تنويه: تم إيقاف استقبال ونشر المشاركات للمجموعة البريدية بدءً من تاريخ 18-11-2009 ، على أن نعاود استقبال ونشر المشاركات مرة أخرى بتاريخ 4-12-2009 ، علمًا بأن الموقع مستمر بتحديث المواد، وكل عام وأنتم بخير.

حسبي الله عليك يالخطوط السعوديه .. دمرتي دراساتي العليا

Eng.Dafer AlShehri بتاريخ 05/12/2007 في شهر 12/2007 • للتواصل alshehri.d@gmail.com

•

7,003

• الطباعة: 120

• الإرسال: 7

• التعليقات: 41

• مرات التفضيل: 0

م. ظافر بن محمد الشهري
طالب دراسات عليا مبتعث داخل ارض الوطن

قلت له : يا خوي ابوس راسك تكفى الشنطه مابيها كلها . ابي بس الهاردسك فيها بحوثي و دراساتي الجامعيه و مشروع الماجستير . دوروا لها زين عندكم والله لو اقدر اجي كان جيتكم لو زحف على وجهي .
قال لي : ياآآآآآخي تراك ابلشتني خامس اتصال لك اليوم عشان هاردسك وماجستيرك . ياآآآآآخي ترا الشهاده اللحين يوزعونها بفلووس . وبعدين شكلك فاضي ، لا عاد تتصل والا ترا اتهمك بازعاج جهه حكوميه !!!!!

هذا كان اخر اتصال لي مع كائن حي بالخطوط الجويه العربيه السعوديه و بالتحديد في مطار ابها الاقليمي وذلك بعد رحلة معاناه مع الناقل الرسمي للحالات النفسيه والامراض الجويه العربيه السعوديه استمرت بين حرب اعصاب و اهانه وذل متكرر دامت 4 شهور .

بداء المشوار في يوم 30 اغسطس 2007 عندما كنت باجازه داخل ارجاء وطني وبالتحديد في مدينة ابها لكن سرعان ما انقطعت هذه الاجازه بسبب دورة عاجله لبريطانيا ، فحاولت الحصول على حجز واخيرا حصلت درجه اولى من ابها للرياض ومن الرياض للدمام . وصلت مطار ابها في ذالك اليوم و عند توجهي للكاونتر لانهاء اوراقي استقبلني احد الشباب السعودي ( الى الان ما انسى شكله ) فابلغته برغبتي بشحن الشنطه على رحلة الرياض فالتفت لي بابتسامه ( استغربتها ونغزني قلبي منها وقتها ) قال ما ودك نرسلها عالدمام على طول !!! قلت وانا متردد والله تسوي خير وتفكني شيلتها طول مطار الملك خالد ، الشنطه الكبيره كانت تحوي على ( ملابس ، كاميرا ، 2هاردسك ( قرص خارجي صلب ) ، 4 جوالات عائليه ، صكوك عقاريه ) اما الشنطه الشخصيه ( واللتي كانت معي ) فكانت تحوي على الكمبيوتر المحمول و اوراق للسفاره و مستندات رسميه اخرى والحمدلله انها ما كانت بالشنطه الكبيره !!!!

طلعنا من مطار ابها الاقليمي الى مطار الملك خالد الدولي بالرياض على رحله رقم 1662 درجه اولى مقعد ( 04L) بتاريخ 30 اغسطس 2007 و صلنا مطار الرياض و كما تعودنا من انتظار بين اروقة مطارنا العزيز و اكملنا السير الى مطار الملك فهد الدولي على رحله رقم ( 1136) درجة اولى و بذلك يكون لي 12 ساعه من اقلاعنا من مطار ابها حتى وصولي الى مطار الملك فهد الدولي بالدمام . وهالورقه اللي اشيلها معي اكثر من بطاقة الاحوال واندب اليوم اللي حدني عالخطوط السعوديه

حسبي الله عليك يالخطوط السعوديه .. دمرتي دراساتي العليا

وكانت الفاجعه الكبرى عدوم وصول الشنطه معي للمطار !!!!!! ادور واركض بين المسافرين ، اللي يشوفني يقول واحد مضيع ولده !!! قطعت الامل وتوجهت لقسم العفش المفقود و كانوا معاي حوالي 7 مسافرين نفس حالتي ، بس منهم اللي يحصلون شنطته باقي بالرياض و اللي شنطته طلعت على رحله ثانيه . عالعموم قام الموظف هناك بتسجيل بلاغ بفقدان الشنطه ويحمل رقم ( 31203 ) وقال لي انتظر 10 ايام بعدها ابداء بتعبئة هذه الاستماره و هي عباره عن مطالبه تعويض !!! يا جماعه انا مابي تعويض انا ابي جهدي يرجع لي . اقسم بالله 4 شهور ما عبيتها وانا كل يوم املي بالله كبير.

