شبكة أبو نواف

الرئيسية › رسائل المجموعة › رسائل 2007 › رسائل 7/2007 » إخلاء طرف

تنويه : تم ايقاف استقبال المشاركات للمجموعة البريدية فقط ، وسوف يتم ايقاف ارسال الرسائل من المجموعة بتاريخ 24-09- 2008 حيث ستتوقف المجموعة فقط لمدة اسبوعين على ان تعاود استقبال ونشر المشاركات مرة أخرى بتاريخ 11-10-2008 ان شاء الله ، علما بأن الموقع مستمر بتحديث المواد ،وكل عام وانتم بخير.

إخلاء طرف

صلوحكا بتاريخ 18/07/2007 في شهر 7/2007

• المشاهدات: 4042

• الطباعة: 18

• الإرسال: 8

• التعليقات: 28

• مرات التفضيل: 0

بسم الله الرحمن الرحيم
أسعد الله أوقاتكم بكل خير
عودة حميدة للقروب الأغلى في الشبكة .. قروب أبو نواف
وتحية مغلفة بالأوركـيد .. للغالي أبو نواف , ولجميع الاعضاء الغالين

موضوعي اليوم يتكلم عن ( إخلاء الطرف ) في جامعة الملك سعود بالرياض
وبما اني احد الطلاب الخريجين من الجامعة .. كان لابد من انهاء اجراءات إخلاء الطرف من الجامعة ..
في البداية .. وقبل الخوض في معمعة الاجراءات المملـّـة .. اقول :
لو لم يكن في جامعة الملك سعود من السلبيات سوى هذه الاجراءات القاتلة .. لكان كافيا لتبرير حصول الجامعة على مركز متأخر جدا ً في سلم الترتيب لأفضلية الجامعات ...!!

القصة تبدأ من إعلان الجامعة لتاريخ انهاء اجراءات اخلاء الطرف .. فلكل رقم جامعي تاريخ معين ..
اول شي خلوني اتكلم بالعامية .. عشان اطلع الحررررررة مضبوط إخلاء طرف
رحت انا ومجموعة من الشباب للجامعة .. واتفقنا نلتقي في كليتنا " العلوم الادارية " عشان ناخذ نموذج اخلاء الطرف في البداية من الكلية ..
اخذنا النموذج .. عبينا البيانات ,, وفي البداية لازم ترقى فوق لمكتب شؤون الطلاب ..
تخلي الموظف يناظر عيونك الحلوة اللي ببطاقة الجامعة .. ويوقع لك النموذج
رقينا لمكتب شؤون الطلاب ,, وكان الوقت بدري .. الساعه 8 الصبح تقريبا ..

رقينا !!! واثره سرا طويل عريض يصل طوله الى نصف طول خشم واحد من الشباب إخلاء طرف .. سرا مد النظر ...!!! اللي يبي يسجل مواد صيفي .. واللي يبي ياخذ نموذج واللي يبي يتأكد من شعبة .. حوووووسة مالها أول ولا آخر !!
طبعا اجراءات اضافة مواد الترم الصيفي والحذف وتغيير الشعبة ... الخ هذي لحالها قصة ثااانية ,, يعني مو معقووول أبد يكون للجميع سرا واحد !!
المفترض اللي عنده نموذج اخلاء طرف ويبي توقيع من الموظف الظريف .. لهم سرا ,, واللي يبي يضيف مواد ويحذف ويغير .. لهم سرا
مو يجلس لي موظف واحد يمسك سرا .. والثانين عصير ربيع ومسلوق !!

المهم دخل واحد من الشباب للمكتب .. كلم الموظف قاله نبي بس نوقع النموذج ,, حنا عندنا اخلاء طرف .. قال اللي عنده اخلاء طرف يجي هنا ,, لا يمسك سرا ,, نوقع له
طيب دااااامه يجي هنا .. وراااااه ما قلتوا اللي عنده اخلاء طرف لهم سرا خاص ..!!

