بسم الله الرحمن الرحيم
السلام عليكم ورحمة الله وبركاته
عمتم مساءً أيها القوم والقومات

وش الأخبار يا أبونواف وشلونكم ووشلون الشباب كلهم
والله لكم وحشة وحشتونن قوووة

اسمح لي أبونواف واسمحولي أعزائي أعضاء القروب والمشتركين فيه
بطول عليكم في الإيميل ذا الي جاء بعد غياب طويل
وبعد ذا الايميل بيكون فيه غياب طويل جدا عشان كذا تحملوني هالمرة
وحتوحشونن يا حبايبي

*****
الايميل يتكون من خمس مواضيع :
الأول : تنبيه
الثاني : تأملات فلسفية جنطية
الثالث : حوادث تفحيط (فيديو )
الرابع : نظرية جنطيوتن
الخامس : ساندرا رودريقز والخيانة التي قتل الحب ( قصة من الأدب المكسيكي )

*****

الموضوع الأول :
تنبيه

قبل مدة أخونا العزيز مدمن شاهي -الي أحمد الله على سلامته - نزل موضوع اسمه (الي اختشوا ماتوا) والموضوع على ذا الرابط :

اضغط بذا عسى يدك ماتنكسر

فكرة الموضوع أنه تتبع الي يسرقون مواضيعه وكتاباته ، والحقيقة إني ما استغرب سرقة المواضيع ولكن الي استغربه انتحال شخصية الكاتب وذا الشي هو الي خلاني أكتب التنبيه .
يعني نقل الموضوع أو سرقته شي عادي بس الي ماهوب عادي إن الواحد يسرق الموضوع وينتحل شخصية كاتب الموضوع وهذا الشي حصل معي بالضبط وهو الي خلاني أكتب الكلام ذا لأني لقيت ناس ما تكتفي بنقل الموضوع بل ينتحل شخصية جنط السفينة وهذا الشي يضايقني لأن تصرفات ذا الحرامي تحسب على جنط السفينة الحقيقي وعشان ما أنحط بذا المواقف السخيفة عرضت عليكم التنبيه وأقولكم إني غير مسؤول عن أي واحد يكتب باسم جنط السفينة في أي مكان غير مجموعة أبونواف وأصلا أنا ماكتبت باسم جنط السفينة إلا في منتدى كنت أكتب فيه وتوقفت عن الكتابة فيه نهائيا من يمكن ثلاث أشهر والآن ما أكتب إلا في مجموعة أبونواف وأي واحد يكتب باسم جنط السفينة فأنا غير مسؤول عنه إطلاقاً

وذي عينه من بعض الأشكال الي أجبرتني أنزل التنبيه ذا






لا ومن الذهانة ماغير اسم خوينا ( موسعن صدره) يعني سارقن الموضوع والنك بس أنبه ضميره لايزور كل الموضوع



ذا حرامي بس بقووووة ، رادن على واحد ناقلن موضوع لي وقاعد يقول له لا تنقل مواضيعي ترى الحقوق محفوظة

*****
الموضوع الثاني :
تأملات فلسفية جنطية :


-1-
(حرف الشين أشين حرف )


بالله مافيه أحد منكم لاحظ إن حرف الشين حرف غثيث وأغلب الاشياء الشينة فيها حرف الشين مثل :
شين
شيفة (شين)
كشبارة (شينة)
شيشة
حشيش
جورج بوش
شارون
شيمون بيرز
شخاط
شباصة << قد وطى وحدة وأعدمت رجله
ورقة بلوت
شاكوش
شبشب (الله يكرمكم )
شمس << بالقايلة
شتيمة
شر
شيطان
شرحبيل << الي مع السنافر
مشاغب
شبح (جني)
شيب
حش (غيبة)
شد عضلي
شق
شك
فشق
رشاش
شلل
شيريخان << الي محجر لماوكلي
شبهه
أشهب ، شهبا
وقد يتساءل البعض << ما أنت بعاقل يا فهد السنيدي
عن سر وجود اسم الأخ (ورقة بلوت) بين الأشياء الشينة الي فيها حرف الشين ، وأنا أقول لهالبعض إن المسألة بسيطة لأن أي اسم ينقسم الى قسمين :
1- بنية سطحية
2- بنية عميقة
والبنية السطحية لاسم الأخ ورقة بلوت هي الكلمتين ( ورقة و بلوت ) أما البنية العميقة فهي ( ورقة تدل على الشجر ) و (بلوت تدل على دشير يلعبون بلوت في استراحة) ولاحظ أخي العزيز أن كلمة شجر وكلمة دشير تحتوي على حرف الشين وهذا هو الرابط الي خلانا نعد ورقة بلوت من الأشياء الشينة الي بحرف الشين .
البنية السطحية : ورقة بلوت
البنية العميقة : ورقة >> شجر
بلوت >> دشير
والقاعدة الفلسفية تقول :
سقراط إنسان >> وكل إنسان يموت >> إذن سقراط يبي يفطس
وإذا طبقنا هذا القاعدة على اسم الاخ ورقة بلوت تصير تسذا :
ورقة بلوت إنسان >> كل شجرة لها ورق >> إذن ورقة بلوت شين

