رحلتي الى هونج كونج Hong Kong

الرئيسية20072007/12 » رحلتي الى هونج كونج Hong Kong

هونج

صباح الخير
كل عام وانتم بخير

كانت رحلتنا اللي فاتت لسيرلانكا وكانت 5 اجزاء
رحلتي الى كولمبو Colombo
رحلتي الى نوراليا nuwaraelia
سياحة : رحلتي الى مدينة كاندي Kandy 
رحلتي الى دمبولا Dambulla
رحلتي الى سيقيريا Sigiriya

قلت لكم قبل كذا ان رحلتنا تأخرت 3 ساعات والرحله ماكانت مباشره كانت عن طريق بانكوك
طبعا رحلتنا اليوم لهونج كونج
كانت صالة الانتظار مليانه من الركاب واكثرهم خليجيين لان الرحله كانت ايام بطولة اسيا
كنا جالسين ننتظر الرحله وجو المضيفات وجلسوا بالكراسي اللي قدامنا طبعا لنا 3 ساعات بالمطار ننتظر ومليت من
سوالف خويي اللي كلها عن بطولاته ايام الدراسه ومطامره فوق الجدران وتكسير سيارات المدرسين مدري وشلون خلص الثانويه
وانا اللي حسبت له من ايام دراسته مايجي شهر ونص
قلت بغير شوي وكلمت المضيفه السيرلنكيه قلت له كم ساعه رحلتنا الى هونج كونج
قالت ساعتين ونص لبانكوك ومن بانكوك 3 ساعات لهونج كونج وبعدين رجعت تسولف مع خوياتها
ماش ماعطتني وجه
قلت لو سمحتي ممكن اقولك شي قالت خيييييييييير بنفس شينه تقولها
قلت تدرين انك اجمل سيرلنكيه شفتها
المسكينه قعدوا يرشونها ما ويسمون عليها من الصدمه
الظاهر ماعمر احد مدحها الخبله
انا طبعا اكذب عليها لان سيرلانكا منفى للشيون اصلا
بس كلامي مع المضيفه جاب النتيجه اللي ابيها تعالوا شوفوا الاهتمام بالطياره كل شوي جايه وش تبي وش اجيب لك
ناقصك شي بغيت اقولها رجعي خويي ورى
ولا انتهت السالفه يوم نزلت في بانكوك وصت رئيس المضيفين

هونج
عطتني المضيفه هالبطاقه قلت ماشاء الله متى العرس؟
قالت وش عرسه قلت هذا ماهو بطاقة دعوه عرسك قالت لا يابن الحلال هذي قائمة الاكل

قبل نوصل هونج كونج وزعوا علينا بطاقات الدخول طبعا لازم تعبي الكرت وترفقه مع الجواز
وصلنا مطار هونج كونج الساعه 9 بالليل

هونج
مطار هونج كونج من اضخم وازحم مطارات العالم

بعد ما انهينا اجراءات الجوازات اخذنا شناطنا وقبل مانطلع مرينا على مكتب حجز الفنادق
ماكان عندنا حجز وكنا مخططين نحجز من المطار كان مكتب الحجز قبل بوابة الخروج
وكان فيه شاشه اكترونيه كبيره ورى موظفين المكتب تبين حالة الفنادق تفاجأنا وحنا نشوف ان تسعين بالميه من الفنادق محجوزه
كانت اسامي الفنادق قدامنا على اللوحه قلت نبي فندق قالت مافيه الا 3 فنادق متوفره والباقي فل
قلت خيييييييير وش صاير قالت حنا بالويك اند
طبعا الاسعار كانت ناااااار كان ارخص فندق سعره 1000 ريال الليله
طبعا ماعندنا حل ثاني اخترنا فندق

هونج
علم هونج كونج

هونج
شعار هونج كونج

هونج
خارطة هونج كونج

Hong Kong

الجزيره التي لاتنام
جزيرة التكنلوجيا القابعه في نهر اللؤلؤ

المساحه 101 الاف كم مربع
عدد السكان 7 مليون غالبيتهم صينيين
اللغه الصينيه الكنتونيه والمانداران وهذي لهجه صينيه والانجليزيه
العمله دولار هونج كونج ويعادل نصف ريال تقريبا
الرئيس دونالد تسانغ
الديانه البوذيه وهي الاغلب والطاويه والكاثوليكيه وفيه بعض الديانات مثل الهندوس واليهود والسيخ
والمسلمين عددهم 50 الف تقريبا