دخلنا ووقعنا .. وطلعنا , لقيت بعض الشباب اللي عندهم اخلاء طرف ماسكين سرااا .. قلت وش عندك واقف .. رح رح ادخل خله يوقع لك .. النظام عندهم سكااااتي ,, ما يقولون لأحد ان اللي يبي اخلاء طرف يدخل على طول ويوقع ..
طلعنا من الكلية .. ووقع لنا الموظف النموذج ..
بعد الكلية .. جاء دور مكتبة الجامعة ( مكتبة الأمير سلمان )
ونروووح رجلية من الكلية للمكتبة .. مسافة 12 دقيقة تقريبا ( يمديكم على الدقه )
وصلنا المكتبة .. سرا بس اقصر من خشم الرجال ... المهم يوم جاء الدور , ويطقطق بالجهاز عشان يشوف انت لك كتاب سبق استعرته ولا رجعته .!! يتوطون ببطنك .. والا عليك شي والا شي .. حريصين الله يجزاهم خير
ويوقع لنا الورقة .. ونطلع من المكتبة ونروح للبهو " حرم الجامعة "

في البداية رحنا صندوق الطلاب .. مكتب الاعانات والسـلف
موظفين اثنين .. زولة يحبهم قلب قلبك , مادري وراه هالمكتب بالذااات مافيه سعوديين !! من بد كل المكاتب .. هالمكتب سودانيين ؟؟!!

قعد يطقطق على الجهاز .. يشوف انت عليك مبالغ قد اخذتها من الجامعة او تسلفتها .. او شي منا والا مناك , عشان يرجعون حقوقهم .. (( الحين كل شهر ياخذون من كل طالب عشرة ريال .. يقولون لصندوق الطلاب )) ولا شفنااااا شي من هالصندوق !! لا مواقف زي الناس .. ولا مساعدة في تصوير المذكرات .. ولاااااااا شي ابد !! ماغير ايداع بهالحساب .. واذا تجرأت ذاك اليوم ورحت تتسلف منهم ( طبعا ً شف السرقة .. تعطيهم كل شهر عشرة .. وتروح تقول طفران ودي اتسلف .. يقولون لك وقع هنا تعهد انك ترجعها في مدة اقصاها كذا وكذا ) يعني يعطيك قروشك ويقولك رجعهاااااا !!

* يمكن البعض يقول ياخي احمد ربك انك تاخذ مكافأة .. اغلب الدول , الجامعات ماتعطي مكافآت ,, انا مالي علاقة بأغلب الدول .. انا مادام اني آخذ مكافأة فهذا حق من حقوقي .. لابد يصرف في الوقت المستحق .. وكــــــاملا ً ...!!!

المشكلة اذا جيت تاخذ تعريف بالمكافأة .. يكتبون ان هالطالب يستلم مكافأة وقدرها 1000 ريال ,, والا 850 ريال .. المهم لا ياخذنا موضوع هالعشرة ريال , بس اقولكم آخر شي يخص العشرة : اذا الجامعة فيها خمسين ألف طالب , وشهريا ً ياخذون منهم عشرة ريال .. هذي نص مليون تودع في حساب صندوق الطلاب .. ورئصني يا قدع إخلاء طرف

نرجع لموضوعنا .. عقب ماوقع لنا الزول حق السلف والاعانات ... وانه ماعلينا اي مبالغ ..
الحين جاء دور " السكن الجامعي " سألنا : ساكنين بالسكن الجامعي ..؟
قلنا لا .. ويطقطق بالجهاز ,, ويوقع لنا .. اننا ماسكنا في السكن الجامعي

عقب السلف والاعانات والسكن الجامعي
رحنا لإدارة الأمن والسلامة .. والله كنك توصف حارة بالشميسي !! لا لوحات ارشادية ولا شي .. الأسياب أقسم بالله العظيم انك تمشي فيها وتتشهد .. الارضية مادري وش هي بالضبط ,, مهيب حجر ولا اسمنت ولا صبة ولا رخام ولا سيراميك ولا بلاط ..
شكلها اسفنج مقوّى .. !!!!!!!