-2-
( طريقة مبتكرة للسفر بالطيارة )


عادي جداً إنك تركب مع واحد توه متعلم السواقة بعدين يشطف بكم سيارة واقفة عاد أنت تلتفت عليه وأنت تتصبب عرق وتقول له : انتبه تراك بغيت تصدم السيارة الي واقفة ، يجي هو يلتفت عليك ووجهه معرق ويبلع ريقه بس يسوي نفسه ماهوب مهتم ويقول لك : شايفها بس أنا بختبركم
وبعد عادي جدا إنك تركب سفينة وبعدين يصدمكم الموج لين تجي السفينة بتقلب من قو الموج ، وعادي جدا إنك تركب قطار بعدين يشطف بعير والا شلة غنم

بس الي ماهوب عادي أبد إنك تكون بالطيارة وعلى ارتفاع 32000 قدم بعدين تهتز الطيارة بقوة وتسمع صوت احتكاك برى وتجي تنادي المضيف وتسأله عن الموضوع عاد يجي هو ويقول : لامافيه شي بس شطفنا شجرة
أنت في هالحالة بتنلحس و ما أنت بلاقي تفسير للموضوع الا احتمال من هالاحتمالات :
1- الطيار يستهبل ويشطّف الارض
2- صدق فيه شجرة نابته بالهواء
3- المضيف يتسذب
وفي كل الحالات أنت بتشعر بإحساس غريب يعني كأنك شاربن عصير الربيع حار مع مارس حار ، عموما موب ذا موضوعنا .
الموضوع ومافيه إنه خطر على بالي إننا نقدر نسافر الى الجهه الثانية من الكورة الأرضية وحنا ماتجاوزنا 100 كيلو متر طبعا تبي تنطون وتقولون لي كيف ؟ وبنط أن هالحين وأعلمكم كيف
المسألة بسيطة مثلا نبغى نسافر للصين ، نجي نجيب طيارة ونركب فيها ركاب بعدين نخليها تطير فوق الرياض الى أقصى ارتفاع لين تتجاوز الغلاف الجوي وتقعد تدور في دائرة قطرها 100 كيلو وبعد اثنعش ساعة نخليها تنزل اذا نزلت بتكون الأرض دارت نصف دورة وبكذا بتصير الصين هي الموقع الي تهبط فيه الطيارة
بس لازم نربط الركاب بالكراسي عشان مافيه جاذبية

*****
الموضوع الثالث :
حوادث تفحيط (فيديو)

بالله ياشباب الى متى على ذا الحال يعني بالله ما تتعظون بالي كل يوم ميتين بحوادث التفحيط ، أنا بس ودي أدري وش تنتظرون يعني تنتظرون الدور يجي عليكم

بالله أبغاك تتأمل ذا الصورة وقلي منهو الخسران



تدري من الخسران ؟!!!

