مسااااااااااااااااء الورد ..
مسااااااااااء أجملـ .. اجمل أحساسـ ..
مسااااااااااااءك أحلى ..
مساااااااااءك طيبه . وعافيه .. اتمناها من قلبي .. لقلبكـ..
كيفكم .. وش أخباركم .. أن شاء الله بخير وعااااااااافيهـ ..

اللي تابعني في تقرير لندن .. وتقرير باريس .. يعرف أن هالتقارير من ضمن رحلاتي لصيف 2007 ..
واللي كان مخطط لها على الشكل التالي : ..

يا حياه الشقى يا طيارتي .. الى الحين تدور من أول تقرير لندن . ..

اليوم أن شاء الله .. راح نكمل التقرير الثالث والأخير .. وهي المحطه الثالثه لي .. وهي بالطبع . سويسرا .. ..
حلقات تقرير سويسرا .. مارح تكون كثيره مثل لندن وباريس ..
لأني ما طولت كثير سويسرا . مجرد ثلاثه ايام ..

قبل ما نبدأ ..
اصبر اصبر .. وش تطالع انت .!! .. اصبر بقول شي بعدين طالع ..
اوكي ؟.. اتفقنا ..
قبل ما نبدأ مع بعض الحلقه الأولى ..
بطلب منك طلب .. ما تردني ؟ . .. يا حوبي لك توافق على طول ..
أبي من وقتك بس .. نص ساعه ..
هالنص ساعه أدري أنها ملكـك . وأدري أنها لك .. بس ممكن اشاركك فيها ؟ ..
ودي قبل ما تبدأ تقرأ التقرير ... أنك تجي كلك .. بعـقلك .. بجوارحك .. بعيونك .. بهواك .. كلك . كلك .. ..
عندك هموم .؟؟ .. تعبان نفسيا ؟؟.. ضايق خلقكـ ؟؟؟ ..
صدقني .. وربي مافيه أحد في الكون عايش براحه تامه ..
كلن فيه هموم . وكلن ضايق صدره .. وكلن تعبان .. بس لا تفكر بأمسك .. ولا تفكر بباكر ...
فكر لي بيومك الحين . بساعتك هذه .. ابيك تستمتع فيها..
<<<<< أشغلتنا أنت . تبي تبدأ وألا أمشي ؟ ..
>>>>> وش جاب هالنشبه معنا : ( .. خلاص خلاص . ببدأ وخر لا تمسكني ..

اوكي حبايبي .. نبدأ ..!!!
نفسيتك تمام ؟ .. طيب مستحيل نبدأ ..
أدري . جالس اشوفك الحين . ناقصك شي . .. تعرف وشو .. يالله قم هاته لين أعدل جلستي ..
ايوووووووووه .. يا عمري اللي فاهمني ..
أقصد طقوسك .. ..
مفرحاتك وينها ؟ .. جنبك ؟؟ .. حلو يا حلو .. طيب والببسي وينه ..!!!
لو حصل بباسي يكون احلى .. ( بباسي في اللغه = 1 + 1 + 1 <<<<< يعني أكثر من ببسي .. )
جوالك . جوالك .. ايه جوالك ذا أبو أرقام.. ذبه هنااااااااااك . بعـيد ..

طيب ..
Vhp kf]h hgpdk lu fuq h,;d
دقيقه . مدري وش جاها كيبوردي . .. صارت تكتب انجليزي ..
اوكي .. جاهزين ..!!!!
هيااااااااااااااااااا بنا ...

كان من ضمن المخطط اللي خططت له .. أن تكون رحلتي الصيف الماضي بإختصار ..
لندن = 6 ايام ..
باريس = 6 ايام ..
سويسرا = 3 او 4 ايام ..

