطين عينات منها . كل واحد يمر وياخذ له حبه او حبتين .. تبون ؟ .. نجرب ؟ .. يالله ..
.. مد يدك لا تستحي ..
وهذه برضو
.. وهذه يااااااا عليها طعم .. جواها كراميل سااااااااااايحه مع شوكولاته .. شفها ..
. هنا صارت سالفه . صراحه ضحكنا عليها لين دخنا .. قبل ما نوصل للقسم اللي عارضين فيه شوكولاته للتذوق .. كان معنا من نفس القروب . بزر صغير .. يمكن عمره خمس سنوات . بس أنه دووووووووب.. كبر هالشاشه اللي قدامي مرتين .. المهم وهي تشرح .. تقول الحين نبي ندخل الغرفه هذه . وكل واحد يتذوق طعم الشوكولاته ووووو .. هالبزر وش سوا .. جا .. ودخل قبلنا.. من غير ما تدري اللي تشرح .. طبعا أنا والله جالس أتابعه . لأنه بثر .. المهم قبل ما ندخل .. قالت بنبه عن شغله .. أول ما تدخلون . راح تلاقون طاولتين كبار . وحده يمين . ووحده يسار .. الشوكولاته اللي على اليمين . هذه فيها كحول.. والشوكولاته اللي على اليسار .. هذه ما فيها شي .. قلنا اوكي .. يوم دخلنا .. ألا هالدوب البزر . ماسك خط مع الشوكولاته اللي على اليمين .. . وما فيه ألا قوه أكل. وأكل . بيدينه الثنتين .. وتجيه أمه . وتلحق عليه . وتشربه مويه .. والله ياااااااااااهو سطل تسطيل .. جالس بس أتابعه .. تخبرون الدوب اذا جاه النوم . وراح يمشي لغرفته ؟ هههههههههههههـ .. يمشي وهو ماااااايل .. اذا حس أنه يمشي جهه اليسار . صفط الكرشه يمين . يتعدل الوضع . والعكس صحيح ههههههههههههههـ .. يا هو وسع صدورنا .. <<<<< ياليتك مصوره يا أخي >>>>> ما أمداني والله <<<<< طيب كمل >>>>> طيب لا تدف آخر شي في المصنع . يطلعونك على مثل السوق .. فيه كل المنتجات اللي يسويها المصنع .. بوص ..
واحد . أثنين . ثلاث .. اربعه . خمسه . سته . سبعه .. سبع صلعاااااات .. طبعا تشتري اللي ودك .. انا قشيت منهم مؤونه سنه .. عاد ما صورتها الا هنا بالرياض . صورت الباقي طبعا .. يالله كل واحد ياخذ شوي ..
وبعدها .. طلعنا من المصنع . قبل ما تطلع . كل واحد عطوه كوب ( هوت شوكوليت ) ..
كعربون توديع .. رجعنا للباص .. وكل واحد جلس في مكانه .. وجا مرشد الرحلة . وجلس يعدنا وتأكد من الحضور .. وقال هيااااااااا بنا ننطلق .. طبعا الحين وين نبي نروح ؟ .. يالله مين متذكر من أول التقرير وين نبي نروح.. ما فيه أحد .. <<<<< قايل لك مافيه ألا انت في هالتقرير >>>>> مالك شغل . اطلع من دوماغي .. ايوووووووه . كأني اسمع صوت من ورا يقول نبي نروح لقلعه Gruyeres .. الحين نبي ننطلق لقلعه Gruyeres . المسافه بينها وبين مصنع الشوكولاته . تقريبا ساعه .. طبعا أنا أقول لك ساعه .. بس صدقني . ما تحس بالوقت .. تقول ما أسرع وصلنا .. بالله شوف المناظر اللي تشوفها بالطريق .
سويسرا .. ليه كل معجز مر هذا الكون فيها له صلة ..!! ..
وليه كل لامعقول فيها ورغم هذا .. تعقله .!! جلست اصور بعض اللوحات اللي نقابلها بالطريق ..
شكلها مو واضحه .. صح ..!!! نغير شوي ..