والله يا جماعه اول شهرين وهم بس لعب في اعصابي . كل فتره يتصل علي واحد يقول حصلنا شنطتك تعال شوفها ، وانا اروح لهم على وجهي وعروقي ابتلت بالامل . يوم اروح لهم واحصلها تبع واحد يدرس بفرنسا و مضيعينها عليه والا شنطة ادويه . بالاخير قلتلهم يا جماعه تراكم اتلفتوا لي اعصابي ، قبل تتصلون علي تاكدوا ان داخل الشنطه في بطاقة عمل لي ( بزنس كارد )كنت حاطها داخل الشنطه

عالعموم جلسوا 3 شهور ما احد كلمني وانا ارتحت نفسيا شوي ونسيت سالفه الشنطه ويجي اليوم المشؤوم اللي هو 1-12-2007 ويتصل علي احد موظفي العفش المركزي بمطار جده ( احتفظ باسمه ) قال لي ترا حصلنا شنطتك وعرفناك عن طريق بطاقة العمل حقتك . قلت طيب وش تنتظرون !!! ارسلوها لي اليوم الثاني على رحلة الساعه 3 عصرا ووصلت 5 لمطار الملك فهد الدولي بالدمام

رحت لهم الساعه 9 بالليل للمطار واول ما وصلت لهم طلعوا باقي يتذكروني لاني اقلقتهم وقتها قالوا خذ شنطتك اللي قلبت الدنيا عليها . ما صدقت انها هي والله اخذتها وطيران عالبيت ، يوم وصلت البيت وافتحها اقسم بالله يا جماعه ما حصلت الا ملابس بس !!! ومحيوسه فوق تحت !!!!!!!!!

ورب الكعبه يا جماعه الصيحه جاتني الا شي بسيط من القهر ( واعوذ بالله من قهر الرجال ) الى متى واحنا لعب بالاعصاب . الى متى يجلسون يسرقوننا بفلوسنا . الى متى واحنا في اهانه و قمع

والله لو ( واعوذ بالله من كلمة لو ) اني دارس ببريطانيا واروح واجي بالبرتش ايرويز انه ازين من مقابلة هالخطوط السعوديه والذل فيها و الفساد الاداري واللامسئوليه

انا قلت هالكلام لابونواف . والله يوم انها قفلت بوجهي قلت له اني باكتب هالكلام عالاقل امتصاص جزء من القهر فيني ويشهد الله اني ما تذكرت الا مجموعته لاني حسيت انها هي اللي توصل للمسؤولين بغض النظر عن الجرائد اللي اغلبها ضحك على اشناب . وانا مسئول عن كل الكلام اللي قلته لان ما عاد في شي اخاف عليه.

عـ العموم بنفس اليوم انتكست صحيا و لا رحت للعمل و اليوم الثاني كلمت احد الزملاء وجاني مشكورا ورحنا للمطار، ولله يا جماعه اني ادخل المطار وانا مستند على جدرانها من التعب ويوم جيت للموظف ( احتفظ باسمه )
قال لي : ها وش جابك بعد ؟
انا : ؟؟؟؟؟؟ ليش تبيني ارجع ابشر
قال لي : لا جيتك واضح مهي على خير !!!
قلت له : يا عزيزي اخذت الشنطه امس ولا حصلت داخلها الا ملابس بس . فابي اسوي بلاغ لعل وعسى يحصلونها بالعفش المركزي مرميه والا طايحه ( هذا اذا ما سرقت وانا اجزم انها سرقت بنسبه 80%) لانها مختاره بعنايه مع انها كانت موجوده بدرج الشنطه الداخلي
قال لي : يا حبيبي بقولها لك وبشهادة خويك وخويي . زين اذا انهم ارسلوا لك خطاب اعتذار بعد
قلت له : انا ما جيتك عشان تسمعني هالكلام !!!! اللي عليك سوه وبس

بالنهايه اعطاني الرقم (27012) كرقم لمراجعه حالة السرقه هذه وتلفون المطار اللي اقدر اتصل عليهم . واللي شكلي بعلقها بمكتبي بدال شهادة الماجستير

حسبي الله عليك يالخطوط السعوديه .. دمرتي دراساتي العليا

يعني ما اظلم الرجال انه تعاون معي لاكن هل هذا اسلوب امتصاص الصدمه ؟؟ . والا اكلم زملائي المسؤولين بالمطار عشان اخذ جزء من حقي !!!

