ملاحظه .. ترى الموضوع طوووويل ... وراك شي .. رح وتعال ... ابيك معي هنا بكل احاسيسك .. وبمزاااااجك ... يالله !! ... هيا بنا ....
مساااااااااااااء الخير لكل الأحبابــ .. مسااااااااااااء الورد لكل الأصحابــ ... مساااااااااااء ما يليق إلا بأحبابي ... انت .. وأنتي ... كيفكم يا حلوين .. وش مسوين ... ان شاء الله بخير وعااااااافيه ...
اليوم ان شاء الله ... راح نكمل مع بعض باقي سلسله رحلتي لصيف عام 2007 .... تكلمنا قبل فتره عن أول محطات السفر ... وكانت محبوبتي لندن ... اليوم بعون الله ... راح نتكلم ... عن المحطه الثانيه ... وهي ....
................... باريس................. اول شي .. قبل ما ادخل في اول حلقات باريس ... كنت قبل كم يوم جالس ارتب الصور الخاصه فيها ... المهم توقعت اصلا انها في أي حال من الاحوال .. ما راح يتعدى عددها الصور اللي صورتها في لندن ... المهم يوم جبت اللابتوب .. واشوف الصور ... الا عددها تقريبا 720 صوره .... ياااااااااهو يا كاميرا وش قصتك معي انتي ... شكلك جالسه تكررين الصور ... قالت لا والله لا تظلمني ... انت اللي مير تضغط فيني من سافرنا لين رجعنا
<<< انفصام يؤدي الى محادثه الجوامد ....
المهم جلست اشوف الصور الا والله واااااااجده ... قلت امممممممم ... لالالا .. مو قلت امممممم .. اقصد سويت امممممممم .... المهم .. فرزتها وصلحتها ... وعلى فكره ... ديزني لاند ... تقريبا لها النصيب الأكبر ... يعني راح نفلها مع بعض في حلقات ديزني ... ... طيب ... وش رايك نبدا في أول الحلقه ... كل اموركم جاهزه !! ... الببسي البااااااارد جاهز !! ... مفرحاتك يمك !! ... جوالك مسكره !! ... يا لبى قليبك ... هيا بنا ....
بعد ما جلست تقريبا 6 ايام راااااائعه في لندن ... جا موعد سفري لباريس ... كان السفر .. يوم الاربعاء ... ( يعني ليله خميس ) ... طبعا اخترت اني اسافر عن طريق القطار اللي يربط بين باريس ولندن ... وهو اني حجزت من سلسله قطارات ... ....... Eurostar ....... هذه شركه قطارات دوليه ... لهذا اكثر من وجهه واكثر من محطه ... من المحطات اللي تربطها ... هو الربط بين بريطانيا وبين فرنسا ... او بالاصح ... بين لندن وباريس ...
طبعا انا يومني في لندن ... قد دخلت موقع الشركه اللي هو ...هنــــا .... ابد اول ما دخلت الموقع ... لقيته سهل جدا .. فيه انك تقدر تحدد وجهتك وتحجز وتدفع عن طريق البطاقه .. وصلى الله وبارك ... شوف معي ياحلو ...
ابد .. هنا تدخل كل المعلومات .. وهو بيطلع لك كل اللي تبي ... واخر شي بيكون معك مثل هالتذكره ...