ايووووووووه . وضحت الحين .. القلعه هذه . مرررره رايقه .. هدوووووء . وفيها محلات قديمه . تحسك أنك في عصر الشسمه .. أول ما وصلنا لها .. وقفنا الباص حقنا <<<< صار حقنا .. المرشد السياحي . قال الحين ساااااااعتكم كم ؟.. قلن كيذا وكيذا .. قال يا عيني عليكم .. خلاص . موعدنا في الباص .. الساعه كيذا .. لازم الجميع نكون في الباص . اوكي يا حلوين ؟ .. قلنا اوووووووووكي .. طيب . خلونا ننزل .. وناخذ لنا لفه في هالقلعه .. والاشياء الحلوه اللي فيها . يالله ؟ .. يالله ننزل ؟ . يالله . اول شي تجي تدخل من هذا الممر
ونمشي شوي قدااااااااااااااام
حتى يباااااااان لك المكان كله
.. .. مثل ما أنت شايف .. مكان مريييييح . ورايق .. فيه محلات على اليمين واليسار .. فيه كوفيات . فيه مطاعم سويسريه .. فيه محلات تبيع الجبنه .. يعني تحس انك رجعت للتراث السويسري القديم .. شي روعه صراحه .. نشوف مناظر ثانيه ..
طبعا رحت أتمشى في هالجو الروووووعه . والمناظر والاجواء اللي تسحرك بكل شي فيها . حتى وصلت لهذا الشي
مثل المتحف .. بس ما دخلته . صورت كم صوره خارجيه
وأنت في هالقلعه فيه مثل القطار صغيرررر .. تقدر تقص تذكره .. وتخليه يمشيك بين هالأشياء الروعه . شوف معاي
يلف فيك ويمشيك بملغ بسيط . 5 فرنك . تقريبا 17 ريال .. وهذه صوره أخرى له ..
طالعو الصوره اللي فوق .. وانا اصوره . شفت هالبنوته اللي ع اليسار .. مررررررررره كيوت. شافتني اصور . قلت لها تعالي تعالي .. <<<<< والله ولقيت لك احد تعضضه .. >>>>> شفت عااااااااااد المهم شوي وتجي . يا حوبي لها .. وأكلمها بالأنجليزي . ما فهمت شي .. ردت علي بكلام الظاهر .. الظاهر .. أنه ألماني .. بس اللي ان شاء الله واثق منه . أنه كلامن زين . لاهوب سبه ولا شي . لأنها كانت تضحك .. المهم جلست يمي . وكان فيه كلب صغيرررر مربوط .. مدري من ربطه وانحاش .. جلست تلعب معاه .
وهذه
.. طبعا كان في مشروع عضه .. لكن صعبه تصيح في هالجو . حراااااااااام . بعد كيذا .. لقيت مكان روووووعه في أعلى القلعه .. قلت راقيه راقيه .. خلاص مسكت . وهي اذا مسكت مسكت .. مكان تروح فيه لحالك . تجلس فيه بروحك . تسرح بعـيد . بعيد هنااااااااااك . شوف .
.. .. وهذه من فووووووووووووووق
.. بعدها لمحت عيني هالمشهد . أرغمني على أني أجلس.. في أعلى القلعه .. حطيت شنطتي .. وتربعت في الارض . وجلست قدام هالمنظر ..
وصار لسان حالي يقول .!!! ليه عمري مالقى البرد له دفى .. إلا دفاكي ..!! ليه أنا عيني تشوف .. وماتشوف إلا بهاكي ..!! يا أجمل من الأخيلة .. هاذي جواب الأسئلة .. كي تكوني يا سويسرااااااا .. في عيوني . ومن حنيني . وبس فيني ..ومو بدوني .. مذهلة .. جلست تقريبا 40 دقيقه .. حتى أنه ما خلاني أقوم الا موعد رجوعنا . أقوم أول شي من جلستي . وأقوم ثاني شي من سرحاني .. بعدها رجعنا للباص .. وقبل ما أركب الباص . ألتفت على القلعه . آخر ألتفاته .. وصورت هالصوره ..