رحنا للأمن والسلامة .. عطيناه الأوراق .. ماشاف الجهاز ولا ناظر البطاقات ولا شي .. على طول وقع على الورقة ,, يعني انت اللي جيت والا مهوب انت .. مايهمه ,, يوقع وبس
اخذنا الورقة .. ومن ادارة الأمن والسلامة , الى عمادة القبول والتسجيل ( مكتب المكافآت والبطاقات الجامعية )
رحنا وعطيناه الأوراق .. ويطقطق بالجهاز .. ويوقع لك ,, ويسحب بطاقتك الجامعية ... بعدين رحنا لمكتب المكافآت .. ونفس الشي ,, يطقطق ويناظر .. ويوقع لك ..
الآن جاء الدور على تسليم الملفات .. هنا أم الكوارث !!!
الاجراءات السابقة .. رغم انها طويلة .. بس انهيناها بسرعة ,, وكناااا مبسوووطين ان الأمور عدت على خير
نزلنا تحت لمكتب تسليم الملفات .. اللي فيها شهادة الثانوي يوم تجي وتسجل بالجامعة ...
والله ثم والله يا جماعة الخـير .. لو يجي احد للمكان ذاك ,, مستحيل مستحيييييييل يتخيل انه في جامعة !!
جدار اسمنتي .. اسلاك كهربااائية في كل مكان ... فـــوضى مابعدها فــوضي ..

عاااااالم من الطلاب .. تبي تاخذ ملفاتها ... وصلنا لمنطقة الزززحمة
سألنا .. هنا تسليم الملفات , قالوا ايه .. بس الموظفين ماداموا .......!!!!!!!!!!!!!!!!
الساعه كانت 9 وشوي .. الصبح !! ويقولي ماداوموا ؟؟؟
وفي النهاية درينا ان الموظفين المسؤولين عن تسليم الملفات .. رايحين يراقبون في اختبار القدرات ( القياس ) في احدى الكليات ....!!! ومسكرين المكتب ورااااايحين ...!!

مشينا .. نحاول ندور موظف نستفسر منه .. متى يجون الموظفين .. متى نقدر ناخذ الملفات .. وصلنا لأحد المكاتب .. لقينا فيه موظف .. واستبشرنا خير
دخل عليه واحد من الزملاء ... سلام عليكم .. عليكم السلام
اخوي عندي استفسار الله لا يهينك
الموظف : ما أقدر افيدك ..!!!!!!!!!!!!!
اقسم بالله انه رد بالطريقة هذي .. حتى قبل لا يسمع الاستفسار .....!!

تناقلوا بعض الشباب اخبار .. ان الموظفين بيداومون على الساعه 11 ,, طبعا ً جامعة ابوهم .. يداومون متى مايبون ,, كأن الجامعة مافيها اي احد يقدر يراقب في اختبار القياس ...!!
طلعنا من الجامعة .. ورحنا افطرنا .. وودينا واحد من الشباب للمطار كانت عنده رحلة في نفس اليوم ..
رجعنا للجامعة .. سلمنا الأوراق ,, وقالوا تسليم الملفات على الساعه 1 الظهر ..!!
وصلنا عندهم في الوقت المحدد .. وبدأ التسليم العشوووواااائي ..

ينادي الموظف على اسم الطالب .. وهو يجلس في وسطهم .. والاعداد كثيــــفة جدا ً .. ويصرخ الطااالب : حااااااااااااااااااااااضر .. وتتلقف الايادي الملف .. حتى يصل الى يد الطالب المبحوح .. من قوة الصرخة بـ حاااااااااااااااضر
عــادي جدا ً ان يقول اي طالب حاضر .. وحتى لو لم يكن هو صاحب الملف ,, ويستلم ملف غيره .. !!!!
طريقة تسليم الملفات غريبة جدا ً وعشواااائية الى أبعد حــــــد ...!!
ولا يوجد ما يثبت ان الطالب استلم الملف .. فلا يوجد توقيع للطالب او اقرار .. او اي شي ,, فقط كلمة حاااااااضر على بعد امتاااااار عن الموظف ... ثم ينتقل الملف من بين الايادي حتى يصل للطالب ..!!!!!

انتهينا من استلام الملفات .. على الساعه 2 تقريبا ..
وانهينا اجراءات اخلاء الطرف القاااااااتلة ..!!!
كاااااان يوم طــويل .. طوويل جدا ً .... هالمرة اطول من خشم الرجال إخلاء طرف

يستفاد مما سبق :

* الجامعة كخة
* وراه مايصير فيه نظام شبكة بالجامعة ؟ تروح للكلية .. تعبي النموذج .. تعطيه الموظف , يدخل رقمك الجامعي .. ويشوف هل عليك شي في السكن الجامعي او المكتبة او المكافآت او السلف والاعانات .... الخ
يوقع الورقة ويختمها .. وخلصنااااااااا .....!!!

