(( الدش )) والمقلّط وأشياء أخرى

أول مره انزل احدى كتاباتي بالقروب وان شالله مي اخر مره ؛؛ واتمنى ان هلموضوع المتواضع يعجبكم

مساء الخيــــــــــــر

ومرحبا باعضاء المجالس وقروب أبو نواف  بناته قبل شبابه

مو عشان شي

بس تراني افهم بالذوق

ماتشوفون الأجانب يقولون (( ليديز آند جنتل مان )) يعني النسوان أول

لكن بما ان الشرع عندنا يوجب مخالفه الكفااار تسمع بالمقاطعه

فمضطرين يابنات نتنازل عن هذا الحق

ونعيد من جديد

مرحبا باعضاء المجالس شبابه وبناته

لحظه

ماتفقنا (( و )) اتفقنا نقول(( قبل ))


طيب ولا يهمكم نعيد من جديد

مرحبا باعضاء المجالي شبابه قبل بناته

--------------------





وبعد المعركه الحاميه الفطيس اللي فوق هذي ندخل بالموضوع

الموضوع يتكلم عن (( ورقة من مذكرات اخونا " الدش " ))

تذكرون اول ماطلعت الدشات ؛؛

كان فيه قناتين فقط (( mbc ومصر )) بسسسسسسسس

والعالم كانت متشققه من الوناااسه

واللي عنده دش هذا اكبر مثقف

والخطوه التاليه من تطور الدشوش صاروا الناس عندهم عربسات

وانواااااااع الفلة !!!!!!!!!

العرب سات فيه يمكن 22 قناة ؛؛

وبعدين جت ((art)) وسوت لنا شلّة قنوات اضافيه

وبعد كذا جا ((الأوربت والشوتايم)) وهذا كان عند الناس الهاي هاي

وحالياً صار الناس عندها (( الدجيتل )) مافيه قناااه بالعاااالم او اذاعه مايجيبها لك


------------------------


المهم ياطويلين الأعمار نبي نتكلم عن :

مساوئ الدشوش جمع دش



1- ظاهرة المقارنة بين المذيعات والزوجات

وهذه الظاهرة مؤسسها هو تمسوح زيتي اللون كان يعسكر 24 ساعه على الدش

لو تقطعون كتفه مايحسسسسسسس ولا يرمش اصلا ماغير يطالع بالتلفزيووون وحالته حاله ؛؛ ويقعد يناكف زوجته وانواااع المقارنات


------------------------


2- الفوازير

نعم يا اعضاء نص كم الموقرين ؛؛ الفوازير الله يجيركم ؛؛ مافيه فزووووووورة بالعااالم سمعوا فيها ؛؛ الا سووا عنها حلقه

ماخلوااا ولاااابقواااا بهالفوازير ؛؛ وسمير غانم


كان كل سنه يتحفنا بما يحمله من خثاريد برويسه المنسم واشهر مسلسل لفوازيره (( فطوطــــــــــه ))

ولا يهونون

1- (( نللي ))

2- و(( شريهان ))

الأولى متقمصه دور بنت ال15 سنه وهي للاسف 51 خريف مشتّي

والثانيه سوت حادث وتكصمت عشرمية كصمه ؛؛ كصمه تنطح كصمه

لاكنهم حولها للعبه مكعبات ؛؛ وابد ماعندك احد طلعوا لها عظااام جديده واستمرت تناقز


------------------------


3- المطاوعة ومعارضتهم للدشوش

(( بعـــــــــض )) تحيه لأخونا سعبوله

بعض من المطاوعه بعد زن زوجاااتهم عليهم ؛؛ اضطروا يشترون دشات

يصير الواحد لادخل بيته تلطم على باله احد يصوره

ولانه رضخ لاوامر زوجته اضطر انه يركب الدش بالحوش من ورا البيت وليس بالسطح كي يراه خلق الله

واضطرأيضاً ان يضع الدش بالمقلط وليس بمجلس الرجال ؛؛ ويسكر عليه البابين (( اغلب الناس مقلطهم له بابين ))

واليكم هذه القصه من التراث السعودي بعنوان :

(( الدش والمقلط بين راعيات المعارض اللي قامن يتحدن !! ))

ويوم جا العصر والوالد نام بعد ماتغدى

راحت (( غزلان )) للمقلط ؛؛ وتطق المكيّف ؛؛ وتسكر البيبان وتحط المركا قدام التلفزيون ؛؛ وتفرك بالريموت لعنت خيره وهي تفرك من قناة لقناه