فقلت بخلي رجعتي للرياض . من مطار جنيف بسويسرا .. ومن مطار جنيف .. لسطح شقة أبو حسام على طوووووووول ..
آخر يوم لي في باريس .. قلت بحجز قطار يوديني من باريس .. الى جنيف ..
طبعا ممكن تروح بأكثر من طريقه .. من باريس الى جنيف ...
ممكن بالطياره .. أو الظاهر ممكن بالسياره .. وممكن بالقطار .. وفيه طريقه رابعه .. ايووووووووه .. على رجليك ..
بس اذا وصلت .. أبآآآآآآ . أبلني .. <<<<< بالله ما تعبت وانت تنطقها ..
فقلت بحجز بالقطار .. وخاصه أنك تشوف الوجيه السفره . اقصد المناظر الحلوه بالطريق ..
طيب يا حلو ..
الآن انت في باريس .. وتبي تحجز قطار لجنيف .. كيف تحجز ؟ ..
( فيس حاط يده على خده . ويسلهم بعيونه ) ...
شوف حبيبي ..
يا أنك تروح لمحطه معينه في باريس . بقول لك عنها بعد شوي .. وتحجز من هناك وتقص التذاكر ..
أول تدخل من الأنترنت . وتحجز كل شي . وتدفع عن طريق البطاقه الإئتمانيه .. وصلى الله وبارك ..

خلونا نشوف الطريقتين ..
فيه محطه في باريس .. اسمه
Gare de Lyon Stations

نشوفها مع بعض على الخريطه .. بوص معايا يا باشا .. ..

مثل ما أنت شايف . هذه خريطه بسيطه لباريس .. وهاللي تأشر بالأحمر . هي المحطه اللي راح ينقلك القطار منها لجنيف ..
( لا يفوتك حي المايسترو اللي فوق .. جنب الأوبرا .. )
<<<<< كمل الله يصلحك ..
>>>>> طيب طيب .. ناشب لي من فوق انت ..
طيب عرفنا مكان المحطه .. اذا ما تبي تحجز من النت .. تروح لهم هناك . وتلاقي شبابيك ونوافذه . تقول بحجز لجنيف . تعطيه اليوم والتاريخ .. ويدبرك ..
طيب يا حلو .. ودك تحجز من النت ؟ .. طيب . برضو بوص معايا . بس غير البصه اللي فوق ..

اول شي .. تدخل هالموقع ..


طبعا فيه أكثر من موقع .. لكن أنا جربت هذا .. أول ما تدخل . يطلع لك ..

( مشكله اللي يعرس على وحده قصيره . ناشبتن في رقبته . احسها تقول نفسي .. نفسي ألمس جبهته ) ..
<<<
ايوه .. هذا الموقع الان .. سهل جدا .. يقول لك تبي تروح وترجع . والا تبي تروح بلا رجعه ان شاء الله . ؟
<<<<< طبعا الترجمه اللي في الموقع تقول . مو أنا ..
بعدها تكتب مثلا . من باريس .. الى جنيف .. طبعا الموقع فيه ميزه حلوه . أنه يكمل لك الكلمه اذا كتبتها ..
يعني لوك من جنبها في السبيلنك .. ما يخالف .. ..
وتكمل البيانات الباقيه . بعدها تضغط سيرش ..
وشهي ذيك الكلمه اللي تشبه السيرش . وقسم بالله كانت في بالي .. ايه ايه . سترتش .. <<<<< اوووم الفرق ..

اول ما تضغط سيرش .. يطلع لك نتايج البحث .. شوف معاي مثال ..

طلع لنا نتايج الرحلات اللي ممكن تحجز ليها .. هنا بنبه لنقطه مهمه جدا جدا جدا ..
البعض يمكن ما ينتبه لها لما يحجز ..
الأن لما تحجز من باريس لجنيف .. فيه قطارين . قطار يوقف عند كذا محطه .. طبعا هذا بياخذ وقت ..
وفيه قطار ما يوقف . ابدن .. طااااااااااااير ..
انت لما تجي تحجز من المكتب .. قل للي يحجز لك . ابي مباشر ..
بس اذا جيت تحجز من النت .. شوف معاي الصوره الثاني .. ( لا تشوف . بص أحسن )

شفت المربعات اللي فوق ؟؟
طلع لي رحلتين .. رحله من باريس . وتوقف في لوزان . وتكمل لجنيف ..
ورحله من باريس . على طول لجنيف .. وهذه تستغرق 3 ساعات ونص تقريبا .. طبعا اختر اللي تبي ..