بعدها طلعت من فندقي في لندن .. ورحت على طوووول للمحطه اللي بطلع منها لباريس .. وصلت الى المحطه بوقت كافي جدا ... قبل رحلتي .. تقريبا جيت قبل الرحله ساعه ونص .. من الحرص الزايد ... بعد ما قربت ساعه تحرك القطار ... رحت اشوف المسار اللي مخصص لنا عشان نركب القطار ... وعشان يشيكون على الجواز ... والامور هذه ... المهم صار لي موقف هناك ... كنت بروح في خبر كااااانا واخواتها وجيرانهم بعد ... بعد ما دخلت شنطتي في ذاك اللي يفحص الشنط ... ذاااااااك ذااااااااك اللي يدخلون فيه الشنطه ويفحصونها .... عرفتها !! ... ايوووووووووه يا عيني عليك .... المهم بعد ما دخلو الشنطه ... وطلعت من الجهه الثانيه ... باقي مرحله انهم يشوفون جوازي ... وان المملوح اللي قدامهم هو نفسه اللي في الجواز ... اللي صار لي ... ان البنت اللي تشيك على الجواز .. كانت مثل ما تقولون في غرفه .. وتستقبل المسافرين من شباك قزاز .. المهم هي وش تسوي .. تاخذ جوازك .. تشوف خشتك ... تشوف فيزتك ... درررررررردوووووب .... (دردوب هذا صوت الختم لما تختم لك ) ... المهم .. اني عطيتها جوازي ... قالت شل النظاره ... قلت يووووووووه بدينا بالغزل ... عاد فرنسيين عرقهم شسمه ... المهم اني شلت النظاره ... وبعد ما شافتني ... نزلت راسها ... يوم نزلت راسها ... انا مشيت ... والله مشيت ... قالت تعااااااااااال ... تعاااااااااال ... جوازك ما خذيته ... مدري من جد وش جاني وقتها ... ما احب احد يطالع عيوني <<< بشويش يا توم كروز ... المهم شكو فيني ... وخافو ... يقولون وش هاللي مخترش ... وتجلس تسأل كم سؤال بعد ... وينك منه ! ... من خوالك ! .. وش ترجعون له ... منكم ماخذين منه !! .... هههههههههههههههــ ... لالالا امزح ... بس جلست تسأل وين راح تسكن .. وليش مسافر ... مع انها ما سألتني اول ما وقفت منها ... المهم بعد ما تعديت هالموقف .. رحت وركبت القطاااااااااار .. وبدءت الرحله ... جلست في مكاني في القطار ... اول ما جلست مبسوووووط ما احد جنبي .. وبدا شغل الوسوسه .. كل ما دخل احد وجا يمشي .. اجلس اقول .. تتوقع يا بندر هذا اللي بيجلس جنبك ... اذا تعداني .. قلت شفت انك ما عندك سالفه .... >>> قايل لكم انفصام ... بعد ما جلست .. وريحت ... تحرك القطار في الموعد المحدد له ... جلست تقريبا ربع ساعه ... بس عشان اخذ على المكان على قولتهم ... بعدها قربت شنطتي الصغيره .. بطلع بعض الاغراض منها .. عشان اراجعها لين نوصل ...
مثل ما انت شايف في الصوره فوق ... جدول الرحله – الام بي ثري – حجزي في فندق باريس- تقارير رحلات سابقه جالس استفيد منها ... وهذه صوره من الطريق ... كان روعه صراحه ...
وانا جالس اشوف الاوراق .. كنت اسمع بعض الميوزك ...
لا اتعذر باحتياجك .. كلنا ناقص حنان ... كلنا طفل يتمنى أي شخص يحضنه ... نبني الدنيا وحنـا ,, ونوقف في نفس المكان ... للاسف ينقص وفانا .. مع مرور الازمنه ... وطبعا كانت عين على باريس .. وعين على الرياض ...
صراحه مشى الوقت سرررريع في القطار ... حتى وصلت الى باريس ... بعد ما وصلت وكيذا .. وقفت اقرب تاكسي ... وعطيته عنوان الفندق ... قلت يالله يابو ... تحرك الله لا يهينك ... خلوني اتكلم شوي عن الفندق اللي اخذته في باريس ... قبل ما اجهز للرحله بشكل عام ... احترت كثيرررر في اختياري للفندق المناسب في باريس ... جلست ابحث واسأل عن فندق مناسب .. لييييين اخترت هالفندق ... بوص معاااااااايا ...
الفندق اسمه ... Renaissance Paris Hotel La Defence من سلسله فنادق الماريوت ... وهو اربع نجوم ... وموقعهم على النت ...هنا ... وهذه خريطه لموقع الفندق ...
شفت اللي يأشر هنااااااك .. ايوه .. هذا مكان الفندق الفندق هذا حجزته عن طريق موقع اكسبيديا ...
