شبكة أبو نواف

الرئيسية › رسائل المجموعة › رسائل 2008 › رسائل 1/2008 » وين الأمانة ياوكالة هوندا

وين الأمانة ياوكالة هوندا

®stop ksa® بتاريخ 09/01/2008 في شهر 1/2008

• المشاهدات: 4239

• الطباعة: 8

• الإرسال: 5

• التعليقات: 25

• مرات التفضيل: 0

بسم الله الرحمن الرحيم

في البداية أحب أن أشكر أدارة قروب أبو نواف على هذا النجاح الباهر

قال الله تعالى :{إنا عرضنا الأمانة على السموات والأرض والجبال فأبين أن يحملنا وأشفقن منها وحملها الإنسان إنه كان ظلومًا جهولا} ألأية
وقال صلى الله عليه وسلم :(لا إيمان لمن لا أمانة له، ولا دين لمن لا عهد له) .

في البداية يعلم الله ليس الهدف من قصتي تشويه أو اشهار أو لمصلحة خاصة ولكن هذا ماحصل معي
وليأخذ كل ذي حق حقه ولأن الشركة لم تلقي لي بالاً لذلك وجب النتبيه لمالكي هوندا لكي لايكون ضحية مثلي

أملك سيارة هوندا أكورد 2005 ومن عادتي كل 6 شهور اسوي فحص في الوكالة وتشيكات بحكم أنهم أخبر -أمحق خبره - ويعطونك ضمان (5000 كيلو) بعد الفحص المهم دخلتي سيارتي لمقر وكالة عبدالله هاشم المحدودة - طريق خريص - وكان يوم الأحد الموافق (2007/11/04) وبدأت في تعبئة النماذج وكل شي وقالوا لي بندق عليكـ بكرة تجي تاخذ موترك لاتقفل تلفونك أو تشغله ( طبعاً تشغله تصريفه ) المهم أنتظرت اليوم الثاني أتصالهم الكريم ولكن يامضوح في خلاه ماعندك أحد قمت أنا طال عمري وأتصلت عليهم وسألتهم عن موتري قالوا كم رقم أمرالتشغيل وعطيتهم قالوا ايه هذا الموتر توهم مخلصين منه ألحين وكنا بندق عليك ( ياكبرها عند الله ) المهم الله لايهينك أنقز لمنا الحين على شان تستلم موترك قمت ونقزت لهم وكان دوامهم ينتهي الساعه 7 المساء المهم وصلتهم الساعة 6 يعني قبل يشطبون بساعه قالوا تعال حك جيبك (يعني أدفع الحساب) قلت ابد ماطلبتوا شي ودفعت لهم مبلغ وقدره (594 ريال) عطوني مفتاح موتري وجلست أدور عليه ساعه لقيتهم موقفينه في إبليس يالله حصلته ويوم قربت والقى الموتر كنه طالع من طعس وألا براحه يعني ماغسلوه (لأن الوكالة يغسلون السيارة بعد الفحص وهذا مو مهم) المهم قلت المشكى على الله ويوم جيت طالع وألقي المهندس يمشي على رجله قلت له يالأجودي ليش ماغسلتوا موتري لواقولكم خفضوا لي ريال طرتوا فيني قالوا المعذرة الوقت متاخر المهم أنه صرفني .
الزبده خذيت تقريباً أسبوعين ويوم جيت طالع يوم بروح أجيب رسائل لي من أحد صناديق البريد ماوعيت ألا حرارة السيارة فوق النصف وقفت عند مشحمة سيارات وطلبت منه يفحص لي وش العله وش سبب ارتفاع حرارة السياره قالي يالطيب السبب زيت السياره له أكثر من 6 شهور ماتغير ؟؟؟؟