كانت وداعيه . لمكان أرتحت فيه كثيرررر .. المهم .. رجعنا الباص .. ويشتغل المرشد عد .. واحد . اثنين . ثلاثه .. .. عشان يعدنا ما نسينا أحد .. أنا ما همني أحد .. ألا واااااااااااااااحد .. منهو ؟ .. البزر الدوب اللي أكل من مصنع الشوكولاته .. قلت لا يتهور ويروح يرمي نفسه من اعلى القلعه .. عاد اللي يعين البقر اللي بيستقبله تحت .. .. طيب .. الحين ركبنا الباص . قال المرشد . الحين نبي نروح لمحطه قطارات .. نبي ننزل فيها . وبالقطار نبي نطلع لمكان حلو كثير . عشان نبي نزور شي رووووووووووعه هناك .. ونخلي الباص يلحقنا .. لأن لو نروح بالباص لهالمكان . نبي نتأخر .. وغير كيذا .. شي من التغير . أنكم تركبون القطار .. خلو كل أغراضكم الغير مهمه فوق مقاعدكم .. عشانه بيقابلنا هناك .. هااااااااا وش رايكم ؟. قلنا قدااااااااااااااااااااااااام ..ى <<<<< كالعاده قلتها بعد بالسويسري ؟ >>>>> افا عليك بس .. المهم وحنا في الباص .. رايحين لمحطه القطارات . وزع علينا تذاكر القطار .. جااااااااهزه معه من الصبح .. وهذه هي
اهم شي الجنز قال كل واحد يخليها في جيبه .. عشان اذا وصلنا للقطار .. ما تدفعون فلوس .. هذه تذاكركم معكم .. وصلنا للمحطه ..
ونزلنا من الباص . وتحرك الباص وقال الوعد هناااااااااك .. أول ما وصلنا المحطه . كان القطار الخاص فينا ما وصل . فجلسنا ننتظر شوي .. وصورت كم صوره .
وهذه
يفرق طعم هذه عن الحصى حول بحيره جنيف .. وبرضو هذه .
مثلي اوقفت تلمس جروحي وحيرتي .. بعيده اوقفت . وانا بعيد بلهفتي .. ماحد عرف اللي حصل .. وماحد لمس مثل الامل .. كل ابتسامه مهاجره جات . رجعت لشفتي .. وكل الدروب الضايعه مني . تنادي خطوتي .. ويارحلة الغربه . وداااااااااعا رحلتي ..
انتظرنا شوي .. حتى وصلنا القطار .. وركبناااااااااااا القطاااااااار .. نبي نروح لمكان روعه روعه روعه .. احسك . احسك . احسك تعبت. صح ؟ .. طيب يا حلو . ما راح اتعبك أكثر اليوم .. نوقف هنا .. اووووكي . نوقف هنا .. بس تعال . بشرط .. الحلقة الثالثه لازم تكمل معنا .. عشان نعرف وين بيودينا هالقطار .. وايش الاشياء الروعه اللي راح نشوفها .. اوووووكي ؟ . اتفقنا خلاص ؟.. يا عيني عليك ..
إلى هنا يا حلوين .. نكون وصلنا لنهايه الحلقة الثانيه .. حاولت بقدر المستطاع .. أني أخذك معي .. وأوصل لك شي من اللي عشته .. أتمنى من كل قلبي . من كل روحي .. أن هالوقت اللي قرأت فيه التقرير .. تكون الابتسامه أنرسمت على شفايفك .. تكون الفرحه دخلت ولو بجزء بسيط بداخلك .. لأن هذا الشعور . والله هو المقصد من كل اللي تشوفه ..
طيب تبي تمشي كيذا على طول ..!! يعني ما فيه شي يبرد على قليبك ولا شي . ما راح نكثر اليوم . شي بسيط آآآآآآآآآآآآآآآآآآآد كيذا .. <<<<< خلاص هاته >>>>> ايه ايه هاته بسرعه
^^ ^^ يووووووووه . انتم الى الحين هنا .. وخرو ما جبت لكم شي .. هات ملعقتك .. وطبعا ببسيك جنبك .. وخذ ..
بالعافيه على قليبكـ ..