كنت افتخر اني اكمل دراساتي العليا داخل مملكتي و هذه نادرا تحصل لانها نعمه بين اهله و وطنه وياما هوجمت لاني ما قدمت عالبعثات الخارجيه . لاكن يبدوا لي اني سأعيد التفكير ليس بالبعثه بس ، اتوقع توصل للهجره بسبب بعض الكائنات الحيه (فاسده اداريا) اللي احصلها وين ما رحت !!!!!

ههههههههههه كنت حاط املا باني اخلص من الدكتوراه قبل ان يتجاوز عمري 28 وهذا كان تحدي مع نفسي ، لاكن يبدوا لي ان هالتحدي صار بيني وبين مجتمعي ومن ضمنهم دوائرنا الخاصه والحكوميه

تخيلوا يا جماعه كنت اداوم من 8 الصباح الى 6 المغرب بالعمل واطلع اكمل دراستي بالجامعه الى 10 بالليل وتجي 3 ايام ما اشوف اهلي كلها لعيون المستقبل و الاخ المحترم في مطار ابها يقول انت فاضي وما وراك احد الا احنا !!!!

طيب فرضاً ان ماوراي الا انت . انت موضوع هنا تخدمني وتخدم غيري !!!!

الخلاصه . ما ابي تعويض ما ابي خطابات اعتذار . اللي ابيه انهم يجيبوا هاردسكي و يحاسبون اللي تجرأ و مد ايده على الشنطه ، دام ان مخزن العفش المركزي مغطاه بكاميرات حسب تصريح احد الموظفين . والا الى متى واحنا ننسرق وكل هذا مدعوم بفلوسنا . نصيحه مني للخطوط السعوديه لو يلغوا رحلاتهم على مطار ابها ويضمونه مع جيزان اتوقع افضل !!!!

والكلمة الاخيرة . لاخواني الطموحين اللي ناوين يكملوا دراساتهم العليا . انا اقول زين لو اخذتوا البكالوريوس بدون عقد نفسيه ، اي دراسه او شهاده اضافيه روح ادرسها برا اريح لك نفسيا وجسديا وفكريا لانه تاكد ان في شخص/جهه بتنشب لك بدون سابق انذار في حياتك الدراسيه واجلس رقّع في نفسيتك وقتها

وقبل انهي الموضوع . احب اخاطب الجهه المعنيه هنا او اللي يقول انه يحس بشويه مسؤوليه بالخطوط الجويه العربيه السعوديه هذا رقم ملفي القديم ( 31203 ) بتاريخ 30-8-2007 و هذا الرقم الجديد ( 27012) بتاريخ 3-12-2007 والله يستر لا تصير في ارقام ثالثه ورابعه وخامسه بعد ,,,, والله المستعان

وحسبي الله ونعم الوكيل

- صورة مع التحية لمدير عام الاتحاد الدولي للنقل الجوي ( الإياتا)
- صورة مع التحيه لمدير منظمة حقوق الانسان بالمملكة
- صورة مع التحية لمدير عام الخطوط الجوية العربيه السعوديه
- صورة بدون تحيه لمدير جهاز خدمات العفش المركزي
- للعلم والاحاطه لمدير مطار ابها الاقليمي و موظفيه المحترمين

م . ظافر بن محمد الشهري
طالب دراسات عليا مبتعث داخل ارض الوطن
الخبر
Alshehri.d@gmail.com


	الموضوع السابق: تصوير - نيو كوليكشن	الموضوع التالي: صور - احلى اعلان تحذيري بالسعوديه

	مواضيع أخرى للمرسل Eng.Dafer AlShehri
	المشاركات الدولية للهارلي السعودي: لبنان
	الرحلات الدوليه للهارلي السعودي : قطر
	صور، مسيرة الهارلي الخريفيه بكورنيش الخبر
	تغطية - رالي ارامكو الأول للدراجات الناريه