قلت ياولد تستهبل (أنتم عاد عارفين كم يمشي الزيت يعني لو تمشي عليه 3000 كلم عادي ماعندك مشاكل فمابالك توني مطلع السياره قبل اسبوعين من الوكاله يعني يمكن مامشيت 500-1000 كلم ) قلت غير لي زيت وعطني فاتورة واشهد معي باللي شفته وأنا وياك ياعبدالله هاشم هذي نهاية الثقة .
في اليوم الثاني أتصلت على وكالة هوندا وطلبت مكالمة المدير العام قالي سكرتيره مشغول المدير اي خدمة
شرحت له موضوعي قالي ابشر ومايصير خاطرك ألا طيب عشر دقائق يكلمك المدير وحنا مايهمنا غير سمعة الوكالة -حركات الشميسي يعني- أنتظرت العشر دقائق الموعود بها وعلى قولتي سابقاً يامضوح في خلاه ماعندك أحد في اليوم الثاني دقوا ولارديت كنت نايم يوم صحيت دقيت عليهم وقالي معليش على العشر دقائق حقت امس كان المدير في أجتماع وخرابيط قلت ياحبيب قلبي ماعندك مشاكل تيك يور تايم قالي على العموم مشكلتك عند مدير قسم الصيانة وراح يكلمك الحين أنت قفل الخط طال عمرك قلت شوكرن وقفلت وبعد عشر دقائق دق علي مدير الصيانه
مدير فرع الصيانة : ألو ؟
ضحية وكالة هوندا : مرحبا !.
مدير فرع الصيانة : أزي حزرتك ؟
ضحية وكالة هوندا : الحمد لله .
مدير فرع الصيانة : معاك أحمد مدير فرع الصيانة بوكالة عبدالله هاشم المحدودة
ضحية وكالة هوندا : حياك الله .
مدير فرع الصيانة : أنت الأخ صاحب السيارة هوندا رقم أمر التشغيل كذا واللي مقدم شكوى بخصوص سيارتك ؟
ضحية وكالة هوندا : بالزبط أنا !.
مدير فرع الصيانة : حزرتك أيه المشكلة ؟
ضحية وكالة هوندا : قلت المشكلة من طقطق الى سلام عليكم ماخليت شي!.
مدير فرع الصيانة : بص حزرتك دحنا بنشكر حزرتك على ثقتك فينا وشكواك ديت بتدل على حرصك على سمعتنا
( أمحق سمعة والله أنك في وادي والصيانه في وادي ) لكن أنت غلطان بائه انت لو بعثت السياره لنا على سطحه كنا بائه عرفنا المتسبب وحاسبناه ( طبعاً هذا تمهيد للزحلقه والتصريف ) لكن بوعد حزرتك هنتصل بيك في اقرب وقت حال عرفنا المتسبب والمشكلة وأعزرنا على اللي حصل .
ضحية وكالة هوندا : يعني هذا اللي عندك على العموم يصير خير !.
مدير فرع الصيانة : مع السلامة .
ضحية وكالة هوندا : ماقلت له مع السلامة من حرارة رده علي وقفلت .

الأستنتاج في نهاية المعضلة :-.
أذا كان خصمك القاضي فمن تقاضي .
أنصحك بالفحص في الصناعية على شان ماتنقهر مثلي.
لو قدر الله عليك وفحصت في الوكالة حاول أنك تشيك بعد فحصهم نظراً لأمانتهم .
خارج الأستنتاج أنا على أستعداد تام على اثبات جميع ماذكر وأتحمل المسؤلية كاملة اذا ثبت عكس ماذكرت

في النهاية
. صورة مع التحية/ لمدير عام شركة عبدالله هاشم المحدودة للأمانة .
. صورة مع التحية /لحماية المستهلك للمتابعة .
صوره مع التحية/ للضحية القادمة للأحاطه .