1- أبوك الي تعب عليك يبيك تبيض وجهه ويبي يرزك في المجالس ويقول ذا ولدي فلان وكان ينتظرك تكبر عشان يشد فيك الظهر لكن ياخيبة ظنه.
2- أمك الي تعبت عليك وتنتظر نفعك ولا يحتاج أعلمك بشعور الأم وآخر شي تجي وتفجعها هالفجيعة وياليتك ميت على خير كان لها عزى بس مع الأسف ميت على خيبة
3- أنت ايه أنت ، خسرت ولا خسرت أي شي أنت خسرت كل شي خسرت الدنيا والآخرة يعني بالله وش تتوقع وأنت منتهي على تفحيط ومخدرات وشذوذ وعقوق وسرقة حلال الناس وازعاج المسلمين وقل صلاة هذا إذا أنت تصلي يالزلابة << عصب الجنط

بالله الى متى والناس يضحكون عليك يقولون لك أحلى يالطارة وياملك الطارات ومن ذا الكلام الغبي وانت تدربي راسك وتبدا تميلح قدامهم يعني بالله ماتدري وش بيسوون ذولي الي ينفخون فيك وأنت تصدق ، اذا جبت العيد يبي يبدون ذولي الي يمترون الشوارع وراك يتراسلون ويعلمون بعض وكل رساليلهم يتشمتون فيك ويقولون الزلابة فلان قبع في الفروسية والا الغروب وبعدين يروحون لبيوتهم ويتغدون وينامون وأنت تحت الأرض والا في السجن

والله انك خسران وخسارتك 100% ومضيع حياتك على خيبة الرجا ، شف أخوياك وش صاروا وأنت للحين داج وتدربي راسك في الشوارع ، وهالحين أبغاك تسأل نفسك ذا السؤال :

إلى متى وأنا زلابة ؟

لتحميل المقاطع :

المقطع الأول
ارعص بذا (6.3 م ب)

المقطع الثاني
ارعص بذا (3.5 م ب)

المقطع الثالث
ارعص بذا (315 ك ب)

********
الموضوع الرابع :
نظرية جنطيوتن

إن ادامة النظر الإرتكازي الى هذا الكون العجيب وتشغيل المخ المصدي بعد جلي الغبار وترسبات الأتربة عنه قد تنتج لنا نظرية عظيمة مثل نظرية محاتسيكم الي أخذت عليها جائزة نوبل وشهادة الدكتوراه من جامعة الملك ديفد بيكهام في ولاية باريس عاصمة أمريكا.

عاد أنا من يوم إني صغير وأنا عبقري تصدقون عاد يوم كنت بخامس ابتدائي كان فيه شي أبيض ينقط مع إذني جاء أبوي وداني لأقرب ورشة يوم فحصوني طلع المخ عندي كثير ومن كثره بدا ينقط جاء اليماني حق الورشة ركب لي جلب وشد أذاني و لاعاد نقط شي بس للحين أسمع صوت تنسيم اذا أسرعت بالمشي يعني اذا حطيتها برابع ، وكان فيه شايب بحارتنا اسمه أبوهزاع دايم يقول أنت لك مستقبل باهر بس ما أدري ليه كان يتوقع إني أصير رئيس عصابة اذا كبرت << أقول خش بالموضوع أنت ووجهك ولا يكثر

صدق والله ياجماعة الخير أنا اكتشفت إن المدرسين حقين الجغرافيا يضحكون علينا كل هالسنين ، لأني بعد ادامة النظر في خريطة العالم اكتشفت ان علماء الجغرافيا مابروسهم ولا عندهم سالفة وان منهج الجغرافيا في كل العالم خطأ ، تبي تقولون لي كيف ؟
خلوني أشرح لكم :
هالحين ماهم دايم يقولون إن اليابان في شرق الكورة الأرضية وكندا في غرب الكورة الأرضية ، انقز أنت هالحين لاقرب كتاب جغرافيا وافتحه واذا لقيت مكتوب : ( تقع اليابان في شرق الكورة الأرضية) اكتب تحتها (تسذبون)
المسألة بسيطة هالحين اذا رحنا لليابان وتعديناها وش بيطلع لنا ؟
بيطلع لنا كندا وأمريكا .
طيب وشلون تقولون لنا إن كندا وأمريكا بالغرب ؟
ونفس الكلام اذا عكسنا ورحنا لكندا وتعديناها بيطلع لنا اليابان
حتى الشمال الجنوب كذا يعني مثلا لو ركبنا طيارة وطرنا باتجاه الشمال بيجينا القطب الشمالي اذا تعدينا القطب الشمالي ولا وقعنا فيه بيجينا القطب الجنوبي بعدين يجينا اليمن وبعدها السعودية يعني اذا بتروح لليمن اطلع اقطوع مع القطب الشمالي بس مالها داعي تغرز بالقطب الشمالي بعدين يهجم عليك دب قطبي أبيض له ثمان شهور ماذاق العيشة بعدين يفترسك وياكل أمعاءك الدقيقة << يعني بالله هو بيوفر شي