تتألف هونج كونج من 236 جزيره اهمها هونج كونج وكولون
وزادت الان جزيره صارت 237 لاني اكتشفت جزيره صغيره مادروا عنها
احتلت بريطانيا هونج كونج بعد حرب الافيون عام 1841 م واستعمرتها 156 سنه ورجعت عام 1997 م
قبل 10 سنوات وقبل كم يوم كان فيه احتفالات بمرور 10 سنوات على استقلالها
يفصل هونج كونج عن الصين نهر تشان تشون وتقع جنوب بحر الصين
تشتهر هونج بصناعة الالكترونيات والبلاستيك والسفن
وصلنا منطقة كولون وقال سواق الباص يالله انزلوا قلت وين ننزل قال هذا فندقكم

هونج
انا قلت لايكون بيوهقنا السواق وجايبنا قصر الرئيس
جيت عند الباب والصراحه يخوف كله اجراس وتماثيل فتحته شوي شوي قلت بشوف

هونج
دخلت الفندق كان غريب 
جدران اللوبي وسقفه من البرونز المشغول الديكور غريب والاضاءه والاثاث والثريات

هونج
الرسبشن

هونج
كراسي من زجاج

 كملنا اجراءات الدخول وعطونا مفتاح الغرفه طبعا زي باقي الفنادق الكبيره المفتاح عباره عن كرت
كانت غرفتنا بالدور رقم 29 رحنا للمصعد وجا معنا واحد قال تعرفون للمصعد قلت وش رايك بغيت اخمه بالشنطه على جبتهه
قفل المصعد وجينا ندور الازرار عشان نطلع لغرفتنا مالقينا ازرار
ندور نتلفت حتى السقف دورنا فيه شوي الا يوم فتح المصعد مره ثانيه الا الرجال قدامنا قال ماشوفكم طلعتوا
قلت انت بس قولنا وين الازرار وانت ساكت قال قلت لكم منتم عارفين له قلت طيب تعال ورنا
قال هات كرت الغرفه عطيته وحط الكرت على شاشه وطلع اسمي على الشاشه وتكلم المصعد مرحبا فايز غرفتكم بالدور 29
وحنا نتلفت ببعض انا عاد استانست جلست 5 ايام في هونج كونج كل مامريت من جنب مصعد سلمت عليه احسبهم يعرفوني

هونج

وصلنا غرفتنا ولا انتهت الاشياء الغريبه
الغرفه اثاثها فخم وغريب حتى ستايرها غريبه
والغريبه مافيها تلفزيون معقوله فندق فخم ولافيه تلفزيون مع اننا حصلنا الريموت وراح الليل وحنا ندور التلفزيون بغيت اتصل على
 الرسبشن اقولهم التلفزيون مسروق قال خويي لا وش تبيهم يقولون عنا خلني بروح لجيرانا واسألهم
وقبل يطلع اخذت الريموت وضغطت عليه واشتغل التلفزيون

هونج
مرايه

هونج

طلعت المرايه هي التلفزيون وهي الانترنت
فعلا هالفندق غريب ومن المواقف اللي صارت قال خويي انا جوعان بطلب عشا قلت له اتصل عليهم
وطبعا الرجال متعود وهو يتصل يجمع له كم كلمه عشان يقولها لموظف الاستقبال اتصل وقفل بسرعه وهو يضحك
قلت وش فيه قال الله ياخذه رد بسرعه ماعطاني فرصه اجمع كلام
جلسنا يومين نضحك على هالسالفه كانت خدمتهم سريعه واذكر مره جيت بتصل بالمطعم الا الجرس يدق واطلع وافتح الباب
لقيت موظف المطعم قال سم طال عمرك بغيت تدق علينا
على النيه الفندق
سألتهم عن درجة الفندق قالوا لنا مصنف 5 نجوم

قمنا الصبح وبعد الفطور اخذنا جوله على المنطقه وكانت منطقه مزحومه

هونج
احد المجمعات الكبيره

هونج
جامع كولون والمركز الاسلامي كان قريب من الفندق ويقع على شارع ناثان

هونج
هاللقطه اخذتها من قوقل ايرث لموقع المسجد في منطقة كولون

هونج
كانت المنطقه اللي نسكن فيها كلها اسواق ومجمعات
كانت محلات بوسيني مصلحين خصم مميز على الملابس وكانت فرصه للرجال اللي مضيع ملابسه بسيرلانكا