	التعليقات على الموضوع
	1 أبو سليمان زائر 15927 شلون \| 05/12/2007 11:13:24 قبل تتصلون علي تاكدوا ان داخل الشنطه في بطاقة عمل لي ( بزنس كارد )كنت حاطها داخل الشنطه .......................... أنت قلتها بنفسك تأكدوا من داخل الشنطه الخطأ منك .. شلون تقول تأكدوا من داخل الشنطه ثم تعترض عليهم ؟لان النفس أمارهـ بالسوء لو فرضنا شنطه فيها 10.000 ريال وفتحها موظف ولا حسيب ولا رقيب عليه ومايخاف الله تتوقع ان الشنطه بترجع لصاحبها ؟ عموماً الله يعوض عليك ويردك الي تبي 2 عبدالوهاب زائر 15928 لاحول ولا قوة الا بالله \| 05/12/2007 11:15:37 الله يعوض عليك 3 المطلق زائر 15930 دراسات عليا \| 05/12/2007 11:35:33 السلام عليكم.. الله يعطيك العافية ومن يشره على الخطوط السعودية.. انا راجع من امريكا للسعودية قبل سنتين وطلعت شنطتي بمطار نيويورك وليومك ماشفتها.. بس اشوى ان اللي فيها بس ملابس.. معوض خير 4 حسن بن محمد زائر 15931 مشكله والله \| 05/12/2007 11:39:03 كان الله بعونك اخي ظافر والله مشكلتك مشكله وان كنت اعتب عليك عتب بسيط وارجوا ان تتقبله مني مثل الاشياء الهامه كان من المفترض ان تكون في حقيبتك الدبلوماسيه الله ييسر امرك اخوك ابو سعود 5 Eng.Dafer AlShehri زائر 15935 شكرا لكم \| 05/12/2007 12:06:28 ابو سليمان المفروض فتح الشنط او العفش يكون باشراف لجنه مكونه من الشرطه والمباحث و امن المطار وامن السعوديه عالاقل و يسجل بمحضر بشكل دوري ------------------ حسن بن محمد كنت شايل معي اشياء اكثر اهميه . يعني لو ضاعت لكنت تحت المسائله بشكل مباشر الحمدلله على كل حال 6 زهرة زائر 15941 بدون \| 05/12/2007 13:49:27 الله يعينك كل دائرة فيها الزين وفيها وفيها الشين لا تحكم على الكل من واحد ومثل ما قالوا الشباب الأشياء هاذي مثل حياتك ما تقدر تحطها بالشحن وتروح 7 sara ahmd زائر 15947 ربي يعوضك خير \| 05/12/2007 14:25:59 آآآخ من قهر الرجال والله حسيت فيك. الله يعوضك خير .. ولا تنسى كن مظلوما ولا تكن ظالما .. عليك بالدعاااء وربي بإذنه يستجيب دعااائك .. 8 hanadi زائر 15957 الله يعوضك يارب \| 05/12/2007 15:02:04 بصراحة وانا ما حصل لي هالموقف -وان شاءالله مايحصل لي ولا لغيري- انقهررررت وبشدة..طيب وش فايدة الكاميرات ومسؤول المراقبة؟؟؟؟ بالتوفيق يارب وان شاءالله تكمل دراستك...وتكون من المتميزين تحيتي لك 9 horse زائر 15970 الله يعوضك خير \| 05/12/2007 16:56:03 يا جامع الناس في يوم لا ريب فيه اجمع الأخ ظافر بضالته..آمين 10 طفشــــــأإن عضو 15977 هونها وتهون \| 05/12/2007 17:49:22 والله مشكلتك مشكلة من جد الله يعينك ويعوضك خير ان شاء الله وفكر في مصايب غيرك تهون مصيبتك لكن يالله أهم شي الصحه والعافية .... خارج النص < متى آخر مره شفت الهارد ديسك؟ والله معاد تشوفه > 11 abu ali زائر 15984 الله يعوضك خير \| 05/12/2007 18:48:03 الله يعوضك خير ياخوي ظافر والله انها مصيبه وفضيحه للخطوط السعوديه تفقد (تسرق منك) اشياء زي هذه من الشنطه لكن عليك بالدعاء في الثلث الأخير من الليل على اللي قام بسرقتك الله يعوض السعوديين بخطوط جويه 12 المرزوقي زائر 15986 الله ييسر أمرك \| 05/12/2007 18:57:24 السلام عليكم ورحمة الله وبركاته الله معك ياخويه وحسيت كني أنا إللي في مكانك وعن جد يقهرون وهذا مستقبلك وحسبيه الله