اشوفكم على خير .. دمتم في أمان الله وحفظه .. دمتم بكاااامل عافيتكمــ ،،، و .. و .. وطبعا .. لكـــ .. انت بس .. مو لغيركـ . المايسترو ،،،
1روضة سعيد زائر
25993 واوووووووووو | 18/06/2008 04:24:54
ماشاء الله امتعتنا والله معك لكن سؤال ؟
اجمل دولة زرتها بحياتك وكنت تتمنى انك تجلس فيها ابد ؟وليش؟
داايم اشوفها بالافلام وافلام كارتون بس ماصدقت انو فيه كل هالجمال ... بس اثبتلي انت من خلال رحلاتك الشيقه.
ابي اروووووووووووووووووووووح لسويسرا..
اي اروووووووووووووووووووووووووووووووووووووح للندن ولباريس ابي رووووووووووووووووووووح ولا ترى ابصييييح <<<صيحي وبااس ^_^
بانتظار الحلقه اللي بعدها بكل شوووووووووووووووق
3شجون زائر
25996 مبدع دائما | 18/06/2008 04:29:39
هلا ويتبعها مليون غلا
ما في داعي تسأل إذا عايشن شعورك
قصدك داخلين جو معك وبقووووه كمان
المايسترو أينما توجد يوجد التميز
أنت للتميز عنوان
ف بلييييييز ما تطول علينا
دائما بانتظارك ..
4dema زائر
25997 دائما متميز | 18/06/2008 04:32:06
رائع بكل معنى الكلمة فعلا تجذب القارئ بروعة أسلوبك وبساطته
شين شؤال: ماشاء الله عليك امداك تروح من باريس الى سويسرا والا هي حصاد سنين من التمشيات ..؟؟
6أم وافي زائر
26010 ما شاء الله جنة الله في الأرض | 18/06/2008 05:51:18
.. كم هو جميل هذا التقرير وكم هي جميلة هذه الصور ..
.. جزاك الله خير وأسأل الله ان يمتعك بنعيم الآخرة ..
.. همسة : كم هي جميلة هذه الرحلات مع زوجة المستقبل والأطفال أسأل الله أن يرزقك الزوجة الصالحة والذرية البارة ..
صراحه مره تعيشنا جوو
بانتظار الحلقة الثالثه بشغف
تبي الجد عاد اول رساله افتحها من القروب تبع المايسترو<<ابسط ياعم خخخخخ
لاتقعد تفهمه تميلح لا والله بس جد اعيش الجو مره مع الصور والتعليقات
ماشا الله عليك ماخليت ولا بقيت
8M A X زائر
26020 الله يخليك لنا | 18/06/2008 06:57:16
والله ثم والله
15..*..كتي كتي..*.. زائر
26048 *_^ | 18/06/2008 10:33:28
واااااااوك ..
أول شيء ابي منديل بمسح سعابيلي..
يممممممم ..
الله على من يروح يبسط بهالمصنع..
وناااااااسه*_^
......
ولا اقول هم فارشين جبالهم ولا وش السالفة<<سامحوها مو متعودة عالطبيعة*_^
أنا اعرف ان الجبال حصا"حجر" بس هم جبالهم مفروشه*_^
....
تسلم اخوي المايسروو ..
16prinsoo زائر
26049 راااااااائع خيوووو بمعنى الكلمهـ .. | 18/06/2008 10:33:57
وااااااااااااو بجد رووووووووعه انا من متابعينك من بدااية لندن الى سويسرا بكل حلقه تبدع اكثررر
17عذوووب زائر
26052 يــــــــا الله ما أحلـى سويسرااا... | 18/06/2008 10:41:07
ووواااوو جنااان جنااان هالتقرير ررووعه طبيعه... وشوكولاته 0000 وقلعه ووناااسه ... مرة حلـــو هالبارت الله يعطيكـ.. الف الف عااافيه........