هونج

الاكل في هونج كونج متعب جدا مافيه مطاعم عربيه في بعض المطاعم الصغيره خاصه بالباكستانيين
اهل الهونج كونج يموتون شي اسمه خنزير وخصوصا كرش الخنزير وكبده
الكرش تطبخ والكبد يقلونها زي اللي عندنا بس ريحة مطاعمهم تجيب الغثيان
جينا عند المطاهم الباكستانيه لانها حلال وتهاوشوا علينا كل واحد يقول تعال عندي واللي يسحبني من يمين واللي يسحبني من يسار
قلت خلااااااااص ماابي اكل عندكم وعناد لكم بروح ادوري مندي خنزير واكل عنده

هونج
شوفوا كرش الخنزير معلق مع البط والدجاج

هونج
الجهه المقابله هي هونج كونج

هونج
  كان الجو رطب لكن بالليل يصير لطيف
درجة الحراره في هونج كونج في شهر اغسطس توصل 27 وفي فبراير توصل 15 درجة مؤيه

هونج

هونج

هونج
وانت جالس على الكورنيش راح تشوف سفن كثيره كبيره وصغيره

هونج

هونج
هذي العبارت اللي تنقل الركاب من كولون الى الضفه الثاني هونج كونج

هونج

هونج
هنا يحطون بصمة يدين ممثلين صينيين مشهورين

هونج
بعض التماثيل على الكورنيش

هونج
شوفوا البنيه تصور اهلها

هونج
قائد فرقه محلات ابوعشره

هونج
لقطة فيديو لاستعراض الفرقه

هونج
اعضاء الفرقه اللي معه قدر واللي معه طشت واللي ملاس واللي معه قوطي

هونج
شعب هونج كونج شعب طيب والابتسامه كثير تشوفها من الكبير والصغير

هونج
هنا يسوون لك تمثال من الشمع ليد

هونج
اجمل المناظر تشوفها وقت الغروب على شاطيء كولون

هونج
اعجبني منظر السحابه بالليل

هونج
هونج كونج مدينة الانوار

هونج

هونج
اذا كنت في هونج كونج لاتفوت عروض الليزر كل يوم الساعه 8 تبدأ
واذا كنت موجود يوم السبت يكون فيه العاب ناريه

هونج
I.F.C
اطول بنايه في هونج كونج

هونج
 لقطات فيديو اثناء عروض الليزر

هونج
منظر للقمر سبحان الله زي اللي عندنا

هونج
منطقة هونج كونج منطقة عمل ومقر الشركات العالميه

هونج

كنت جايب معي ستاند للكاميرا بس عشان هالمنظر مع ان وزن الاستاند حوالي2 كيلو
طبعا بتشوف على الكورنيش مصورين محترفين كثير كل واحد معه شنطه كلها عدسات والله اني استحيت وانا صاف جنبهم
تعرفت على شاب من هونج كونج كان جنبي وحنا ننتظر عروض الليزر جلست معه يمكن 3 ساعات وكان معه امه كان خلوق جدا
رجعنا من الكورنيش حوالي الساعه 10 بالليل وحسيت بألم ببطني وكان يزيد الالم ولاقدرت اتحمل اتصلت على الاستقبال

وقلت بطني يعورني ابي الطبيب قالت لي الموظفه الطبيب يجي بعد ساعه قلت لها كم قيمة الكشف
قالت لي تقريبا 1500 دولار
قالت لي طبعا على حسب المرض اللي عندك
قلت طيب وشو ارخص مرض عندكم>>>ياشين الطفره
قلت اصلا هو مايعورني مره اقدر اتحمل
بعد ساعه جاني مدير الفندق ومعه الموظفه وقالوا تبي الطبيب قلت ايه بس غالي قالوا طيب روح للمستشفى ارخص
قلت يعني بكم قالت قالوا تقريبا 750 دولار الكشف من غير العلاج
قلت وش دعوه انا محصل بطن سيرلنكي كامل ومعه الكبد والبنكرياس بـ100 دولار بس
قالت اقولك احسن شي تروح للصيدليه وتاخذ دوا

هونج
طلعت ادور صيدليه وهناك مايعرفون الحيه اللي ملتويه على الكاس شعار الصيدليه
شوفوا اللوحات وين الواحد يقلى صيدليه هنا