علهم ونعمه الوكيل وودي أعلق على كلام الأخ أبو سليمان هو شوي معاه حق بس ماعليه يعني الواحد يوم يكون في هذا الموقف وين بيحس في عمره ولا بيحاسب على الكلام إللي يقولله إدعووله ياإخواني وأخواتي 13 رامي الغامدي زائر 15988 الله لا يوفقهم \| 05/12/2007 19:23:16 والله العظيم من جد قهر والله اخوي مدري ايش اقولك ودي اسوي شي من جد قهر كل المجهود راح قول يارب الله لا يوفقه الي مد يده والله يعوضك يارب تحياتي لك 14 احلى من العقد زائر 15989 الله يعينك \| 05/12/2007 19:26:38 معليه يالغالي اصبر ترى انت مشكلتك صج تقهر بس اهون من اخونا اللي المفروض يخلص دراسته من سنتين وكل سنه لما يكلم الجامعه يقولون له انت ماداومت طول السنه ولا عندك اي اوراق تثبت انك سلمت تقارير لنا ولين يومك هذا مارجع بلاده ومتغرب الرجال جاته حاله نفسيه خلص ال27 وهو على امل انه يخلص السنه وياخذ الشهاده ويرجع قول الحمدلله على كل حال والله بيعوضك خير انشالله مع ان الهارديسك اكيد فيه معلوماتك ومراجعاتك وشغلات ماتقدر تجيبها بس الله كـــــريم 15 Thugs Life زائر 15991 Power \| 05/12/2007 19:43:17 صدقني ماتسترد حقك الا بطريقتين فقط: 1- حـرف الــ(و) يتبنى الموضوع وتسترد ماسرق منك ويحاسب المتسبب. 2- انت بنفسك تاخذ حقك بيدك يعني زي ماتقول (نظام شوارع). والثانية مجربة 100% 16 للأسف زائر 15994 دولتي!!!! \| 05/12/2007 20:18:15 دولتي.... كم انتي مخيسة! 17 لولو#2 زائر 15999 دق باب المسؤولين \| 05/12/2007 21:54:30 قرأت موضوعك و ردود بعض الأخوة عليه وجزاهم الله خيرا كلهم يطيبون خاطرك , الأجراءات التي عملتها جيدة لكن عندما سدت الطرق ما فكرت تروح مباشرة لكبار المسؤولين بالخطوط أو حتى لمدير عام الخطوط دام الضرر الواقع عليك كبير لهذا الحد؟؟ أرجو أن يرد الله لك ضالتك ويكون معك! 18 abu loes زائر 16001 تسيب واااضح \| 05/12/2007 23:10:44 يعني إلى هالحد وصلوا الله يستر أنا طالب تويي بالثالثه ثانوي آخر سنه لي واطمح دراسات عليا بعد الجامعه تصدق تحطمت شكلي ببتعث................. الله يعوضك بأبحاثك والله يفضح من سرقها 19 طنقوره هانم زائر 16007 حسبي الله عليهم \| 06/12/2007 00:13:03 من جد معاناة الحمد لله و الشكر .. الحين ما تسلطوا الا على هالشنطة .. قسم بالله انهم لاعبين علينا وتعيقا علىالي قالك أذيتنا انت و هاردسكك بلا لاكيد شهادته متوسط او ابتدائي علشان كذا مو فاهم اهمية الموضوع .. الله يكون بعونك من جد معاناه 20 طالبه بكالوريس زائر 16009 صدقت ورب الكعبه \| 06/12/2007 00:19:07 أولا أحسن الله عزاءك أخي الفاضل في حقيبتك اللي ماأظنها ترجع لك . أخي الكريم والله إنك صادق بكل كلمه قلتها وخصوصا الفساااااااااد الإداري اللي عندنا شئ شئ مو طبيعي في كل مكان تلقاه في السوق وفي الدوائر الحكوميه والمستشفيات والتعليم اللي ماأدري متى بيتحسن وضعنا فيه .. حتى أكلنا ألحين صار كله يسبب السرطان ولا حياه لمن تنادي ,,, ... من زماان وأنا أفكر بالهجره بسبب هالفسااد الإداري وخصوصا في قطاع التعليم تخيل ياأخي الكريم عندنا بالجامعه أستاذه محاضره ماشاء الله أخذت البكالورياس بتخصص الحاسب ببريطانيا في 3 سنوات + سنه ماجستير وهنا 5 سنين ولا حصلنا حتى البكالورياس .. يااااااارب تعينا وتصلح أمر نا يارب وترزقني إكمال الماستر (( بالخارج)) آمين 21 إعصار زائر 