18الحلم الواعد زائر
26056 خطييييير يالمايسترو | 18/06/2008 10:56:29
والله انك وسعت صدورنا الله مير يوسع صديرك بالعافية قل اميييين يا وليدي <<جدتي جنبي وسولف لها وحبت تسلم عليك عاد<<احلفي بس
رحلتك جونااااان دخلت سويسرا براسي واحسن شيء القلعة خوطيرة جد بس ما عندك رحلة للتشيك والا تركيا
19عبدالكريم القحطاني زائر
26057 روعه واسلوب جذاب ومجهود تشكر عليه | 18/06/2008 10:59:15
اذا تكلمنا على التصوير فشيء لايعلى عليه .... اذا تكلمنا عن الاسلوب بالكتابة فاسلوبك يدخل بسرعه للعقل والوجدان ...اذا تكلمنا عن قفشاتك وطلعاتك المرحه فمهضومه وماتحس فيها تكلف .... اذا اردنا ان نعلق عن اختيارك للمواقع السياحيه والاشياء المفيده للسائح والنصائح المستفاده فهي راائعه ... باختصار انت مايسترو ذوق وثقافة وقدوة للشباب السعودي ... لكن لي عتب بسيط عليك الا ترى ان مجهودك الرائع لم يصل بالشكل المطلوب والذي يستحقه النت لايكفي انت مهمل لنفسك بصراحه التقارير هذي بروعتها وبحسن اسلوبها وجودة الماده فيها تستحق زيادة على مواقع الشبكة ان تكون في كتيب ولو بحجم كتب الجيب ارجوا ان تعيد النظر في هذا وشكرا من الاعماق يامايسترو
20الحلم الواعد زائر
26058 خطييييير يالمايسترو | 18/06/2008 11:16:46
كنت اكتب تعليقي وفجاة اكلم اختي واناظر الشاشة الا والتعليق راح وانا ما كملتش<<شكله قال ذي مطولة خل اروح بس ما درى اني ناشبتن بحلقووه
المووووهيييم انا ما ادري وين وقفت بتعليقي نثيت بس اما الدوووووب ذا والله اني حبيته يا خي ليتك مصوره لنا بدال ذا الوحات المززة
الا فيه سؤالن محيرني ومشغل باااالي
انت
انت
انت
انت
يومك انك تصور القطار والشارع كنت منسدح ع الزفلت ؟؟..<<احس اني بتسطر ع ذا السؤال
يالله اجل ما اطول عليك<<بتنحاش قبل لا تسطرها
اللى القاء في الجزء الثالث
ولا تنسى تركيا والتشيك ان كانك رايحن لها
21رساااويه زائر
26076 ........ | 18/06/2008 13:00:40
جد يعطيك الف عاااافيه على التقرير يوسع الصدر ويخلي الواحد يعيش جو كانه مسافر ماشالله عليك ومتابعين لتقاريرك من البدايه من لندن وونتظر دااايم جديدك....
23راوية الشوق زائر
26092 ياللله رحمتك وشذا الزين | 18/06/2008 15:04:13
يااااخيي والله تتحفنا دووووم بهالتقارير
واللله كثيررررررررر انبسطت يوم شفت انك كملت في التقارير
لان زعلت كثيرررر يوم اخر جزء لباريس
لان بصراحه كنت استمتع وانتظر كل جزء بفارق الصبر
وكمان هالشخصيتين:
<<<<< قايل لك مافيه ألا انت في هالتقرير
>>>>> مالك شغل . اطلع من دوماغي ..
بصرااااحه موتوني ضحك عليهن سوالفن تخليك تضحك
ننتظر التكمله باحر من الجمر
تسلمممممممممممم
24شجون زائر
26094 جزيل الشكر | 18/06/2008 15:10:54
يعجز لساني عن شكرك بصراحة رحلتك جدا ممتعة ولي يجذبنا اكثر اسلوب الراقي وفعلنا تدخل على قلوبنا الفرحة بطريقتك وتصويرك الممتاز
والله مو قادرة اوصف لك فرحتي وانا اقر مواضيعك الرائعة
تحياتي لشخصك الكريم
25الحسن زائر
26103 دق حنك | 18/06/2008 15:45:17
ليتنا إذا زرنا اماكن نستفيد منها
مثل الصينين أو الهنود وقبلهم اليابانين
سويسرا فيها مصنع لجزء من الطائرات
الاوربيه المقاتله
ومصانع غير مجال
36غاده زائر
26144 سويسرا | 19/06/2008 02:44:19
روعه واعجز اقول روعه
سبحان الله جنة الله في ارضه
شوقتني يامايسترو اروحها
احيي اسلوبك الممتع وتصويرك الرائع اللي اعطى المكان سحر ثاني
وانا من متابعينك في رحلت باريس الرائعه بس خساره ماوصلتني حلقات لندن
في انتظارك يامايسترو في الحلقات الجايه
تحياتي
37F A Y E Z 30007 زائر
26146 لا مامثلك | 19/06/2008 03:12:46
بسم الله ما شاء الله تبارك الله
فعلاً بلد رائع ...