متى نصل الى هذي المرونة في التعامل ؟؟؟
ويقولون حكومة الكترونية .. اقول وهـ بس

.
.
.
صلوحكا


	الموضوع السابق: الإقسام بالله	الموضوع التالي: سينما : افلام يوليو 2007

	مواضيع أخرى للمرسل صلوحكا
	صور ، رمضاننا في بيتنا غير
	قصيدة : حرفي يتمتم
	الركبة السودا .. ليست مجرد عيارة
	اسطوانة الغاز والدب
	قصيدة - لابوها كورة من بعد روحة الذيب

	التعليقات على الموضوع
	العنود زائر 8390 اففففففففففففف منها جامعه \| 18/07/2007 05:58:19 والله انك صادق النفسيه خرى من كل موظف فيها لا دكتور ولا مشرف ولا فراش كنهم شامين ريحة........ اذا حطت وحده منهم عينك بعينها معامله (تفتح النفس)قبل ووقت وبعد الدخول فيها همس المشاعر زائر 8391 مبرووك التخرج \| 18/07/2007 05:59:16 اول شي احب ابارك لك على التخرج وعقبااال ماتتوظف << ايه هين ثاني شي انت بكلامك هذا سببت لي عقده نفسيه خلقه انا عايفه جامعه سعود خصوصا لما نسوي الجداول ونضيف ونحذف عاد هالحين حتى باخلاء الطرف ناوين يمرمطوني يلا عسى ربي يفرجها وانا اختك انا باقي لي هالترم بجرب حظي يمكن يكون الجامعه تطورت خخخخخخخخخ horse زائر 8395 أجل طلعتوا أردى مننا يا التماسيح \| 18/07/2007 06:24:02 أنا برضو خريجة هذي السنة ويوم رحت آخذ وثيقتي ضربتني الشموس من مبنى لمبنى وكنت اتوقع انه عذاب ما بعده عذاب بس الصراحة احس اننا انظم منكم ..أجل يعطونكم ملفاتكم حقت الثانوي بدون اثبات..احنا ما نتنفس ولا نتحرك الا بالبطاقة الجامعية حتى تصدق قبل ثلاث سنوات كنا كلما دخلنا مع باب الجامعة لطلب العلم قالوا ابرزوا البطاقة..(عادي وسع صدرك)..المهم تدري وش أغرب ما في الموضوع ان كل الموظفات اللي مريت عليهم يتبسمون ويوقلون لنا مبروك الله يوفقكم عقبال الوظيفة.. الله هي الشمس طالعة من فين؟! سنا الفضه زائر 8400 تعليـقي على فوضى الجامعـة \| 18/07/2007 06:51:52 أول شي أحب أشكرك أخوي صلوحكا .. وأقول الله يعينـك .. ويمكن أفتكيت بس بشرني متخرج والا فاصل من الجامعـه .. بصراحـة أنا سبقتك في في تمثيل هذا المسلسل .. بس ما كان بهالصعوبـة أبد .. جيـت بوقـت الأجازة الصيفيـة وكان كل شي فاضي .. يمكن الشي اللي تنرفزت منـه هو صندوق الطلاب .. لأن الموظفيـن السودانيين نفس اللي تكلمـت عنهـم تقول كأني متسلف من حسابهـم الخـاص .. شوي وأحب راسـه عشان يوقـع لي .. لكـن الزحمـة ما صادفتني الحمد لله .. وما أقول كلامي هذا أنتقاد لكلامـك .. بالعكس أنا أيقـن بأن هالشي يصير ... كافي فوضى تسليم بطاقات الصراف .. لحـالها هذي مسلسل مدبلج أبو 200 حلقـه .. وأنا أقرا حوارك قلت في بالي ليـه ما يكون فيـه شبكـة موحدة .. تجمع جميـع أقسام وأدارات الجامعـة .. وزي ما تفضلت أنت وقلت بمجرد ادخال الرقم الجامعي للطالب أقدر أعرف الأشياء اللي تفيدني مو شرط كل شي .. وبكذا تكون سهـل بس راح يخسروم موظفيـن .. الشي الثاني هو التسيب اللي لاحظـته في موظفي الجامعـة يعـني قلوا موظفي الجامعـة الفاظين اللي ما عندهم شغـل .. طيب على الأقل يوظفون ناس بمدة مؤقتـه وبكذا نقدر تقول أفادوا العاطلين اللي في بيوتهـم ولا أشغلوا الموظفين عن أشغالهـم .. بصراحـه يوم سويت أخلاء طرف من الجامعـه كان مختلف تماماً .. كل شي كان مرتب .. وحتى يوم استلمت الملف وقعـت على هالشي .. faro7 زائر 8401 ياليل مطوللك.. \| 18/07/2007 06:53:36 اولا ...