صباااااحكم فل
رجعت لكم برحله جديده
رحلتي هالمره لبلاد الشاي والتوابل سيرلنكا
اول بعطيكم نبذه سريعه عن هالبلد

இலங்கை ஜனநாயக சோஷலிசக் குடியரசு
بيعلمكم انه عرف لغتهم>>>

الدوله سيرلنكا
العاصمه كولمبو
اللغه السنهاليه - التاميليه
العمله الروبيه السيرلنكيه
المساحه 65610 كم والباقي ماتغير خخخخخخخخخ
عدد السكان 20 مليون تقريبا
الرئيس الشيخ ماهيندا راجباكسى

سيرلنكا البلد التي تشبه الكمثرى تقع في المحيط الهندي يحدها خليج البنغال من الشمال الشرقي والمحيط
الهندي من الجهات الباقيه
مناخها استوائي

سرنديب كان اسمها قديما ثم تغير اسمها الى سيرلنكا اثناء الاستعمار الانجليزي
 لقد زارها الرحاله العربي ابن بطوطه عام 1344 م  ويوجد هناك مدينه جميله على المحيط الهندي اسمها بنتوتا
والحقيقه انها سميت بأسمه بن بتوتا
ونفي اليها الشاعر العربي محمود البارودي وقال فيها اشعار كثيره على مدى 17 عام

تعاقب المستعمرون الغرب على البلاد طمعا بخيراتها بدأ البرتغاليون استعمارها وكانت نيتهم السيطره على
التوابل التي كانت بيد العرب ثم استعمرها الهولنديون ثم الانجليز والذين قاموا بزراعة الشاي هناك
واليوم تصدر سيرلنكا اجود انواع الشاي والتوابل

%الديانه تتصدر البوذيه القائمه ثم الهندوسيه ثم الكاثوليكيه ثم الاسلام ونسبة المسلمين 8
ستشاهد في سيرلنكا المعابد البوذيه والهندوسيه والكنائس والمساجد

هذه كانت نبذه بسيطه عن سيرلنكا
طبعا راح تكون الرحله على اجزاء كل مدينه جزء مستقل لان الصور كثيره والمعلومات والسوالف والمواقف اكثر
وفيه رحلات لثلاث دول غير سيرلنكا يعني بتملون

- - - - - - - - - -

الناقل الرسمي الخطوط السيرلنكيه

اختيارنا للخطوط السيرلنكيه مخطط له مسبقا ولم يكن عشوائي لان وجهتنا لم تكن سيرلنكا ولان خطوط اي بلد
لابد ان تمر على موطنها الاصلي اخترناها لنتمكن من المكوث فيها لمدة خمسة ايام وهي مدة اقامتنا
اقلعت طائرتنا انا وصديقي من مطار البحرين الساعه العاشره مساء بأتجاه العاصمه السيرلنكيه كولمبو
وهذه اول مره اسافر على السيرلنكيه وكانت الخدمه لابأس بها فهم يضعون العرب والخليجيين بقسم خاص
وكانت ثلاثة ارباع الطائره خليجيين
قبل الوصول الى سيرلنكا سوف يقومون بتوزيع كروت لدخول سيرلنكا باللغه الانجليزيه ويستثنى من هذا
مسافري الترانزيت
كان لدينا معلومات كافيه قبل وصولنا الى سيرلنكا وكان مخططنا هو البدء بالجوله من ابعد نقطه وهي مدينه  سيقيريا
والتي يتطلب الوصول اليها 5 ساعات بالسياره كانت متعبه ولكنها الافضل
والخارطه توضح خطة الرحله

خطة الرحله كانت مغادرة مطار كولمبو الى مدينة سيقريا ومنها الى دمبولا ثم كاندي ثم نوريليا واخيرا العاصمه كولمبو
----------
وصلنا الى مطار كولمبو فجر يوم الثلاثاء 17-7-2007  استلمنا حقائبنا وانهينا اجراءات الدخول
لايلزم مواطني الخليج الحصول على تأشيرة دخول وسيحصلون على تأشيره لمدة شهر من المطار
 توجهنا الى بوابة الخروج وهناك توجد المكاتب السياحيه

