صباح العيد المليان حلاو بقر .. وكل عام وانتم بخــير

كيفكم ياحلوين .. ؟
لاتقولون : والله طيبين بس العيد أتعبنا .. أتحداكم .. أقسم بالله ماتجون مثل ماجاني من كرف .. والله ياني أنكرفت كرف الويل .. جب قهوه ودّ قهوه جب الشاهي ودّ الشاهي  وكنت أتمنى لحظتها أني صرت متزوج مثل ولد خالتي : علي ، مابلا يامر وينهى وحاطن رجل على رجل وماعاد ينادونه علي زي العيد الماضي ، صاروا ينادونه ( أبو صالح ) .. ودي ينادوني ( أبو صعفق ) بس أصير زيّه مع شلّة دفاتر العايلة وافتكّ من هالشلّه اللي حدّهم بطاقة أحوال ورخصة قيادة منتهيه صلاحيتها من عام الفيل !

 
عاد النوم عندي تلخبط وصرت أمشي على توقيت قرنتش الساحلي ... أرقد العصر ثم أقوم المغرب وارقد بعد العشا ثم في توالي الليل أصحى واجلس أفرفر في الشوارع أدوّر لي على" تسالي " عشان آخذ لي بطاطس بالكتشب وعصير كوكتيل حاطين فيه تفاح خايس .

[ مدخل ]
كيف الحال ؟ << واضح أن عندي شي بقوله بس قاعدن اسايسكم لين تركدون !

 
تخيلوا معي أن الدنيا من دون حريم ؟ .. والله البلشه .. شلون بنعرس ويجونا بزران !

طيب تخيلوا أن ماعندنا مطعم ماما نوره .. شلون بناكل شورما ثومها زايد !
صدز والله ياجماعه .. تخيلوا أن منتخب السعودية لونهم زهري .. أحس أن الجمهور بيتلطّم من الحيا !

 
تخيلوا أن راشد زين ..هو مُجرد تخيّل .. ضنكم بيقدر يتأقلم معنا والا يبي له سبع سنين عشان يحس بأنه ولدن ذرب !

طيب تخيلوا أن الانترنت مافيه منتديات .. والله البلشه .. بنصير نسولف أربعه وعشرين ساعه على " الشات " ونقعد نحش في المسعولين على الخاص !
[ معبر جِمال ]
خويي صالح قلت له تعرف ( كواليس ) .. قال ( وش كواليسه ) .. انفجرت ضحك على كلمة ( وش كواليسه ) وتذكّرت سالفة ذاك القروي اللي مهرّب له كم قطعة حشيش مُخدّر ويوم وصل عند نقطة التفتيش قال له العسكري : وش اسمك .. من الروعة الضعيّف قال ( وش حشيشه ) !

[ تصريح ]
يوم ان الابداع يتمخطر .. ويوم ان الامتاع يتمردح .. ويوم أني أنا أقولها بالفم المليان ( كلام يقوطر عسل ) .. فأنا أعني ( موقع ومنتديات كواليس ) .. !

شفت ( راشد ) فتح موقع لبيع الخردوات .. وشفت ( سالم ) طقّ له دليل مواقع مافيه إلا سبعة مواقع لبيع أدوات التجميل وموقعين سياسية شنكرتها مدينة الملك عبدالعزيز بشنكارين وقفّلتها بالشمع الاحمر .. بعدها بصراحة مسكت على دربكة أموري مثلهم .. جيزي جيز هالعالم .. بس عندنا ( الوضع غير ) واللمسات الإبداعية ( لها طعم ) والكتابة ( بذوق وفن ) والتمخطر والتسحبل له( فايدة ولذّه فريده ) .. !

عندنا ( ميدان ) أكتب فيه اللي تبغى .. وعندنا توقيت على الساعة ( 9.5 ) مساءً بتوقيت القراوى فيه كل اخبار اليوم مع قسم سياسي متشرشف بشرشف الـ ( شطحات ) المتنيّله بخراطيش الدفاع المدني ..ولحقون الجّوال لهم مساحة للتمرطح هناكـ .. ولشغلات الكمبيوتر وطقطقتها من طرف الماوس إلى آخر الكيبورد حطينا لهم قسمن وش كبره كبر راس كل عضو براسه خنبقة حاسب .. وأيضاً لأصحاب الشعر والدراهم والاقتصاد والإقلاع والوناسة والرياضة من نصروايين وهلاليين .. كلّن له قسم وكلّن له مساحة يحلو فيها ( مُحياه ) للكتابة وتبادل الخبرات والإستأناس بالتبطّح بـ " كواليس " .
أخيراً .. دعوة لِكُل من في يده صِبغةُ جمال .. لإكمال جماله معنا هُناك ..
صحيح .. هناك .. كلامنا يقوطر عسـل .

 
من هُنا تكون الدعسة بالخشم للولوج متبرطحاُ هُناكـ
http://www.coalles.com/vb

[ شُكر ]
شُكر عظيم لهذه المجموعة الطيبة بإشرافها وأعضائها لأن سمحوا لي بأن أكون أحد الكُتّاب المُقلّين بالطرح فيها وأعطوني المجال الخصب لأن أكتب خربشاتي المُتناثرة فيها ، والشكر العميق الموصول للأخ الفاضل الأستاذ : أبو نواف على جهوده العظيمة والتي لايُحصيها خطُ قلم أو شهادة شكر أو حروفٌ مصفوفة مدحاً وثناء ، فالجهود تُرى ومالنا إلى الدُعاء لهُ في ظهر الغيب ،وللعلم : فأنا متواصِلٌ معكم بحول الله ولن يتفرق الجسد مادام في العُمر بقيه .

مُحبكم : مدمن شاهي .