كليتي الموقرة تكفين لا عاد تسوين موقع

Stop There SH بتاريخ 14/03/2007 في شهر 3/2007

•

3,816

• الطباعة: 32

• الإرسال: 0

• التعليقات: 10

• مرات التفضيل: 0

هالرابط أدخلوه قبل قراءة الموضوع

كثير من الذكريات الجميلة والغير جميلة وكثير من اللحظات الصعبة والأوقات العصيبة مررت فيها في كليتي كلية علوم الحاسب بجامعة الملك سعود
مما يوجب علي ومن باب الوفاء أن أعيد الذكريات وأحاول ان استرجع الايام الجميلة التي قضيتها في هذه الكلية
ماأدري حسيت بشوق الى كليتي وحنين أو بالأصح قدر الله علي واحتجت معلومة من الكلية وبالمنطق الرياضي ( الرياضي من الرياضيات وليس من الرياض أو من الرياضة )
>> أقول لا يكثر بس :)

بما أننا في عصر الانترنت
وبما أن المعلومة من كلية الحاسب
اذن : المعلومة أكيد موجودة في موقعهم
وبما أنها كلية الحاسب فأكيد مافيه غير موقع الكلية لاحاول أن استعيد الذكريات
وليتني ماحاولت أستعيد هالذكريات
جربت البحث عن كليتي عن طريق موقع قووووقل
طبعا النتيجة كانت ثاني نتيجة في البحث أول نتيجة كانت كلية الحاسب في جامعة الامام الي مايتعدى عمرها العمر الأكاديمي لأحد المعيدين في كليتنا الموقرة
ومع ذلك جاءت قبلنا
دخلت موقع كلية علوم الحاسب في أعرق جامعة ( جامعة الملك سعود ) في بلد من أولويات توجهاته الحكومة الالكترونية
دخلت موقع كلية تضم نخبة من أفضل الطلاب على مستوى المملكة ( طبعا هذا قبل ماأدخلها بعد مادخلتها صارت تضم نخبة من أفضل طلاب العالم :) )

دخلت موقع كلية فيها من الامكانات المادية والبشرية الشيء الكثير
كان من المفروض أن يكون الموقع واجهة تعكس المستوى الجيد لهالكلية
كان من المفروض أن الموقع يكون من الاشياء التي يفتخر بها أبناء الكلية ( بالمناسبة دخلت الجامعة وتخرجت وأنا ماأدري عن الموقع وهذي اعتبرها ميزة لأني لو دريت عنه ان كان موجود في هذاك الوقت أتوقع تجيني صدمة عصبية من المواقع كلها ) ـ

بالمناسبة أتمنى أن كليتنا الموقرة تسوي استبيان للطلاب فيه سؤالين بسيطين
هل تعرف ان للكلية موقع على الانترنت
الاجابة لا أو لا
لأني أتوقع ان ماأحد يعرف

السؤال الثاني
هل سبق لك ان دخلت موقع الكلية واستفدت منه ؟
ماراح أكتب عن التصميم الغير موجود في الموقع
ماراح أتكلم عن التقنيات الجديدة مثل
A:)AX و XHTML
وغيرها الي أتوقع أن الي يشوف الموقع يتوقع انه داخل الى موقع أرشفة الانترنت ومطلع موقع الكلية أول مادخل النت

ماراح أتكلم عن المواصفات القياسية للمواقع
ماراح أتكلم عن تفاعلية الموقع والخدمات الي يقدمها للطلاب أو الاشخاص الي حدهم الوقت واضطروا يدورون معلومات عن كليتنا الموقرة
ماراح أتكلم عن انعدام ربط الطلاب بالموقع عن طريق وضع مواد المقررات أو الواجبات أو المشاريع في الموقع
ماراح أتكلم عن دليل الاتصال بالشبكة الداخلية باستخدام ويندوز 95 وجه كبير فاقن خشته معقوله 95 باقي أحد يستخدمه والعالم الان يتكلمون في وندوز فيستا لا ووين يستخدم في كلية الحاسب معقل العقول الحاسوبية

مااراح أتكلم في برمجة الموقع واستخدامه للغة
html
بدلا من لغات البرمجة
Scripting languages

ماراح أتكلم في التنسيق الرائع للموقع مثال بسيط
في المقررات الدراسية كاتبين اسم المقرر وقدامه رقم ابغى أعرف وش قصة هالرقم عدد الساعات ولا وش بالضبط