وهالحين سويت إعادة تسمية الاتجاهات الاربع وسميتها ( الشمال الجنوبي ، والجنوب الشمالي ، والشرق الغربي ، والغرب الشرقي ) يعني اليابان تقع في الشرق الغربي وكندا في الغرب الشرقي واليمن في الجنوب الشمالي و أوربا في الشمالي الجنوبي .








وقد حصلت ولله الحمد على شهادة الدكتوراه بعد هالاكتشاف وسميت النظرية (نظرية التجاهات المتوازية) , وعشان ماتقولون لي تسذب زي العادة هذي شهادة الدكتوراه من جامعة الملك ديفد بيكهام الى في باريس عاصمة أمريكا







********

الموضوع الخامس :

ساندرا رودريغز و جنط السفينة . . . . الخيانة التي قتلت الحب (قصة من الأدب المكسكي)



قصتي غرامي معتس فلم كرتون ........... تجي النهايه ما عرفت البدايه


الفصل الاول

في الساعة الحادية طعش صباحاً طلعت من مدرسة سعد بن أبي وقاص رضي الله عنه المتوسطة في حي منفوحة
وأنا محبط وقافلة معي والاخلاق زفت مادريت الا يوم وقف بجنبي صديق العمر (علي أبو رجل مسلوخة المشهور بأبوحنش)
قال : السلام عليكم
قلت : اخلص وش تبي
قال : ياخي رد السلام ، وش فيك عسى ماشر وش فيها الاخلاق ؟
قلت : وعليكم السلام ، بعد وش فيني بعد ، جايب العيد بكل المواد
قال : طيب وش الجديد كل سنة تجيب العيد والا على بالك يالشين تبي تنجح
قلت : يا أبوحنش أنا أخاف يضيع مستقبلي
قال : يا ابن الحلال انا قايل لك أنت مضيع نفسك بالدراسة أنت مستقبلك باهر بس لو تسمع الكلام
قلت : لا تقول لي ادخل مع شلل النظيم ترى مانيب رايق لهالموضوع
قال : لا يا ابن الحلال أنت المفروض تقدم على بعثة لكولومبيا والا الاكوادور أنت قدراتك أكبر من النظيم
قلت : طيب ذي له مستقبل
قال : أكيد والا وش برايك
قلت : طيب وشلون أروح << ماتعوق معه الشين
قال : سهلة أنا أكلم لك واحد من العيال هناك يضبط وضعك
مر أسبوع مادريت الا يوم جاب لي أبوحنش التذاكر وقال يالله ترى رحلتك بكرا , رحت لكولومبيا ودرست في جامعة الزحف المفتوحه واكيد صارت لي علاقات هناك مع ناس اشكال وانواع لكن ومن اقوى العلاقات الي صارت لي هناك مع ثلاث اشخاص الاول معالي الدكتور سيزار كارلوس استاذي وقدوتي وصديقي والي يفزع معي دايم والثاني ساندرا رودريغز حبيبة القلب رمز التضحية والصمود والوفاء والوقوف في وجه الاعداء والثالث هو خوان كامبوس ملعون ابو الرقبه ابن الحرام مفرق الخلان والمنافس الدائم على قلب ساندرا
عاد يومني هناك ادرس كنت اتردد على مزرعة الدكتور سيزار الي في راس الجبل الي يصنعون فيها الكوكائين وكنت اذا جيته يرحب ويهلي بي المهم وكنت دايم اشوف عنده بنت عمرها ( 64 سنه) زي القمر كنت اذا دخلت تناظرني همن اذا ناظرته صدت ايقاله ما تناظرني وانا بعد مثله المهم مع الايام بديت أحس ان البنت تحبني ... ايه نعم تحبني عرفت انه تحبن من عيونه ما سمعتوا الشاعر الجاهلي امرؤ القيس بن شداد يقول :
من عيوني خذ مراسيل الغرام . . . . . تسان تفهم في لغة حب العيون