وأخيراً رست على قناة (( art الأغناني )) كانت وقتها جديده

ويجي حفل للفناة أحلام ؛؛ وقامت احلام تقول :

راعي المعارض قام يتحدى


ثم تفك غزلان خشتهاااا

وتطالع مي مصدقه انها احلام اللي قدامها ؛؛ وتطلع من المقلط وتركض وتركض وبعدين

احححححححححححححححححححووووء التفحيطه اللي خلتها توقف بنص الصاله المفتوحه على الدور اللي فوق

وصارت تنادي خواتها (( بدريييييييية - حصييييصه - هدييييل ))

طبعاً البنات يطالعون من الدرج وهم مرتاعات : بسم الله وش فيك ؛؛ طلع لك صرصور ولا ظاطور ؟

الحقوااااااااااااا ؛؛ لاتفوتكم اغنيه راعي المعارض

وبأقل من ربع ثانيه ؛؛ الكل صار بالمقلط ويررررررقص

حصيصه: فلت شعرها وقامت تشوووووش

هديل : تتصل على صديقتها وتبشرها بقدوم اغنيه احلاااااام

غزلان: مي فاظيه ؛؛ قاعده تفحط

وبدريه : تطالع بخواتها ومستانسه وصارت تركض بالمقلط رايحه جايه رايحه جايه

وبعدين صار الجني اللي قاعد بالقرنه مستااااااااااانسسس



يطاااالع بالبنات ويقول اي وحده اسكن ؛؛ يالله بسرعه اختار ياولد عفريته ترى ان جا جني غيري وسكن وحده منهن يمكن اني اظيع فرصه ماتنعوظ

وصار ابليس رايح جاي بالمقلط ؛؛ تركض غزلان من هنا ؛؛ يركض ورا بدريه من هناك

.................................. ....... ...........................

....... .................................. ..............
--------------------

المهم ودخل اخوهم (( مهند )) 6سنوات ؛؛

ويوم شاف خواته بهالحاله طاحن خواته من عينه و ارتاع


وقال : وث فيكم يابنات ترى ان مابطلتوا خبال انادي لكم يبه عبد الرحمن كذا ينادي ابوه متأثر بالشغاله

وخواته : ماااااااااعندك احد ؛؛ كل وحده ماسكه لها خط ؛؛

مهند : قثم بالله مابطلتوا مثخرة ؛؛ اني لا اعلم يبه عب........

ددددددددج صوت الباب يوم سكروه بوجهه

قال انا اوريكم ؛؛


ومسح خشته من المشق وتوقف عن المناشق

ورقا غرفة ابوه

وقال : يبه عبد الرحمااااااااان ؛؛ ترى الذيران اتثلوا علينا وقال دخلوا بناتكم ؛؛ لقيناهم يرقثون بالثارع

الأب : وشووووو ؟؟

هنيدي : لا بث قاعدين يرقثوووووون وفاتحين الدثثثثث

الأب : لابوك لا ابووو اللي جابك يالنتفه

وينزل الاب وثوبه مجعلك ولبس طاقيته الاب حساس مايحب احد يشوف صلعته وينزل ومعه العقاااال ؛؛ وتحمس هنيدي النتفه وجاب معه النبيطه

ويفتح الاب باب المقلط !!!!!!


واذا بالفااااجعه!!!


بناته قاعدات يرقصوون ولا عندك احد البنات ماخذات راحتهم بقووووة ؛؛ لان صوت رقع التلفزيون يصم الاذان !!

اول شي سواه سكر بيبان المقلط بمساعده النتفه

-------------------------

ويوم الجني شاف ان الاب الأعظم (( ابليسوووه اعاذنا الله منه )) راكب راس ابو هنيدي ؟؟

قال انحش ياولد مابدهاااااااش ؛؛ تلحق عمرك ؛؛العمر مش بعزقه ياحليله ولد عفريته ينكت

ثم يرجع الجني من حيث اتى (( اتى من عند النتفة مهند ))

-------------------------

ثاني شي استفتح بغزلان عطاها كم لسعه بالعقال

ثمن جا دور حصيصه اللي قاعده تشوش بشعرها ؛؛ ولاهي منتبهه ان ابوها جا ؛؛ ويمسكها من شعرها ؛؛ ويدينها تطير حمام ؛؛ والله ويمسكها من شوشتها ويرفعها الى الأعلى حنيّن ابوها بالحيل