حجز الفندق من هالموقع ... ودفعت الفلوس وكل ابو شي ... الفندق طلع علي الظاهر بـ 600 ريال الليله .. كان فيه عرض .. وانا استغليت العرض هذا ... الغرفه اصلا حول بـ 900 ريال .. بس كان في عرض في موقع اسكبيديا .. وهو انهم يعطونك خصم حلو كثير .. بس انك اذا دفعت فلوس .. ما ترجع ولا ريال اذا هونت ... بعكس لو حجزت أي فندق عادي .. وهونت قبل قدومك للفندق ب 24 ساعه ... يرجعون لك فلوسك ... قلت يااااااااااااالله بس .. احجز وتوكل على الله ... يوم جيت احجز بالموقع ... جاست اتشرط عليهم ... قلت اول شي ابي غرفه في اعلى دور عندكم ... احب الاماكن المرتفعه ... وابيها تطل على مناظرن زينه ... بعد خيررررررررر فلوسي .. بتشرط على كيفي ( فيس حاط يده على خصره ومميل راسه شوي يمين ) ... المهم ... بعد ما حاس راسي راعي التاكسي من اللفلفه ... والدوجان ... وصلنا للفندق .. هذه صوره من برى ...
وهذه صوره ثانيه ...
اول ما وصلت ... وحاسبت التاكسي وكيذا .. وادخل واروح للريسبشنه ... اول ما شافتني .. قالت بنصوااااااا ... قلت بنصوارين . ... بعدين قالت : بنجوغ بوناغ تولي بورا جينا ري بنجوغ بوناغ تولي بورا ... قلت هييييييييييه هيييييييييييه ... خير ان شاء الله .. تكلمي انجليزي ... ما اعرف فرنسي .. قالت اوووووه سوري ... وتقلب على الموجه الانجليزيه ... ايه صدق ... يوم جلست تبربر فرنسي .. يوم قالت ... بنجوغ بوناغ تولي بورا جينا ري بنجوغ بوناغ تولي بورا ... قلت الحين تبي تقول بنجوغ بوناغ تولي كنج عبدالعزيز .. تذكرت الاخبار الفرنسيه في القناه الثانيه .. ما نفهم الا اسماء طويلين العمر ... المهم ان امور حجزي كانت اوكي .. اوراقي جاهزه عندهم .. واسمي وكل ابو شي ... عطتني كرت باب الغرفه .. وقلت اللي يشيل الشناط مشغول الحين .. انت رح ... وبخليه يجيبها ... قلت الله مير يسلمتس ما تقصرين والله ... وهذه صوره للوبي اخذتها وانا على عوجاله ...
واخذ لابتوبي واروح للاصنصير ... هنا صاااااااار لي موقف ... جلست اضحك ولا عشر دقايق ... اللي صار اني ضغطت على زر المصعد عشان ينفتح .. اوكي ... يوم فتح الباب وكيذا ... ركبت جوا لحالي .. واضغط على رقم 7 ... وهو الدور اللي انا ساكن فيه ... وجالس انتظر يعني عشان المصعد يرقى فوق .. واجلس انتظر .. انتظر .. انتظر ... انتظر .. انتظر ... لحووووووول لين الحين ما وصلنا ... قلت شكلهم والله مسكنيني فوق مره ... المهم شوي وينفتح الباب حق المصعد ... الا قدامي الريسبشن ... والعامل معه شنطتي ... قلت له وش السااااااااااالفه ... قال نظام المصعد عندنا .. انك اول ما تركبه .. تحط كرتك في هالفتحه .. ويأشر عليها .. قال تحط كرتك فيها .. وتختار رقم الدور .. عشان يتحرك المصعد ... قلت ايووووووووووووووووووه ... يعني كل العشر دقايق اللي راحت كنت واقف بس .. قال ايوه ... قلت وانت مبسوط تشوفني .. قال ايوه .. قلت ومفكر اني بعطيك بخشيش عشان وجهي طاح .. قال ايوه .. قلت تدل بيتكم .. قال ايوه ... قلت ياااااالله اجل .. هات شنطتي .. وانقلع .. هههههههههههــ من جد جلست اضحك على نفسي ... مسوي فاهم .. قلت ما شاء الله .. المصعد حقهم ماله صوت ... اثر اني شسمه ... اول ما فتح المصعد ... اخذ صوره للممر ...