ماراح أتكلم عن بعض مشاريع التخرج الي مالها أي فائدة بعد تنفيذها ولو كنت عميد للكلية لجعلت مشاريع التخرج لطلاب سنة من السنوات جميعها برمجة مواقع لكليات الجامعة الموقرة وللجامعة بنفسها وصدقوني راح تلاحظون الفرق
ماراح أتكلم عن رابط صور الكلية الي مافيه شي مع أني ضغطت عليه الى ان هاوشني الزر الايسر للفاره وقال يابوالشباب تراك أزعجتنا من كثر الضغط
ماراح أتكلم عن الصورة في رأس الصفحة الي حاطين كيبورد ياأنها كيبورد كمبيوتر صخر أو كيبورد كان يستخدمه فرعون في الشتشته
ماراح أتكلم عن الكليات الثانية الي مواقعها عبارة عن صفحة فاضية طيب ليه متعبين أنفسكم وحاطين لها وصلات مادامها فاضية
ماراح أتكلم عن موفع الجامعة والذبابة الي تدور فوق في رأس الصفحة وماأدري وش موقعها من الاعراب في موقع جامعة محترم توقعت أني داخل موقع من مواقع الشات وماتوقعت اني داخل منتدى لأن المنتديات مع انها تمثل شخص او مجموعات مو صرح علمي ماتتنازل تحط ذبابة في رأس الصفحة
الغريبة أنها ماتوقف أبد دايم تتحرك
>> ملاحظة واحد توه قايم من النوم
ماراح أتكلم عن أنه لا يوجد أية طريقة للتواصل المباشر مع الكلية من خلال الموقع لا نموذج اتصال ولا أرقام تلفونات ولا حتى بيجر :) فضلا عن طريقة للتواصل مع أحد الدكاترة الأفاضل .
ماراح أتكلم عن أني أكتشفت في النهاية أنه في موقع جديد للكليات وباقي مشغلين هالموقع والمشكلة أنه هو الي يظهر لك في بحث قوووقل
ماراح أتكلم عن شيء لأني أريد ان تبقى بعض من الذكريات الجميلة عن الكلية في مخيلتي ولا أريد أن تعكر صفوها هالاشياء

ظنكم أقدر ؟ ؟
مع تحيات طالب سابق في الكلية آخر أيامه في الكلية يوم استلام وثيقة التخرج :) والله لا يحدنا على الشين :)


	الموضوع السابق: اسطنبول - صور - الجزء الاول	الموضوع التالي: لا أحد يحفظ جدول الضرب - فيديو + صور

	مواضيع أخرى للمرسل Stop There SH
	من زرف الآخر يا جريدة الرياض
	صباح الصبح ياقزازتي
	صور : متحف الشمع في لندن Madame tussauds
	صور : خداع بالمجلات
	دراسات خفيفة لطيفة ظريفة ...الخ