بالنسبه لي .. دخلت على الموقع على النت وانا في باريس ... وحجزت لي طريق مباشر .. وأخترت الدرجه الأولى ..
جا يوم الخميس ..
جت ليله فراقك يا باريس ..
جت ليله وداعك يا أحلى أيام ..
جت لحظه ترك باريس ..

حجزت بدري . تقريبا على الساعه 10 الصباح ..
قمت وتحممت . وضبطت كل أموري .. ونزلت عشان اسوي تشك آوت .. واطلب لي تاكسي ..
وقبل ما أمشي من الفندق باريس .. قلت هاااااااااااااتو لي اللي ضحك في وجهي يوم موقف المصعد أول ما جيتكم ..
<<<<< ياليل النشبااااااااااات
لأنه خلاص بمشي . فعادي بسوي أي شي ما يمديه يسوي شي . ولا عيال عمه ولا شي ... فيا مطقوق . أو مجلود <<<<< كلها مثل بعض يا ذكي ..
لكن قلت يالمايسترو . اقصر الشر .. والمسامح كريم .. <<<<< اشوى أنك شسمه ..
طلعت من فندقي في باريس .. ورحت لمحطه القطارات .. عشان من هناك أروح لجنيف ..
وصلت بدري . وركبت شنطتي .. وجلست في مكاني .. خلونا نشوف كراسي الدرجه الأولى في القطار .. لالالالا . ما نشوف .. نبوص ..
<<<<< وش تحس به انت
>>>>> والله مدري . وخر بس بكمل .. ..

المهم .

هذه مقاعد الدرجه الاولى .. طبعا جلست عادي .. بدون ما أفكر مين مين مين بيجلس جنبي ..
بيني وبينكم .. كنت مكتوم شوي.. ما أحب أفارق أحد .. حتى لو كانت مدينه . حتى لو كانت دوله ..
عشت أيام حلوه كثير كثير في باريس .. فكان من الصعوبه أني أتركها كيذا ..
جلست في مكاني .. وطلعت لي ورقه . وقلم .. وجلست اشخمط .. كلام كتبته .. وقطعته في وقته .. ورميته ..
وشي كتبته .. وقدرت أصوره ..

.. ..
قلت لي وش تحرى .!!! . ذااااااااااابت نجوم الليل . من جمر الآهااااااااااااااتــ ...
لا تشره على الخط .. القطار كان يهز شوي . وكان القلم يهز معاه ..

فيه كافتيريا صغيره في القطار .. قمت وجبت لي كوفي ... ورجعت لمكاني .. وشغلت أنارتي ..

وجلست اكتب . أول مره أحس أن لي الرغبه في الكتابه .. وكانت المناظر اللي حولي في القطار . تساعدني كثير ..

مع المناظر الرائعه .. مع أبو نوره لما يسلطن بالعود .. ويقول ..

الحب كله لو جمع عشر ذرة .. واللي في قلبي لك ملايين ذرات
احساسي لك كوكب تعدى المجرة . فيه الفضاء شيد لنفسه مجرات

مع كل هالشعور . والجو الغير .. مرت علي هالساعات ..
بعد هالوقت . الحمد لله وصلنا جنيف بكل سلامه وعافيه ..
طبعا كنت مضبط كل أموري في جنيف قبل ما أوصل .. كنت حاجز الفندق من الرياض من النت . قبل ما أطلع ..
الفندق اللي أخترته . كان ..
Warwick Hotel

تبي تدخل موقعه ؟ ..

الفندق هذا . حجزت الغرفه فيه . تقريبا على ما اذكر . 700 ريال لليله .. غرفه عاديه . لأني ما راح أطول ..
الفندق هذا قريب جدااااا من محطه القطارات اللي وصلت . لها ..
طيب ادري مو مصدقني .. طيب اصبر لا تطالع .. . خلنا نشوف موقعه على الخريطه مع بعض ..

