السلام عليكم ورحمه الله

قصتي تاريخيه هههههههه كثري منها
بس تراها طويله شوي يعني اللي وراه شغل يروح لشغله ويقراها بعدين

بقص عليكم سالفه عمتي >>>الله يطووول بعمرها كما روتها لي
عمتى يوم هي صغنووونه كانت بمزرعه تعرفون القديمين
هي عمرها فوق الستين الله يطول بعمرها على عمل صالح
ويخليها لي ولا يحرمني منها قولوا امين
عمتي بسميها فوفو

فوفو هي البنت الوحيده لجدي كل اللي عندها اولاد فكانت
جدتي يرحمها الله تتكل عليها بشغل البيت منذ نعومه اظافرها
حيث تقوم من بعد صلاه الفجر وطواااالي وتذهب الى
الفلاحتي>>>بلا تفلسف الحين نمسك الخط اصبروا
هذا البروقرم حق يومها

تصلي الفجر كانت صغيره عمرها هي تقول الله اعلم يا ثمان
او تسع خلونا نقول عشر لانها يمكن مغبيه كم سنه
نكمل بليز هدوووء

تصلي وتشب النار وتطبخ القهوه وتبعدها شوي عن النار تحطها على نار خفيفه
علشان تطبخ القهوه زين ولا تطيش
وبالفتره ذي تروح للمزرعه تروح لحوش البقره اكرمكم الله
تطل على ماكينه اللبن >>قصدي البقره وتعطيها فطورها
قصدي العلف (البرسيم- الزت)) بها الوقت ذا جدتي تقوم باعداد
القهوه وتبهيرها وعمل الشاهي وهايدي >>قصدي عمتي فوفو

تا خذ سطل اللبن وتحلب من هالبقره وخذ يا حلب واذا بقي
شوي حليب بالبقره تروح تطلع العجله >>بنت البقره
وتخليها ترضع من امها بعدين تاخذ الحليب وتروح للبيت بعد ما
تسكر على البقره والعجله باب المزرعه وتروح تخض الحليب
وتطلع الزبد وحاله >>ما طاحوا بزبدة لورباك >>خخخخخخ
بالفتره ذي جدي وجدتي وابوي وعمومتي يفطرون علشان
وراهم الفلاحه والرواسه >>سقيا الزرع واللزي منه

واذا خلصوا تجي عمتي فوفو وتاكل فطورها >>لانه عيب
البزارين يجلسون مع الكبارين >> ابوي اصغر منها بس يفطر
معهم بحتج على جدي عنده تمييز عنصري >>الله يرحمه
الاولين ما يبون البنات جفسيين >>على قوله فوفو ماهو
مثل الحين جفسيين لغير الناطقين بالصيني تعني خشونه
وصلابه في المشاعر والعواطف
افطرت عمتي وسبعت المعاميل >>برضه لغير الناطقيين
>>تغسيل ادوات القهوه من دلال وفناجيل

تجيب مكنسه الخوص هذي مكنستهم منول وكنس بالحوش
واذا خلصت راحت للليوان وتكنسه والليوان قسم الرجال
واذا خلصت من الكنس تروح للفلاحه وتجمع ما طاح من
غصون الشجر او سعف النخل اوعسبان >>توابع النخله
يا عمري يا فو فو ولا هايدي زمانها
وتجمع ما اقسمه الله لها ذاك اليوم >>هذي بليستيشن
حقها جمع الحطب
وتوديه للمطبخ عند جدتي

بعدين تروح للمزرعه وتروح لبقاله المراعي >>قصدي البقره
وتاخذ العجله وتدخلها بحجرتها علشان ما تبتل ترضع من امها
والبقره الام بحوش لحالها تحت العريش
فوفو تحب العجله ذي بالمره >>>باربي حقتها طفوله زمان يا عمري هي

تلعب معها وتسولف عليها لحد ما يجي وقت الغداء والله من
زين اللعب والريحه بعد هههههههه ودكم تسمعن عمتي
كخخخخخخ

تغدت عمتي و طوالي ذاك اليوم راحت لباربي >>قصدي العجله
فرحه فتحت باب الحجره اللي فيها العجله ورحمتها >>
حنونه فوفو قالت وراء ما اروح اتمشى فيها بالفلاحه توسع صدرها

واروح العب معها طلعت وسكرت باب حجره البقره واخذت
باربي معها للفلاحه العجله تمشي قدام عمتي وعمتي
طايره من السعاده رفيتستها مستانسه وهي بعد

مرت عمتي من عند حوض الزت ((البرسيم)) اكلت العجله
منه وابعدتها عمتي عنه بس العجله نشيطه انشط من عمتي
طلعن من حوض الزت ومرن من عند القليب خافت عمتي
على باربي لا تطيح بالقليب واخذت عاسيب النخله وضربت العجله فيه
العجله بعد ما ضربت حست ان كرامتها انهانت وين تضرب

عمتي تقول انها بدت ترقص وتنابط واخذت تركض عمتي
خافت على صديقتها وامسكت بذيل العجله

باربي بعد ما مسكتها فوفو انطلقت ولا جيب مرهم ما
يشاف ولا غبارها انطلقت بسرعه ميتين كيلوا
وعمتي متجوده فيها خبركم مزارع منول مالها جدران
جدرانها اثل متراصات بجنب بعض

