رحلة إلى مدينة بينانج في ماليزيا

الرئيسية20112011/04 » رحلة إلى مدينة بينانج في ماليزيا


border=0border=0border=0

بسم الله الرحمن الرحيم
السلام عليكم ورحمة الله وبركاته border=0
وشسمه.. صباحكم ورد وكموّن وينسون.. ومساءكم ياسمين وحلبه وحلتيته.. border=0
<< مع تحيات أبو طلق للطبّ الشعبي ههههه border=0
أخباركم إن شاء الله تزقحون وكلش؟
والله لكم وحشه.. من زمان عن المواضيع وكذا.. border=0
واللياقة دمار والله.. جالس أمرّن أصابعي وأسمعها تطقطق.. والخنصر جاه شد عضلي ههههه border=0
أما البنصر مسوّي نواف التمياط.. جاه رباط صليبي.. border=0
المهم دهنتها بـ فقس وفازلين وغسلتها بزيت زيتون.. والحمدلله ألحين أحسن.. إلا أني كل ماجيت أكتب حرف يزلق أصبعي ع الحرف اللي جنبه.. لذلك (زرّ الدليت) أحسّه مشوّه وممسوح لأنه أكثر زرّ ضغطته اليوم هههههه.. border=0
.
وشسمه.. نحدثكم هذا الصباح من دولة ماليزيا الشقيقة وكما عودناكم سابقاً بنقل الأحداث المهمة.. والغير مهمة بعد.. لعلّ وعسى أن نفيدكم ونرسم البسمة على خششكم الشهباء المليئة بأنواع الكريمات اللماعة.. border=0
ولقد إنني إنقطعت الفترة الماضية لظروف خارجة عن الإرادة.. أختصرها بكلمة واحدة ألا وهي "نفسية"!!
لكن مهيب نفسيتي أنا.. إنها نفسية مديري الذي صار "ينفسن" علينا هالأهبل.. سحقاً له.. border=0
.
وشسمه.. الفترة الجاية بحاول أكتب تقارير عن الرحلات السابقة التي خضناها أنا وزملاء الغفلة أصدقاءي الرهيبين الكويسين.. وبحاول أجزءها عدة أجزاء نظراً لكثرة الصور وكذا.. وإن شاء الله أنها تعجبكم وكذا.. border=0

نبدأ اليوم بـ رحلة إلى مدينة بينانج في ماليزيا – الجزء الأول border=0
.
.
.

border=0

][مدخل][

ياهيه إلتفت لي واسمع ادعاي لك ياهيه..
ترى عادك بتشبع من البعد وتواجه..

دعيتك بصوت ياصلك ليه ماتوحيه..؟
وأنا اسمع ضلوعك من صدى الصوت لجاجه..

عليك الفؤاد اخلاجه مصمخ راعيه..
خف الله في راعيه ماتسمع اخلاجه..

ترى العفو قد جاك أوّله واغتنم تاليه..
وترى الحلم بحر غير لا تامن أمواجه..

وترى الود ليل مظلم جيت لك ساريه..
سراجه وصالك والجفى ينفخ اسراجه..

وترى قصرنا اللي كم سنه نجمع ونبنيه..
هوى العذل طيّح بابه العود وسياجه..

لي أيام مدري وين دارك ولا ادري ليه..
وانا خابر اني باب شفّك ومزلاجه..

border=0border=0

border=0

][التعريف بالمدينة][

border=0

* بينانج (بالإنجليزية: Penang‏) وهي ولاية ماليزية تحولت من أول محطة تجارية بريطانية في الشرق الأقصي عام 1786 إلي مدينة صاخبة تجمع بين الطابع الشرقي والطابع الغربي. ويبدو ذلك جليا للعيان من المباني التراثية التي تجاور المباني الحديثة المنتشرة في المدينة ونمط الحياة ، والمأكولات والعادات السائدة في أوساط السكان. أما George Town (جورج تاون) التي سميت على اسم الملك جورج الثالث البريطاني ......... ألخ..