شف طبعا اللي يأشر ..
<<<<< من شفت براويزك الورديه وأنا مغسلن يدي
>>>>> اص ولا كلمه . والا ما أخليك تكمل معي كتابه التقرير

اللهم سكنهم مساكنهم ..
ما عليكم من هالاثنين اللي فوق ..
مثل ما انت شايف . الفندق قريب جدا من محطه القطارات . وقريب برضو من بحيره جنيف ..
وصلت للمحطه وخلصت كل أموري .. وأول ما طلعت من باب المحطه .. ألا الفندق في وجهي ..
يعني اللي بيحجز في هالفندق . ما يحتاج ياخذ تاكسي . ويلعب عليه . ويجلس يلف به . يلف به . يلف به .. ويرجع ينزله عند الفندق
لأنه تقريبا ولا 200 متر ..
جلست اجرجر شنطتي .. ورحت للفندق .. وأدخل عليهم . السلام عليكم ورحمه الله ..
<<<<< استغفر الله . ما سلمت..
المهم وصلت الفندق . عطيته رقم الحجز . قال أنت الاطخم بندر ؟ .. قلت له . الله الله ..
لأني حاجز من أول .. على طول أخذ جوازي وشيك على الاسم .. ومفتاحي جاهز . ما جلست عنده ولا عشر دقايق ..
دعوناااااااااا نصعد سوين للغرفه ... هلوما بنا ..
حاطيني في الدور الرابع .. لأني قايل لهم يوم احجز . ابي فووووووووق . ابرد ..
<<<<< فاهم البراد غلط

اخذت شنطتي .. وأروح للمصعد ..
اول . أول . أول شي سويته أول ما دخلت المصعد .. جلست اشوف . فيه نفس حركه مصعد باريس والا لا .. وحريص أنه أركب لحالي. . عشان اذا تفشلت .. اضحك لحالي ..
المهم ركبت المصعد . والحمد لله ما عندهم مثل عيال شيراك ..
نشوف مع بعض ممر الفندق .. أأ . أأأأ . أأأ .. قصدي نبوص

الفندق حلو . ونظيف .. جلست أدور غرفتي ..
وصلنا الغرفه . رقمها 413 .. ( 3 + 1 = 4 ) <<<<< ياليل الوسوسه

طبعا في الدور اللي ما فيه تتانين . ( يعني مدخنين ) ..
نشوف بعض صور الغرفه من جوا ...
اول ما تدخل .. يجيك دوره المياه ( الله يكرمكم ) ..

الحمد لله ياااااااارب . الحمد لله مافيه تلفون . من جد وش يجيب التلفون في الحمام ؟ ..
على طاري الحمام ..
شوفو المرايا الدائريه اللي هناااااااااك . ايه ايه . هناك ..
هذه تكبر الخشه .. . ضاع نص وقت رحلتي لجنيف . وانا قدامها ههههههههـ. .
اقول يوووووووه . هذه عيني .. يوووه .. هذه منابت شعري ..
لأنها تكبر الاشياء مرررررررررره ..
تصلح طبعا لحقين المكياج .. عشان الروج يصير تمام . ياااااااااي ..
نكمل احسن ..

وهذه صوره ثانيه لدوره المياه ..

انوااااااااع الشسمه ..
ندخل بعد شوي ؟؟
يالله ..

طبعا تشوف حاطين قنوات عربيه .. وحركات يعني ..
طيب نروح نفتح اهم شي في الغرفه .. وهي الثلاجه ..

تراني ما أعرف ألا الفستق .. والتلفون اللي فوق . الباقي مالي دخل فيه هههههههههههـ ..
وكانت الغرفه تطل مباشره على الشارع . بوريكم محطه القطار اللي نزلت فيها أول ما وصلت .. بوص ..

شفت هاللي فوق ؟ .. هذه محطه القطارات .. ومصورها .. وأنا موجود بالغرفه .. يعني ما يبي لها تعب ..
بدلت ملابسي .. وأخذت لي شور . وصليت وعينت من الله خير .. وجلست شوي طلعت بعض أوراقي ..
ايه ايه . بوريكم عمله السويسريين. ايه ايه . الدراهم حقتهم ..