وهذه صوره للمصعد المشؤووووم
المهم وصلت الغرفه بعد وقت طويل ... خلونا نتعرف على الغرفه من جوا ... هذه صوره للغرفه اول ما دخلت ...
وهذه ثانيه
ومثل ما انتم شايفين .. الغرفه مررررره مريحه نفسيا ..
وهيدي ...
وعلشاني طالب الغرفه تكون في اعلى دور .. هذه صوره من فوق .. من شباك الغرفه ...
ربيع ربيع وطبعا لازم نشوف وش في الثلاجه ...
يا حوبي للاثنين اللي واقفين تحت يمين ... برب اشتهيت ببسي ثاني .... باك ... <<<< احلى باك ... المهم ما عليكم في هاللي يسولف على نفسه فوق .. خلونا نكمل ... وافتح التلفزيون ... الا فيه كم قناه عربيه ...
بوص يا محمد .. طلأني يعني تطلأني ... بأولك طلأني ... الله .. موش فاهم يعني .. اكتبهالك ... وهذه صوره لدوره المياه ( الله يكرمكم ) ...
اول ما دخلت الغرفه .. تفاجأت بهديه لي جواها..
طبعا ما وفرتها ...
بعدها بدلت ملابسي .. واخذت لي شور داااااااافي ... وصليت وكيذا ... وريحت جسمي شوي ... بعدها .. قلت ياولد .. اطلع استكشف المنطقه اللي حولك ... رجعت ودخلت دوره المياه ... وضبط اموري ..
بعدين لبست وكشخت ... ونزلت تحت .. اول ما نزلت شفت ان فيه نادي صحي في الفندق .. قلت نشوفه ...
بعدين طلعت برى ... وجلست اشوف المنطقه ... المنطقه طبعا اسمها .. اللاديفانس ... منطقه صحيح انها مو قريبه من الشانز والطقه هذه .. لكن مررررريحه صراحه ... مدري ارتحت فيها وبس ... طلعت ولقيت فيه مثل الشي ... لا احد يسألني وشو هالشي ... لأني ما اعرف وشو لين اليوم ... شوفوه معي ...
هذا هو ... صراحه مدري وشو .. بس فيه ناس ترقاه .. قلت معهم ... وقفت عند الي يقص التذاكر .. وقصيت التذكره .. وركبت المصعد .. وهذه صوره وحنا في المصعد ...
اول ما رقيت فوق ... اممممممممم مدري جاي على شكل متحف .. او معرض صور .. هذه كم صوره من جوا ...
جمل ... والمؤنث منه جمله .. وجمعها جملات ... وهذه صوره ثانيه ...
اول ما شفتها .. اشتهيت البيتزا ... المهم ما طولت فوق .. على طول نزلت ... وجلست شوي على الدرج الطووووويل اللي قدمه .. وصورت هالصورتين ...
وهذه ...
بعدها رحت لسوق جنب الاوتيل ... وشريت منه مفرحات .. وبباسي(جمع ببسي ) .. وبعض الحاجيات ... ورجعت للفندق على طوووووول ... اول ما رجعت .. سألت عن الانترنت .. قلت بشيك على ايميلي ... قالت لي الريسبشنه اللي كنت بكفخها .. قالت لي في اللوبي النت مجانا .. في الغرف بفلوس ... قلت اوكي .. رحت لغرفتي .. وابي اشبك النت .. صار الكيبل قصير وحالته حاله .. قلت بنزل للوبي احسن ...
نزلت للوبي .. وشيكت على ايميلي .. والمواقع المهمه لي .. وشفت اسهمي حمرا وقلت الحمد لله ... بعد كيذا .. كان جسمي شوي مهدود ... قلت بروح انام واريح ... وادخل الغرفه بعد ما جا الليل .. يعني اظلمت الدنيا ... طلعت الغرفه احلى بكثيرررررر مع الاناره الخافته ..