في يوم من الايام كنت رايحن اشتري شوي اغراض من السوق الا والله واقابلها بالصدفه هناك وتسلم علي و تلزم الا تعزمني على كاس كوبتشينو في مقهى وقت القهوه ! ! ! الي بجنب دكتور كيف الي بشارع الملك عبدالله حقهم ... انا ماصدقت خبر وبدت العلاقه من ذاك اليوم وبعده باسبوع واصارحه اني احبه قالت انا بعد رايحتن خرخر معك
المهم انتشر الخبر بسرعه انتشار النار بالهشيم ( رجاء لا احد يسألني وش معناها ) وكل أهل بوغوتا (عاصمة كولومبيا ) يدرون عن الموضوع واثر فيه واحد رئيس عصابه اسمه خوان كامبيوس حاطن عينه على ساندرا ... ابن الكلب مادريت الا مرسل لي ثلاثة ويكسرون باب شقتي ويدخلون علي ويهددوني وقالوا لولا انك من طلاب الدكتور سيزار تسان أغديناك من صيد أمس

قلت : يا جماعة الخير وش السالفة
قالوا : السالفة وما فيها البنت ساندرا لا تهوب نحيتها
قلت : ليه طيب
قالوا : عشان السيد خوان كامبيوس حاطن عينه عليها
قلت : يصير خير



أحد أعضاء شلة خوان كامبوس أثناء مداهمة شقتي

رحت للبنت وقلت له الموضوع قالت انا أفديك بروحي ( والله إني عجزن أكمل وش قالت لكن اذا كنت قد غازلت بنت فالي قالت لك البنت ترى ساندرا قالته لي واذا ما عمرك غازلت طق راسك بالجدار فاضي لك انا أكسر أصابعي من الضغط على الكيبورد عشانك أنت ووجهك<< يا اخوي لوك قايلن وش قالت والله انه اهون من هالحتسي

ومن بكرا رحت للدكتور سيزار وعلمته السالفه لكن تفاجئت يوم قال لي لا تحرش بهالشخص تراه أقشر ما يعرف اللف الدوران وأنصحك أول ماتاخذ شهادتك تروح لديرتك على طول ترى ماهوب مخليك ذا المجرم
وكنا مقبلين على الاختبارات قطعت العلاقة معها وبعد الاختبارات حجزت للرياض وواعدت البنت وعلمته الموضوع وقلت امشي معي بس هي عيّت وقعدت تصيح وتقول تكفى اقعد واهج معك للمكسيك والا لتشيلي
قلت : ما اقدر لكن راجع لتس عن قريب
قالت : وانا ابنتظرك والله لو تقعد عشرين سنه انا انتظرك

وقبل اقلاع الطيار ودعنا بعض وضميتها على صدري وقعدنا نصيح ولا فكنا الا صوت الميكروفون يقول على ركاب الرحلة رقم6473894 التوجه للبوابه رقم سبع وثلاثين ترى نبي نصك باب الطياره همن بل تذكرتك واشرب ميتها
ركبت الطيارة وانا اردد قول الشاعر :
يا سندرا القلب ولع نار .......... والعين زادت مدامعها
ضاعت حياتي من الاشرار ...... والناس بانت مطامعها
ياهيه كامبوس طلع غدار ......... يبغى يفرق مجامعها

طارت الطيارة ووصلنا الرياض وكتمت الموضوع ولا علمت به احد حتى صديق العمر علي ابو رجل مسلوخة

ومرت الايام ودارت الايام ونسيت ساندرا ورجعت حياتي مثل أول رجه وزحف ووناسة.

الفصل الثاني


في يوم من أيام الشتا اتصل علي الاخ علي ابو رجل مسلوخه


طـــــــــــــــــــــــــــوط طــــــــــــــــــــــــــوط
طـــــــــــــــــــــــــــوط << مسوي ثقل مايرد على طول
ولا رديت الا بعد الدقة الثالثة
قال : السلام عليكم
قلت : وعليكم السلام
قال : قل قدام
قلت : قدام وش عندك
قال : نروح الثمامه ونشب لنا ضو ونتقهوى ونتشهوى(يعني نشرب شاهي) ومتى ما ملينا رجعنا
قلت : يا اخوي تشوف الوقت هالحين آخر العصر وانا مواصل لي ثلاث ايام مانمت
قال: يارجال انا لي خمس ايام مانمت
قلت : خلاص مر

طوط . . . . . طوط. . . . .