اما عليهم فلوووووس .. بالله شف اللي على اليمين . ايه ايه . اللي 100 ..
هذه احس أنهم مقومينه من النوم . مروعينه .. قم قم . هيه هيه .
قم نبي نصور للفلوس ..
والله والا هذا شكل ؟ ..
والا اللي على اليسار مررره . أبو عشره .. مسوي ما شفتكم .
رافع لي النظاره هههههههههههـ ..
يا زين ريالنا بس ..
المهم . جلست شوي بالغرفه .. وأكلت لي شيئا من المفرحات ..
على فكره . الفندق هذا . تحته مجمع سوق صغير . فيه مااااااك . وفيه سوبر ماركت .. وفيه مكينه صرف فلوس .. وحركات يعني ..
بعد ما ريحت شوي .. قلت بطلع أخذ لفه بالأماكن اللي حولنا ..
طبعا بنبه عن شغله ..
ايامي قليله جدا في سويسرا .. عشان كيذا كنت حاط في بالي أستغل كل كل كل دقيقه ..
هذا شي .. الشي الثاني ..
اذا كنت في سفره . وضاق عليك الوقت .. وأنت ما تدل كثير في البلد .. لا تسوي نفسك فااااااااااااهم ..
جد والله .. لا تسوي نفسك فاهم . وتقول ما عليه . بجلس أدبر أموري .. لالالالا . نصيحه لك ..
رح أسأل . أو رح لشركه سياحيه تدبر لك يوم سياحي كااااااااامل ..
على قوله المثل .. عط الخباز خبزه لو أكل عجينه كله وراح شسمه .. <<<<< يرحم والديك قل مره مثل كامل صح ..
عشان كيذا . حطيت هدف في بالي أول ما اوصل لجنيف . أن أول يوم يكون للمشي حول البحيره .. وتضبيط جدول لليومين اللي بعده ..
طبعا معروفه بحيره جنيف .. ونافوره جنيف .. هي اشهر شي هناك ..
طيب كم يبعد الفندق اللي اخذته . عن البحيره ؟ .. هل احتاج تاكسي ..!!
طبعا ما يحتاج .. شوف معاي ..

هذه الصوره مصوره وخلفي مباشره البحيره .. وآآآآآآآآخر الشارع . شوف آخر الشارع .
. لا تشوفني هنا . لالالا . شوف آخر الشارع .شف البنايه اللي على اليمين . هذا هو الفندق اللي حجزت فيه ..
يعني مشي تقريبا 10 دقايق ..

وش رايكم نغير جو شوي . ونلف لفه كاااااااااااامل على بحيره جنيف ؟ ..
يالله .. خلونا نقطع الشارع ..

انتبه . . انتبه لا تجي سياره تطيرك وأبلش بك ..
يالله نشوف ..

الله الله ..
وشوف هذه ..

هذه نافوره بحيره جنيف .. ..
ابد . ما فيه فرق بينها وبين نافوره جده .. الا الوجيه اللي يبيعون فصفص وعلوك حول البحيره ..
<<<<< براااااااا ..
نكمل جولتنا ..

كل زين أشاااااااااهده . وأنتم بعيد . منوتي ليتك معي ...
وشوف هذه ..

وهذا أسد يسبح ..

وهذه توها ماخذه شور سريع

البحيره ملياااااااااااااااانه قوارب .. بوص ..

وهذه بعض الفنادق اللي تطل على البحيره ..

زاويه أخرى ..

وأنا أمشي . لقيت هناك ستار بكس .. مريته وأخذت لي كوفي . وكملت مشي ..
تقريبا مشيتها في ساعتين ونص .. كاااااامل البحيره . من أولها لأخرها ..
وأنا امشي . بدا الجو يتغير .. كأنها تبي تمطر .. وراح تلاحظ هالشي في الصور الجايه ..
بوص يا ضنايا ..

وهونا ..