بدلت ملابسي ... وجلست على السرير شوي .. وجلست اطالع التلفزيون واشوف طلقها ذاك والا لا ... .. واشوف وين بروح اليوم الثاني ... طبعا هالسرير حق الفندق .. اتوقع فيه شي .. لا جد لا تطالعني .. احس فيه شي .. من جد لوك نايم 345345 ساعه .. وشبعان نوم .. وجيت على هالسرير .. بيجيك النوم غصبن عنك .. مرررررررريح جدا جدا جدا ... ... بعدها طفيت الانوار ... ورحت لسريري .. ونمـــــــت
أيـــــــــــــــــــه .. <<<< ياخذ نفس عميق ... اليوم يا حلوين وصلنا لنهايه الحلقه الاولى من رحلتي لباريس ... واتمنى من كل قلبي ... انك تكون معي .. ويمي.. وتتابع باقي الحلقات الجايه ... ان شاء الله ياااااارب انها تبي تعجبك ... وقبل ما تطلع ... كالعاده .. لازم نعطيك شي بسيط ... جايب ملعقتك معك ؟!! ... ما جبتها ... طيب شوكه .. برضوووو ... كل مره يعني اقول هات ملعقتك معك ... طيب طيب .. خلالالالاص طيب لا ترفع صوتك ... مو لازم شوكه انا بجيب لك ... خذ ... واستمتع ...
جواها شوكولاته ساااااااايحه
اشوفكم على خير ... دمتم في أمان الله وحفظه ... لكـــ .... انت بس ... مو لغيركـ.... المايسترو
متنفســـ ليلة لقانا .. موعدي الساعة ثمان .. كان الندى موعود مع رمش الزهر .. والزهر سهران يعطر بالحنان .. ليلة لقانا .. فيها الفرح ثوب جديد .. لقياك عندي يوم عيد .. موج البحر مغنى وقصيد .. والليل من فرحه عريس .. ليلة خميس ... Al-Maistro.Com
2فهد العنزي زائر
22441 إبداع وتميز ... كالعاااااده ... | 16/04/2008 09:55:21
تحيه طيبه إخوي المايسترو .. إذا كان للتألق عنوان فانت عنوانه ... إنت أصلاً كلك تألق .. الله يعافيك وجهد بصراحه تشكر عليه ... أما بعض المشككين عليك فأتمنى منك تعطيهم تشكيله ... قمه في التميز بصراحه ... بالمناسبه فيه واحد عندي بالعمل يتكلم عن رحلاتك وأنا جالس أتقهوى الصباح وبصراحه أكثر الناس صارت تعرفك ... وتمدح فيييك كثيير وبإسلوبك المرح ... الله يوفقنا ويوفقك ...
3عبد الله زائر
22449 سفرتك ممتعه | 16/04/2008 10:56:45
شكرآ لك مايسترو على مشاركتنا هذه اللحظات الجميله. فعلآ يحس الواحد كأنه مسافر معاك.
4bdweiah زائر
22450 سلااااام | 16/04/2008 11:13:35
مرحبااا اخوي المايستروو ماشاءالله صور رووعه وبااريس بالاساس رووعه وماينمل منهاا والحمدالله على سلامتك لو هي متاخر
بس بغيت اقوولك الصوره حقت اللاديفانس الشي الي مااعرفته ترى هذا قوس النصر بانينه جديد لان اللاديفاانس زي بيسونها زي الشانز وترى احسها مرره حلووه وهااديه اذكر الصيف الي فات كان فندقناا فيها بالسوفيتيل وكاان هم حلوو ...
سي يووو
5ساره زائر
22451 الحمدلله على السلامه | 16/04/2008 11:19:04
ماشاالله عليك على الروقان والتنظيم...من جد احسها رحله خقااق
احلا شي انك مصور كل شبر
6البطل زائر
22455 ماشاء الله | 16/04/2008 11:39:23
بصراحة مره شئ خطير بس كله كوم والجوال كوم ثاني عندي سؤال ؟؟؟؟
كيف حطيت توقيت الرياض وباريس في نفس الوقت على الشاشة ؟؟؟؟؟
بلييييييييييييييييز علمني كيف
7شائستا زائر
22457 يؤؤؤؤؤ | 16/04/2008 11:43:20
أهلين مايسترو
رحله خطيرررره ومنظمه بقوة
سياق حلو والتصوير كان برضو حلو ياحلو ماشاء الله عليك الله يحفظك لا تحرمنا من ابدعاتك يامايسترو اواو نسيت كمان اسمك حلوو ..
نشوفك على خير ...