	التعليقات على الموضوع
	1 أميرة الأحساس زائر 1054 مرحباا \| 14/03/2007 11:01:47 مرحبااا اخي العزيز انا اول ماقريت عنوان موضوعك حسبتك تقصد كليتك الي في البطن مو الكلية الي تدرس فيها ههههههه فكرت الموضوع طبيي ويوم فتحت الرسالة وشفتك تتكلم عن كلية الحاسب والله انسدت نفسي ذكرتني بكليتي هههه الكلية الي درست فيها كلية الآداب للبنات با الدمام والله لو انك متكلم عن الكلية الموقرة الي با المصارين اصرف من ها الكليات الزفت ملاحظة : اذا عندك مواضيع عن الية الي با البطن ...ارسلها لي لاني اعاني من كليتي اكثر من كليتك حقت الحاسب وشكرا ً ههههههه امححححححق تعليق 2 سعودي نت زائر 1064 صدقت \| 14/03/2007 12:28:01 مساء الخير سلمت يمناك اخي الفاضل بصراحة ما كنت ادري ان في فرع في موقع الجامعة لكلية الحاسب بس اشوى ما شفته انا عندي انتقادات كثيرة لخدمات الموقع بس لمن تقول ومن اهمها عدم تفاعل اضافة وحذف المواد للفصل الدراسي مع ان جامعة الملك عبد العزيز موجودة فيها هالخدمة ومفيدة جداً ولماذا جامعة الملك سعود الأقوى من حيث التعليم والدكاتره ولا توجد بها مثل هذه الخدمة البسيطة والمخففة عن الضغط الكبير في بداية كل فصل دراسي داخل الجامعة 3 الــ س ــائــح زائر 1098 صدقت الا نص \| 14/03/2007 16:44:27 في بعض الكلام صدقت فيه وانا مثلك ماراح اتكلم عن تصميم الموقع والديزان الي اعتقد كان ناتج عن نشاط طلابي في كلية الحاسب ( الي يسوي صفحه رئيسيه ينجح عندي خخخخ ) التصميم مو مهم الحين والكلام الي قلته بقول مثلك ماااقول شي عنه وصحيح ان الموقع مثل الصوره فقط مااهتموا بوضع خدمات تخدم الطالب في اي مكان من خلال ضغطت زر . بالنسبه للاتصال المُباشر فهذه صفحه موجوده http://www.ksu.edu.sa/services/telphon3.php لكن انا مابي اتصال مباشر ولا ابي شي انا اقترح بما اننا بعصر السرعه يكون هناك اشخاص معتمدين مخصصين في إدارة الموقع بوضع خدمات تهم الطالب مثل جداول الإختبارات ومثل وضع نماذج خاصه للتعبئه والطباعه وكذا تسهل على الطالب الروحه والجيه والمماطل بهالشوارع علشان ورقه الموقع ككل وليس بس كلية الحاسب مقصره جدا في خدماتها الإفاده الوحيده هي عرض نتائج الطالب واخبر موقع مدرسه ابتدائيه ناموذجيه مسويه نفس هالخدمه وافضل فما بالك جامعه بكبرها عندها هالشي فقط احس انه فشيله خخخخخخخ اسفين على الإطاله 4 malekh alehsas زائر 1103 الي يشوف مصيبه غيره تهون عليه مصيبته \| 14/03/2007 17:30:21 مرحبا اخوي ومشكور على الموضوع بس حبيت اقولك لا تكدر على نفسك واحتفظ بالذكريات الجميله احسن على الاقل احسن من غيرك ...انا جار علي الزمن وخلاني ادخل كليه الحاسبات ونظم المعلومات بس وين في جامعه الطائف لا وكاتبينها بالخط العريض على ايش مسوين كليه حاسب مادري؟؟ والله العظيم مافيها الا دكتورتين من سوريا ماعندهم ماعند جدتي الله يخليهم لاهلهم ومعيده وحده بس سعوديه لان الباقين بطلوا من سوء المعامله ومتعاقدين مع كم وحده نص الايام غايبات وبعطيك العافيه 5 HMANNY زائر 1122 يا ناس احمدوا ربكم \| 15/03/2007 01:21:53 يا اخواااااان احمدوا ربكم ان فيه مواقع لكلياتكم .... انا بكلية الشريعة بالاحساء وللأسف لاننا الى الآن في تخلف من عدة نقاط 1- نستلم المكافأة مدبسة 2- النتايج معلقة على الجدار 3- مافيه موقع على الانترنت تاخذ نتيجتك او تعرف من اللي يدرسك لكن الله يعيننا على باقي هالسنة ونفتك وأخيرا أقول لك اخوي كاتب الموضوع احمد ربك على العافية ومن شاف مصيبتنا هانت عليه مصيبته تحياتي / H M A N N Y 6 So0o0So0o0o زائر 1126 تووووي أدري أنا لنا سايت خطير زي هاذا<<<باقي ترم وتتخرج \| 15/03/2007 03:53:23 من جد توووي أدري أنا لنا سايت كشخة زي هاذا تبي الجد موضوعك مررررررة مفيد لاني أخذت معلووومة مهمة ماتنتفووووت وأول ماقريت موضوووعك وأروح ركض بشووووف ذا الأسطورة اللي وصفتها لنا ووالله عندي شيت ماحليتة