هونج
دخلت اكثر من محل وكلهم مافهموا علي مالقيت احد يتكلم انجليزي كلهم صينيين
اخر محل دخلته لقيت عجوز وقعدت أشر على بطني وحسيت انها مستغربه مني وعطتني دوا اكتشفت انه حبوب حمل
فضلت اني ارتاح بالفندق وكانت فرصه لخويي ينام لاني كرفته في سيرلنكا ولاينام الا 5 ساعات باليوم
كان اليوم الثاني عندنا رحله سياحيه مدفوعه قيمتها 1500 دولار
كلمت المكتب وقلت لهم مانقدر نروح قالوا ماهي مشكله بس تدفعون ضريبه 100 دولار
واليوم الثاني خف الالم ولله الحمد

هونج
بعض المحلات لوحته اكبر من المحل

هونج
احلا شي في هونج كونج لوحات المحلات خصوصا بالليل

هونج

هونج

هونج

بالليل رحنا لمجمع ضخم اعتقد اسمه اوشن سنتر

هونج
المجمع من الداخل

هونج
المجمع منظم كل منتج له دور خاص والدور هذا مخصص للاجهزه الالكترونيه

هونج

 المجمعات تقفل الساعه 8 وبعض المحلات تقفل الساعه 10
من الاماكن اللي تستحق الزياره جبل فكتوريا
قرية الصيادين
دزني لاند

بالاضافه الى العديد من المتاحف منها متحف الشمع

هونج

 وسائل المواصلات في هونج كونج التكاسي والباصات والسفن والمترو والترام اللي تشوفون بالصوره
 النظام في هونج كونج يشبه النظام في بريطانيا السيارات دركسون يمين
يعني اذا بتقطع الشارع التفت يمين ماهوب يسار وحتى لو قطعت الشارع مع مكان غير الاماكن المخصصه للمشاه
راح تشوف كل السيارات توقف لك

هونج

هونج

مشكلة هونج كونج السكن لان مافيه مساحه
تصور توك ساكن وجيرانك اخذينك بالدور كل يوم واحد معشيك مايخلصون الا منتهي اجار الشقه

هونج

احلى شي عندي ادخل بين البيوت واشوف اهل هونج كونج مع ان خويي مايحب هالاماكن اضطر اروح لحالي

هونج

 كل هذي دعايات

هونج

احد الحدائق الجميله

هونج

شجره معمره يقولي واحد صيني انه عروق هالشجر شايفها باليابان

هونج

هونج

هونج

هونج

مصور منسدح>>>

هونج

هونج

هنا تشتري تذاكر السفن السريعه وبعدها تختم جوازك وتركب السفينه

هونج

السف السريعه واللي تنقل المسافرين الى الصين والدول المجاوره
وهذي السفينه اللي سافرنا فيها لوجهتنا القادمه

الرحله القادمه الى دوله استغربوا اهلها  وجودونا وجميعهم لايعلم اي تقع السعوديه
 اعتذر عن التقرير اذا ما اعجبكم لاني سويته بسرعه

عن الكاتب
الأسم: f a y e z
عدد النقاط: 1267 نقطة

صورة f a y e z

تابعوا جديد شبكة أبو نواف على:

التعليقات

  • 1
    AbOd (زائر)

    شي جميل جدا شوقتني ما تصير خوي :P

  • فايز والله والله مواضيعك كلها روعه وخفة دمك ياسلام الله عليك ليت الملا كلهم مثلك يافايز موفق ان شاءالله

  • 3
    سليمان- القصيم (زائر)

    بالعكس تقريرك متكامل وحلو إنك لخصته بهذي الطريقة.. لأن هونج كونج الكلام عنها يطول .. وشوقتني أروح لها بس كم تكلف الروحة لها لمدة 10 أيام تقريبا؟؟؟؟ وشكرا أخوي فايز

  • 4
    محسن البنا (زائر)

    الحمد لله على السلامة.حبيت الموضوع كثير و حابين انشوف سفرتك الثانية ان شاء الله.والله صار خاطري اسافر معاك.اخوي فايز.انا مسافر اكثر من 20 دولة خلال 3 سنوات.وحبيت اشارك مواضيعك و نتناقش سوالف و نتبادل صور و اراء في صفحة وحدة.ناطر رايك بالموضوع.سلام يا عزيزي.

