بابا نويل.. وش قصته ؟

الرئيسية20062006/12 » بابا نويل.. وش قصته ؟

السلام عليكم أعضاء قروب ابو نواف الغالي ..
من عرفت النت وتقنية القروبات وانا مشترك في ابو نواف وكل ما اطلع ايميل على طول ابو نواف قروب
من زمان ودي اشارك بس مدري وش اشارك به
لقيت ان هالموضوع اثار فضولي قلت يمكن يعجبكم واتمنى ان الإدارة توافق على ارساله ..

بابا نويل .. الشخصية الأسطورية لأطفال الغرب
لا أريد ابداء اهتمام بأفكار الغرب وما ابي احد يفهمني كذ
بس قريت قصص مختصرة له ببعض المواقع فضولاً ابي اعرف
وش سالفة هالشايب ابو لحية بيضا واللبس الأحمر والهدايا اللي تصير ببلاش نهاية راس السنة

سانتا

بابا نويل أو سانتا كلوز هي شخصية اسطورية مستمدة من قصة القديس نيقولاوس وهو اسقف "ميرا" الذي عاش في القرن الرابع الميلادي،
يقال ان نيقولاوس كان يقوم ليلاً بتوزيع الهدايا والمؤن للفقراء ولعائلات المحتاجين دون ان تعلم هذه العائلات من هو الفاعل .

اما ما يتعلق ب "بابا نويل" فهي من الفرنسية وتعني "اب الميلاد"، حيث يتخيل الناس بابا نويل شيخاً حسناً ذو لحية بيضاء كالثلج ويرتدي
ملابس حمراء اللون ، وصاحب جسم قوي شديد والله من زين الشده ، راكباً على عربة سحرية تجرها غزلان و في الخلف انواع الهداي
ليتم توزيعها على الاولاد اثناء هبوطه من المداخن او دخوله من النوافذ وشقوق الابواب

سانتا

لكن يجدر لفت النظر أن بابا النويل وهداياه أخذت من الشهرة ما هدّد في وقت من الأوقات معنى العيد الحقيقي حتى بات عدد كبير من
الأطفال يعتبرون عيد الميلاد كعيد بابا نويل وليس عيد ميلاد يسوع (نسأل الله السلامة) . ومن هنا يجدر بنا توعية ابناءنا عن واقع هذه
الاساطير وان اعيادنا ثنتين مالهم ثالث

هذي نبذه مختصرة عن قصة منشأ هالشايب
لكن وش يستفيد هالشايب .. انا اقصد بالشايب الشخصية الأصلية
وش يستفيد من هاللي يسويه .. ما هو الدافع ..

هنا القصة

بابا نويل ..(سانتا كلوز) ولد وحيدا لوالدين من أعيان مدينة ميرا وذلك منذ حوالي 17 قرنا، وكان طفلا ذكيا وشابا نابه
متعلما ورغم ثرائه الشديد فقد قرر ان يلتحق
بالدير وأن يقدم جميع امواله للفقراء والمحتاجين ولكن دون ان يشعر احد بذلك.
وكان من بين هالفقراء .. واحد غني فقد كل ثروته وساءت حالته ..
ايه عليكم نور مثل حقين الأسهم << الله يكون بعوننا ويرتفع هالمؤشر
الزبدة .. هالهامور اللي صار فقير كان عنده ثلاث بنات يبي يزوجهم بس ما عنده دراهم .. الظاهر انه على ايامهم
كانو يدفعون المهر للشباب عشان يتزوجون
فجا نيقولاس( بابا نويل) وحط له كيس فلوس من دريشة هالهامور عشان يساعده على تزويج بناته
قام الهامور ولقا الفلوس ..
راح ودخل به سوق طوكيو يقول سوقنا ما فيه خير << بدينا بالتميصل