أدري تقولون وش نبي بذا الخربطة.. لكن اللي يبي زيادة معلومات يشوف ويكيبيديا.. هذي مقدمة بالمختصر الغير مفيد!! border=0

* الزبدة.. تعرف بينانج (بجوهرة الشرق) اشتهرت بشواطئها المناسبة للرياضة المائية ومنتجعاتها ذات المواصفات العالمية والمنتشرة على طول الساحل حيث تمنح السائح كل الراحة والمتعة.

* من المعالم البارزة للمدينة:
- مسجد Kapitan Keling
- معبد Sri Mariamman
- حصن كورن واليس Cornwallis
- معبد Wat Chaiya Mangkalaram البوذي
- Penang Hill
- معبد Kek Lok Si
- مزرعة الفراشات
- حديقة بينانج Botanical Gardens
- معبد الثعابين
- حديقة الطيور

هذا بإختصار شديد.. بدون ما أجيب العيد.. border=0

border=0

][رحلة القدوم][

تم الحجز على طيران آسيا بحكم أنه طيران إقتصادي وهو الأرخص في آسيا..
Air Asia

border=0

حجزنا نحن 6 أشخاص على نفس الرحلة.. ورتبنا مع أحد شركات النقل تجهيز باص يكفي لـ 6 أشخاص.. يأخذنا جولة حول جزيرة بينانج..

border=0

border=0

][حجز الفندق][

تم حجز فندق - هوليدي إن - قبل الرحلة بأسبوعين.. وهو فندق معروف ورائع ونظيف وكويسّ وأسعاره مناسبة (أبوالوصف ياشيخ).. لكن أخطأنا بأننا حجزنا في البرج.. وليس المنتجع المقابل للبحر.. نظراً لفهاوة أحد أصدقاءي الذي تولّى عملية حجز السكن.. هداهـ الله ورعاه وصوّب خُطاه.. border=0
لذلك.. قمنا بتبديل الغرف إلى أخرى مطلّة على البحر من البرج.. مع دفع الفرق.. لكن في نفس البرج..

هذي صورة للممر المؤدي للغرفة..

border=0

صورة للغرفة مع أحد السرائر.. والستارة مصكرة نظراً لخصوصية الشعب السعودي وكذا..

border=0

صورة للتسريحة.. وواضح أننا نحب الترتيب وكذا يعني.. border=0

border=0

هذا الممر اللي يربط بين البرج والشاطئ.. وفيه صورة بتجي بعد شوي للشارع تذكروها زين.. border=0

border=0

صورة من الشباك للشاطئ الكويس.. وهذي في وقت العصر قبل الغروب..

border=0

وشسمه.. هذي الصورة على أذان المغرب.. جانا ضباب مفاجئ ومطر وكذا.. وواضحة الأنشطة والأسواق الليلية ولّعت اللمبات وبدو الشغل..

border=0

هذي صورة على الشاطئ.. توضح البحر والجلسات وعلى اليمين فيه المسبح..

border=0

وهذا المسبح الكويس اللي ما سبحنا فيه.. border=0

border=0

وهذا الشيف البطل.. تستأجره بالليلة ويشوي لك اللي تبي.. تابع لمطعم الفندق يعني..

border=0

الجلسات على إمتداد الثيـّل "الزرع يعني" والجو خوقاقي..

border=0

هذي دورات المياه وأنتو بكرامه.. ماتفرق معهم رجال مع حريم سوا سوا.. أنواع حومة التسبد.. قاتلهم الله!! border=0

border=0

وهذي الجلسات اللي بالأجار.. بفلوس يعني وإن ما خانتني الذاكرة أنها بالساعة..

border=0

هذا المطعم العربي اللي جنب الفندق.. كنا نفطر فيه.. وياكثرها المطاعم العربية على هالشارع وما تشتهر الا بالشيشه والكبسة والفول هههههه.. border=0

border=0

تذكرون الصورة اللي قلت لكم قبل شوي.. فوق الجسر.. هذي لقطتها من فوق الجسر.. مدري ليش عاجبتني.. border=0

border=0

طيبّ خلونا نطلع من الفندق وحوسته.. ونتمشى شوي.. border=0

border=0

][فاصل][

غياب بلا سبه هجاد بلا تنبيه..
وجفا أغلى العرب نار على الكبد وهاجه..

نضج قلبي من البعد وش حاجتك تكويه..
جفاك الجمر والصبر في بعدك الصاجه..

