السلام عليكم ورحمة الله وبركاتة
هذي أول مشاركة لي
وأن شاء الله ما تكون الأخيرة

بمناسبة المناسبات

:التالية
أولاً : انتقالنا للإستراحه الجديده
واللي اتفقنا نسميها
إستراحة
(( دير بالك ع حالك ))
  متأثرين بباب الحارة >>

ثانياً: إجازة الأوبك << بس حنا ياحقين الرياض
ثالثاً: والأهم كتب كتاب أحد كبارعضوات الأ ستراحه  "أبو ابراهيم" << عقبالنا جميعاً 

قررنا نقط ونتعشى تيس على كيف كيفك
وفجأه وحنا نجمع القطه وتطيح عيوننا على حفرة مندي داخل الاستراحه الجديده
قلنا هذي مناسبة خامسة لازم نسوي التيس مندي
شغل إيدينا أضمن من شغل المطاعم
خاصة من عقب الفار اللي ياكل الشاورما
الله يعز النعمه صرت أغمض اذا مريت على مطعم
اللي مابعد شافه يتحمد ربه انه مابعد شافه
واللي ملزم يشوفه هذا هو المقطع
في قسم البلوتوث
هنا

المووووهيم نرجع لموضوعنا
كل واحد تكفل بشي
اللي يضبط شاهي واللي يجيب التيس
واللي يجيب اغراض وكل واحد له شغله
الاأنا بما أني فاشل في الكشتات والحركات هذي
شديت حيلي بالتصوير
تقول خواجه كل شوي ناط لهم بفلاشي تشيك تشيك << ترى هذا صوت الفلاش
وبدت رحلة الكبسة

مراعاة لظروف ضعاف القلوب والنواعم
قمت بحذف صور التيس وهم يذبحونه ويصلخونه
ماودنا ننكد عليكم
:
هذي صورة المرحوم بعد الصلخ والتعليق

وهذي الصوره الله يرحم قاعدين نملحه << مسوي مشتغل معهم 

وهنا بعد التعليق وننتظر النار تجمر

وهذي ضونا الله يجيرنا وياكم

الحين جاء شغل الرز
تعرفون الرز غالي شارين كيس أبو 20 كيلو

هنا يبدأ شغل الشيف سعود بتضبيط الرز
لين تجمر النار

>> البصل مخلوق عجيب
تشم ريحته الله يعز النعمه بس اذا حمسته مافيه احلى من ريحته
فاتتكم الريحه

هنا عاد اكبس الرز وخله شوي

بعدين تربط القدر
المقادير : معاليق + زرادية
الطريقه : مدري العيال هم اللي عفطوها كذا << ه

هنا بدا الشغل الصح وهذا التنور الله يجيرنا وياكم دنيا وآخره 

تحط بطانية مبلله وتكتم أبو أبوه << ساقط في التعبير ه

ترى للحين ماخلصنا
الشيف : نايف قال:خل الرز مضغوط  أضمن
والشيف : سعود يقول لا مندي
قام الشيف : نايف وخذا الراس والرقبه وكم قطعة صغيرة هبرة
وضبط رز مضغوط بنكهة اللحم

فاصل إعلاني
mbc متأثر بالــ >>
خلصنا شغل اللحم والرز
ومابقى إلا الانتظار

وكل واحد يمارس هواياته اللي يضبط شاهي

واللي يشغل اللاب توب

اللي يتفرجون على التلفزيون

واللي شغلوا البلاي ستيشن
وهذا صورته

مسوين نواعم
أدري ان محد مصدق بس مشوها هالمرة  >>

بصراحه العيال طفشوا من التصوير والفلاش اعمى عيونهم ومنعوا عني التصوير
وعاد لازم احط صورة للبلاي ستيشن مالقيت الا هذا
وش اسوي أدمنت التصوير  >>
وحقين البلوت بعد كرشوني ممنوع التصوير

  على طاري البلوت
هذي لعبة البلوت ناس كثيرين يسألون عنها
وخصوصاً طلاب الجامعه
اللي يجلسون آخر القاعه
عاد عندنا في الجامعه المحاظرات ساعتين وثلاث
يعني يبيله بلوووت

ياشينه ذا الدب اللي مقابلك يقهرك
تهرب هاص يجيك هاص

وهذارابط اللعبه
وتراها كامله مكمله
MBC ويقولون الـ 
تسوق للعبه مدري وش طاري لهم

لـقـد عـدنـا
وهذا العشاء بعد ما انتظرنا ساعه

قبل ما نقرب الصورة كل واحد يقرب مناديل
  محافظتن على الكيبوردات
غير مسؤل عن خراب الكيبوردات>>

وهذا الرز كان ودي اصور الكشنه حقت الرز المندي
بس ماأمداني ألحق عليها
الشباب ماعندهم صبر

اثار الجريمه واضحه على الكووووووووشنه

وهنا الرز المضغوط باللحم

الشيف : نايف يشوف شغله

قبل مانفرش السفرة
(لازم تواجد شيخ السفرة ( البيبسي

ولا تهون شطة الكريستال

تصدقون العام يوم انقطعت الكريستال من الرياض
نشتريها بالدس من محل في أبن دايل
+++++++++++++++
وهنا مابقى الا نقول اقلطوا على عشاكم
اللي يبي
رز المندي

واللي يبي رز المضغوط   

هاه وشرايكم في الشغل ....؟
لاتنسون نظام الأستراحة
(( آخر كرشة تشيل الفرشه ))

طلب بسيط 
اللي عنده محل فاضي في صناعية الخرج ويبي يأجرة
:يعطيني خبر على الايميل
FF4KK@hotmail.com
    ناوين ننافس مطعم مندي السعيد في الصناعيه >>

قبل مانودعكم هذا مقطعين بلوتوث لي
أحلى ضحكة

دلع بزران

تقبلوا تحيات مراسلكم
فارس الكلمه
مجموعة أبونواف البريديه
الرياض
استراحة
(( دير بالك ع حالك ))
اتمنى الايميل أعجبكم