وشايلة همه ولما دخلت وشفت سايتهممم وأضحك إلا ماقلت أمين يعني وسعت صدري الله يوسع صدر موقعهم الموقر بجد صراحة موقع متعوووب علية والحق ينقال يكفي ياشيخ الذبابة اللي تحوووم بس أمووت وأعرف كيف سووها بجد فن وربي وأنا عرفت وش موقع الذبابة من الإعراب لان أكيد أن قصدهم أنهم يحسسونا أننا مو بسايت أننا قاعدين بالحوش أو بالبر يعني من زود البساطة في التصميم وأنهم مايبون الزائر يحس أنة خارج نطاق الطبيعة الجميلة التي تحظى بها بلادنا الحبيبة<<<<بنتهم واعرف نواياهم الحسنة لذلك الذبابة لها تأثير مهم في إحساس الزائر أنة لسى داخل نطاق الطبيعة يعني الذبابة لها موقع مهم من الإعراب والقواعد والنحوووووو بعد وبعدين الحمدلله أننا عزينا نفسنا بنفسنا وسوينا لنا موقع بنفسنا وماأستنينا مواقع وتصاميمهم الفن وسوينا لنا موقع ولسى في طور النمو بس أهم شي يليق بمستوانا التعليمي والأهم أنة إنتاجنا وكرم منا لهم وبدون مقابل بعد www.ksu-it.com وأحب أشكر الأخت اللي صممته وأقولها تسلم يدك ولاتنسين تأخذين دروس فن من موقعهم التحفة اللي أنوصف بشكل مبدع من أخونا المبدع ووالله خووفي بعد موضوعك انهم يضبطون السايت الأسطورة ثم نقعد فيها لاننا بنفقد مصدر مهم من مصادر الضحك والتعليق اللامحدود وتسلمممم على موضوعك الرايق والمعلومة اللي أخذتها منك 7 Manar عضو 1134 كليتي كم أشعر بالولاء لك، لحد يهاوشني :) \| 15/03/2007 07:08:40 مدري ليه أنقهر إذا أحد نقد في كليتنا .. مع انه ممكن يكون صح الظاهر الولاء عندي زااااااااايد حبتين ههههه المهم انا راح أوقف موقف الدفاع بنسبة 50% .. وبسم الله نبدأ أولا كان الأصح أن يكون عنوان الموضوع "جامعتي الموقرة تكفين لاتسوين موقع" وليس كليتي باقول لك ليه .. لانه هالصفحة تابعة لموقع الجامعة وليس الكلية ... والشيء الخطير اللي اكتشفته ان هالصفحة الحين مالها رابط من الموقع الرئيسي في الجامعه لكنها مدري ليه لسا موجودة والمصيبة تطلع في قوقل ههههههههههههه <<<< شر البلية مايضحك راح تلقى رابط موقع الكلية هو http://ccis.edu.sa/ طبعاً الموقع مااكتمل ومدري متى ناوين يكملونه ولنا حنا البنات هالموقع اللي محد يعرف عنه طبعاً وماله أي إشارة في موقع لجامعة http://www.ksu-it.com/ أخيراً ... اتفق معك أن هالموقع ظلم لنا كجامعة كبيرة وعريقة وعندنا كفاءات رااااائعة لكن هو نتيجة طبيعية لإعطاء المسؤولية من هو ليس أهلاً لها.. مع تحيات طالبة سابقة في الكلية بس مابعدت عن كليتي وعسانا مانبعد 8 خنفشارية زائر 1143 *%$ هههههههههه $%* \| 15/03/2007 09:33:24 شي يخلي العين تدمع ( لا مو تدمع الا انهار و شلالات ) من كتر الضحك .. تعرفوا شي من متى كان عندنا شي حلو في مجال التعليم و غيروا ( خلونا ساكتين ) و انا مني شايفة انو في شي جديد من زمن ستي و هم على هذا الحال .. المفروض اننا نتأقلم مع الوضع و نعيش الامر الواقع ..... و سلامتكم 9 عبدالمجيد زائر 1170 مخطئ بعض الشيء \| 15/03/2007 22:08:27 طيب وش رايك في هذا الموقع .. http://www.ccis.edu.sa/ ^ هذا هو الموقع الرسمي اللي ندخله كطلاب والموقع جيد الى حد ما .. ولكل مادة صفحة .. مثلا csc 107 http://www.ccis.edu.sa/~csc107 ... موجود فيها سلايدات ومواعيد الاختبارات ومراجع .. وغيرها الوضع الآن مختلف .. لكن الشيء السيء ان بعض الدكاتره يستعين بالياهو قروبز مع ان الكلية موفره له صفحه اذا يبي ينزل فيها ملفاته .. 10 المطحون زائر 1177 فهم سقيم \| 16/03/2007 02:04:41 تصدق أني أحسبك تقصد كليتك الي في بطنك... داري أنك بتقول لا تفكر مره ثانيه... أما على الموضوع الاساسي.. فأنصح الجميع بدخول الصفحه الرئيسيه لموقع جامعة الملك سعود لتضحك على اكبر جامعه سعوديه....

	اقسام الملتيميديا
	العاب \| ملفات \| بلوتوث \| صوت \| صور \| فلاش \| فيديو \| منوعات

أنثى

شبكة أبو نواف

موبايلي

موبايلي

كليتي الموقرة تكفين لا عاد تسوين موقع