8نبضة قلب زائر
22459 رووووووووعة وتميز | 16/04/2008 11:43:56
يسلمووووووووا مايسترو تمنيت اكون انا مكانك ياحظك مشكور عالصور الخطيرة ..غرفة النوم كانت رومانسيه وبعدين ليه كل حلقه تحط لنا صور شوكولا تقهرنا يعني.. يعطيك العاقيه اخوي
بس حركات الأصنصيرات ذي تحوم تسبدي
دايم الواحد يجيب العيد عندها
من جد تفشل
ولا عاد تحط شوكلاته مره ثانيه تكفى
ترا ما تسوى علينا تشفيبنا
حنا خلقه متشفقين على باريس بدون شوكلاتات وتكملها تحط شوكلاته ..حرام عليك
المهم
ترانا ننتظرك لا تبطي علينا << متحمسه العجيز خخخخ
تحياتي لك
10فتافيت سكر زائر
22463 نصيحه صغنونه | 16/04/2008 11:56:42
السلام عليكم ورحمة الله وبركاته صراحه انا من المتابعين لمواضيعكالشيقة وهذي اول مرة اعلق على موضوع وصراحة احس كني انا اللي مسافرة بس لاحظت شي الله يهديك دايم تكثر من الاغاني ف الم بي ثري حقك يعني لو تحط بدالها اناشيد والا قران وانت تطالع في الطبيعة الله جوناان يعني تصير سياحة وعبادة وتفكر وتامل في ابداع الخالق وعفوا عالاطالة وهذا من وراء القصد والله يهدينا واياكم الى صراطه المستقيم
13فااااتن زائر
22474 الله يوفقك | 16/04/2008 13:13:20
رحله شكلها متعبه ولكن حلوه
ان شاء الله اذا كتب لنا نسافر هالمناطق نستغل تعلمنا اللغه الانجليزيه وندعو الى الاسلام شكرا لك
لو كنت بمكانك وسفراتي دايم بره استغلها بهالشي عشان تلقى الراحه العظمى الله يجزاك خير فكر واستخير
14نسيم نجد عضو
22477 naseemnajd.com | 16/04/2008 13:42:14
ماشاء الله أخينا المايستروا باريس من ورانا
رحلة رائعة , و عدسة مميزة كعادتك أخي الكريم...
أيام سعيدة في أحضان الطبيعة الأوربية ...
و إطلالة رائعة من على برج الأدفانص الباريسي ...
تحياتي لك
15أبوعبدالله زائر
22478 السلام عليكم | 16/04/2008 13:48:28
ماشاء الله صورة روعة ورحلة رائعة والتعليق كذالك ,
لكن إذا كنت تسمع أغاني أستر على نفسك الله يفكك منها ,
16زجااااج عضو
22482 .. | 16/04/2008 14:12:56
تسلم ايدك على الصور .. ويسلم فكرك على التعليق والشرح ..مروري وتقديري
17shad0w عضو
22485 ماشاء الله عليك | 16/04/2008 14:15:02
هلا أخوووووووووووي وربي إنك فلة بس حكاية المصعد حكاية ههههههههه الله يوفقك اخوييي
18O Just Me O زائر
22497 خطيييييير المايسترو | 16/04/2008 15:05:57
بصراحة ما شاء الله عليك يا أحلى الماسترووويييين .. ههههه ...
أنا دائماً متابع لك بس هذه أول مرهـ أضيف تعليق
ذووووق + إبداع + كل أبو شي حلوووو= المايسترو.
يعجبني و يفكفكني و يبسطني تعليقاتك وأسلوبك.
إلا على طاري أسلوبك
كيف حطيت توقيت الرياض وباريس في نفس الوقت على الشاشة ؟؟؟
19ظميانة نجد زائر
22508 هلا مايسترو | 16/04/2008 16:05:05
بحول اسمي من ظميانه نجد لظميانه سفر .. رحلاتك دايما روعه وروااق لانك تروح لها لحالك .. متابعة يوزرك -رحلاتك-منتداك ..وكل شي ..
ويالله سلام يابو لندن
20ام بدر زائر
22519 ماشاء الله | 16/04/2008 18:57:44
ما شاء الله يا ميسترو والله رحلة جميلة وطريقتك في سرد الاحداث وربط الموضوع اجمل.