الف مبروك التخرج.. ثانيا..الف مبروك انك قدرت تخلص اوراقك ههههه من جد حوسه الله يعينكم والله سالفه غريبه ماتوقعت من جامعه لها سمعتها ووزنها يصير فيها كذا... وانا بعد بحتاس وبرردد ياليل مطوللك على مايعطوني وجه ويردون علي.. شكل جامعة البنات موبعيدة عندكم بالحوسه وعدم الانتظام.. اتصلت بعد الاختبارات على طول على الجامعه عشان استفسر عن الماستر بحكم ان ماعندي خبرة ولا اعرف اي شي ولا الاوراق المطلوبه ووقت التقديم==>متحمسه بقوة بتكمل هههه المهم اتصلت وترد علي وحده قلت لها حوليني على العميده لوسمحتي قالت طيب ثواني...حطت الاخت السماعه على جنب وطق حنك مع اللي جنبها الى نصف ساعه قلت امري لا الله ظفي وجهك يابنت. الاخت تتقهوى وهات ياضحك ولاكن احد عالخط..اتصلت مره ثانيه لاحياة لمن تنادي..اليوم اللي بعدو كمان لاحياة لمن تنادي..جاني احباط شديد وحرمت اتصل عليهم.. دعوااااااااااااااااااااااااتكم لي تكفون.. تحياااااااتي.. تركي ،، ولد عمك و انا عمك زائر 8429 إيييييييييه ياكننق ساءود يونوفيرسيتي \| 18/07/2007 12:13:04 هلا صلوحكااا زين اللي خلصتوا بيوم واحد على أيامنا تتوظف بوظيفه مؤقته ليييييييييين يطلع ملفك و تخلي طرفك من القوات المسلحة ،، قصدي الجامعة !!!! بالنسبة لرأيك و رغبتك بالتحول لإخلاء طرف إلكتروووني ،، فعلاً هذا المطلوب ،، و يستحسن يكون عن طريق الانترنت ،، يوم و الموضوع منتهي وجايك الاخلاء على الايميل و ملفك الاخضر العلاقي مرسلينه بظرف لصندوق بريدك ،، و معه أربع مية و ثمانين ريال تجميع العشرات لأربع سنين هههه عقبــــال الوظيفه AKG عضو 8433 ههههههههههههههههههه \| 18/07/2007 13:28:41 أحلى مافي الموضوع خشم صديقك عقبال الوظيفة d3bo0ol زائر 8440 والله من زين جامعاتنا \| 18/07/2007 14:48:18 كل هذي البلاوي وهي جامعة الملك سعود اجل لو تشوف الجامعات الثانية زي الي بالطايف شي يجيب الهم ,الله يكون بعون الي ناوين يدرسون في المملكة كووشخه زائر 8443 يارب سترك لاتكون جامعه المللك عبد العزيز مثلها :( \| 18/07/2007 15:25:09 اول شي ألفــــــ مبروك التخرج وعقبال الوظيفه يـ!!ارب ثانيا أهنيك على أبداء رأيك وبكل صراحه كذا يعني من جد الحين جامعات وتطور وذابحينا على التكنلوجيا اللي عندهم وكل هذا تسونه عشان أخلاء الطرف وارقى فوق ،، وأنزل تحت ،، ووروح يمين وارجع يسار . ابغا افهم ليه التعذيب ؟؟ ليه مايصير في نظام عدل ومرتب ؟؟ عشان نقدر نقول احنا ناس متطورين والتكنلوجيا واصله عندنا صح ولا هذا اللي قاهرني ينادي بألأسم وقلت له حاااااضر وعطاك ملفك يعني من جد هنا المشكله لو واحد ماعنده ذمه ومايحبك واخذ ملفك عادي كأنه العيد وتعبي يروح زي السلام عليكم => متى نتطوور عدل بس يعطيك ألف عافيه على الطرح الراقي ويسلموو الأيادي على الموضوع المره الجايه اكتب على النص المليون اللي توصلهم كل شهر والعشرات حق الصندوق => ياليل الأنظمه بس بنت الرياص زائر 8445 قال حكومه الكترونيه ؟؟؟؟ \| 18/07/2007 15:54:28 اول شي حبيت اباركلك على التخرج وعقبال الوظيفه.. اااااااااه من اخلاء الطرف ومشاويره ..انا يوم جيت اخلي طرفي من عندهم وبعد ماخلصت اجراءات المكتبه في عليشه ارسلتني الموظفه لفرع المكتبه بالملز مع العلم اني ادرس بالاقسام الادبيه يعني وش دخلني بالملز وبعدين ليش ماتكون المكتبات عندهم مربوطه بنظام واحد ولا لازم الواحد يتمشور بس علشان توقيع ............ ماادري هل هم تطورا الحين ولا على حطة يدك .... الماهر زائر 8446 الله يذكر البطاقه الجامعية بالخير \| 18/07/2007 16:08:56 خخخخخخخخخ والله لي ثلاث سنين مضيع البطاقة الجامعية ... يله باقي لي سنتين ( دراستي 7 سنين ) يمكن ألاقيها تحت السرير والا فوق الثلاجه هههههههههه ... بس فعلا اذا كان رب البيت بالدف ضاربا فشيمة أهل البيت الرقص ... خرريجه زائر 8448 :( \| 18/07/2007 16:49:17 مبرووووك عليك وعلينا اخوي التخرج الحمد لله كانت اجرائاتنا احسن منكم واخف واسلم مع اني ما توقعتها بهالشكل ابد ابد على سمعة جامعتنا الحلوه ماغير توقيع من المكتبه واشوى اللي ما عنوني انا من الملز و وقعتها من مكتبة عليشه وبس الله يوفق جميع الخريجين وعقبال الوظايف الحلوه<< تحلمين zozo عضو 8450 zms \| 18/07/2007 16:53:33 مبروك التخرج وعقبال الوظيفة صلوحكا صاحب الموضوع 8453 الله يبارك فيكم \| 18/07/2007 17:45:41 مشكورين حبايبي على الردود والتفاااعل الروعة .. وما قصرتوا بصراااحة هذا اللي صاير !! وش نسوي .. خلك على قردك لا يجيك اللي اقرد منه الحمد لله على كل حال .. والله يوفق الجميييييع ان شاااااء الله .. البعض .. شنبات وبنات ذكروا بعض المواقف ,, وبصراحة شي يحز في الخاااطر !! العالم تتطور .. وحنا نترااجع اكثر !! خصوصا في التكنولوجيا .. بضغطة زر مفروض تخلي طرفك .. مير حيل الله اقوى اشكركم جميييييع اخواني واخواتي .. وما قصرتوا والله لا يحرمني منكم . . . صلوحكا مو متخرج زائر 8473 نفس الوضع في جامعة الملك فهد \| 19/07/2007 00:04:19 ترى الوضع نفسه في جامعة الملك فهد بس من ناحية الفرة ولسه عندنا المباني بعيييدة إذا ماعندك سيارة راحت عليك... الشباب دايما يشتكون من هالنقطة>>>أنا ما ادري عنها وطبعا لازم فيه سرا لأنه إخلاء الطرف جماعي بس المباني نظيفة ومرتبة المصمم كول زائر 8477 الففففففففففف مبروك على التخرج \| 19/07/2007 01:17:03 مبروك على التخرج وكلامك جداً في محلو وهذا دليل على الفساد الأداري وعدم وجود الرقابة مع هذا كلو اقولكم على حاجة كلنا نعرفها ميزانية الجامعات كم ................... وراتب الدكاتر كم .................... وكم دكتور اجنبي عندنا ............... ولكن للاسف نفس الحال في جامعة ام القرى وممكن اخس وشكرا على هذا الموضوع الجميل . أخوكم المصممم كول moon face زائر 8487 شئ طبيعي يصير كذا \| 19/07/2007 04:38:15 المفروض يكون هذا الوضع عادي عندنا انا عادي عندي ما استغربت هذا حال جامعتنا وللأسف المقهووور منهم زائر 8513 ولا همه فيكم \| 20/07/2007 01:07:27 شي واحد ابي اعرفه