بعد ربع ساعة الا الكامري عند الباب واركب معه ونمشي ومع دوار العويضه يسار لما وصلنا لنا مكانن زين براس طعس ونشب الضو ونبدا نتقهوى ... عاد الوقت وقت غروب وانا قاعدن اتأمل الغروب مادريت الا يوم شغل علي مسجل الكامري الا فيه اغنية عبد الحليم حافظ الي تقول :
البارحه في منامي شفت خلي . . . . . . وفزيت تسني قريصن عضه الداب

يوم شغله طرت علي ساندرا على طول ويضيق صدري وماش كأنه بان على وجهي اني تغيرت بس ماطرى على بال أبوحنش اني أحب ... المهم قال شكله مايبي ذا الاغنية ويقوم ويطلع الشريط ويدخل شريط ام كلثوم الي فيه اغنيته المشهوره :
هل دمعي فوق خدي وانهمل . . . . . . واعذاب القلب من فرقا الحبيب

يوم شغله وأنهار وأقعد أصيح ويبلش بي علي... وراك يا ابن الحلال ؟ وشبك ؟ وانا أصيح ولا أرد عليه المهم بعد المحاولات علمته وش السالفه ويوم علمته
قال : افا عليك بس يا جنط والله لوه أكبر راس نغسل شراعه لك يا صديقي <<مسكين علي يحسبه بالنسيم
قلت : مانقدر له والا تسان انا تفاهمت معه يومي هناك



ملعون أبو الرقبة خوان كامبوس

قال : انت وش عندك بكره
قلت: ماعندي شي
قال: أجل جهز عفشك
قلت : وش عندك
قال : نبي نروح لكولومبيا ونخطف البنت ونرجع
قلت: والله فكره بس منين لنا الفلوس
قال : والله انك صادز منين لنا فلوس
قعدنا نفكر منين نجيب الفلوس وحنا نفكر طرت علي فكرة
قلت: ليه مانبيع الثلاث طعش كيلو حشيش الي عندك ونسافر بهن
قال: الصراحه انا بايعهن
قلت : طيب وين الفلوس
قال : راحن باللعبه <<<<<< الحمار ابو حنش طايحن بالقمار هاليومين يلعب هو وشلة عرابجة في استراحه بالنظيم انا ما انقهرت انه راحت الفلوس انا الي قهرني انهم يلعبون اقمار ب ( الاونو واحد كرت )
قال: مافيه حل الا انك تبيع الكراسيدا الاكسل ( XL ) حقتك
قلت : الا ذي
قال : مافيه غيرها
قلت : صعبة والله ماتبي ندق على (يابعدهم) يمكن معه شي يسلفنا
قال : والله (يابعدهم) مايقصر لكنه طفران هاليومين حتى يقولون العيال انه يتسلف حق الدخان من البنقالي حق البقالة
وقعدت افكر همن قطع علي تفكيري
وقال : ترى الحب يبي تضحيه
قلت : شورك وهداية الله
مشينا ومن بكرا نروح معارض النسيم ونبيع الاكسل باربع طعش الف ونقص التذاكر ... وبعد كم يوم جا الموعد ونروح المطار ونركب الطياره وبعد ربع ساعة من الاقلاع بغى الطيار يوقف بالهوى ويفتح الباب ويجدع ابوحنش لانه تحرش بالمضيفه هالمشفوح ما عمره شاف عيشه

وصلنا هناك وقلت ما حنا معلمين أحد إننا جايين اخاف يدري خوان كامبوس همن من يفكنا منه ... استعرنا جمس برازيلي من واحد أعرفه وأول يوم نمنا بالبر وثاني يوم نزلنا للديرة على الجمس ورحت للمكان الي بالعادة تروح له ساندرا ... دايم حول مقهى (وقت القهوة) المهم يوم وصلنا ونوقف على جال الخط ننتظرها وقبل أذان المغرب بشوي الا هذي ساندرا جايه لكن