خلاص الى هنا ونوقف فصحى
قلت لصديقي اذا قربنا من المكاتب لاتقعد تلفت خلنا نروح لمكتب  كأننا نعرفه من قبل واعجبته الفكره
اصحاب المكاتب ماتعرضونا ابدا قالوا وخروا عنهم هذولي مقطعين سيرلنكا
سلمنا على راعي المكتب وضربته بوكس على كتفه  وانا مسوي نفسي اعرفه قلت له ماعرفتني؟
 طبعا هو مايقدر يقول لا ماعرفك قال اييييه اكيد اعرفك
قلت له يالله طيب نبي سياره بسواقها وعطيته خطة الرحله قال طيب والفنادق قلت وهذي اسامي الفنادق
عطني اسعار الفنادق وسعر السياره بسرعه
المهم اتفقنا على سعر السياره وكان شرطنا ان السياره تكون جديده والسواق يتكلم انجليزي
بعد الهواش على السعر  اتقفنا على مبلغ 170 دولار لمدة 5 ايام والبنزين عليهم وشارطين عليه نخليه يودينا اي مكان
ويوقف باي مكان حتى اذا مسكت معنا نخليه يرفع السياره ويخلي الكفرات تدور يسويها
بعد الاتفاق قلت اول اشوف السياره طلعنا وشفنا السياره كورلا جديده 2006 وسواقها لغته ممتازه بس شايب

-----

ركبنا السياره وكانت الساعه 6 ونص الصبح تقريبا وجهتنا سيقريا ابعد نقطه في رحلتنا
قال السواق ممكن اروح بس البيت اخذ شنطتي قلت له لاااااااا>>>مسوي قوي من اولها
قلت له لاااا اصلا حتى ملابسك هذي تنزلها قال هاااااااه
قلت امزح ياخي روح بيتك يالله ومنها نسلم على ورعانك قبل يروحون المدرسه>>>يمون
رحنا للبيت ودخلنا بالسياره داخل جلسنا ننتظر شوي الا هو جاي يركض ومرته وراه بالمكنسه
حتى هم عندهم هالحركه
قلنا خيييييير وش فيك يا لكي اسمه لكي بس منحوس
قال مرتي ماهي مصدقه اني بروح مع سياح  قلت ايه الظاهر انك راعي سوابق
وراني راسه الا فيه رقم 37 قلت وش هالرقم قال هذا رقم الزنوبه
قلت افاااااااا قال ماشفت شي وراني ظهره الا كله ارقام 37 بس لاحظت رقم 40 قلت وهذا وشو قال هذي
امها سيرت علينا مره 
قلت طيب امش لاتخليني احط لك رقم 43 >>>مقاسه

مشينا والجو ممطر وخويي متمدد ورى والسواق يسولف انا طيحت معه الميانه من بدري
كان الطريق مزحوووم مره وكله بنات قلت له شسالفه قال هذولي عاملات المصانع يروحون الدوام

الدراسه في سيرلنكا تنتهي في اخر اغسطس
المسافه لسيقريا حوالي 170 كم لكن الطريق زحمه ولا فيه طريق سريع
وحنا نمشي بالسياره شفت شركة اتصالات دايلوج قلت له وقف ابي اشتري شريحه وقفنا ودخلنا المكتب قالوا
اذا بتطلع من عندنا لازم يكون عندك اقاامه
تصدقون اول مره اخاف من الجوازات حسيت نفسي بنغالي قلت طيب الحل قال السواق خلاص بطلع لك بأسمي
قلت اوكي قال بس هاااا ماتوهقني قلت لا افاااا علييك بس
 وانا قلت بنفسي خله يقعد يلف ويدور معنا والله لاتصل على نمور التاميل واقفل لين يجيبونه
افضل شركة اتصالات هي دايلوج  لانها تغطي كافة مدن سيرلنكا ولكنها الاغلى
كانت قيمة الشريحه بدون شحن 6 دولار وتقدر تشحنها من الشركه واقل سعر للشحن 250 روبيه
مدة الشريحه شهر فقط وهي الانسب للسياح
طبعا فيه شرايح تباع بدون اسم خارج الشركه لكن مو مضمونه
قالوا لي بنفعلها لك بعد ساعه طبعا حتى اللي يتصل عليك محسوب عليك نسبه من الاتصال يعني انسى دقه وتقفيله

اخص عليها سنووون تقول تفرش بكلوركس

بدا الطريق يصير اجمل كل ما قربنا الى سيقريا

طلعنا وواصلنا رحلتنا وصلنا لفندقنا في منطقة سيقريا وكان اسم الفندق امايا ليك واخذ الاسم من اسم البحيره
المهم وصلنا بوابه وعليها عسكري
قلت بسسسس رحنا فيها هذا من نمور التاميل والحين بنصير رهائن زي الكوريين