الهامور قام وشاف الفلوس وراح زوج بنته
ومن بكره جا بابا نويل وسوا نفس الشي وحط كيس
وراح الشايب وزوج بنته الثانية
ومن بكره بعد جا الشايب يبي يحط الفلوس .. ما درا ان الهامور سهران عشان يبي يقفطه
يوم رمى الفلوس .. طب عليه الهامور وقال كفشتك
وعرف انه الشايب اللي يلبس احمر اب لحية بيضا ويغطي جزء من وجهه

وبعد كذا بدوا الناس بتقليد هذه الشخصية بالقيام بنفس
الدور مع الاطفال الأيتام وداخل المستشفيات، لكن الرسام الأمريكي الشهير توماس هو اول
من حدد الصورة المتعارف عليها الآن لشخصية بابا نويل وكان ذلك عام 1822
والتي شكلت في ذهن الأطفال القصص الاسطورية حول هذه الشخصية التي تأتي علي عربة من الماس او من الخشب ( حسب الروايات )
يجرها زوج من الغزلان ذات الاجنحة ( واحياناً بدون اجنحه ) والتي تطير بالرجل من مكان لآخر ليلة رأس السنة ليوزع هداياه علي الاطفال.

سانتا

من اطرف المواقف اللي صارت عن هالشخصية ..
واحد من السويد اسمه مارل هانسن .. مسوي بابا نويل الله يصلحه في راس السنة كان معبي سيارته هدايا وانقلبت به في الثلوج وتنقع تحت الثلوج
لين جو من بكره وطلعوه .. يقولون انهم طلعوا الهدايا قبله

سانتا

وفيه وحده استرالية مدرسة تذكرني بالبزر اللي اذا سمعه ابوه يقول يبه اخاف من البع بع قال : اعقب ..
هذي الاسترالية مسوية صريحة وراحت مدينة سدني ودخلت مدرسة تغطي (تمسك عنها يعني) على مدرسة ثانية .. الظاهر ان عندهم نظام شفتات في
المدرسة
المهم سألت هالمدرسة الطلاب والطالبات عن امنيتهم في نهاية رأس السانة وبكل براءة قالوا نبي بابا نويل .. بابا نويل
قالت المدرسة هههههه
ترا بابا نويل نصبة وانا امكم وانه موب موجود ابد بس هي شخصية انقالت في القصص وان الهدايا اللي تلقونه
تحت مخداتكم (وساداتكم) امك انت وياه هي اللي حاطتها ههههه
هي مستانسه بس المبزرة في الفصل انفجروا صياح ..
غبنتهم .. كانهم يقولون لها ليتك سكتتي وخليتينا على هالنصبه عايشييين
وابشركم ان المدرّسة انفصلت من الادراة نظراً لانها في نظرهم ليس لديها "حس تربوي"

سانتا

في أمريكا .. صارت مأساه على حسب المصدر ..
بابا نويل حاول يتسلق بيت يبي يحط هدية لطفل صغير بيته في الدور الثاني ولسوء حظه طاح وصار له
كسر مضاعف في رجله وجلس مكانه ساعتين لين حسوا به اهل البيت ونقلوه المستشفى ..
مأساه ثانية حسب المصدر .. أن شخص بكندا يبي يسوي عربة طائرة عشان ينتقل بها من بيت لبيت << فاهم بابا نويل غلط
وجربها ..
هي ما تعتبر تجربه لانه اقلع فعلا ..
بس من فوق لتحت
الله يرحمه

النرويج عام 2002 شهدت مؤتمر من نوعه من مجموعة مسبّك يبون يسوون بابانويل من كل انحاء العالم ووصل
عددهم 5 الاف شخص بزيهم الموحد وبنفس الستايل المعهود عن شايبنا الحبوب
الله يثبتنا على دينه بس ..

اتمنى ان يكون موضوعي هادف وممتع في نفس الوقت
تحياتي وعذراً على الإطالة ..

وشكراً لإدارة ابو نواف
اتقبل الانتقادات بصدر رحب

اخوكم مكسور الخاطر

عن الكاتب
عدد النقاط: 10 نقطة

صورة مكسور الخاطر

تابعوا جديد شبكة أبو نواف على:

تطوير: SharedTech