طبع حبك بقلبي والايام ما تمحيه..
هذا هجرك يحاول يموجه ولا ماجه..

يموت الأمل لكن ضنون الغلا تحييه..
وعروق الوفا بالروح والقلب وجاجه..

خبرتوا حدٍ يبكي على واحدٍ يبكيه..
وخبرتوا حدٍ مسجون مايبغي إفراجه..


أحبه ولا أبغضته على شيٍ إيسويه..
ولا زالت ارقاب الرجا فيه منعاجه..

border=0border=0

border=0

][التسوّق والغداء][

لقد إننا تمشّينا بعد ذلك في عدة أسواق ومولات.. ولم نجد أحداً يمنعنا ويقول لنا (لو سمحتوا عوايل عوايل).. ولا أحداً آخر يباغتنا ويقول (وين أهلكم؟) هل تصدقوا أنه لم يوقفنا أحدٌ ليقول (إثباتاتكم لو سمحتوا؟)!! border=0
الزبدة يعني تغدينا وتمشينا.. وفالأخير ما شرينا.. والأهم من هذا وهذا.. ولا أحد من خلق الله أذيـّـنا!!

border=0

border=0

border=0

border=0

][المسجد العائم][

كان لنا زيارة بعد ذلك إلى المسجد العائم.. وسبب تسميتة أنه مبني بجانب البحر وشكله من بعيد كالمبنى الذي يطفو فوق البحر..
بعض الصور له.. المسجد من الخارج..

border=0

من الداخل..

border=0

بعض الديكورات والتفاصيل والزخارف الإسلامية..

border=0

border=0

المسجد من الخارج..

border=0

المنارة والقبة..

border=0

ربعي يصلّون.. وتراني صوّرت ولحقت عليهم لا ينطّ لي أحد فـ حلدزي.. border=0

border=0

الله يتقبلها بس : ) border=0

border=0

][معبد الثعابين][

أول شي.. قولوا الحمدلله على نعمة الإسلام..
الحمدلله.. الحمدلله.. الحمدلله..
هذولا ناس خلصوا الآلهه عندهم وما بقى إلا الثعابين..
أشهد ألا إله إلا الله.. وأشهد أن محمد رسول الله..
border=0

خلونا ندخل ونشوف وش فيه جوّا..
المدخل الرئيسي..

border=0

صورة توضح وش فيه جوّا.. بالاضافة الى المحلات بجانب المعبد..

border=0

صورة أخرى للخزعبلات اللي بالداخل..

border=0

صورة أخيرة توضح الشخص اللي ساجد لإله الثعابين وهو عبارة عن تمثال..
وأيضاً سلحفاة خاشة غلط الظاهر..
ومكان للتصوير مع الثعابين..

border=0

وهذا هو الشيء اللي يعتقدون أنه إلههم.. والعياذ بالله..

border=0

وهذا للأخ اللطيف الكبير جداً.. لحقت أني أصورّ جزء منه.. border=0
سبحان من سوّاه بس..

border=0

هذي طبعاً مذكرات ما قبل الخروج.. border=0
والفاكهة اللي ع اليمين الأولى جوز الهند وشربنا منها العصير المحّمض..
والفاكهة الثانية اللي هي الدُريان.. رائحته كريهة وطعمة لذيذ.. حسب ما سمعت..
ولله الحمد لم أنل شرف ذواقته حتى الآن.. border=0

border=0

border=0

][شاهي العصر على البحر][

من أمتع الأشياء في مدينة بيننق والتي لا لها ذكرى لا تنسى.. تناول الشاهي على الشاطئ وقت العصرية.. border=0
وشسمه.. فلقد تناولنا أنا وربعي قدحين من الشاهي الأحمر وإستلذينا بطعمه المستساغ حتى تصحصحت رؤوسنا وتفتحت أدمغتنا المنغلقة.. آآآآهـ.. يا له من شاهي.. <أصلح حق دعايات وكذا؟؟ border=0

border=0

هذي واجهة جلستنا على البحر.. لكن الصورة خانتني وطالع البحر أبيض.. من زود الحيا يعني.. border=0

border=0

لقطة منوّعة للمكان المحيط..

border=0

ختاماً.. هذه الحمامة صديقتي في مدينة بيننق.. لقد إنني صوّرتها تسعطعش صورة.. وأصبحت كالفوتوغرافية وكذا.. وأهديها لكم لبى قلوبكم.. border=0 border=0

border=0

border=0

][مخرج][

عسى منزلٍ ضمّه حقوق الوسم تسقيه..
وتضحك له الدنيا وهو يضحك أحجاجه..