38أصيلةالروح زائر
26148 ياماشالله عليك | 19/06/2008 03:23:08
مساء الخير والاحساس..
تقرير اليوم حلو ,, وأشوه انك ماعضيت البنت, وبعدين مالك من العاده اتفوت تصوير الولد اللي اكل الشوكولاته.. اللي على اليمين..أخاف انت ومستحي اتقول.. على كلن معليه جل من لا يسهو.. ذكرتني باغنيه من غير ليه يوم اني اسمعها في مونترو.. يا ألله.. تحياتي لك ولقلمك الراءع..
39احـلاهـم زائر
26154 وربي كني وياك | 19/06/2008 03:48:49
مساء الخـير
اخوى المايستور
اهنيك على اسلوبك الرائع والطرح المشوق وربي احس اني كنت وياك في كل مكان بس كان ودي انك مصور الدب الي اكل الشوكولاته نفسي اشوفه ....
يعطيك العافيه وبأنتظار الحلقه القادمه بشووق
42نظرة ولو جبر خاطر زائر
26161 اثر سويسرا مو بطالة؟؟؟؟ | 19/06/2008 07:13:06
احمد الله اني ما رحتها ؟؟
مدري لو رحتها كيف بقدر اتعايش مع الصحراء بعد الخضرة والجو الحلو
سبحان الله .. ان شاء الله ان ما ينتظرنا في الجنه اجمل .
44مرمرت بزمانه زائر
26166 ولا اروووووووووووع | 19/06/2008 14:08:03
ما شاء الله تبارك الرحمن
صراحه انا عجبتني لندن
وعجبتني باريس
بس هالتقرير غير
حسيت نفسيتك حلوه وانت تكتبه
التعليقات روعه بروعه صاحبها
والطبيعه خيااااااااااااااال
عمري ماعلقت ع احد بس انت شديتني من اول رحله
واليوم حلفت الا ارد لك
غرت من اللي يردون يعني شلون ؟؟ بيعلمونك انهم متابعين ؟؟
حتى انا متابعه
الله يعطيك العافيه
45أميرة اللولو زائر
26181 رهيب والله رهيب | 19/06/2008 18:47:52
اللي احلى من سويسرا وفرنسا وكل الاماكل اسلوبك
عندي اسئلة
ممكن
س1/ما كان معاك خويا في الرحله؟؟
س2/أنت تسوي لهم دعايات بس شكلها مو مجانا تاخذلك من وراها نسبة مو؟؟؟
س3/سفرتك هذي عندي احساس انها هروب من واقع مؤلم او من صدمه عانيت منها مو؟؟؟
48علي العبدالله زائر
26192 سؤال هااااام إلك .. أيها المايسترو | 20/06/2008 01:48:36
أحييك بقوة وبعاصفة من التصفيق المدوي
وكونك مبدع وأدخلت البهجة إلينا ... هذا ما فيه ذرة شك ...
لكن سؤالي وإن كان فيه شوي حقانة وبلشة وفلفسة يمكن بعد
هو:
هل تحس أنك استمتعت بشكل كامل بكل الأماكن البارعة الجمال اللي رحت لها؟؟!
أو أن مرافقة ومشاركة الكاميرا لك بكل لحظة شوهت عليك أن تعيش تلك اللحظات بكاملها؟؟؟ّ
فأنا أخشى أن من يصور في كل وقت يعيش مع الصورة وقت اللي يشوفها بعدين!!!