كما اشكر أدارة قروب أبو نواف على المتابعة الدائمة لمثل هذه القضايا ونتمنى لهم التوفيق
stop.ksa@hotmail.com للطلب والتأكيد


	الموضوع السابق: تباريح 9	الموضوع التالي: وسائط للسنه الجديده MMs

	التعليقات على الموضوع
	سامر القطان زائر 17375 للأمانة أوضح التالي \| 09/01/2008 07:51:26 للأمانة أوضح التالي حسب خبرتي من أختصاص ونشاط عملى أن زيت المحرك لا يوجد له أي دور لأرتفاع حرارة المحرك وسبب أرتفاع الحرارة المبرد أو نقص بالماء أو تعطل مروحة التبريد عبدالله زائر 17377 ليش تصدق بنشري ولا تصدق وكاله \| 09/01/2008 08:10:42 تأكد اخي قبل ان تتهم احد ان الزيت فعلا لم يغير شي ثاني الزيت مايبين اذا كا ن له 6شهور ا 6 سنين المهم كم السيارة مشت من كيلوا احذر اللي يغيرون زيوت في المحطات وخله يعبيلك علب (قواطي) و ليس جالون لانه يغشونه بسهوله السياره ما ترتفع حرارتها بسبب ان الزيت قديم على الاقل حسب علمي ان الظلم ظلمات يوم القيامه شرحك سرا زائر 17380 ولاتهون باقي الوكالات \| 09/01/2008 08:56:35 بالنظر الان لما يحدث للمواطن من نهب وتسابق من الشركات الكبرى قبل الصغرى على جيوب المواطنين والموقف الايجابي من وزير التجار(ة) لحماية المصلحة العامة للتجار فلا ولن تجد من ينصفك أو يأخذ حقك وبالنسبة لك فقد أعطوك شركة عبدالله هاشم لسانا حلوا وهذا يحسب لهم أما بعض الوكالات الأخرى فإنهم ياخذون فلوسك ويخربون سيارتك وينفخون عليك بعد (بناء على تجربة سابقا مع وكالة العيسى) ياسر زائر 17386 عجيب \| 09/01/2008 10:03:18 السلام عليكم ورحمة الله وبركاته أخي الكريم ما أعرفه يقيناً أنه من تحصل له مشكلة فعلاً يستوجب عليه أن يطرح مشكلته بأسلوب جاد خالي من المزاح والفكاهه.. وهذه المشكلة التي حصلت لك لا تعبّر عن مشكلة عامة في الشركة وفقك الله تواقيع وحروف زائر 17390 إنتظر القادم \| 09/01/2008 11:15:05 اخي العزيز للاسف نحن نعيش في دوامة التلاعب فمن تلاعب الاسعار الى تلاعب الشركات .. عزيزي هذا امر اراهجدا عادي عطفا على السبات العميق لحماية المستهلك . أنصحك بأن تلجأ الىالله بالدعاء على المتسبب كما انصحك بعدم مطرادة تلك الشركه وغيرها من الشركات لانك لن تظهر بنتيجه .. سلطان الجبيل زائر 17391 يا رجال احمد ربك \| 09/01/2008 11:24:09 يا رجال احمد ربك انها جت على تغيير زيت طيب واللي دخل سيارته الوكاله علشان التشييك ويوم جا يستلمها قالو له مفتاحك ضيعناه ويم جيت اطالبهم قالو بنغير لك السسيستم بس ما نقدر نعطيك باليوم الا تسعين ريال تأجر سياره وغير كذا اعرف واحد سارقين سيارته من داخل الشركه مهزله والله علشان تصدق شف هاللنك http://www.toyota4arab.com/forum/showthread.php?t=19487 http://www.toyota4arab.com/forum/showthread.php?t=19755 سلفستر زائر 17392 بخصوص هوندااا \| 09/01/2008 11:50:09 السلام عليكم ،،، مع احترامي لشخصكم الكريم فأنت غلطان انا اقول لك لييه !! يوم قدر الله عليك ودفعت 594 ريال ليه تدفع مبلغ 100 ريال غير زيت عند راعي المشحمه ؟؟؟ انت خسرت خسارتين الأولى : دراهمك والثانيه : شكواك بإمكانهم يجحدونك زي السلام عليكم وإثباتك بله واشرب ماه انت تقول هذا متعصب للوكاله والله مالي علاقه بهم ،،، ولا املك وحده من سياراتهم الحمد لله انا صارت لي مشكله مع الجميح << راعي كابريس ما طلعت الموتر من المواقف حتا حل جميع مشاكلي غير كذا انهم رفعوا سعر الفاتوره علي اختلف كلامهم بمعن يوم دخلت السياره قالوا المبلغ المكلف 334 ريال وتفاجئت عند خروج السياره بقول المحاسب ( الصندوق ) ان المبلغ 410 ريال سويت صجه لييين ما خصم لي المبلغ الشاهد من السالفه هذي كلها انك لو رجعت السياره وخليت الفني اللي تبع الخدمه السريعه يشيك على الوضع لكان افضل لك من دوخة الراس هذي بالخير الله يعينك ويمكن ان الواكاله يمرمطونك بالمواعيد وانت لا تسكت لهم اتبع الكذاب إلى باب بيته تحياتي ،،، So Sweet Girl °◦●..ஐ‏ زائر 17394 لشكوى على الله \| 09/01/2008 12:21:56 عموما هذا الحال في كل الامور الغش عيني عينك الله يخلف عليك ويرزقك ع نيتك ويعوض عليك قرشك بألف ان شاء الله s3b-almnal زائر 17407 الله يكون في العون \| 09/01/2008 14:17:34 اي والله يكذبون علينا حسبي الله عليهم كنا مسافرين لتركيا عن طريق مطار البحرين ووقفنا الموتر في مواقف المطار لمده شهرين ونص اكيد الموتر بيخترب له شهرين ونص ماتحرك المهم صلحناها في البحرين وبعدها وديناها وكاله هوندا الي في الدمام خربوا السياره اكثر حسبي الله عليهم وفوق كذا اخذوا مبلغ ناار وحتى وكاله تيوتا نفس القصه والله انهم اكبر حراميه بريكات السياره فيها خراب تطلع صوت قالي الوالد ودها الوكاله وديتها الوكاله كلمت المهندس عن المشكله وقال اوكي بصلحها رحت له اليوم الثاني استلمت السياره ونفس المشكله ماصلحوا السياره رجعت مره ثانيه ركبت المهندس السياره وقلت له اسمع الصوت قال هذا مافي مشكل قلت له تستهبل انت نزلته ورحت للبيت معصب وبعد بطاريه السياره خلصت رحت للوكاله قالي انتظر على مانغير البطاريه استلمت السياره اوكي بعد اسبوع السياره ماتشتغل جبت كهربائي قالي البطاريه مخلصه رحت الوكاله وانا معصب وغيروا البطاريه غصب عنهم وجلست على راس المصلح وشفته وهو يركب البطاريه وهذا الي يفيد معهم انك تجلس على راسهم عابر سبيل زائر 17409 راجع نفسك \| 09/01/2008 14:24:51 بختصار لاعلاقه للتغيير الزيت بإرتفاع حرارة السياره طالما ماينقص الزيت بشكل كبير ابوفيصل زائر 17411 الزيت ما يتغير الا بعد 5000 كلم \| 09/01/2008 14:29:40 انا بصراحة متاكد ان كلامك صح لكن الشيء الي ضحكني على الي زرفك وقال الزيت له 6 شهور ما تغير كذاب كيف عرف المدة هذا اولاً ثانيا الزيت ماله علاقة بالحرارة ..