منهو المسؤال عن كل هاذى .. مايدري يعني ولا هو راعي العشره كل شهر يعني اهم شي تتحول في حسابه كل شهر ولا احاسبكم على الفوضة واللة مانطور ولا نجوز عن السرقه لو بعد 2000 سنه مساكين واللة انى نراجع و نخلص جامعة و نتخرج و يوصل عمرك 30 او 35 و تحصل وظيفة راتب 2000 ريال خخخخ لا تبي عسكر ية يقولون عمرك وصل 30 غير مسموح ههههه و تعرس وانت مديون وعمرك 40 هههه ويقولون ليه انا السعودية ازداد عدد العنوسة فيها واللة منهم وهم السبب تلقى الواحد يبي يلقا مستقبل مشرق خخخ يلقا مستقبل مظلم ... من المسؤال ياشعب شي واحد بس اقوله حسبي اللة ونعم الوكيل على من كان السبب واللة يورينا يوم فيه ان شاءاللة .. ..... تشكي ولا ماتشكي مالك الا مالك خخخخخخ hanan زائر 8516 جامعة البحرين \| 20/07/2007 02:07:40 مع انك تتكلم عن جامعة الملك سعود لكن سبحان الله كأنك تتكلم عن جامعة البحرين بالضبط مثل الاختام اللي ندور بها من مبنى لي مبنى من المكتبة لمالية للامن لشؤون الطلبة ماسااااة وكل مبنى بصوب لكنه كله يهون عشان التخرج ومبروك التخرج دنيا الوله زائر 8520 ما نقول اللى حسبي الله عليهم ونعم الوكيل \| 20/07/2007 05:12:47 والله مو بس جامعه العيال فيها هالحركات حتى جامعة البنات ادهى وامر ما اقول إلا الله بس يعينا على غثاهم Smokymind عضو 8533 أعلم لك متى نصل الى المرونة المطلوبة !! \| 20/07/2007 16:48:18 السلام عليكم ... أخي الكريم ... سوف تصل الى المرونه المطلوبة عندنا .. عندما تأكل المعكرونة بداخل الفصول اقول ... مو وهـ بس وهـ .. آحيييه وبس!!! كان الله في عونك ووفق الجميع لما يحب ويرضاه مشكور على موضوعك وأتمنى انها تصل للأعين الساهره اخوك Smokymind خالد زائر 8536 يلعن ام التحطيم \| 20/07/2007 17:07:12 اوول شي نقوول مبروووك التخررررج ومووضوعك محل اهتماام وموضع حواار يعطيك العاافيه انا توني قدمت على برنامج الانتساب بجامعة الملك عبدالعزيز لكن والله كل شي كان سهل ومرتب مع اني من اهل الشمال والجامعه في جده كل شي كان عن طريق الانترنت وبكل سهوول وبعض الاوراق ارسلتها لهم عن طريق الدي اتش ال وبسعر منهم مناسب لانهم متعاملين مع هالشركه لكن هذاا يمكن كله لأننا ندفع لهم لان الترم بثلاث الاف ريال وهذا يدل على انهم يقدروون يسوون نفس طريقة التقديم ويخلوون طرفك بنفس الطريقه وبنفس السهوله. يعني انا استغرب ليش فعلا مايربطوونهم بشبكه ونظام موحد مثل ماتفظلتوو اصلاا اسهل لهم واكثر ترتيب واقل مووضفين يعني اوفر لهم بكثير لكن فعلا السبب هو الفساد الاداري ولا اكيد فيه من يقترح هالاشيااء بس ماحد يعطيه وجه. مبرووك التخررج ياخووي وعقباال الوضيفه تحياتي للجميع صلوحكا صاحب الموضوع 8539 هذي المشكلة !! \| 20/07/2007 17:34:31 مشكوووورين يالغالين على التفاعل والتواصل .. والتشريف ما قصرتوا .. والله يعطيكم العافية يارب المشكلة .. فيه كثير من الاخوات قالوا ان عندهم نفس الاجراءات ويمكن اكثر وأشد !! والمشكلة ان فيه جاماعات خارجية عندها نفس المشكلة !! ودي اعرف الحكمة من اخلاء الطرف بهذي الطريقة ...!!! والله شي يحز في النفس .. لكن مانقول