وعلى هالحال ما يصير فيه فرق بين اللي المصور واللي يتفرج على الألبوم بعدين!!!!!!
عرفت قصدي يا حبيبنا؟
أتمنى منك تجيب عن هذا السؤال مع كل التحايا لك على ما أتحفتنا به وأمتعتنا به
يا راااااااااااااااائع
49anas أنـــس عضو
26198 الكيس الآخر ليس لخام الشوكولاته البيضاء كما ذكر | 20/06/2008 02:56:59
السلام عليكم..
شكرا للأخ صاحب التقرير الممتع و الشيق .
بالنسبة للصورة التي فيها كيسين و هي تقريبا الصورة السابعة عشرة.احد الأكياس (الموجود على اليسار) ليس لخام الشوكولاته بل هو لأحد المكسرات و هو البندق أو ما يسمى بالفرنسية NOISETTE او HAZELNUT بالانجليزية .
بالمناسبة : لا يوجد هناك خام للشوكولاته البيضاء إنما تصنع من الحليب و بعض من خام الشوكولاته البني اللون و عناصر أخرى!
و هناك بعض المؤسسات و الأفراد لا يصنفها علميا على أساس أنها شوكولاته كمؤسسة :
the U.S. Food and Drug Administration
أو اختصارا FDA و هي الإدارة المسؤولة عن الأدوية و العقاقير الطبية و تراخيصها بأمريكا.
للتنويه و الفائدة فقط .
و شكرا
50روان زائر
26203 مبدع جداً | 20/06/2008 07:23:07
المايستروو مبدع بمعنى الكلمه .. هذي الناس الي من جد تسافر مو زينا بس نروح نشتري ملابس وناكل وننام خخخخخ انا لمن رحت سويسرا ما شفت هذا كلو خخخخخ <أجل وين رحتي خخخخ
المهم حابه اقولك واشجعك تراك مره زوووين خخخخخ
تحياتي وودي لك
رووني
51سارونه زائر
26206 شي خطيييييييييييير | 20/06/2008 15:24:12
مشكووور
من جد مببببببدع
وغيرت نظرتي للشبابنا السعودي<<حاقده عليهم
وانا اقرأ اتحمممس للجاي تحت
وهذ يدل على اسلوبك الخطيير في التشويق..
دمت بعافيه..
52خـــــــلود زائر
26208 رحلة سعــــــــــــــــــيدة | 20/06/2008 15:54:24
ما شاء الله تبارك الله
خطيرة الرحلة
يمـ يمـ الشوكلاته لزيزه
البنوته ياناس عليها تجنن
أما الدب شي ثاني
والمناظر روعه
ربي يعطيك ألف عافيه .,,,. وتحياتي لكـ
53Brownie زائر
26214 روووووووووووووعه.. | 20/06/2008 17:47:46
ماشاء الله صور ولا احلى منها..
بس ليتك تصدق على احد وخذته معك..ولا منحاش من الناس وتبي تصفي ذهنك..؟
بالتوفيق وننتظر جديدك المشوق..
لاهنت..
54متعب زائر
26225 مـآشآء الله .. | 20/06/2008 21:46:33
يـآأخي والله إشتهيت أنط لم بـآآآريس طوآآآلي
المايسترو 
12,375
..
..
.. وكثر منها اليوم . عشان في الاخير راح تعرف
.. والببسي يسبح فيه 
. لو سمحت يعني
..
..
.. دردوب
.. قلت ها .. ايه ايه 
..
..
.. قلت أبد . لو ما يحصل من الرحلة ألا هالمكان
.. 
..
ـ .. انت بس .. مو لغيركـ .
بس اما الدوووووب ذا والله اني حبيته يا خي ليتك مصوره لنا بدال ذا الوحات المززة 
تصميم وبرمجة 
واوووووووووو | 18/06/2008 04:24:54
ماشاء الله امتعتنا والله معك لكن سؤال ؟
اجمل دولة زرتها بحياتك وكنت تتمنى انك تجلس فيها ابد ؟وليش؟