فقد خاطري شيٍ من الضيقه مسليه..
وغدت روحي من الناس والليل هجاجه..

أروح لمكان خابره ..خابره ياتيه..
أسوق القدم صوبه وهي مالها حاجه..

مكانٍ نزيهٍ وأوّل مواجهي له فيه..
وانا خابرٍ ما رجل مثله بدوّاجه..

لعل وعسى ما حدّني للمجي.. يدعيه..
وأشوفه وأنا ماودّي أسبب احراجه..

يحب الجريح آخر دروب اللقاء ويجيه..
وتحب القدم جية مكان أول مواجه..

border=0border=0

border=0

][خاتمة][

أتمنى أن يحوز الموضوع على رضاكم جميعاً.. وينال ذائقتكم..
وأعذروني إن كان هناك أي تقصير أو أخطاء..

سبحانك اللهم وبحمدك.. أشهد ألا إله إلا أنت.. أستغفرك وأتوب إليك..
اللهم إغفر للمسلمين والمسلمات.. الأحياء منهم والأموات.. وأغفر لجداتي وخالتي أم سلطان..
وأخلف لأخوي بندر خيراً مما فقده يارب العالمين..واللهم إشف أم مصعب شفاءاً لا يغادر سقماً.. وإجعل ما أصابها تكفيراً لها يوم القيامة..
اللهم آمين.. اللهم آمين.. اللهم آمين..

مدونة بدر الشوق:
http://www.b-alshoq.com/

إستمع للقرآن:
www.tvquran.com/

كتبه الفقير إلى عفو ربّه:
محبكم: باء نقطة شين..
بدر الشوق..
border=0 border=0

border=0border=0border=0


تابعوا جديد شبكة أبونواف على فيس بوك وتويتر

   

تابعوا جديد شبكة أبو نواف على:

التعليقات

  • 1
    _ (زائر)

    سلامو <<< اخلصي:~:~ مواضيعك مررررةجيدة استمر ونبغا مواضيع احلا واجمل استمر . . استمر . .استمر . . انت فلة شمعة منورة<< مدري ليش حسيتها بايخة

  • 2
    شماليه (زائر)

    رحله تهبل , يالبى ماليزيا بس متى يجي عريس الغفله ويودينن له بس فيه ملاحظه اخ بدر , ودي لو انك مكبر الصور بدال ما تجمع اربع بصوره وحده باين الصور حلوه وحرام تحشرها عند الله سعه هههههههههههههههههههههههههه

  • 3
    3iat-tndmal (زائر)

    مااا شاء الله شكل الرحله كااانت رهيييبه ننتظر المزيد جد جد يزاااك الله خير اخوي ... يعجبني طرحك كل مره لا تحرمنااا من جديدك ^^

  • 4
    Lotus (زائر)

    من جد صور حلوة..يعطيك العافية أخوي فعلاً مدينة جنااااااان وطبيعتها خيال..بس للأسف ماجلست فيها إلا 4 أيام..بس حبيتها كثيييير.. أنواع الروقان فيها.. من جد تصوير بطل.. لاتحرمنا جديدك أخوي وتقبل الـكومنتوالمرور:)