ومثلك عارف . سويسرا مشهوره بالساعات . فتشوف الدعايات في كل مكان . حتى فوق المباني ..

وانا أتمشى حول البحيره .. شفت واحد يسبح . جد والله .. شوف ..

يا عينـــــــــــي على الروقان . المشكله المويه باااااااااااااارده ..
نكمل باقي الصور ..
شوف هذه ..

وأنا أمشي .. لقيت بيبي . يجنـــــــــن .. شوف

أبوه جالس يعلمه كيف يمشيي .. طبعا ما أستحملت .. رحت وعضيته .. بس الولد ما صاح . جلس يطالعني .. يقول وش قصه أمه ذا .. جاي من الربوه لجنيف عشان يعضني ...
بس صدقوني . بعد العضه بدا يمشي زين ..

<<<<< نكمل الصور .. ؟؟
>>>>> أي والله أحسن ..
نشوف هالصوره الأنبطاحيه ..

واحب أسافر مع سحاب تعلى . واحب فوق الغيم لمع البروقــ
واحب أساهر بدري اللي تجلى . وارسم شعاع الشمس عند الشروقــ
أحب أعسف المهرة اللي تغلى . واحب أروض كل طرف يموق

حتى طعم حصى جنيف .. يهبل ..
وانت تمشي حول البحيره . تشوف محل صغير . يأجر سياكل .. طبعا مو بفلوس . لالالا . ببلاش .. هذه من حكومه سويسرا اللي يعزها ..

شوف ..

بس تروح لهم . وتعطيهم أي اثبات معك . يعني عشان ما تسرق السيكل ولا يردك الا بيتكم ..
وتخلي اثباتك معهم .. لين ترجع السيكل ..
وألا اذا رجيلاتك ما تشيلك. . فيه القطار اللي يلف حول البحيره .. بوص يا خلفهم
<<<<< مصري من زمان عايش في الرياض ..

هذا شكل القطار .. يلف بك لفه كامله حول البحيره . بالمخطط هذا ..

أنا عني . لا أخذت لا هذا ولا هذا .. مسكت معي أني أمشي .. أحب أمشي طيب وش تطالع ..
المهم كملت المشي على البحيره ..

طبعا وأنا امشي . كنت أسأل عن مكاتب سياحيه . أو شركات سياحيه ..
لأن الفتره اللي بجلسها قليله . وودي أستغل كل دقيقه .. فالحمد لله .. لقيت هالشركه

مشهوره كثير هناك . وقفت عند الرجال . وقلت له عندي بكره يوم كاااااااامل فاضي . وودي استغله كله .
. قال ابشر . ( قالها بالسويسري ) ..
عطاني كتيب .. قال عندنا أكثر من برنامج .. أنت اختار ..
مثل ما تشوف في الصوره فوق . فيه اكثر من برنامج يومي . وجنبها الأسعار . أنا اخترت واحد .
بس ما راح اعلمك وش هو . لأنه بيكون مخططنا للحلقه الثانيه ان شاء الله .. ..
المهم حجزت من عنده كل شي .. وعطيته الفلوس . وخلصت أموري .. على أساس يوم بكره . بيكون كله مع هالشركه ..
بعد ما خلصت وحجزت .. مسكت معي مسكه .. شفتو نافوره جنيف .. !! . مسكت ..
أني أروح تحتها .. وأخلي المويه تضــــــــــــــرب .. طبعا مستحيل تحتها تحتها .. بس قريب منها مررررررررره ..
<<<<< عليك مسكات بعد ..
>>>>> وش دخلك ؟ . تراني محترمك من أول التقرير ..
اشغولنا هالاثنين اللي فوق .
المهم رحت أمشي للنافوره . لأنها كانت بعيده عني شوي .. وأنا بالطريق .
صورت هالمجسم في الحديقه اللي جنب البحيره ..

مدري من هذا .. ما بقى ألا راسه .. الباقي مدري وين راح .. ..
طبعا حول البحيره فيه قوارب.. وفيه سفن .. ممكن تقص تذكره . ويلفون بك حول البحيره . ممكن تطلع طلعه عشاء . أو غداء . وتتغدى على متن السفينه .. ( قويه متن ) ..
شوف ..