ويرفعها من شوشتها الى الأعلى وبما انها قصيرة والاب طويل فقد سبب ذلك بفراغ بين رجليها والأرض ؛؛

والاااااان دور هديل ؛؛؛ اللي لقاها تبشر صديقتها واخذت كم لسعه محترمه

ويووووووووم التفت على بدرية لقاها لابده القرنه وساااااكته

بدريه : يبـــــــه والله ما اعرف ارقص ؛؛ انا بس قمت اتفرج هذي غزلان اللي دعتنا

الأب : عيدي عيدي ؟؟ ما اسمع ؟؟

بدرية :

الأب : قال ترقصين قال انتي لو رقصتي السليمانيه بيجيها زلزااال ؛؛ وان اكتشفوا اني ابوتس بيحسبوني ارهابي واني مسلطتس عليهم انتبهي وانا ابوتس تفكرين اصلاً بالرقص !!

8
88
888
8888

انوااااااع التحطيم

(( بدريه سميكه قصدي سمينه ولا تعرف ترقص من متانتها ))

وعندما نظر الأب الى عينين بدريه : >>> لقا البنت ناشفه بمكانها من الخرعه

ثمن قال الأب خطبته العصماء :

هذي اخرة التربيه ؟؟ هبلتن بي الله يهبلكن

لابارك الله فيكم

جبتوا لي الضغط !!!!

مهند : (( وهو حاط رظمه بالنبيطه ومنشنها على غزلان )) جبتوا لي الضعط ينطق الغين (( عين ))

الأب : انت ولا كلمه النتفه مدري لمين طالع فتيني

هنيدي : مبعااا اسكت اصلا عذلان هي اللي صكت الباب بوجهي وانا بفلقها بالنبيطه

غزلان : والله لا اعلم امي واعلمها انك انت اللي مطيح الستارة يوم تلعب بها طرزان

----------------------------------

وتنتهي هذه المعركه بغلق ابو مهند بيبان المقلط بالمفاتيح ؛؛ عشان محد يتفرج على دشّه

ومازال الجني ساكن بالنتفه مهند

نرجع لمحور حديثنا


---------------------------------


احححم

4- كثرة افلام الكرتون بالدشات ؛؛

ففي كل قناه فترتين لأفلام الكرتون صباحيه ومسائيه ؛؛ يعني لو عندك عربسات (( 22 قناة ))

22×2= 44 فلم كرتوني

هذا اذا ماعرضت القناه في كل فتره اكثر من 3 او 4 افلام كرتونيه ؛؛

عدا عن ذلك القنوات اللتي تبث 24 ساعه افلام كرتونيه

سبيس تون

ارتينز

قناة دزني

كرتون نت وورك

art الاطفال

ول ل ل ل ل ..........)) الخ

مما ادى لأطفالنا تنسيم عفوي من الدميجه يتخلل التنسيم طفرة من اللغه العربيه الفصحى

بيد ان شركه والت دزني (( يالله انك تجزاه كل خير )) تدارك الموضوع وترجم بعض افلامه للغه المصرية وفرح الاطفال المصريين بهذه التعويضات ؛؛

وصدرت شائعات بان الشركه المذكورة ستترجم افلامها الى اللهجات الخليجية

وتناقل الكثيرون هذه الشائعة رغبة منهم في سد التنسيم الظاهر على عقول اطفالهم ؛؛ ولكن الامل مربوط بقضية فلسطين

5- ايضا ظهور ظاهرة عجيبه يا اخوان واخوات

الا وهي : الاتصال على البرامج الغنائيه الهابطه وهذه الظاهر هي اللي خلت العالم يتعرفون علينا اكثر ويعرفون عقولنا النيّرة ((عقولنا الفاظيه )) والثقل والعبقريه ((السطحية والسخافه ))

6- القنوات الاخباريـــــــــــــــــــة اللي ما ابي اتكلم عنها ؛؛
مو لأني تعبت ل عشان ما نبي ندخل بالسياسه ؛؛ خبركم فيني اعرف اتكلم الماني


اتمنى انكم استمتعتم بورقه من مذكرات دش

ونلقاكم بمواضيع اخرى

وكــــــــــل عام وانتـــــــــم بخير قبل الزحمة


ودمتم سالميــــــــــــــن

اختكم / هيفاؤووه