  • السلام عليكم ورحمة الله وبركاته بداية ،، الحمد لله على السلامة و عودا حميدا يا ابو شوق ! تقرير ممتاز ،، ينقصه فقط بعض التفاصيل التي لا تجدها الا في تقارير الأخت الفاضلة ( نور الشمس ) حيث تصف لك الرحلة وكأنك انت الذي سافرت وتتذكر رحلتك ! وهذه موهبة ولكن امرها سهل ،، أتمنى تطلع على احد تقاريرها المفصلة يعني : تجي تقول لي هذي جلسات ( اظنها) بالساعه .. وتمشي ! لا ! ما ينفع كذا :) نبا التفاصيل وتفاصيل التفاصيل ! خل امورك الخاصه ،، او ما تراه من الخصوصيات ، لكن اسعار الفنادق والتذاكر والتنقلات وملاحظات اخرى ... هذي لابد منها وجرب ،، لو جربت مره وحده تكتب مذكرات من تطلع من المطار الى ان ترجع بالساعة ( الوقت ) وبالتفاصيل المالية ) لا تقول لي مانا فاضي لك 8) طيب نجي نخرّم في المفيد على ما قالوا اخوانا في مصر وهي ملاحظة اكتبها لك ولغيرك : لنستفيد (و هذا حق لك علينا نحن القراء ) ان ننصح ولو لا اني اتوقع ان يقع في هذا غيرك ،، لكتبت لك الملاحظة با الإيميل ! الملاحظه هي : ما يهم تزور معابد والا غيره ما دام الواحد عارف دينه و حامد الله على نعمة الإسلام ! وليست ملاحظتي انك كتبت معابد كثيرة مقابل مسجد واحد :) لا ليست هذي الملاحظة ولكن ان تكتب في سجل زياراتهم مثل اللي كتبت !!!B فهذه صعبه ... أقول لك ليش .. ترى والله ما هو تعاطف معهم ولكن ،، تذكر انهم يقدرون يجيبونك خلال ساعات ! من الفندق وتروح في استجواب يفسد عليك الرحلة ! وحتى لا تقول سليمان يبالغ اقول لك موقف : في احد السنوات عاد شخص للسعودية بتابوت ! مقتول ! السبب انه تكلم بكلام عن بوذا في بلد آسيوي ! فكثر السب المتبادل ، وترصدوا له فقتل !!! ( الله يبعد عنا وعنكم كل شر ) واختم بهذه الآية : {وَلاَ تَسُبُّواْ الَّذِينَ يَدْعُونَ مِن دُونِ اللّهِ فَيَسُبُّواْ اللّهَ عَدْواً بِغَيْرِ عِلْمٍ كَذَلِكَ زَيَّنَّا لِكُلِّ أُمَّةٍ عَمَلَهُمْ ثُمَّ إِلَى رَبِّهِم مَّرْجِعُهُمْ فَيُنَبِّئُهُم بِمَا كَانُواْ يَعْمَلُونَ }الأنعام108 بقية التقرير روعه ،، خاصة الأبيات ( تسلم ذائقتك ) حفظك الله وبارك في عمرك ،، وما تؤاخذني على الملاحظة ,, من غلاك يا بدر !:)

  • نسيت اقول لك يا اخ بدر ( كل هالهذر ونسيت ) :o تمنيت ان تذكر اسم شاعر القصيدة حتى ولو كانت لشاعر بحجم ( محمد ابن فطيس المري ) ! للتوثيق شكرا اتمنى دمج هذا مع التعليق الأول

  • 7
    حنونة (زائر)

    الصور حلوة كتير والتعليق اروع وابيات الشعر كتير حلوة تسلم ايديك

  • اولاً الحمدالله على سلامتكم ثانياً مشكور على تقريرك ثالثاً انا رحت شهر العسل لماليزيا قبل 3 سنوات ومن اسوء مافي هالرحله هالمدينه وهالفندق اول ما وصلت ومعي الفيوتشر وكنت حاجز بالبرج وجيت متأخر بالليل لأن رحلتي كانت من مدينه لنكاوي لبينانق يوم وصلت للفندق عطوني غرفه غير الحجز الي انا طالبه بالفيوتشر وتهاوشت معهم :( وقالو ما عندنا الا هالغرفه تبي والا ادفع فرق على البحر لأن الغرفه الي انا طالبها معطينها واحد غيري وبعد مشادات معهم جهزولي غرفه ثانيه نفس ما ابي ماليزيا بعد ما صاروا السعودين ينكبون عليها قاموا يستغلون وانا اشوف هالفندق خدمتهم سيئه على ما سمعت شنقريلاا افضل بكثير واغلى واحلى مافي ماليزيا لنكااااااوي تحياتي

  • 9
    aaboturki (زائر)

    الرحلة جميلة وتعليقاتك زادتها جمال لكن تبي الصدق أنا (خقيت) مع أبيات الشعر أكثر من الصور والتعليق لمن هالقصيدة الراااااائعة؟ انتظر ردك تكفى بأسرع وقت

  • 10
    7ammod (زائر)

    اوما حمامة .. هذا طير المينا ..