وجنبها الأوقات اللي تتحرك فيها السفينه ..

وبرضو الأماكن اللي راح تمرها ..

يعني كل شي مرتب . وكل شي واااااااضح قدام أي ساااااااائح ..
استمريت في المشي .. والمقصد وشو .. النااااااااافوره ..
جالس تحتها يعني جالس تحتها .. الله لا يعوق بشر ..
النافوره في وسط البحيره . ففيه مثل الممر لازم تمشيه .. نمشي مع بعض .. يالله ..

مشيت . مشيت . مشيت . حتى وصلت قرررررررررريب من النافوره .. شوف ..

بوف . بوف .بوف ..
شف قوه الدفع بس ..
طبعا وقفت تحتها . ويجيك المويه من فوق .. مع شويه براااااااد . الله الله الله ...
شوي حسيت الشمس بدت تغيب .. خلونا ناخذ صوره لأعلى النافوره . بعد ما غطت الغيوم كل شي .

الله ..
بعدها قلت ياولد . تحرك تحرك .. قبل ما تغيب الشمس .. وتبلش في عمرك ..

ومشيت . مشيت . على أساس أرجع الفندق .. لأنه كان بعيـــــــــد عني ..
كان ودي ما أرجع . أجلس بس . اشوف لحظه تدخل الغيوم . مع مغيب الشمس ..

.. راحت مشت . وعيوني تتبعها . راحت مشت . مجبور أودعها ..

كانت هذه آآآآآآخر صوره صورتها قبل ما تغيب شمس أول يوم لي في جنيف ..
بعدها رجعت للفندق . وكنت مهدووود كثير ..
ريحت جسمي .. وريحت ظهري . اللي كان يعورني مثل الحين ..

دقيقه بس ..
برب ..
طق طق . طق طق ..
<<<<< يطقطق ظهره ..

نفس عميــــــــــــق .. ..
إلى هنا يا حلوين .. نكون وصلنا لنهايه الحلقة الأولى ..
مثل ما قلت لك في أول التقرير .. أتمنى . أتمنى . من كل قلبي .. أنك عشت معي . لو للحظااااااات ..
وأهم شي .. أن تكون هاللحظات . مستمتع فيها ..
أتمنى برضو . أنك تتابع معي الحلقه الثانيه .. صدقني تبي تكون حلقه غير .. بس بوجودك أنت معنا .. ..
نمشي ..!!!!! ..
ما أسمع .. نمشي ؟؟؟ .. ..
لالالالالالا .. تمشي فين يا سيدي ..
اليوم تعبتك معي .. وأنواع المشااااااااااوير .. من باريس لجنيف ..
أدري مفرحاتك خلصت .. عشان كيذا . هالمره خل كل شي علي . ..
جايب ملعقتك معك ؟ .. عاد اليوم نبي ملعقتين مو وحده ..
أول شي .. بما أن اليوم حر .. برد لي على قليبك بهالآيسكريم ..

بسررررررعه بسرعه قبل ما يسيح ..
وأول ما تخلص منه . هات ملعقتك .. وتعال خذ .. ..

بالعافيه على قليبكـ ...
اشوفكم على خير ..
دمتم في أمان الله وحفظه ..
دمتم بكاااامل عافيتكمــ ،،،
و .. و .. وطبعا ..
لكـــ .. انت بس .. مو لغيركـ .
المايسترو ،،،

wWw.al-Maistro.Com



متنفسـ

في ليله كنها الليله ..
عرفتك بسمتي و فجري .

و ليله زي ذي الليله .
و هبتك في الامل عمري .

و يا ريت البسمه ما كانت و لا الاحساس .
وياريت الدنيا خانتني و كل الناس .

و لا خنتي هواي انتي .
و لا قلتي في أمــــان الله .

و ليله كانت الفرقا ..
و قالت لي في امان الله ..

كانت ليلة خميس ..