غير حسبنا الله ونعم الوكيل ...!!! . . . صلوحكا abusummer زائر 8553 لو نستفيد و نتطور ما كنا دولة عالم ثالث \| 21/07/2007 04:51:00 اخوي لو نستفيد من اخطاءنا ما كنا دولة عالم ثالث. انظر الى ماليزيا و جارتنا الامارات-دبي ونحن لا نعترف بان لدينا اخطاء نكابر اباً عن كابر باننا الافضل بل الاصلح و نتلقى الضربات واحدة تلو الاخرى و نصحح باخطاء !! لماذا لا نقلد الدول بتجاربها الناجحة لماذا نخترع و نقول هذا الصحيح و لا نقيم انفسنا هل تعلم يا اخي لو كنت مسئول لقلت انك لا تستطيع التطوير لان المسئول الاعلى منك لم يعطك الميزانية الى ان تصل الى وزير و انت لاتستطع تطبيق شيء لان الذي اعلى منك لم يضع في الميزانية رغبتك بالتطوير فلا تلم من هو اعلى منك. طلاب الكليات التقنية لايستطيعون الدخول الى الانترنت لا ن لانترنت مقطوعة على الكلية لم يتم تسديد رسومها لماذا ؟لم ترصد بالميزانية حتى اعضاء هيئة التدريس مقطوعة عليهم فما الذنب العميد و المحافظ! السبب موضوع دولة كاملة اكبر مني و منك و وزير. الامل يبقى فيمن عانى ليرفففع البلد a7laminel7lween زائر 8554 اخلاء طرف \| 21/07/2007 05:49:56 معقوله الاشياء هذي تصير في الجامعات .. صراحه توقعتها احسن بكثير .. <<< كل مالها ووتحطم اكثر من اليوم الي قبله .. وع البركه التخرج .. عقبالي << شوفة النفس ما تلعب .. عبدالرحمن الضويان زائر 8572 اخلاء ترف \| 21/07/2007 18:57:18 إقتباس موظفين اثنين .. زولة يحبهم قلب قلبك , مادري وراه هالمكتب بالذااات مافيه سعوديين !! من بد كل المكاتب .. هالمكتب سودانيين ؟؟!! هههههههههههههههههههههههههههههههههههههههههههههههههههههههههههههههههههههههههههههههه حسبي الله عليك صلوحكا هههههههههههههههههههههههه بس ماقلت لي .. سلموكم الميداليه حقت نهاية المارثون ..؟!! زياد السليمان زائر 8575 في الكلية التقنية - الرياض \| 21/07/2007 20:00:52 انا خريج السنه الماضيه من الكلية التقنيه الصراحه مافيها اي تعقيد ابداً !! صحيح فيها اخلاء طرف من هنا وهناك .. لكن بسيطه جداً وبالنسبه للمواقف اقسم بالله انك تقدر تفحط بمواقفنا من كبرها ( ماشاء الله ) وفيه شباب يوقف سيارته بالعرض والطول .. ولا فيه اي اشكاليه الله يرحم ايام الكليه .. كانت حلوهـ .. ومرت بسرعه عبود زائر 8601 مثل مراكز الشرطه \| 23/07/2007 20:21:56 تستغربون العنوان بس والله ما اشبه هالاجراءات الا مثل معاملة رجال الشرطه للمراجعين على قولة المثل (نفس شينه في جلد معفن) والسبب وبعد جهد جهيد تأكد لي السبب ...وهو ان الجماعه ما يبون يشوفون خلقة وجهك مرة ثانيه لا في زين ولا في شين لا شاكي ولا مشتكي واضن ان الجامعة عندكم مثلهم بالضبط يبغون يطفشونكم علشان تطفشون اللي بعدكم ويا دار ما دخلك شر والله ان التعليم متخلف ومتأخر والله انه حرام ندخل تصنيف الجامعات العالمية حتى لو يجطوننا رقم الاخير وما يصدق علينا الا المقولة الرائعة ( الجامعات السعودية لم ينجح احد) وسلا متكم

	اقسام الملتيميديا
	العاب \| ملفات \| بلوتوث \| صوت \| صور \| فلاش \| فيديو \| منوعات

عضو في اتحاد المواقع العربية الكبرى