هجت باربي >>اللي هي العجله وراحت بعمتي للاثل
ودخلت فيها وتمر ما بينهن وعمتي ماسكه فيها هذا وقت
الظهر والناس مقيلين وانطلقي فيها لمزرعه جيرانهم وتمر
من وسط الزت حقهم وتمر من عند عريش نيم فيه ابوهم
وتمشي من جنبه الف
وقام على حيله منهبل هو يحلم ولا اللي يشوفه حقيقي عجز
يستوعب المشهد

عمتي من بعد ما دخلت فيها العجله بالاثل
انتفشت شوشتها وجميع غصن بالاثل مر على شعرها
ومشطه لها
اذن العصر والعجله ما تعبت ابد
وعمتي متمسكه فيها خايفه على راس المال
العجله ما قصرت فرجت عمتي القريه كلها بيت بيت وحايط
حايط وراحت بها للقري اللي بجنبهم

جت لم المسجد حق القريه منول مافيه بيبان للمسجد
عاريش وعمدان ومحراب بس مو مثل الحين
صفوا الجماعه واول ما ركعوا دخلت عليهم العجله وعمتي و
وززززززززز من عندهم ما بين الامام والجماعه الامام راكع
مادرى عن السالفه بس الجماعه اللي قطع صلاته واللي
فغصته العجله واللي فز من شكل عمتي حاله
تلخبطت الجماعه حسبي الله عليتس ياباربي

طلعت العجله من المسجد وطوالي على خو الاثل وادخلى
مره ثانيه وجميع ما براس عمتي من شعر لصق على
اغصان الشجر رجلين عمتي ورمت واظفور رجلينها تقلعت
من الحصى والجذوع

صارت على هالحال وقت طويل عمتي فوفو تقول انتصف
العصر وهي تركض تقول انا مادري وين مكاني ولا كان اطلق
ذيلها بس ما ادل البيت تقول واتمسك قوووه وتمر من عند
القلبان ((جمع البير)) المكشوفه فوفو شافت المشهد
غمضت وتمسكت اكثر والعجله اسرعت من شده المسك
وتنطلق وتدخل حوش بيت فيه حرمه معها طاسه مليانه حنا
وبنتها قدامها تبي تمشط شعرها

دخلت العجله بينهم وطارت الطاسه والبنت وامها انهبلوا من
اللي شافوه عجله وجني ماسكها من ورى كله دمان وثيابه
متشققه وخذ صراخ منهن وهبال
زادت العجله من قووه انطلاقها ما توقفت ابد عمتي تقول
بلاها من الحشيمه اللي انا حاشمتها كل شوي اوكلها احسن الزت

غابت الشمس وهن على هالحاله صلوا الناس وراحوا
لبيوتهم وهايدي وباربي الى الحين قصدي عمتي والعجله
ظلمت الدنيا عليهم وخافت عمتي وتسمع اصوات كلاب او
ذيابه شافت العجله نور سراج وانطلقت لمه ولاهم ناس
قاعدين بالحوش يبي ياكلون مطازيزهم يحترون يبرد شوي
وززززززززززز ولا العجله مكان صحنهم الرجل نبط ومرته هجت
والعيال الله اعلم بحالهم وعمتي تصارخ ويحسبونها جني
ههههههههه

وبعد عناء وتعب وشقى >>>فحمت عمتي وهي تقص قصتها اصبروا اروح
اجيب لها ماء

فو فو كملي وش صار
تقول هايدي قصدي فوفو انها ما تحس لا برجلينها ولا بيدينها
وكل جسمها بدت ما تحس فيه على قولتهم خارت قواها
العجله ورم ذيلها وتقطع الجلد منه وتزلط ((تسلخ )) هجدت
العجله >>>شكله فضى بنزينها وقفت بالظلماء واصوات
الكلاب تزيد خافت فوفو

وشوي وتسمع ذاك الصوت اللي يوسع الصدر فوفو يوم
سمعت الصوت فرحت مرررره ليش لانه صوت ابو دحييم
المذن اللي بالمسجد اللي بجنب بيتهم يذن لصلاة الاخير

مسكت فوفو باربي مع اذنها وشدتها >>يقالها حمقه عليها
وتتبع الصوت منين جاي وشوي شوي ويبين نوور من بعيد ولا
هذا بيتهم دارت دارت وارجعت لبيتهم هههههههه

امسكت العجله ودخلتها حجرتها >>>نصوح يا حول
راحت لم جدتي ولا والله ما جابو خبرها ما دروا عنها وعن المعاناه اللي صارت
متعشين وشبعانين >>لان العشاء على طول بعد صلاة المغرب

دخلت على جدتي شافتها جدتي انهبلت وش اللي صاير
علمت امها السالفه
تدرون ايش صار

جدتي
7
7
7
7
7

ضربتها لانها طلعت العجله و جرحت ذيلها عمتي جلست

تكد شعرها اسبوع يالله يالله طلع اللي به من الاغصان
والورق والشوك
رجلينها جلست كم يوم ماتقدر تمشي وبس يحطون عليهن
حنا وملح علشان الورم اللي بهن
العجله جلست كم اسبوع وذيلها واااااارم عمتي بعد ما
اشوت وتعافت عاودت نشاطها من جديد ونفس البروقرم
حق كل يوم
بس تابت ما عاد تطلع العجله من حجره البقره

ارجو ان قصه عمتي فوفو اعجبتكم وادعوا لها بطوله العمر
نسيت اقوول لكم ان واحد من العيال اللي طار عشاهم
المطازيز انتقم من عمتي وتزوجها بعد قصه غرام بدت من
حرمانهم من عشاهم ذاك اليوم الى ان توفاه الله

الله يرحم موتانا ان شاء الله ويخلي لنا احبابنا ومن نعز منهم
يارب ويحللنا منهم