اللهم لا حسد ولكن اتعلم ان هناك اناس لا يملكون ثمن اتخراج جواز سفر فما بالك برحلة جميلة بكل ما تحمله الكلمة من معنى. لا تستغرب فهناك الكثير والكثير وانا اولهم
تحياتي ام بدر
21قوطي صلصه عضو
22525 لا يكثر | 16/04/2008 20:28:53
هلا وغلا فيك يالغالي ..
رحله جووونااان وتعليق اجن .
يالله لا تأخر علينا .. بالاجزاء الباقيه ..
بس في شي لفت انتباهي ..
<-- يدقق في كل شي هع هع
والا اقول بلا فضايح ..
خخخخخخخخخخخخخخخخخخخخ
مشكور يالغالي ..
دوام التوفيق ..
22أصيلةالروح زائر
22526 بونسواغ | 16/04/2008 20:29:30
الله عليك يامايسترو....اعجبني في المقال كل كلمه وضحكه..وال الأحلى انك ماذكرت ولا كلمه عن قلة ذوق الفرنسين ..ممايدل على انك ماتأذيت منهم. الحمدلله. انا خليجيه أدرس هنا. ولايعه جبدي. ياريتني قابلتك هنا عشان اعطيك نصايح.
وكلمه أخيره:
عساك ماتفقد قلوب اتراعيك ولا تشتكي من جايرات الليالي.
23Abadi زائر
22527 افضل عضو في القروب | 16/04/2008 20:59:11
السلام عليكم
صبحك الله بالخير الماايستررووو
بصراحة والله انا اشهد انك انت افضل عضو في القروب وهذا اول تعليق لي في القروب والله شديتني اني اشكرك بصراحة
اعتقد ان سر مواضيعك تنسيقك للاوان والابتسامات وكلاامك اللي يقوووطر عسل
25wildbluewave زائر
22534 باريس..عشقتك قبل ما أشوفك..وشفتك صرت كلى حلم | 16/04/2008 22:35:43
هلا بالميسترو
منذ الذى لا يعشق فرنسا عامه و باريس خاصه
باريس لها طعم ومذاق خاص بين مدن العالم
فتجد بها كل شئ من التاريخ العاتيق الى الحديث
تتمشى بشوارعها وتستنشق عبق القديم..والحديث فى ان واحد ..
اه يا باريس كلما عدت اليك..كلما ما أجد فيك الكثير و الكثير لاستكشفه..واتعلم و ارتشف منه الكثير
لك حق ان تعشقها
تحياتى لك
26لؤلؤة البحار زائر
22538 لا إله إلا الله (((عقبالي)))وربيإن شاء الله يحقق لي مناتي | 17/04/2008 00:06:50
اللهم صلي عالنبي
من زمان وأنا أشوف رحلاتك بس ماكنت أتحمس إني أراها كنت أقول وش بيكون فيها بس وربي لا إله إلا الله عليك وأنا أقرا جاني شعور غريب مدري وش معناه بس أبي الجزء الثاني اليوم قبل بكره
28suleman15000 زائر
22541 ما شاء الله على التعليق.. | 17/04/2008 00:34:54
ما أقول إلا ماشاء الله تبارك الله الي وهبك هذي القدرة على البيان تنظيم + إبداع +تمييز +.....................
سر إلى الأمام ولا تخشى الصعاب
وفي الختام نتمنى لك التوفيق في الدنيا والأخرة.
30ريمو زائر
22551 مبدع الله لا يضرك ^_* | 17/04/2008 04:30:46
ماشاء الله عليك طرح رائع ومميز واسلووبك مره مره مررررررره حلو .. يعني اقراء وانا مستمتعه اخذه معلومه وفكرهـ عن المدينه الي انتا زرتها وكاني معاك واسلوبك رائع ويوسع الصدر .. ننتظر حلقااتك القادمه .. سي يو ^_*
31ابوكــــــــــــــــــوكي زائر
22552 باريسك يالمايسترو ...غير | 17/04/2008 05:20:39
صراحه كما عودتنا مواضيع روعه وصرور روعه الف شكر..