16010 دعاء \| 06/12/2007 00:31:14 اللهم يا جامع الناس ليومٍ لا ريب فيه أجمع بين ظافر وضالته 22 soos زائر 16016 حسبي الله ونعم الوكيل \| 06/12/2007 05:03:23 حسبي الله ونعم الوكيل اقترح عليك اخو انك ترسل برقيه لأبو متعب وانشاء الله مايقصر معك ويطلع عيونهم 23 عليـا زائر 16028 حسبي الله ونعم الوكيل \| 06/12/2007 11:19:26 لا حول ولا قوة الا بالله ... والله حسيت بمعاناتك يا اخوي ،، حرف حرف .. وحسيت بقهر .. مرات الانسان يمر باوقات يحس فيها انه ضعيف جداً وانه محتاج للمساعده بس يوم يتلفت حوله ما يلاقي حد !!.. بس لا تنسى في هذي اللحظه تدعي ربك وتلجأ له لأني مريت بموقف مشابه والله وما كان لي حد غير ربي وما توكلت على حد غيره ،، ووالله ثم والله ان حقي رجع لي والحمدلله والشكر على كل حال .. السارق يعل ايده القطع ان شاء الله ويارب حقك يرجع لك وما يضيع تعبك ببلاش وتكمل دراستك وتحصل الدكتواره قبل ال 27 بعد .. الله يوفقك ويوفق كل طالب علم مجتهد مثلك وان شاء الله ادعي لك بكل صدق ان مشكلتك تنحل وربي يعاقب اللي كان السبب وياخذ حقك منه .. واسمحلي على الاطاله .. والله يوفقك يارب 24 ابوتركـي زائر 16030 لاحول ولاقوة الا بالله \| 06/12/2007 12:01:53 الله يفك كربك وكربنا وييسر امرك وامرنا ويصلح حالك وحالنا ويصلح حال موظفين الخطوط السعودية وحال الدوائر الحكومية كلها 25 هيا زائر 16033 مافيه شي مستحيل وان شالله تلقاها \| 06/12/2007 13:11:53 الله يعينك الله يعييينك اللهم يا جامع الناس ليوم لاريب فيه اجمع الأخ ظافر بضالته ربي ما يضيع احد وان شالله ترجع لك الأوراق هونها وتهون ولو ما رجعت انت استفدت من دراستك ولو بتقدم مره أخرى بتكون عليك اسهل وبيكون عندك خبرة 26 sh0sh0 زائر 16035 لا تيأس \| 06/12/2007 13:53:04 أخ ظافر بس حبيت اقول انك لازم ماتخلي هالشي يأثر عليك ولازم تكمل مشوارك وتواجه التحديات مافي شي يجي بسهوله وعندي سوال الحين وش صار معاك؟>>لقافه 27 شكرا يا وطني زائر 16036 شكرا يا وطني \| 06/12/2007 13:53:40 شكرا يا وطني..... الله يعوضك خير بالاخيره .. مثل ما تفضلت ترى خيار الهجره لازم تاخذه بعين الاعتبار... ودمت بود 28 علي زائر 16039 يارب يدقون عليك \| 06/12/2007 14:44:30 يمكن يحصلونها أو الحرامي إلي أخذها يأنبه ضميره و يرجعها عمي إنسرقت علي شنطة فيها عقد زواج من أجنبية و إذن من وزارة الداخلية و 5000 ريال و أوراقه الرسميه يعني حاط إلي قدامه و إلي وراه و حط في الإستقبال رقم جواله الخاص وبعد مرمطة 4 شهور دق علي الحرامي و باين عليه ذاق المر قال لي خذ عفشك طلع الشخص هذ1 عايش بالرياض و عمي بالخبر قال له إرسلها بالبريد و الفلوس هدية لك و أرسلها الرجل و عمي صار يدعيله والله لأنه خفف عليه 10 سنين من عمره يطلع بدل فاقد أوراقه الرسمية من الدواير الحكومية و أخير أقول الله يرجع لك شقى عمرك ويارب تأخذ الدكتوراه زي ما تخطط ولك دعواتي 29 حمزاوي زائر 16040 خيره بإذن الله خيره \| 06/12/2007 16:20:23 أخي المهندس/ ظافر الشهري تحياتي لك وأنا معك قلباً وقالباً ... عموماً كل ما يحدث للإنسان في هذه الحياة يكون له خيره بإذن الله لأن سبحانه وتعالى هو مقدر هذه الأمور ، وأنت لا تعلم ما الذي كان قد يحدث لك لو حصلت على هارديسكك وفجأة سلمت الدارسه الخاصة بك ورفضت مثلا من قبل دكتورك المشرف عليك أتوقع