ثالث نصيحة للجميع لا تضيع فلوسك في تغير الزيت كان معي سوزوكي وهوندا ما اغير الزيت الا كل عشرة الالف كيلو (10000) كلم ومثل الحلاوة اعتقد لو ما تغير الزيت نهائيا ما جاء السيارة شيء بجربها واقولكم ياسر عوض زائر 17418 الله يعينك \| 09/01/2008 15:39:15 حسبنا الله ونعم الوكيل الغالبية العظمى للوكلات هذا هو ديدنهم لا تنسي أخي الكريم صورة مع التحية لعبدالله هاشم صاحب الشركة نفسه عبوود زائر 17421 سبق وقلنا... \| 09/01/2008 15:53:17 اخوي انا اخبرتك في المنتدى الي نشرت فيه موضوعك انو جيب اثباتات اذا خايف من شي>>امسح اسمك>> ممكن انت صادق بس في ناس ماتتصدق وهم يتبلون . زي موضوع سابق لاحد الاخوة عن استيراد بضايع من اسرائل تتصور لو كتب الموضوع من دون اثباتات كان احد صدقه؟ لا طبعا!!! ثبت انا كتبت ردي وعدد المشاهدين585 ولا احد رد ليش؟؟ الموضوع بس كلام >>وقد يكون خيال>> zaid177 زائر 17425 بدري... \| 09/01/2008 16:57:39 توك داري ان الطاسه ضايعه.. ان يامحاكيك دخلت سيارتي عند نيسان تشييك كامل لانه طالع صوت طقطقه وشفطو مني 8700ريال وبالاخير طلعتها بعد اسبوعين من عندهم وسافرت اليوم الثاني لمكه وتفاجأة بالخط ان الصوت باقي !!!! ورجعت بعد 16 يوم وقالوا ليش ماجبتها اول ماسمعت الصوت... مليش وانا اخوك عدي كروم زائر 17427 الله لايهينك \| 09/01/2008 17:18:12 مشكور وماقصرت على التنبيه انا معي هوندا اكورد والوكاله ذي ماش مادخلت مزاجي ابد عندنا هندي بالقصيم اسمه اختر مضيقن صدري ماش احس انه يتعلم على السيارات المهم اني ماعمري سويت لسيارتي صيانه والا هالخرابيط عندهم ابد بس اول 1000كيلوو قلت له ترى فيه تنسيم انا منب صادق معه ماكان فيه تنسيم بس ابيه يحط البخاخ على الربل عشان يصير لين ولايصير تنسيم بعدين حتى يوم قالي غيرت لك الزيت عشان الالف ماصدقته يوم مشت السياره 5000رحت غيرته ونصيحه لصاحب الرساله لاتنتظر منهم رد لأن لو تطير وتوقع ماردو عليك ^_^ سليمان الذويخ عضو 17442 لا تدور امانه هاليومين ! \| 09/01/2008 23:44:20 استغفر الله ولكن شوفة عينك... اخوي الكريم بالنسبة للصورة الأولى لموجهة لمديرهم العام هذي ما لنا فيها شغل ! الصورتان الثنية والثالثة نشكرك عليها واعتبرهن وصلن حماية المستهلم الى الآن والمولود القيصري لم ير النور ولكن لقيت لك مكان فيه جهود متواضعه ووصيت واحد يحط الموضوع .. وهذا رابطه لو تكرم الأخوة الكرام في المجموعه بعدم حذفه .. http://www.al-mostahlik.com/vb/showthread.php?p=7664#post7664 شكرا لك وعساك سالم وغانم أسامة النمري زائر 17444 طريقة احضار الاثبات \| 10/01/2008 00:13:59 كيف يطالب الإخوة باثبات ، في هذه الحالة كيف يحضر المتضرر اثبات ؟ يصور الزيت؟ يصور المكينة ؟ .....؟.......؟ كيف محمد زائر 17446 احسن غير زيتك بنفسك \| 10/01/2008 00:51:17 ترا ما هي بعيده عليهم وتحصل عادي وش همهم ما دام في ناس تدفع اما انا فاخذتها نصيحة اعرف ناس كثيرين السيارة وكالة ويغير الزيت ويفحصها عند البنشر ولا ورشة عادية وإذا خايف ان الزيت مغشوش عند اهل البناشر فما عليه عرج على الوكالة وخذ الامور اللي تحتاجها من هناك من زيت وسيفون ورح عند البنشر ووقف على واعطه الزيت والسيفون وخله يغيره وانت تشوف ابوعمر زائر 17448 نصيحه لمثل هذي الشركات \| 10/01/2008 01:12:41 في حال حصو موقف زي كذا لاي شخص في المستقبل التسلسل الادارس مفيد جدا يعني كلمت الاداره وزحلقوك زي ما صار مع الاخ علطو ايميل بكل التفاصيل للمدير الاقليمي للشرق الاوسط غالبا يكونون بدبي او حتى الشركه الام وشف وشلون يلاحقونك انا حصلي قصه مشابه لسياره خربت عكوسها والسبب اهمال لان الزيت ناشف من فتره وقالو لي هذا خطئك انت قلت انا وين مدير الصيانه شرحت الوضع قال نفس الكلام قلت استاذي السيره كانت عندكم قبل اسبو وقبل شهر ولا قلتولي انو فيها مشكله وانا اعتمدت انكم وكاله محترمه ما يحتاج اشيك بعدكم المهم التكلف كانت حول الخمسه الاف فال نعمل خصم كويس ولاتزعل علينا قلت طيب دزيت ايميل للمدير الاقليمي في دبي بكل التفاصيل وبين اني مارح اتعامل معكم بسبب الوكيل في السعوديه يوم وانواع الجوالات تتصل علي صلحوها وعطوني سياره بديله لدرجه ان الشخص اللي باعني السياره في صاله المبيعات او الوكاله كلم يعتذر وهو ماله دخل النهايه راسل الشرك الاكبر سواء في الشرق الاوسط اة الشركه الام وانشاء الله حقك يرجع وزياده نايف محمد زائر 17450 غير مستغرب عنهم \| 10/01/2008 01:39:50 سبق وجربت وكالة هوندا بخريص .. وديت سارة الوالد لهم .. الله لا يعيدها من حالة .. كل ما تذكرت طول انتظاري حمدت ربي أن سيارتي تويوتا .. انتظار طويل جدا وطريقة استلام السيارة سيئة والتسليم أسوأ .. عبداللطيف جميل هو أحسن السيئ والحمدلله .. يا حبيلك يا التويوتا ابو عبدالله زائر 17466 نصيحه \| 10/01/2008 14:22:11 لاتودي سيارتك الى اي وكاله لانهم حراميه والمصيبه انهم ما يخلوك تخش تشوف سيارتك وهي تتصلح كانك داخل غرفة عمليات جراحيه ههههههههههه انا طول عمري اسوي صيانه لسيارتي الجديده خارج الوكاله ( الجميح ) لان خدمتهم زفت ونصابين وعلى صيانه عاديه يخلو السياره عندهم يومين ريح بالك وسوي وسيارتك عند ورشه قدام عينك والشغله ما تاخذ ساعه أبو عاصم زائر 17476 ارجو الطرح كما هو \| 10/01/2008 21:29:47 مع احترامي الشديد .. القضيه تافهه ولا تستحق العرض وكل هذه المبالغات المذكوره .. إلى الآن لم تخبرنا مانتيجة مكالمتك مع مدير فرع الصيانه اللي ماخليت شي ماسبيته .. يعني الخطأ وارد من الصيانه وانت وعدوك تاخذ حقك .. كمل مايحتاج تكتب فيهم .. انا والله العظيم لوني مكانهم اجحدك بعد هالإيميل ورح دور احد يرد لك صوت في هالبلد .. الجماعه مستقبلينك وماخذين ومعطين معك .. ليه تسوي نفسك قوي وتجلس تشهر في شيء لم ينتهي حتى الآن .. وانا والله العظيم ماعندي هوندا ولا لي علاقه بالشركه واصلاً أكره السياره لأنه متعارف على انه قطع غيارها غاليه .. عبد الرحمن زائر 17478 وسع صدرك واتبع النصائح \| 10/01/2008 23:13:49 السلام عليكم