بس الكوريين اهلهم يبونهم وحنا اهلنا مايبونا بيقولون وش نبي فيهم يستاهلون خلهم يقعدون
بس اشوى  طلع هذا الفندق وهذا سكيورتي
وصلنا الفندق الساعه 11 ونص قبل الظهر قلنا للسواق روح الحين والساعه 4 نلقاك بالرسبشن
بس هااااااه مو تصير زينا نقولك 4 تجي 5

هذا مدخل الفندق

اول ماوصلنا عطونا شاي مثلج

احد يشرب الشاي من البريق على طول

عطونا مفتاح الغرفه وطريقتهم غريبه شوي

المفتاح بالظرف هذا ويحطون عليه ورد خويي يقول يمكن هذا بذر ويبونا نزرع معم قلت هااااه
واحذف المفتاح عليهم قلت من اولها تشغلونا عندكم خلااااااص بنرجع

وهذ اللوبي بالهوا الطلق

الظاهر اللي قبلنا زرعوه

طبعا اللون الوطني عندهم البرتقالي والاخضر>>>الله من زين الذوق

سياكل للايجار الساعه 30 روبيه
ثلاثين روبيه = ريال
الدولار=110 روبيه

الفندق كان عباره عن منتجع غرف مبعثره بالغابه تغطيها الاشجار

ترى الوزره يعني يونيفورم

هذي غرفتنا من برى
يعني عادي تقوم الصبح وتشوف مع الدريشه اسد مار
والا تشوف طرزان معه عيال عمه رايحين قنص

يكتبون لك عبارات باوراق الاشجار والورد العديد من العبارات على حسب التوقيت مثل صباح الخير

او مساء الخير او مرحبا

حركات هالفندق ختى تلفزيوناتهم بلازما

حاطين هالصوره الظاهر صورة راعي الفندق

انا لقيت هالقطعه الصفرا اللي على السرير ولبستها الصبح وطلعت وقعد يلحقوني وانا رايح المطعم قلت خير
قالوا وش فيك لابس الشرشف قلت والله على بالي وزره حاطينها لنا

كل شجره مكتوب عليها اسمها

الساعه 4 طلعنا مع السواق  كانت وجهتنا الى صخرة سيقريا

قال السواق حنا متأخرين وش رايكم اوديكم مع طريق مختصر قلت اذا فيه قطاع طرق عادي روح معه نبي اكشن
كان الطريق مختصر بس طوله تقريبا 5 كم بين المزارع وبيوت الفلاحين والقنوات المائيه

--------------

صخرة سيقيريا

ROCK FORTRES

ترى هالاقرع خويي>>>بينجلد
طبعا هالصخره لها قصه بقولها لكم بأختصار
كان قديما ملك يحكم هذه المنطقه وقرر انه  يخلي ولده الصغير من زوجته الثانيه يحكم وهنا طنقر الولد
الكبير وقال معصي والله مايحكم وقام وذبح ابوه وانحاش ومعه حاشيته واستقر على هالصخره وحصنها
 تحصين قوي وحفر قناه مائيه حول الصخره وملاها تماسيح وقال لاخوه كانك رجال ادخل
طبعا القصر منحوت حول الصخره وكان له مجلس فوق الصخره يستخدمه بالصيف

تذكرة الدخول غاليه 20 دولار

الوصول الى الصخره متعب خصوصا اذا الجو رطب لان السيارات تقف بمنطقه بعييييده عن الصخره

الصعود الى الصخره متعب جدااااا واكثر السياح يكتفي بالوصول الى قاع الصخره

الممرات والسلالم وضعت بطريقه خطيره
والدليل هالعجيز اللي متمسكه بالسياج جايتها ام الركب

وهذا سلم حلزوني خطير جدااا لانه مثبت على جدار الصخره بأوتاد
وفي نهاية السلم يوجد جدار كان طويل العمر  يشاهد صورته من خلال الجدار
وكان الجدار المقابل عليه رسوم لفتيات ويقال ان الامير لديه اكثر من 500 جاريه

ممنوع لمس الجدار

نزلنا وسلكنا طريق اخر وذلك للصعود للصخره

وهنا بداية الصعود الشاق

لم يكن هناك سلالم وكانوا يستخدون الحبال للصعود
السلم متعب جدا لضيقه ويوجد بعض درجات السلم لاتتجاوز 10سم عرضا

بالله وين تحط رجلك
يعني انقز زي الكنغر  على رجل وحده والا شلون

بمنتصف الطريق التقطت هذه الصوره للغابات المحطيه بالصخره

وهنا بتشوفون خلايا نحل كثيره على جدار الصخره لكن لاتحاول تزعج النحل او ترميه واذا شفت احد يحارش