  • 11
    صورة حلا

    عاد يازين ذكرياتكم وانتو طالعين لو قروها ماخلوكم تطلعون خخخخخخخخ:$

  • 13
    نونا نور (زائر)

    مكان جميل وصور اجمل اتمنى انك تكون استمتعت بالرحله وتفضل ذكريات جميله ومشكور لانك اعطيتنا احساس كاننا في الرحله

  • 14
    المهندس فارس (زائر)

    موضوعك جميل بس انت شكلك الامام الدبي وقال أنا الي بصور اما ما أذيتم أحد من خلق الله هذي كثر منها كثر الله من امثالك تحياتي ودمتم بود

  • 15
    طير حوران (زائر)

    :o:o:o روووووووعة يابدوري الله يعطيك العافية وعاش من شاف وقرأ ايميلاتك والحمد لله على السلامه

  • 16
    Full Moon (زائر)

    والله اني وش اسمه اني ما اداني اشوف اي تقرير مصور لأني بصراحة مليت من كثرها عسى ما راح واحد قرنه ( اقصد مكان يعني ) إلا وترزز لنا باللي صوره وأم الملاقه يعني كذا .... لكن انت يا بدر الشوق يا سلام عليك كلام كبيييير وأقدع القدعان يعني والله اني اصفق لك على طرحك الحلو يعني والله اني ضحكت على طريقة تعليقك على الصور ممتع وحلو مرررررة وشسمه هااااااااااااااااي سلام لك يا صاحبي وللأمام

  • 17
    خالد القحطاني (زائر)

    الله يسعد قلبك كل موضوعاتك مميزه ولا اعجبني زياده وخلاني اضحك الا تعليقك بالدفتر ماعندكم ماعند جدتي مزنه هههههههههه الله يسعدك دنيا ودين

  • 18
    شقطلالام (زائر)

    .. تقرير بطل و كذا :o صور جميله و كذا :o ماليزيا شي ولله و كذا :o السؤال اخي الكريم كم مرة قلت ( و كذا ) في الموضوع :o

  • 19
    S.AL-OTAIBI (زائر)

    ههههههههههههههههه اما كاتب لهم ماعندكم ماعند جدتي ولا مسوي تمويه هههههههههههه

  • 20
    nejjara11 من ال... (زائر)

    الله يعطيك الصحة على هالرحلة لماليزيا و تعليقاتك المرحة على الصور خلال تجولك بالمنطقة...بس تمتعنا شويا بصحبة موضوعك هدا.

  • 21
    ابو خلــــود (زائر)

    مشاء الله عليك اهنيك على الاسلوب الاكثر من رائع ولكن اعجبني وبشدة كلمة خلصو الالهة ههههههه خوقاااااااااااااااااااااااااااااااااااااااااااااااقي

  • 22
    معلم المع (زائر)

    صور جميلة وتعليق اجمل وخفيف دم مثل الشاي حقكم وكذا

  • 23
    وجدان (زائر)

    رحلة جميلة كما يبدو من الصور و الاجمل تعليقاتك الخنفشارية...هههههههه عموما السفر فن, يعني في ناس تروح اوروبا و ماليزيا لكن كانها في ربوع السعودية يبحثون عن الكبسة و المضاغيط و الشيشة و الحريم مولات و الاطفال مع الشغالات زيارة المعابد, المساجد, المعالم الاثرية , التأمل يضفي على السياحة شيء من الروحانية و المتعة اعجبتني قبة المسجد و الجلسة الراقية و النظافة و الترتيب حكايييية thanks bddr elshog

  • 24
    الاسياح (زائر)

    بسم الله الرحمن الرحيم الصراحه صور جونآآآآآن مرررره المهم كم تكلفة الرحلة من اول شي الى اخر شي يعني من اول ماطلعت من بيتكم الى دخلتك كم تتوقع رد تكفى

  • السلام عليكم الأخت: ---- ان شاء الله بستمر.. بس اموت واعرف وش يعني: فلة شمعة منوّرة؟ اشوف العالم هابّين فيها ومدري وش السالفه خخخخ حياتس الله خيتي..