يا رجال وسع صدرك والله يرزقك خير سيارتك ويكفيك شرها التصنيف المعروف ما لنا بعد الله إلا هوندا أو تويوتا أو هيونداي ( عملية وقلة خرابات ) الأوروبي فر من المجذوم فرراك من الأسد وإن شاء الله أنزل عنه موضوع الأمريكي ما عاد مثل أول American Engineering لكن عليك بالنصائح التالية : - أي قطعة يغيرونها في الوكالة الأصل أنهم يحطونها في الشنطة - تأكد من شغلهم بنفسك وكل ما في الموضوع أنك تستشير قبل أي مشكلة - السيارة بشكل عام تحتوي على مجموعة الحركة من محرك وجيربوكس وعكوس وغيرها وفي عندك دورة تبريد، دورة تزييت، دورة الوقود وغيرها وكل مشكلة لها أعراض مثلا صعوبة في الإشعال الصباح الاحتمال الكبير بواجي خاصة إذا كان فيه نفضة قوية أو غيرها - لا تثق أبدا في كلام الورش من واقع تجربة لأن أي خراب في السيارة ما يحتاج احتمالات يحتاج أدلة بعضهم يقول لك الظاهر أنه - لا تعطي الوكالة وجه أبدا ( خصم اطلبه كامل واحسب بنفسك ) اعذرني على الإطالة وإن شاء الله نقدر نشارك ولو باليسيير في هذه المجموعة بمواضيع إن شاء الله تعجبكم دعواتكم sami زائر 17480 ماشفت شي \| 11/01/2008 01:35:47 اخي الكريم كان الله في عونك وعون اخوانك المسلمين.. انا بس حبيت اضيف على موضوع انه صارلي موقف مع شركه عبدالله هاشم بالرياض(الخالديه) معي هوندا 2006مراوح السياره نظام اشتغاله وانطفاءه غريب اذا ولعت المكيف تشتغل دقيقه وتطفي خمس ثواني همن ترجع تشتغل,, بصراحه وسوست مع ذلك الحراره ولله الحمد كويسه ماترتفع وديتها لمهم وقالي واحد سعودي بالصيانه نبي نفحصها وندق عليك المهم احتريتهم يدقون يوم دقوا قالوا المشكله في الفريون عندك فاضي مرره مع ان المكيف بعز الصيف كويس تبريده وانه لازم تعبي فريون قلت يعني المشكله من الفريون قالوا اكييد قلت بكم تعبون الفريون قالوا بـ 350 تخيلوا فريون بالقيمه هذي!! قالوا لي هذا فريون السياره وكاله وانصحك ماتغير الا هو قلت ماتشوف انه غالي قال هذا السعر ومن غبائي قلتلهم غيروه المهم يوم غيروه ودقوا علي عشان استلم موتري شغل السياره وشغل المكيف والا الوضوع هو هو .. ماتغير قلتله مشكلتي ما انحلت يوم غيرتوا الفريون قال المراوح طبيعيه وماعندك مشكله بس كان الفريون ناقص ,,, انا بصراحه عصبت وحاسبتهم وطلعت لأني ما ابغى اتسبب على نفسي بجريمه,, وعقبها حرمت اعتب عليهم تحياتي للجميع محمدعبدالعزيز زائر 17494 ياقلب لاتحزن؟؟؟ \| 11/01/2008 17:31:19 الغلطة غلطتك ولاوالله مااعتب عليهم نهائيا.الان انا صار لي موقف مع توكيلات الجزيزه نفس الشي لانه ماعندهم مشكلة لاحسيب ولارقيب وحمايه مستهلك وخذ راحتك وهذة اللي ذبحنا ياخذون فلوسك وبعد هم راعينا المنه عليك بعد.طيب وش نسوي اتركهم ورح للصناعيه اصرف منهم وخلص شغلك وقضينا وهولاء اللصوص ادع عليهم.

	اقسام الملتيميديا
	العاب \| ملفات \| بلوتوث \| صوت \| صور \| فلاش \| فيديو \| منوعات

عضو في اتحاد المواقع العربية الكبرى