النحل حط رجلك

واخيرااااااا وصلت للقمه وهذي لقطه للمنطقه من قمة الصخره وفيه بركه كبيره تجتمع فيها مياه الامطار يشربون

منها ويتسدح فيها الامير وش يسوي ماعنده شغل حاشره اخوه على هالحصاه

قبل الغروب

وهذي لقطه للمدخل اللي دخلنا معه

عادي الناس هناك يمشون حافين

لاتتوقع ان النزول سهل
بالصوره هذي فيه طريقين واحد رايح وواحد جاي طبعا كان قدامي مجموعه من السيرلنكيين ولان الوقت تأخر
كان طريق الصاعد فاضي قمت ونزلت معه وطبعا سبقت الجميع واستغربوا السيرلنكيين قالوا وشلون ماجت
على بالنا وكان فيه واحد باخر السلم يعني خلاص بيوصل قام رجع مع طريقه وجا وراي
من جددددددددد سيرلنكي

طبعا لان فيه كثير يحارشون النحل خصوصا المبزره وقاموا وحطوا هالغرفه عشان تندس هنا
لكن لو احد حارش النحل وانت فوق وش تسوي
طبعا فيه مناظر كثيره تستحق التصوير لان هالصخره عجيبه وبنيانها عجيب  بس بعض الصور كانت مهزوه
لانها كانت اول الصور اللي صورتها واعدادت الكاميرا ماكانت مضبوطه

واذا نزلت تحت بتشوف جواد العلي بس النيجاتف حقه
طبعا معه هالحيه الصغيره والعلب اللي قدامه فيها كوبرا  يرقصها على انغام المزمار

اضغط على الصورة لمشاهدة الفيديو

وعند المخرج لقينا هالمحل يبيع تحتف وتماثيل وتذكار

رجعنا وكان الوقت بعد المغرب شفنا محل عصيرات طازجه وخلينا السواق يوقف
هالمحل ياخذون الفواكه من مزرعه خلف المحل وسعر كاس العصير 100 روبيه

بعدها رجعنا للفندق وتعشينا بمطعم الفندق كان عباره عن بوفيه لذيذ ونظيف
كان الجو مطر روعه
طبعا كنت اسأل السواق وش اشهر اكله عندكم قال الرز بالكاري قلت لازم اجربها
بس نصيحه لاحد يجربها الا جنبه جيك ما لانك بتشوف الدخان يطلع من اذانيك

بالفندق راح تشوف السناجب بكل مكان على الاشجار وعلى الصخور والارض

 وبعض المرات تشوف اشياء ثانيه

الجوانا حيوان زاحف يشبه الضب بس تيربو
طبعا هذا حجم صغير ويكبر ويوصل بطول متر ونص بس احسن مافيه انه نباتي

رجعنا للغرفه وقعدنا نقلب بهالقنوات التلفزيونيه مالقينا طاري لكاس اسيا اصلا ماعرفنا ولا قناه كلمناهم قالوا
ماعندنا الا هالقنوات

من الطفش رحت اسألهم عن النت قالوا فيه بس المسؤل عن النت طالع انتظر لين يجي
قلت الظاهر النوم احسن وانا راجع سمعت صوت ناي بس مادري من وين كان قريب وجلست ادور من وين جاي الصوت
كانت المنطقه مظلمه ولافيه شي مبين شافني واحد وقعد يأشر لي على برج رحت للبرج ولقيت رجال جالس
فوق ويعزف على الناي كان الصوت روووعه طلعت عنده وقلت له اعزف مره ثانيه

شوفوا المقطع

اضغط على الصورة لمشاهدة الفيديو

وهو يعزف قاعد اطلع تحت لاتطلع لي حيه مستنزله

انتهى هذا اليوم وفي اليوم الثاني بعد الفطور اخذت الكاميرا بعد تعديل اعدادتها ورحت للبحيره اللي يطل عليها

الفندق وجبت لكم هالصور الرااااائعه

تصور وانت تفطر وهالمنظر قدامك كانت هذي اطلالة المطعم

الظاهر سواقنا كان نايم هنا

الطريق للبحيره

بعض قوارب الصيادين

البحيره ويلاحظ جذوع الاشجار وسط البحيره

بعد هالجوله على البحيره ودعنا الفندق وكانت وجهتنا دمبولا

ورجعنا مع الطريق المختصر بس بالنهار اجمل

صور الفلاحين وسط مزارع الارز

سيرلنكيه صغيره خلف الاشجار

حقول الارز على مد البصر
بدت السحاب يتجمع وبدت الامطار بغزاره
(انتهى الجزء الاول (سيقيريا