  • شماليه هلا وسهلا جدتي والله كان ودّي لكن عدد الصور لازم يكون معقول.. والعاده الموضوع يحتوي 30-40 صورة.. تقريباً.. ولو زودت على كذا بيكون بطء ف التصفح بالنسبة للاعضاء اللي اتصالهم مخيس <مثلي مثلاً هع لكن ان شاء الله بحاول اجمع الصور الزينه اللي ما توفّقت ف تنزيلها لأي سبب من الاسباب.. وانزلها مع بعض في موضوع خاص.. شكراً لمرورتس العطر وحياتس الله, . . عيت تندمل.. شكراً لحضورك, ويعطيك الف عافيه وان شاء الله القادم اجمل وافضل.. لاهنتِ.. . . لوتس.. انا نفس الشي جلست فيها 4 ايام لكن حللت والديها وما بقيت مكان مارحت له هع.. الله يعوضك بأحسن منها في اقرب وقت ان شاء الله.. عافاتس ربي,

  • هلا وسهلا بالأستاذ الكبير سليمان الذويخ.. نوّرت الموضوع والله, اول شي بخصوص التفاصيل, للأسف الشديد اني الذاكرة عندي موش تمام.. يعني اكثر واحد ينسى فالعالم انا.. ولو تقول سجل يوميات وكذا, حاولت اسويها في المدونه والى الآن احاول استمر واحاول اخليها بشكل شبه يومي.. اما بالنسبة للاسعار فـ هي متغيره من مكان للثاني ومن وقت للثاني, الفنادق على سبيل المثال ما تثبت, اسعار الانشطة البحرية مثلاً متغيره من شاطئ للثاني.. صعب تحصرها.. حتى الجلسات تتغير لأنها تابعه للفندق وطبيعي ترتفع وتنزل, وفي الحقيقه مدري كم السعر لأني ما سألت.. اما بخصوص المعبد وزيارتنا له, كان الهدف منها اولاً واخيراً رؤية العالم.. عادات وتقاليد وعبادات, الحمدلله الواحد على قدر كبير من الايمان بالله وان شاء الله اننا كذلك.. لكن الهدف الثاني نشر الوعي في مجتمعنا وان هذولا يعبدون كذا وكذا وهالشي خطأ وشوفوا تفكيرهم كيف وصل؟ اما بخصوص السبّ وكذا.. متأكد ان كلامك وقصتك صحيحة لكن انا ما سبّيت إلههم المدّعى.. او ذكرته بالاسم مثلاً.. حاولت يكون التعليق بشكل عام, وما ظن فيه مترجم بيفهم بهالسرعه وش يعني ماعندكم ماعند جدتي.!! خصوصاً أنها متداولة ك لغة تقليدية وليست فصحى.. لكن على كل الاحوال اشكرك جزيل الشكر استاذي الغالي على مرورك ونصايحك وردك .. وبالعكس انبسطت كثير والله.. وانبسط لما تجيني النصايح والتوجيهات, وممكن الانسان يغلط والخطأ وارد .. والانسان مثل البشر مره يكون آدمي ومرات يعيش هيومن.. شكراً لك بحجم السماء.. شرفت ونورت الموضوع.. عافاك المولى :) (F)