وش اشوف

أصدق عيوني والا اكذبها

لا ماهوب معقول

معقول هذي ساندرا

معقول هذي حبيبة القلب

معقول هذي الي ضحيت عشانها

معقول هذي الي خاطرت بروحي عشانها

معقول هذي الي جينا من الرياض عشانها

معقول هذي الي بعت الاكسل عشانها

معقول

معقول

معقول ساندرا تمشي مع رجال غيري

معقول ساندرا تحب غيري

وقفت مصدوم ومحتار ودمعتي على خدي ، بس ماصدقت قلت لازم نتأكد وأجي أرسل علي أبورجل مسلوخة للمقهى ... دخل علي وسولف شوي مع المحاسب وسأله عن ساندرا قال المحاسب ايه والله هذي ساندرا الرودريغز وتحب هالرجال جاء علي وعلمني السالفة انصدمت وقعدت اصيح ... المهم

قال: ابو حنش افا عليك جنط تهل دموعك عشان وحده خوانه
قلت : ياابوحنش الحب يعمي الواحد
قال : اذا انت ملزم نقوم نخطفها هالحين

وافقت وقلت العوض ولا القطيعه انتظرنا لين طلعت من المقهى وراحت لبيتهم يوم دخلت في شارع مظلم ونحدها بالجمس وأنزل أنا وأركبها بالقوة ... خطفناها وهي يوم شافتني اعتذرت وقالت لا يهمك يالجنط ترى القلب معك وانا ابروح معكم برضاي وأجي وأحطها على الباب الايمن واركب بجنبها وابو حنش يسوق المهم ونهج من العاصمه وحنا بالطريق وقفنا عند محطه وكان فيه عرابجى موجودين بالمحطة يناظرونا
نزلت ساندرا الطخمه ودخلت الحمام (الله يكرمكم) ويوم قعدنا شوي الا ونسمع صراخ الا فيه واحد من العرابجى جاء من ورى ودخل عليها يحاول يفتح باب الحمام ونقوم حنا نفزع وندخل عليه ونغسل شراعه ويجون العرابجى ونتهاوش معهم وتطب علينا الحكومه وعلى طول يسحبونا للقسم وأجي أنا أرفع قضيه عليهم بتهمة التحرش الجنسي
اتصلنا بمحامي ويوم جاء المحامي وشاف وجه ساندرا قال ياجماعة الخير ما أنصحكم تخلونها تحرش جنسي لأن القاضي ماهوب مصدق ترى وجهساندرا مايساعد وبتخسرون القضيه
قلت : وش السواة
قال : خلوها محاولة سرقة محفظة نقود << ايقال القصة مترجمة
بعدين قعدنا نتشاور وقلنا مالها داعي نضيع وقت ... وقررنا إننا نتنازل عن القضيه ومشينا ومسكنا الخط متجهين للعاصمة مرة ثانية ... وبنص الخط وقف ابوحنش على جنب
وقال : انزل ابيك بسالفة
نزلت وقلت: وش فيك
قال : انت صاحي تحب وحده خانتك وشفتها بعينك تمشي مع غيرك
قلت : وش تقصد
قال: مثل ما اغدرت بك اغدربها وخل نخليها بهالمقطعه غديها تموت << والله يا هو نذل
قلت : هذا الراي ؟
قال : هذا الراي
جيت أنا وقلت لها انزلي لأتوطى في بطنك
وانزلها بالمقطعه واتفل عليها وهي تقول خلاص خل نفتح صفحه جديدة قلت اندزلعي وهمن رجعنا للعاصمه وتعشينا عند الدكتور سيزار وهمن رجعنا الجمس لراعيه ومن باتسر رجعنا للرياض ونروح لبيت الي شرى الكراسيداونسرقها ونشق الشعيب وترجع لي سيارتي وانسى الحب وهالحين كل يوم اشغل :

خلاص من حبكم يا زين عزلنا . . . . . . ما عاد لي في هواكم شف او راده

خلاص انتهينا
ودمتم بأحلى ابتسامة

أحسن واحد بالعالم
د. جنط السفينة