  • 5
    شجاع (زائر)

    الاخ فايز مشاءالله عليك سياحة على اصولة وتغطية جميلة جدا الصور والتعليقات تبين انك انسان فني مضحك جدا اتمني ان اسافر معك او واحد مثلك و ماشاءالله عليك والى الامام وشكرا لك thank so match

  • 6
    S.F (زائر)

    ما شاء الله ... عيني عليك بارده ... ذكرتني بأيامها الحلوه ... وملاحظاتك وتقريرك شدني لها مره ثانية ... وأنا جلست فيها 14 يوم بس صارت كثيره حبتين ... التقرير رائع ... والموضوع رائع ... وصاحبه أيضاً رائع تحياتي لك

  • 7
    صورة بدر

    الصراحه ولا اروع تعليق رووووووووعه جداً صور رائعه وحبيت اسأل عن الدوله هل تعتبر غاليه والمعيشه ايضاً هناك وكذلك رايك بخطوط الكاثي وهل تحتاج الدوله فيزة دخو ل للعرب ؟ اشكرك

  • 8
    محمد عبدالعزيز (زائر)

    في الواقع صور جميله وتعبير راقي وماقصرت على هذة الصور الحلوة وان شاء الله المرة الجايه تكون أفضل واحلي شكرا لكم ..

  • اخوي فايز اتمنى من الله لك دوام الصحة والسعادة في جميع رحلاتك. تقرير ولا اروع منه بالمره

  • اياد ماسافرت كثير كلها كم دوله وموجوده بالقروب احلى بنوته بالعكس عندنا اشياء حلوه تناسبهم بس حنا ملينا منها هههههههه عبدالرحمن الله يسلمك ويعافيك وكل عام وانت بخير وعافيه هتلره تسلمين والله وان شاء الله القادم اجمل ويعجبك غريب شكرا لك اخوي وخل الرحله الجايه مفاجأه احسن ميمو ديم شكرا لك روح الله يسلمك ويعافيك ابشري مره ثانيه باخذ الادويه من هنا ههههههه روز صح كلامك هونج كونج فيها اشياء غريبه كثير بس الظروف ماساعدتنا نزورها كلها سارا ان شاء الله بس ما اتوهق ولا تعجبك وتدعلين علي ههههههههه اخر العنقود الله يسلمك ويعافيك تغريد الله يسلمك وان شاء الله الرحله الجايه تعجبك عبود اصير اخوك ونص سارا222 الله يعطيك العافيه ويسلمك يارب سليمان تسلم اخوي اذا تبي معلومات عن اي شي راسلي على الايميل وابشر

  • 11
    lulu (زائر)

    مشكوووورعلى الرحلة الحلوه الله يعطيك العافية

  • 12
    اخر العنقود (زائر)

    الله يعطيك العافية تقرير متكامل ياليت في آخر التقرير تكتب عدد الايام - اسماء الفنادق - تكلفة الرحلة - تفيد اخوانك اللي يفكرون يسافرون وعساك القوة يامال الغنيمة

  • 13
    ياسر المعجل (زائر)

    ما شاء الله لا قوة الا بالله اقووول فايزي ما ودك بخوي :) ونستنا الله يونسك بالعافيه مشكووور رفيق كل الشكر :)

  • 14
    عبدالعــ الفهد ... (زائر)

    السلام عليكم اشكر الاخ فايز وانا السراحة من اكثر الناس المعجبين بكتاباته واتمنى لك التوفيق والسداد وزيادة الاداء مع تحياتي وتقديري لك

  • محسن البنا الله يسلمك ويعافيك ماشاء الله عليك 20 بلد ب3 سنوات انا اللي ابي اخذ خبره منك على العموم انا حاضر وايميلي موجود واتشرف اخوي محسن شجاع هلابك اخوي وانا اتشرف بخوة الشجعان تسلم لي والله اس اف وانت رائع بعد بس 14 يوم وااااجد على هونج كونج بدربالنسبه لمواطني الخليج مايحتاج فيزا والبلد ماهي غاليه مره لو عرفت تدبر امورك لكن مقارنة بماليزيا ايه غاليه محمد عبدالعزيز تسلم اخوي واوعدك الرحله الجايه احلا ان شاء الله khi_282 تسلم اخوي وانت اروع لولو عدد الايام كان 5 ايام بس الفنادق كثيره لكن افضل شي الواحد يحجز من المطار قبل يدخل البلد اخر العنقود الله يعافيك ويسلمك ياسر المعجل اخوي ياسر اترف بخوتك الله يسلمك عبدالعزيز الفهد تسلم لي حبيبي وان شاء الله القادم اجمل ورايك يهمني دايما