  • اخوي سليمان.. بالنسبة لإسم الشاعر سقط سهواً.. لكن في الجزء الثاني تلافيت هالزلة.. شكراً لعودتك استاذي, . . حنونه مرورك الاحلى والاروع.. عافاك ربي خيتوو. . . العزيز ابو عبدالله بخصوص فندق شنقريلا او غيره.. فيه فنادق كثيرة افضل من هوليدي ان.. لكن طلعتنا كانت شبابيه عزابية.. لذلك يهمنا تكون اقتصادية وممتعه قدر الامكان, وفندق الهوليدي ان لما رحنا له كان على قدر كبير من النظافة والروعة, ممكن انهم استغلاليين في معظم الاحوال,, والفنادق بشكل عام طبعهم كذا.. ولو رجعت لهالمدينه مره ثانيه ماراح اسكن في نفس الفندق.. لأني شفت الفنادق هناك وعرفت الكويس منها والبايخ, وفندق بارك رويال كان رهيب.. وهارد روك أيضاً.. لكن يعيبهم السعر فقط.. شكراً لحضورك وردّك.. والله يوفقك في حياتك الزوجية.. امين. . . ابو تركي.. القصيدة ل الشاعر محمد بن فطيس ويكفيني حضورك وردّك استاذي, . . حمود.. خخخخ مدري وش اسمها بالضبط لكن المتداول بيننا حمامه.. وللأسف الشديد مالي خبره فالطيور مثلك ماشاء الله, . . حلا هههههههه من جدّ.. بس أحسها شي حلو الذكريات, يمكن لو رجعوا بعد كم سنه يحصلون نفس الذكريات.. من جد شعور روعه, . . أبو لمى.. الله يسلمك عافاك ربي . . نونا نور الله يعافيتس خيتو والحمدلله اذا قدرت اوصل لكم هالاحساس.. والله يرزقكم بسفرة احسن منها.. قولي امين, شكرا لمرورتس العذب. . . الباش مهندس فارس.. هههههههه وش دعوه ياخوي!! ان شاء الله اننا ما أذينا أحد.. وحتى لو كنت الامام الدبّي.. ما ظن فيها شي هع.. . .

  • طير حوران الله يسلمك قلبك.. ويعطيك الف عافيه والله.. وشكرا على مرورك العذب,, استمتعت بحضورك.. . . فل موون.. شهادة اعتز وافتخر بها.. وكلامك شي يفرحني الصراحة.. اني قدرت اطلع عن المألوف.. واسوي شي افضل.. والحمدلله رب العالمين, شاكر لك ومقدر مرورك العذب.. وعافاك المولى . . خالد القحطاني الله يسعد ايامك حبيبي.. شكراً لك على مرورك العذب, وعافاك ربي استاذي, . . شقطلالام ذكرت كلمة وكذا أكثر من عدد زوار الموضوع خخخخخ شكراً لمرورك.. . . أس. العتيبي.. وسع صدرك يارجال ههههه الحمدلله انهم مافهموها.. ولا كان علوم هع . . نيجارا حدعش.. الله يعافي قلبك.. والحمدلله دام استمتعتوا فيه.. واتمنى اني اقدم الافضل دايماً.. شكراً لمرورك العذب, . . ابو خلوّد.. الحمدلله على نعمة الاسلام بس.. والعقل نعمه وانا اخوك, شكراً لمرورك الرائع استاذي.. وعافاك ربيّ.. . . معلم ألمع من ذوقك استاذي.. وان شاء الله تذوقه وتذوق اللي افضل منه شكراً لمرورك الجميل.. عافاك الرحمن.. . . وجدان.. فعلاً صدقتي.. فيه ناس تروح عشان تستكشف شي جديد, وناس تروح عشان تسوّي نفس اللي كانت تسوّيه ف ديرتها.. وتحاول ما تطلع منه ابداً.. كأنه حرام التجربه والتجديد.. لكن الهدف الاساسي بالنسبة لي من جميع السفرات هو استكشاف اي شي جديد وتجربة المثير منه.. شكراً لحضورتس العذب.. وعافاتس المولى.. . . الاسياح هلا بك اخوي مقدر اعطيك سعر محدد لأن الرحلة كانت جماعيه وشبابيه وانطلاقاً من كوالالمبور في ماليزيا الى بينانج.. التذاكر تقريباً على الشخص 350ريال ذهاب وعودة السكن على الشخص 125 الليله الألعاب تقريباً 150 خمس ألعاب.. المشتريات والطعام مقدر احددها لأنها تختلف حسب المطاعم اللي تبغاها.. أتمنى أكون أفدتك قدر الامكان.. وشكراً لمرورك استاذي, . . شكراً للجميع.. اعضاء وزوار وكلش.. عافاكم ربي.. الجزء الثاني: http://www.abunawaf.com/post-10630.html .

  • تطوير: SharedTech