نفسيتك قد تكون أسوأ مما أنت عليه فالله سبحانه ربما أراد تأخيرك حتى يأتي دكتور يراعي أجتهادك وهكذا.... علما بأن ماذكر سابقاً هو مثال على أن كل ما يحدث للإنسان هو بأقدار الله ، لكن ما يحدث من تسيب في مطاراتنا لابد أن يحاسب وبيد من حديد لأن ممكتلكات الناس ليست لعبة بيد فلان وفلان وهل المقصود من إضاعة أغراض الناس بهذه السهولة يعتبر خطأ ، لا فهي مقصودة فكيف موجهاا لتذهب الدمام ويعود ليجدها بجدة بكل هذه السهولة أين المراقبة أين الأمن أين المسئولين الموظفين لمراقبة الأعمال ومتابعة الأشياء ، ولكن لا نقول إلا حسبنا الله على من كان هذا تصرفه ومسئوليته وتهاون بها ... وأخيراً أدعو الله بأن تعود ممتلكاتك لك أخي ظافر الشهري وأن يوفقك الله في حياتك العلمية والعملية وندعوك بإذن الله الدكتور /ظافر ، فأآآآآآآآآمين يارب . 30 علي اللما زائر 16045 صادق اخوي والله صادق \| 06/12/2007 18:52:50 السلام عليكم مطار ابها دائما هذه مشاكله.. التاخير في تسليم الامتعه وضياعها.. انا ضاعت شنطة بنتي الرضيعه وفيها ملابسها واغراضها وحتى ذهبها وللاسف كنت رايح زيارة ابي استمتع بالجو والوقت هناك ولكن للاسف صارت كل الرحله من السكن للمطار وجتني الشنطة بعد اسبوع تقريباً.. ويوم اساله عن الشنطه يقول باقي في الدمام قلت له ليه مايرسلوها قال كلهم كبار وبيقعدونهم ومالهم خلق يشتغلون. وصارت نفس الشغله لزميلي ضيعوا شنطته وعوضوه بــ 130 ريال.. تخيلوا خطوط تعبانه بكل المقاييس الله يعوض عليك اخوي ونسأل الله ان تكون خيره لك تحياتي 31 غربة الروح زائر 16056 الله يكون بعونك والله شي يقهر صراحه \| 06/12/2007 21:47:26 حسيت بمعاناتك وقهرك الله يكون بعونك ويمكن يحن قلب الي اخذ الاغراض عليك اقلها يرجع الدسك الي فيه البحوث والله قهر بجد ... الصبر جميل ياعم 32 سحر الحياه زائر 16060 السلام عليكم \| 06/12/2007 22:08:31 والله حااااااااااله كلن يشتكي من هالمطارات اخوي الله يعوضك خير ذكرتني بسالفتنا المضحكه يوم حجزنا من مطارابها(ال.........)الرحله من ابها الى المدينه المنوره,,وبعد طول انتظار جاء اليوم الموعود تدرون ش صار طلعت الرحله من المدينه الى ابها(وتعالو دورولنا) يايويييييييييييلي ويلاااااااااه من ذاك اليوووووم,,, الله لا يعيدك يامطار ابها 33 سحر الحياه زائر 16061 السلام عليكم \| 06/12/2007 22:19:42 اخي المحترم ظافر ياجبل ما يهزك ريح انت اقوى وافضل من انك تفكر في الهجره او التوقف عن الدراسه,, انت اعلى وارقى من هالافكار الشيطانيه,, كمل دراستك واثبت لنفسك انك قممممممه وان شاء الله اسمع يوم من الايام انك اصبحت(الدكتور ظافرالشهري) مع التحيه 34 مواطنـــه بأحساس أميره زائر 16063 حسبي الله ونعم الوكيل \| 06/12/2007 22:34:49 أخــــــوى ظافر قريت قصتك واحزنتنى كثير لا تسكت عن حقك طالب فيهاولا يضيع حق وراه مطالب وانا انصحك ماتخليهم ويضيع مستقبلك ولو تأصل لأكبر رأس ورح للمسؤلين الكبار مثل الأماره او الداخليه او كل من له صلـــه في هذا التسيب والفساد الظاهر للعيان والله يوفقك ويجمعك مع ظالتك وقدر الله وماشاء فعل 35 نايف زائر 16065 ياابو محمد \| 06/12/2007 23:27:36 تكفى ونا أخوك كمل مبتغاك المستقبلي,وعتبر الي صار دافع بلا او اختبار او دافع لك او على الاقل تكون عندك قصه ترويها لـ أولادك وتكون دأله على جهدك وصبرك ومثابرتك الدراسيه والعمليه والاجتماعيه والحياتيه والانسانيه والنفسيه والوطنيه,وفي الختام ادعوا الله الواحد الفرد الصمد ان يوفقك ويوفق ابناء المسلمين. وشكرآ أخوك: نايف عبدالعزيز 36 خالد زائر 16067 قدم عليهم شكوااااااااااا على( IATA) \| 07/12/2007 00:05:32 السلام عليكم ورحمة الله وبركاته... اخوي انا اختصر لك الموضوع قدم عليهم شكوا على موقع IATAوهي الي بتسعى لك بحقك وبتاخذه غصب عليهم والابيسحبون منهم الرخصة الدولية ........ لان اذكر واحد ضيعو علية مناقصة في حائل او ماني متاكد من المدينة المهم قيمة المناقصة 50000000ريال سعودي لان الرحلة تاخرة وتفاجئو انها متكنسلة وبعدين قالهم ان عنده مناقصة مع ذلك مافيه فايدة ....وقدم شكوا للمنظمة IATA بوراقه الرسمة والاصلية وعطوه تعويض غصب على الي مايرضى................ 37 N.M.N زائر 16077 الله يخلف عليك \| 07/12/2007 09:55:20 ما نقول لك يا ظافر الا الله يخلف عليك والله يبشرك باليوم اللي ترجع فيه اجهزتك وباقي موجودات الشنطة لكن كان المفروض عليك ان تضع الاجهزة في شنطتك الشخصية وان تضع اكثر من نسخة لدراستك لشهادة الماجستير لانك ما تدري عن الظروف اخيراً الله يوفقك في دراستك للماجستير وعقبال الدكتورة ان شاء الله 38 موظف خطوط زائر 16078 حصل خير \| 07/12/2007 10:45:00 اخي العزيز المهندس/ظافر الشهري اعتقد لا يقل عن 30% من ركاب مطار ابها الاقليمي تعلم جيداً عن مستواهم العلمي وعن طريقة الاسلوب الجاف الذي يتعاملون مع الموظفين به ........ هل تسمح لي بالتعامل معك على انك واحد منهم ؟؟؟!!! اعتقد تعرف ما اقصد ولكن خلاصة الموضوع يؤسف كل مواطن به انتماء لوطنه ان يجد اخاً طموحاً ويحال بينه وبين هدفه الطيب ولكن تعرف المثل (خص ولا تعم ) شكراً لمجموعة ابو نواف .. 39 شخص ما زائر 16083 بدون \| 07/12/2007 15:15:54 اخوي ظافر ان شاء الله انك تحصل اغراضك ويحاسب الي كان السبب . لانه بصراحه شيء يقهر الله يعينك. لكن اخوي اسمحلي انت عليك مسؤوليه كبيره من الخطأ لانه المفروض ماتشحن اغراض مثل هذي بالعفش . وبالنسبة لمطار ابها بالذات انا لي ملاحظه بسيطه انه معروف دائما بالمشاكل وانا ماعتقد انه بسبب الموظفين لانهم تغيروا وسمعة المطار مثل ماهي من وقت ما بدأ العمل فيه وجهه نظري انه السبب المجتمع المحيط بالمطار ويستخدمه هو السبب . 40 زجااااج عضو 16087 لا تعليق \| 07/12/2007 18:55:14 لاحول ولا قوة الا بالله 41 مجرد اسم زائر 16095 لله يعظم اجرك \| 07/12/2007 23:14:02 وربي ارتفع ضغطي.. الناس تخلص امورها من النت واحنا الى الان الاستهتار يعم اجهزتنا الاداريه.. صار لي موقف مماثل بس انا بسبب رحله طيران لاخبطوا في توقيتها وماعلنوا عنه.. كنت ادرس بجامعه الملك عبدالعزيز انتساب وعندي امتحان الساعه 2الظهر.. وسبهم ماوصلت جده الا على طيارة الساعه 4 العصر.. ونزلت لي المادة رسوووب..وبعد معاناه مدتها 3شهور قدرت اطلع عذر وتعتبر المادة تخلف .. مالك الا الصبر ونصيحه اذا ركبت طياره استودع اغراضك الله..تراها مجربه.. والله يوفقك وتخلص دراستك على خيييييير يااااااااااااااااااارب

	اقسام الملتيميديا
	العاب \| ملفات \| بلوتوث \| صوت \| صور \| فلاش \| فيديو \| منوعات

عضو في اتحاد المواقع العربية الكبرى

شبكة أبو نواف

موبايلي

موبايلي

حسبي الله عليك يالخطوط السعوديه .. دمرتي دراساتي العليا