بس بصراحه اختيارك للفندق موفق جدا تصدق اني سكنت في الهلتون باريس ومع علو سعره واطلالته على برج ايفل الا ما كان في جمال الفندق اللي اخترته انت..
(ماادري لصورك جاذبيه اكثر) ....
المهم لا تطول علينا بالحلقه الثانيه...تحياتي..
32احساسي غريب ! عضو
22560 يمي يمي | 17/04/2008 13:19:27
اهلييين وسهليييين المايستروو
من جد موضوع يمي يمي ولذيذ ..
<< وضحي شلون يمي يمي
يعني كل شئ يحممس .. وانا كنت في باريس برضو بس شهر 7 !!
بس اجوااااااااااااااء
يعطيك العافيه
38مشاري الحارثي زائر
22578 مطفر | 18/04/2008 03:03:30
والله الصراحة انت مبدع
الله يعينك يا خوي
ابقولك شئ !!ماتبغى خوي يخاويك عادري ترى انا ما عندي شئ
عاطل بس على فكرة انا مطفر يعني على حسابك اقولك اقولك معايا الف ريال والباقي عليييك
اذا بغيت رقم جوالي ثلقاة عند الشباب
39ana زائر
22582 الحمد لله على سلامتك....!! | 18/04/2008 07:04:04
اولا الحمدلله على السلامه....
انا اللي اعجبني عطر اللوووور سبوورت من تشناااال>>>>>>>يدقق بكل شي
وماحب الشوكلت تجيب السكر>>>>>>توجد كذبه بالسطر
فديتك مشكووووور على الايميل بصراااحه روووعه..........
وياويل قلبي يـــ باريس...............@
40gala alaeen عضو
22586 شي والله | 18/04/2008 12:40:44
اهلين وسهلين اخونا المايسترو شغل عدل بارك الله فيك لو انك بس تسوي كتاب صغيرون بالحلقات كلها عشان ما يروح تعبك شغلك خسارة
ويستفيد منه كل مسافر او حتى للاستمتاع بقراءته
<< اول وحدة بتشتري كتابك (:
بانتظار بقية الحلقات
41عبدالله زائر
22593 روووعه - قمة الابداع | 18/04/2008 18:46:24
ابدعت في التعبير ,
حسستني اني انا الي اكتب الموضوع من شدة الاندماج
بصراحه اهنيك على القلم الذهبي
..
لكن ممكن استفسار او سؤال بسيط (؛
رحلة باريس ..!
تكاليف الرحله من سكن و أكل ووسائل نقل
كم تقريبا ؟
شاكر لك
42بسمـه زائر
22595 موفـق | 18/04/2008 19:44:53
يسعد مساك اخوي .. ماشاء الله عليك .. كذا مره اقرا تقاريرك واستمتع كل مره أحس كأني لاول مره اقراها .. استمتع بكل صوره وكل تعليق وكل موقف .. أبدعت بتصويرك ووصفك واسلوبك ربي يحفظك .. ننتظر باقي الأجزاء بشغف .. لاتطول علينا
المايسترو 
13,989
..
...
.......... باريس..........
... 
... شكلك جالسه تكررين الصور 
... انت اللي مير تضغط فيني من سافرنا لين رجعنا
....
.. اقصد سويت امممممممم
...
... كنت بروح في خبر كااااانا واخواتها وجيرانهم بعد
) ...
... عاد فرنسيين عرقهم شسمه
... جوازك ما خذيته 
.. وبدا شغل الوسوسه 
... والدوجان
... 
...
....
...
... جايب ملعقتك معك ؟!!
ـ .... انت بس ... مو لغيركـ....
...
قوطي صلصه
تصميم وبرمجة 
^ـــــــ^ | 16/04/2008 08:39:54
يااهوو...وربي انك خطيييييير ..تعليقك روووعه
تاابعه كل حلقااتك ومتحمسه كنى اطاالع بريزون بريك هع هع هع
بس يااشيخ لا تكثر من صور التشوكلت لانى اسوي رجيم وماااكلهاا هع هع >>> (الرجيم ) سواالف حريم ماتعرفوونها هع هع
بس من جد حسيت كنى انا اللي مسااافره ..تسلم يدك
ويالا يابو بالتوفيق..:P