  • 16
    ام لانا (زائر)

    تقرير رائع ملخص ومفيد انا اعجبيتني هونج كونج واتمنى زيارتها مرة ثانية

  • 17
    كيان (زائر)

    ماشاء الله عليك اخوي فايز تقرير فعلا رائع وشيق,,,معلومات رائعه وجديده علينا وحلاها اكثر خفت دمك وتعليقاتك ننتظر الرحله القادمه والحمد لله على سلامتك

  • 18
    ابوسامي (زائر)

    ياسلام على التقرير .. والشغل المتكتك .. ماقصرت أخوي فايز .. والله اني وقفت بنص التقرير .. رحت أجيب كوب شاي .. علشان أستقعد للموضوع تقطّعت من الضحك وفقك الله

  • يقول راشد احس بشوفه الجنه وانا اقول احس بشوفة تقاريرك المتعه والبهجة.. انت اكتر من راااااااائع .. تحياتي لك فوزو

  • 20
    جوري الدوحه (زائر)

    الحمد لله على السلامة قرأت اول الموضوع وقلت لازم أشكرك وأسجل إعجابي بالتقرير الرائع أحب جداً قراءة التقارير عن البلدان التي لا يزورها أحد بكثرة وهونج كونج تعتبر من الدول الغامضه لدي شكرا فايز شكرا شكراااااااااااااااااااا

  • ماشاء الله تبارك الرحمــــــــن موضوع رااااااائع وشامل الله يحفظك ياأخوي فايز وننتظر جديد رحلاتك الممتعه بفااارغ الصبرررررر

  • 23
    كويتي (زائر)

    ماشاء الله تبارك الله اخوي فايز تقرير جميل وصور جميلة ايضا اخي الكريم وتعليقات ولااااااااااااا اروع ولكن لو فصلت اشوي الاماكن الي زرتها والاسواق علشان نستفيد من خبرتك

  • 24
    saudia (زائر)

    يعطيك العافية أخوي بعد ما استمتعت برحلتك العجيبه عندي كم سؤال حبيت أسألك هل فيها عرب وسعوديين كثير ؟ ووش كان اللباس الغالب هناك للحريم السعوديات؟ يعني هل أغلبها ملابس ومعاها حجاب وإلا العبايات منتشرة هناك ؟

  • 25
    عاشق جده (زائر)

    الغالي fayez ايش هالابداع لاعدمناك يافناااااااااان سريتنا بتقريرك عن هونج كونج والمعلومات القيمة مع الصور الاروع .. حفظك الله وجزاك الله خير الجزاء على كل شيء فيه كل هذا كوم وتعليقك كوم ماشاء الله عليك

  • مساء الخير اخوي وكل عام وانت بخير ماشاء الله عليك عيني عليك بارده من سيرلانكا لهونج كونج تصدق اني كنت موجوده انا وعائلتي بنفس الوقت اللي انت فيه هناك وكني شفتك بالكورنيش لاني ماشفت الا واحد خليجي بس هناك عموما رحله ولا اجمل من كذا خصوصا اني زايره هونج كونج

  • 27
    ali hassan (زائر)

    يجب ان تعلم بأننا سافرنا معك في جميع سفرياتك اللتي ذكرتها وذلك يرجع لأسلوبك الرائع في السرد والاسترسال. والصور كانت رائعة ايضاً. ننتظر جديدك وفقك الله

  • ام لانا تسلمين وشكرا لك كيان كلك ذوق والرحله الجايه بتعجبك ابوسامي جازت لي الشغل المتكتك هههههه محمد عساك دوم مبسوط وتسلم لي يامحمد جوري الله يسلمك ان شاء الله الحين ماهيب غامضه كويتي الله يعطيك العافيه الرحله الجايه بيكون بالتفصيل الممل سعوديا الصراحه ماشفت عرب الا كم شخص بس شفت عائله سعوديه وكأنهم يمشون هنا بالعبايه والنقاب ولا عندها مشكله الوضع طبيعي عاشق جده تسلم لي اخوي روان مساء النور وكل عام وانتي بخير انا ماشفت الا سعوديه وحده هناك شكلها انتي هههههههههه علي حسن وانا يشرفني اخوي علي بس مره ثانيه باخذ عليكم عموله هههههههههه

  • تطوير: SharedTech